السلام عليكم ورحمة الله وبركاته نتقدم الى اعضاء منتدانا بالتهاني والتبريكات بمناسبة مولد كريم اهل البيت عليهم السلام وبمناسبة القرقيعان اعاده الله علينا باليمن والبركات واشكر اختي زهور الريف على الدعوه وان شاء الله نستمتع معاكم في هالجولة وعلى بركة الله ابدأ 1 - كم كان عمرك أول ما قرقعت ؟ و متى توقفت عن القرقيعان ؟ عمري في بداية القرقيعان كان عمري ست سنوات ومع تقدم العمر توقفت عن القرقيعان في صف اول ثانوي طبعا اقصد القرقيعان الحقيقي( الحواسه بالاكياس والاصوات المرتفعه) اما الان فأخرج مع الشباب ونتفرج على القرقيعان وناخذ نصيبنا بعد من الربيان والبليله والحركات هذي... 2 - مع من كنت تقرقع ؟ مع الاصدقاء المقربين اكثر شي ومع اخوي الكبير 3 - ما هي خطتك اللي كنت تتبعها في القرقيعان ،، من تطلع من البيت إلى أن ترجع ؟ طبعا كنا نجهز قبل القرقيعان بأيام وماتظل كيسة الا ونجيبها كنا نطلع من البيت في الراشديه ونمر على الجيران وبعدها على بيوت الاهل الى ان نخلص بيوت الراشديه وبعدها نتجه الى الشرقيه(الديره) ونشخلها شخال طبعا ومايبقى فريج الا ونمر فيه ومايبقى داعوس الا تحصلونا فيه وبعدها لابد أخذ قسط من الراحه لان القرقيعان كان قبل في النهار وكانت الشمس حارة جدا لان كنا نروح ونجي مشي طبعا ماكو سيارة ولاسيكل ابد وبعدها الى جبله الحبيبه طبعا جبله قبل مهب مثل الان فيه صيد ثمين نخلصها ونرجع بالغنائم الى ديارنا مباشره . وهذا باختصار المسيره من الخروج الى الرجوع. 4 - هل كنت تلبس ملابس خاصة في القرقيعان ؟ و لاّ تلبس أي شي ؟ في القديم كنا نلبس اي شي كنا نفكر في القريقعان وومشاركة الاصدقاء وطبعا الغياب عن المدرسه هذا اهم شي 5 - موقف صار لك في القرقيعان و لا يمكن أن تنساه ؟ في احد الشباب ويوم كنا في عمر ال9 سنوات تقريبا كنا نقرقع واحنا صايمين يعني الجماعه شديدين يحوسون ويقرقعون وحنا صايمين المهم مع الحواسه والتقرقع ومن التعب قلنا خلونا نرتاح اشوي وجلسنا جمب برادة ماي وصرنا نتفقد بعض وين فلان ووين فلان صار في واحد ناقص دورناه دورناه وطبعا كنا صايمين حصلنا الرجال جالس في زاويه ومسكين من التعب شري ماي وفطر بس بصراحه ماينلام لان كنا نلطلع بالساعات ومشي وشمس وهذره 6 - ما هو القرقيعان المفضل بالنسبة لك ؟؟ ( ربيان ، بسكوت ، مكسرات ...إلخ ) ؟ الربيان والبسكوت 7 - شنهي ردة فعلك لمّا تروح بيت ،، و ما يعطونك قرقيعان ؟ قبل كنت اتضايق لاني اشوفه فرحه للجميع حتى لاصحاب البيوت نفسهم وطبعا نشيل عليهم شيله لما ما يعطونا قرقيعان 8 - شنو يوزعون بيتكم في القرقيعان عادةً ؟ كأي بيت ربيان وبعض الاحيان مكسرات 9 - الكثير من الأطفال كانوا يفطرون يوم القرقيعان بحجة التعب والعطش .. فهل سويتها ؟ انا ولله الحمد ماسويتها 10 - بعض اللي يقرقعون يروحون ويجوون على البيت الواحد أكثر من مرة ؟ فما رآيك في هذي الحركة ؟ و هل كنت تسويها ؟ القرقيعان فرحة لدى البعض وسباق لدى الاخر وطمع بعض الاحيان لدى البعض الاخر ولكنها تبقى براءة الطفولة فأنا لا أجد فيها اي شي بس ولله الحمد مامره سويتها 11 - بعض اللي يقرقعون ،، يجيك و يقول عطوني قرقيعان لأخوي أو أختي .. و لما تقول له وينه ؟ ليش ما يجي يقرقع معاك ؟ يقول لك : هو في البيت ،، ما يقدر يقرقع ،، أصلاً توّه صغير ما بعد حتى يمشي !! فما رأيك في هذي الحركة ؟ و هل سويتها ؟ الولد مسكين يبقى ياخذ مره ومرتين وثلاث لانه عاجبه قرقيعانك ومهب عارف شلون يقولها فمايحصل الا هالسبب عاد انت خلك ذكي واختصرها وعطه اللي يبقى ويمكن يكون كلامه صحيح اذكر سويتها مره وحده لان بصراحه كان في احد البيوت يوزع قريقعان رهيييييب حده وقلنا مالنا الا هالعذر عشان ناخذ مره ثانيه 12 - كم كانت حصيلة القرقيعان اللي تجمعها عادةً ؟ و شنو تسوي فيها ؟ كانت اكياس من الربيان والبسكوت والعصائر والمزازت كنت اكلها من نص رمضان ولا تخلص الا في ذي القعده 13 - هل يتعرض قرقيعانك لأي اعتداءات أو سرقات سواء في الخارج أو في المنزل ؟ في الخارج لابد منه في الداخل لا لان نظامنا جيب اللي عندك ونثرها مع قرقيعان اخوانك كلهم 14 - هل تتمنى يرجع بك الزمن إلى الوراء ..عشان تقرقع ؟ .. وشنو اللي ودّك تسوّيه لو قرقعت ؟ اي والله ودي يرجع الزمان بكشخ احلى كشخه وبقرقع لاني وانا صغير ماخذت راحتي في كشخة القرقيعان 15 - مالدور الذي تقوم به في القرقيعان حالياً ؟ اما اني اوزع القرقيعان على الاطفال . او اني احوس بواحد من الاطفال . 16 - هل تؤيد خروج البعض من الأولاد الكبار ،، أو البنات الكبيرات ،، للقرقيعان ؟ اكيد بكل تأكيد لانه فرحة للجميع بلا استثناء وانا البارح كنت اقرقع وانا كبير . 17 - هل ترى بأن هناك عادات جديدة دخلت في قرقيعان اليوم ..و هل هي إيجابية أم سلبية من وجهة نظرك ؟ نعم هناك امور دخلت على القرقيعان وانا اعتبرها سلبيه جدا اهمها: ماكنا نشاهد الاطفال يسيرون على الاقدام وتتعالى الاصوات بل صرنا نشاهد توصيل الطلبات للمنازل والواحد يوقف بسيارته ويجيه القرقيعان لمحله وهذا كنسل فكرة القرقيعان اصلا خير شر واخيرا اتمنى اني كنت ظيف خفيف الظل عليكم جميعا والشكر مرة اخرى للاخت زهور الريف ومتباركين بالمولد الشريف