[سكون الصمت]

قالت يزوي واهي تدافع عن صديقتها: تراه غلطان، ولجين ذبحيها وقتليها ولا احد يجذب عليها، تكررره شي اسمه جذب ونفاق! ومن بعد ما صار هالشي ولا مرة بحياتها يابت طاريه، وتقول لو شيصير ما ابا اتحجى عنه! ولا تسوون لي حركااات وسوالف حب ومدري شنو! عمرري ما بتقبل هالانسان ولا احد يقول لي ما حب الا بعد كراهية، لان اذا في انسان احتقره بهالدنيا اهو ولد خالج!
قالت علياء باندفاع: قووية عااد تحتقر اخووي ! الف وحدة غيرها تتمنى اخوي، ماله داعي هالحجي ...
سكتت يزوي وما ردت، طالعتها علياء: دنيا دوارة صدق، جوفي وين كنتو ووين صرتوا .. والا من يصدق إن جواد يحب صديقة يزوي! ومو أي صديقة .. الروح بالروح!
تنهدت يزوي: هاي الدنيا ... انا ما بيدي شي، يصطفل اهو وياها!
قالت علياء: الحين لا تحاتين ولا تفكرين فيهم، اهم شي تريحين نفسيتش ليوم الزواج ..
ابتسمت يزوي: ما اتخيل اصلاً ان انا بتزوج، وبفارق اهلي !
ابتسمت علياء: صحي ما قلتين وين بتسافرون انتي وسلطان ؟
يزوي: بنسير إيطاليا سبوعين، وسويسرا أسبوعين، وبعدين ما ادري وين بنسير اسبوع احتمال الهند.. آخر شي بنرد الإمارات
علياء بتساؤل: وبتستقرون هناك ؟
قالت يزوي: اكيييد ! سلطان لو لف العالم كله، مرده للإمارات، على قولته أنا أنفاسي هالديرة، ما اقدر اودرها
وكملت يزوي: أبوية بعد اكا يخطط للرجعة ...
طالعتها علياء باهتمام: رجعة شنو ؟
يزوي: بيرجع يستقر في الامارات ..
حست بعوار في قلبها، قالت علياء: لا تقولين !! ما اتخيل !! من صدقش ؟
هزت راسها: هييه! توه امس يقول، خلال سنة بيضبط كل امووره وبيرجع الامارات ..
قالت علياء بحزن: ما اتخيل يمر يوم الجمعة وما اجوف عمتي ناني !! والا اتهاوش ويا امي ردتي من الكلية وما اروح بيت عمتي! بتضيعوني !! شهالقرار اللي ما له داعي
يزوي: هههههههه تقولين لي! قولي لأبوي ... وايد قرارات هالأيام متخذينها بيتنا ..
علياء: شلون ؟
يزوي: يالسة أحن على راس أمي تخطب مهروو إلى يوسف ..
ضحكت علياء: ويوسف شرايه ؟!
قالت يزوي بنرفزة: افففف هالانسان بارد! ولا هامنه شي تصوري !! يقول عاادي اخطبوا لي اللي تبون!! كلشي عاادي عنده
علياء: ههههههههه يوسف حبوب ! اصلاً سعيدة اللي بتاخذه ..
يزوي: شرايج اقول لأماية تخطبج له ؟
طالعتها علياء: ومهروووه ! تبين تجتلينها على قولتش ؟! ههههههه
يزوي: هههههههههههه، اماية تقول ما يهل هلال ربيع السنة الياية، الا ويساف خاطب وسيفان معرس ... تقوله بخطب لك من الحين إماراتية، عشان اذا سرنا نعرسك على طوول
دق قلبها وسكتت واهي تسمع، وكملت يزوي: وسيفاان يقولها في عيد البش! في عيد البطيخ! انا شاكة فيه مسوود الويه .. احس انه يرمس وحدة بالتلفون! بس ماني قادرة اصيده!
