شعر موسى الخليفي

[كربلائي]

ثلج
شعر موسى الخليفي


صـهـرت الـحرف كـونته جـعـلته سـاحر وفنان

رسمت الكلمه إللي تكونت من بعض تكويني

عشقت الحرف ليش إنه يصور صرخه الإنسان

وأنا صرخه بصدر الشوق وشوقك ما يكفيني

قبل لا ترسم البسمه حياتي.. قول أنا ولهان

تكلم جسد الإحساس في عينك وفي عيني

هلا وشلونك وكيفك..ترى ما تحرك الأشجان

أنـا مـحتـاج لأشـواقك..تفجر كل ما فيني

برودك عاش في دمي..قصيده ما لها عنوان

سكوتك يبتدي عندي وصمتك صار ينهيني

تحرك يا جبل من ثلج..إصرخ قول أنا عشقان

لصوتك..أو قصيده حب..أو هجران يكويني

قصيدي ينتهي عندك..إذا شافك بلا وجدان

ولا إحساس ينعشني..ولا كلمه تدفيني

شعورك لغز حيرني..وحـولني إلـى بركـان

تكلم قول أنا مابيك..قطّع كل شراييني

شياطين القصيده تشتكي للجمر للنيران

وكل الصمت حطمهم وماتوا كل شياطيني

أنا خطيت بحروفي قصيده إسمها..الحرمان

يموت الحرف يحيا الحرف وأنا موتي بسكيني

مع التحيات عاشق الذيب