مساء الورد والرياحين
بداية أشكر غاليتي زهورالريف لهذه الدعوه الرائعه
شكرا لك
أعادك الله على هذا الشهر المبارك كل سنه بخير وسلامه
1 - كم كان عمرك أول ما قرقعت ؟ و متى توقفت عن القرقيعان ؟
تقريبا من عمر سبع سنوات
2 - مع من كنت تقرقع ؟
مع خواتي ولازم أخواني
3 - ما هي خطتك اللي كنت تتبعها في القرقيعان ،، من تطلع من البيت إلى أن ترجع ؟
كنا انا وخواتي وأخواني نأخذ كيس القرقيعان ونذهب الى المنازل المجاوره ويكونوا الناس بانتظار وصول الاطفال للقرقيعان ومجهزين لنا الكثير
4 - هل كنت تلبس ملابس خاصة في القرقيعان ؟ و لاّ تلبس أي شي ؟
يوم كنا صغار كان اهم شي نلبس البخنق ولمن شوي كبرنا كنا نلبس ملابس القرقيعان
5 - موقف صار لك في القرقيعان و لا يمكن أن تنساه ؟
صحيح كنت صغيره جدا يومها عطتني وحده من نساء الجيران فلوس قالت يما عذريني مارحت السوق أشتري قرقيعان وانا وقتها بكيت قلت لها مابي فلوس أبي حلاو
6 - ما هو القرقيعان المفضل بالنسبة لك ؟؟ ( ربيان ، بسكوت ، مكسرات ...إلخ ) ؟
القرقيعان حلو ( سبال بقشور ، الجوز ، حلاو الملون ، وحلاو مشكل)
7 - شنهي ردة فعلك لمّا تروح بيت ،، و ما يعطونك قرقيعان ؟
ماكنت اهتم لان الكيس مليان ونروح بيت ثاني
8 - شنو يوزعون بيتكم في القرقيعان عادةً ؟
يوزعون الكثير من المكسرات والحلاو والشيكولاته
9 - الكثير من الأطفال كانوا يفطرون يوم القرقيعان بحجة التعب والعطش .. فهل سويتها ؟
لا أبدا لان كنا نروح نقرقع بعد الافطار
10 - بعض اللي يقرقعون يروحون ويجوون على البيت الواحد أكثر من مرة ؟
لا باليوم مره وحده نروح لكل بيت لكن على 3 ايام لذا يتم تكرار البيت
فما رآيك في هذي الحركة ؟ و هل كنت تسويها ؟
11 - بعض اللي يقرقعون ،، يجيك و يقول عطوني قرقيعان لأخوي أو أختي ..
و لما تقول له وينه ؟ ليش ما يجي يقرقع معاك ؟
يقول لك : هو في البيت ،، ما يقدر يقرقع ،، أصلاً توّه صغير ما بعد حتى يمشي !!
فما رأيك في هذي الحركة ؟ و هل سويتها ؟
لا ماحصلت معي
12 - كم كانت حصيلة القرقيعان اللي تجمعها عادةً ؟ و شنو تسوي فيها ؟
الكثير والكثير .. كنا نرجع البيت ونقوم بعمل شاق أضع المكسرات بكيس والحلويات بكيس وكانت الحلويات تكفي لشهر كامل من كثرها
13 - هل يتعرض قرقيعانك لأي اعتداءات أو سرقات سواء في الخارج أو في المنزل ؟
لا بس كنا نتبادل مرات بين بيعض انا وخواتي حسب كل وحده شنو تحب من الحلويات
14 - هل تتمنى يرجع بك الزمن إلى الوراء ..عشان تقرقع ؟ .. وشنو اللي ودّك تسوّيه لو قرقعت ؟
أتمنى ان تعود ... لكن مازلنا نقرقع لكن بالبيت ههه بينا وبين بعض
15 - مالدور الذي تقوم به في القرقيعان حالياً ؟
أعمل قرقيعان وأحصل ايضا عليه
16 - هل تؤيد خروج البعض من الأولاد الكبار ،، أو البنات الكبيرات ،، للقرقيعان ؟
لا أبدا لا أؤيد هذا الشيء
من ناحية أخرى لا أؤيد خروج البنات والاولاد الصغار لوحدهم الدنيا ليس فيها أمان أبدا
17 - هل ترى بأن هناك عادات جديدة دخلت في قرقيعان اليوم ..و هل هي إيجابية أم سلبية من وجهة نظرك ؟
نعم للاسف دخلت عادات جديده وأجدها سلبيه جدا
لان القرقيعان كان بالسابق بسيط ومتنوع وجميل لكن الان مبالغ فيه وفيه اسراف كبير حيث يتم التنافس بكيفية العرض وكذلك حتى الحلويات تكون غالية الثمن والخ
حلاو القرقيعان يجب ان يكون مثل السابق وحتى بكيفية التوزيع
شكرا جزيلا لك عزيزتي
الله يعطيك العافيه
دمت بود