ضحكت علياء بخفة، وتمت ساكتة ... قالت يزوي: لا عن جد والله، طريقة كلامه بالتلفون تبين انه يكلم بنت مستحيل يكون ولد ..
علياء: جان سألتيه لاه !
يزوي: وانا عبالج سكت ؟ سألته بس ماشي فايدة .. يقول لي هزااع، او منصور او مدري منوو ! الجذاب ... " وغيرت الموضوع " بكم فصلته لج الفستان ؟
التفت لها علياء واهي شبه شاردة: بـ 90 دينار
يزوي: ليييش ! والله الموديل كللش بسيط
علياء: هذي متضربة ... وين ألف الحين ؟
يزوي: اخذي يسار ... ثالث محل على يدج اليسار .. لافتته خضرا ..







=========








رفع يده واهو يسلم على جاره، وابتسم واهو ماشي ... وصل عند باب شقته، شال جيس الخمام ورماه في الحاوية، ودخل بيته بهدوء ... أول ما دش الصالة، جاف بنته منسدحة على بطنها فوق الكنبة، وتحوس في اللاب توب، راح لها وباس خدها: ها بابا شسوين ..
لفت له واهي تزم شفايفها: افف بابا أبا احط صوت في الباور بوينت مو راضي يصير لي ..
قعد على الكرسي وسند ظهره براحه: ييبي اجووف ..

قامت واهي تشيل اللابتوب، لابسة برمودا وبودي وردي بأكتاف عريضة، وشعرها مسويته ظفيرتين باليمين واليسار، كانت طويلة ... حنطاوية، جبينها عريض، وحواجبها خفيفة، وعيونها سودة مثل أبوها، وخشمها طوويل وفمها صغير ومرسوم ... وفي ذقنها غمازة صغيرة ..
قعدت جنب أبوها : جربت صيغة الويف والام بي ثري وبعد مثل الشي ..
عقد حواجبه واهو يدور الفارة، قال بهمس: انا ما اشتغل وايد على هالبرنامج، ونسيت شلون ..
قالت بملل: يوم قلت لعموو جوااد صرخ علي لان ماله زاغر ومشيت عنه .. افف بابا ليش اخوك كله متنرفز ..
ضحك محمد: خلقته جذي .. " والتفت لها بحنية " بعدين اسمه عمي جواد، مو اخووك ! زين بابا ؟
ابتسمت على جنب: اوكي ..
محمد: مرايم أمج وين ؟
مريم: تسبح كرار وتجهزه عشان نروح المزرعة
محمد: وانتي ما بتتجهزين ؟
مريم: انا جاهزة بابا
محمد: لا حبيبتي ما تطلعين بهالملابس .. روحي لبسي لش شي استر
قالت بزعل: ليش بابا، انا شاريتهم هذول ويا عمتي علياء بالذات عشان اليوم ...
محمد: لا حبيبتي .. تعلمي على الستر من الحين .. هالثياب بس في البيت تلبسينهم، بره لااا
مريم: بابا بعدي صغيرة خلني أستانس ..
طالعها بنظرة: هالحجي حجي عمتش علياء، اعرف انا .. يلاا قومي طيعيني وغيري، اذا تحبيني بتلبسين شي احلى
قالت بتفهم: إن شاء الله بابا .. اهم شي انت تكون راضي
حب جبينها: تعيش بنتي حبيبة أبوها .. يلاا قومي نروح نتجهز
مريم: والباور بوينت ؟ بابا ابا اخلصه عشان المعلمة تبااه أول ما نداوم بعد العيد
محمد: ما عليه يبة .. لا رجعنا من المزرعة، انا اساعدش فيه ونخلصه الليلة قبل لا ننام .. يلا قومي عشان لا نتأخر ..
نطت على ظهره وحضنت رقبته: يالله شيلني ..
ضحك: صرتي ثقيلة يالدبة ..
ضحكت واهو لزمها على ظهره ومشى فيها بسعادة ... راح غرفتهم جاف زوجته فارشة سجادتها وتلبس حرام الصلاة وولده فاتح المجرات ويعفس فيهم ويطلع الاغراض وينفر .. نزل بنته على السرير وزقر على ولده: كرارر ..
التفت لأبوه برعب: هاا
عطاه نظرة حادة: قول نعم، تعال هني ...
مشى بخطواات سريعة ولما وصل لأبوه طالعه ببراءة: نعم ويش ؟!
محمد: شقاعد تسوي ؟!؟
رد: هذا انا ادور صنقل ! بعزي انا !
ضحكت مريم ومحمد قال: أي صنقل واحنا ايام عيد، هذا بس في شهر محرم ..
طالع أبوه بخيبة: انا ابا اعزي الحين!
محمد بحزم: رووح شييل الاغراض اللي نفرتها ورجعهم محلهم ورتب العفسة اللي سويتها، لا اليوم اعاقبك ..
زم شفته بملل وراح يشيل الاغراض، ومحمد التفت لبنته: يالله مريم روحي غيري ثيابش عشان من تخلص امش من الصلاة نمشي ..
مريم: وانت بابا صليت ؟






التفت لولده ورد: توني راجع من المسيد، يالله عجلي يبة .. " ونادى ولده " كرار ..
كرار: نعم
محمد: تعال هني بقولك شي ...
رجع لمحمد اللي حمله وحطه بحضنه: الحين بنروح المزرعة .. بتشوف اعمامك هناك، وباسم وسارة، لا تسوي شطانة ولا اتعب الماما وتهرب بالشارع، زين ؟
هز راسه، وكمل محمد: واذا ماما قالت لك اقعد، تقعد .. واذا تبا تروح الحمام تعال قولي او للماما .. ماشي يبة ؟
كرار: اوكي، وعمة منى بعد هناك ؟
محمد: أي حبيبي .. كللهم هنااك
ابتسم ابتسامة عريضة: يعني حموود صغير بعد هنااك ؟
ابتسم: أي .. حمود الصغير، وسارونة ... الحضانة كلها بتجتمع لا تحاتي ..
ضحكت هدى الي خلصت صلاتها، والتفت لها محمد: غفر الله لكم ..
هدى: لنا ولكم، ليش ما شلت تلفونك معاك ؟ الحجاج اتصلوا واني كنت اسبح كرار وما دريت عن تلفونك الا يوم ينقطع!
محمد: حاطه على الجارج، وانا رايح المسيد ما حبيت أشيله وياي ...
هدى: انزين بنمشي الحين ؟
محمد: أي عمري ما نبا نتأخر ..
حطت مصلاها في الخزانة والتفت له: انا مسوية سويت في الفرن، ربع ساعة بالكثير وبيجهز ... على ما البس بيكون جاهز ..
محمد: ما عليه
هدى: شيل كرار وياك ... من الصبح واهو مطفشني
طالع ولده: شمسوي ؟
طالعته امه بنظرة: اني انظف واهو يوصخ! ارتب ويعفس ..
محمد: صدق هالحجي ؟
قال ببراءة : انا ما سويت شي! بس ألعب ..






=========

مسكت يدين بنتها اللي واقفة على السرير واهي ترقصها وتحرك كتوفها: عاشوو
وبنتها كانت ترقص وتناقز فوق السرير ، قالت واهي تمسكها: وقفي ماما حبيبتي، اول لبسي ثياب بعدين كملي التنقز مالج ...
قالت بنتها: شوووق
طالعتها بنظرة حادة: لا تقولين اسمي ، قووولي ماما
هزت راسها: انزين ماما ...
شوق: نعم ...
حضنت ويه أمها بيدينها لصغار: بابا اوديني عذاري ؟
باستها على خدودها: لا ياعمري، بنروح المزرعة لماما عودة، وبابا عوود، وخالووو
قالت باحباط: بابا قال ساروونة تروح عذاري ...
شوق: بابا قال سارة قمر ، وتروح بالنهار المزرعة، وبالليل لأنها شاطرة وما تسوي شطانة .. يودونها عذاري ...
نطت بفرح: ماما نودي كرار صغير بعد ويانا ؟
ردت واهي تقعدها وتمشط شعرها: نودي ماماته وباباه وكل طوايفه لو تبين ...
قالت بضيق: ما ابا اتسوين شعري ...






فتحت شوق عينها على اقصاها واهي تمشطه: لاااااا حبيبتي، بعدين يقولون ان انتي مو حلوة .. بالحلااااا تصيرين أحلى يا حلووة انتيييييي اموووا ... يلاا عطي ماما بووسة
باست امها على خدها، قالت شوق: بعد مني ...
باستها، قالت شوق: فديييتهم هالعسولات ...
وتمت تمشطها وسارة تغني: أنا الطماطية الحمرة، مزرووعة بين الخضرة، واللي ياكلني كلل يووم اتصير خدووده حمررة ...
شوق: يلاا قولي حمامة نودي نودي ، سلمي على سيودي .. سيودي راح المكة
سارة: امي تحنيني في ملة الصيني .. تراا انغاا انغاا !
ضحكت شوق: فري المووجة، شوي بحرين اف ام شوي الصين شوي بنقلادش ..
سوت لها ظفيرتين مرفوعين كانهم نوافير، وصارت كيووتة، قالت: قعدي هننيي ، انا بدش أغسل ويهي ... لا تعفسين شعرش، فاهمة ؟
سارة: زيين
راحت شووق تغسل ويها، وبعد دقايق سمعت سارة تصيح، قالت بصوت عالي: شفيييييييش ؟
صاحت سارة: مااااااااماا باااااااااسم ...






صرخت شوق: باااسم بييي لك الحين بكسر عافيتك يالسبال ... شسويت فيها ؟
قال بصوت عالي: ما سووويت شي ... اهي تصيح تبا الجبس اللي عندي
طلت بويها من الحمام : انزين يالزطي اعطها
باسم: ما اصرف عليها انا
دخلت مرة ثانية تغسل ويها عن الصابون، ولما نشفته وطلعت راحت ولاتته من اذنه: انت على منوو طالع مصفع جيي ؟
باسم: على ابووي العود
ضربته على كتفه: عن طوالة اللسان يا قليل الأدب ... ليش ما تعطيها تخليها تصيح ؟ مو اختك الصغيرة ولازم تعتني فيها
باسم: انا شـ لي خص فيها
قالت شوق واهي ترفع بنتها من على الفراش وتحضنها: زين ، خل ايي ابوك وجوف شبسوي فيك ...
تأفف وابتعد عنهم وراح للتلفزيون يطالع الرسوم، وشوق حطت بنتها بحضنها وقعدت عشان تكشخ ... والتفت لولدها مرة ثانية: باسم صليت ؟
هز راسه بـ " أي " قالت: باسم صليت ؟
التفت لها: قلت أي !
شوق: انا ما سمعتك، اذا كلمتك رد علي لا اتم تهز لي راسك ...
قال: إن شاء الله ماما
لفت ويها عنه وابتسمت، مسكييين ... كاني طفشت ابه، رجعت لفت له: بابا وين ؟
التفت لها: في الميلس تحت، ويا زوج عمة حوراء ...
شوق: عمتك حوراء يت ؟ وينها ؟
باسم: تعطي يدّي دوااه ..
سمعوا دق الباب، وشوق قالت: قوم حبيبي بطل الباب جووف ...
قام وفتح الباب وكانت حوراء اللي باسته: شلونك حبيبي
باسم: تمام .. تفضلي عمة
قرصت خده: زاد فضلك .. السلام عليكم
ردت شوق واهي تنزل بنتها على الارض: عليكم السلااام .. هلاا حوراء
سلمت عليها حوراء: شخبارش ؟
شوق: تمام، وانتي ؟
حوراء: الحمدلله بخير ... ها جاهزين ؟
شوق: والله للحين، ههههههه تعرفين على طول أنا آخر وحدة ويا عيالي
حوراء: اللي يقول عندش درزن مو ثنين
قعدت شوق واهي تضحك: صدقيني كل واحد عن عشرة ...
حوراء: ساروووو .. تعالي حضينة لعموو
سارة: ما ابا ...
حوراء: وييي مالت عليش! باسم تعال عموو
وقفت سارة وركضت: لا اني اني
حضنتها حوراء وشوق قالت: هههههههههههه الله يالغيرة
حوراء: هههههههه تجنن بهالنوافير اللي على راسها ... " وباستها " ويليي عليها القمر طالعة على عمتها
سارة: ماما سوتهم لي ..
دخل أسامة: بعدكم ؟
شوق: نص ساعة واخلص
أسامة: حقوي بعد؟! اكا اغلبهم وصلوا المزرعة وانتين للحين تعدلين روحش ... سرعي عااد
شوق: على شنو مستعيلين يعني ؟
أسامة: الناس يوااعاا ... ها سارة يوعانة اولا ؟
سارة: بلى
أسامة: ها جفتي ؟
باسم بحذر : يبة ما شريت لي السيديات
طالعه أسامة: اووه نسيت ... باجر ان شاء الله
باسم بضيق: يبة كل يوم تقول باجر باجر! ولا اجوف شي انا
أسامة: انت جايفني العب ؟! انا فاضي اييب زحير وماجلة للبيت لو سيديات حقك ؟
حوراء: وش هلاساليب الجافة اللي عندكم، حاجو اليهال بطيب وحنان شوي ... كانك بتكفخه
شوق: تراني على طول اقوله بس اهو ما يسمع
أسامة: ارجوش عاد، كان انتين اللي صابة جل الحنان عليه ..
شوق: انا من حقي، طول اليوم اهم معاي ومطفشيني، لكن انت نص يومك بالدوام، لازم تيي وتتحملهم .. مو تصارخ عليهم
أسامة: الحين اذا فتحنا هالسالفة ما بتخلص، خلصي بسرعة وانا في السيارة ويا هالاقزام ننطرش
حوراء: ههههههههههههههههههه
وطلع واهو حامل بنته وولده تقدم وياه، وشوق قالت: انتي ضحكي ضحكي بعد
حوراء: هههههههه نكتة انتون ... اكا مجتبى سوا لي مسكول، بروح واحنا بنتقدم المزرعة عنكم
شوق: انزين اوكي ...
وطلعت حوراء، وتمت شوق تحوس وتحوس لين ما اتصل فيها أسامة واهو معصب على التأخير، واهي طلعت تركض حافية وبايدها شنطتها وشنطة اغراض عيالها ونعالها ودشت السيارة بسرعة واهو قال: حشى ما صارت ياشوق!! بتذبحينا انتين بالهوسواس اللي فيش ...
شوق: وسواس شوو ؟! أسامة كنت اكششخ بلااك
أسامة: اوكي اكشخي ! يودي بنتش ... واكا وصختني كاكو، زين جيي ؟
شوق: امبييييييييه ! زين أطلع فوق غير ملابسك
أسامة: مالي مزاج، بحط عليه ماي وخلاص .. مب وايد ..
وحرك السيارة، وشوق لفت لولدها: بسووم شفيك حبيبي متضايق ؟
قال بهمس: راسي يعورني ...
طالعت أسامة: مهاوشه انت شي ؟
أسامة: إي ، لانه اهو اللي عطى أخته الكاكو ووصختني ابه
طالعته بشفقة: أسامة حرام، الصبح زافينه، والبارحة قبل لا ينام، والحين! ما يصير جيي ، خف على الولد
أسامة: عشان يتأدب .... البارحة انتي لو جفتيه شمسوي جان سويتي اكثر من اللي سويته ...
قالت بهمس: زين لا ترفع صوتك، عشان لا يسمع ويتحسس، والله احس هالولد بتييه عقدة من كثر قسوتنا عليه، كاسر خاطري والله .. اهو شمسوي يعني، حاله حال اليهال
أسامة: لا يركب لي بقيات ومواتر سيكل عشان لا اصرخ عليه، انا مانا مستعد اتحمل حوادث وطوارئ واصابات
قالت واهي قلبها ينغزها: بسم الله عليه وعلى عمره ...
سكت أسامة، وسارة قالت: ماما بروح ورا ويا باسم ...
شوق: زين روحي ..
وسارة راحت ورا وقعدت جنب باسم اخوها، اللي كان متضايق وماله مزاج ان يتكلم ...
ولما وصلوا المزرعة نزلوا من السيارة ودخلوا ...
شوق: الســلام عليكم
ردوا الكل: عليكم السلام ...
سيف: هذي على طول آخر الناس
شوق: توني أقول بسم الله ما خطيت بريولي ...
ضحكوا كللهم، ودخل أسـامة وراها وولده يمشي معاه، وسلم عليهم كللهم ....
ودخل محمد وراهم وأهو حامل كارتون متوسط، الكل التفت له باهتمام، وأسامة قال: اووو غنيمة، وش هذا ؟
ضحك محمد ونزله على الارض: هذا من عند سراب المنى لكم، تحف محفورة بـ [ كُل المُنى أنت ] ... كل واحد له وحدة .. " والتفت لأخته " عليـاء تعالي وزعي ...
نطت " فاطِمة ، بنت أخته ليلى " : أني أبا أوزع ..
وحنين وقفت: اني بعد بوزع عطوني ...
قالت يزوي واهي تسحبها من ثيابها: حنين قعدي نكمل لعب ...
وميثا أحتجت: صح حنين ما يصير تقطعين اللعب ..


قالت حنين: اووه انزين بس دقيقة عاد، بوزع شوي وبرجع لكم ... علياء خيوو عطيني شوي
قالت علياء واهي تعطي فاطِمة وحنين: حاسبوا عاد لا يطيحون ويصير فيهم شي ...
محمد: بس لـ الكبار هاااااا ! اليهال خلهم على صوب
حنين: اني مو ياهلة
محمد: لا ما تاخذين
حنين: ما باخذ لكن اني مو ياهلة
ضحكت هدى: خلاص اعترف انها مو ياهلة، فك عمرك
ضحك محمد: اوكي مو ياهلة ... " والتفت لهدى " وين مريم ؟
هدى: راحت الحمام ... الحين بترجع ..
فاطِمة عطت أمها " ليلى" وأبوها ، وخالتها : منى وعلياء ، وخيلانها : محمد وجواد ...
وحنين عطت : حمدان ، نرجس ، وأسامة وشوق ، ويوسف ، وحوراء ...
وعلياء عطت : حسين زوج أختها ، ومجتبى زوج حوراء ، وسيف ، ونـاصر ، ويزوي ...
قالت عليـاء: بعد بقت جم وحدة ..
قالت يزوي: إلى سلطان ولجين حبوبة، يايين بالطريق ...
علياء: انزين ويا هالويه ...
قالت منى لعلياء: صادق أخوي ما اتصل ؟
عليـاء: اتصلت فيه اليوم الصبح، قال إن زهرة للحين في العمليات ..
ردت منى بتوتر: ياربي ... ياميسر لا تعسر ...
قال محمد: اليوم اتصلوا الحجاج، يسلمون عليكم ...
قال جواد: أمي شكلها مستانسة حددها ...
ليلى: أمي مسكينة أمنيتها كانت إن تروح الحج .. والحمدلله اللي الله عطاهم وسافروا ...
علياء: اييه، وحشتني امي صدق ... وابويي بعد
منى: الله يردهم سالمين ...
علياء: وين ولدش؟
منى: ابوه يتحجى في التلفون واخذه وياه
غمزت لها: وحدة ثانية ؟
ضحكت منى بسخرية: هيهيهي ما تنكتين ... روحي منااك
ضحكت عليـاء وراحت قعدت، وانفتح الباب وطلت لجين وبعدها سلطان: الســـــلام عليكم
جواد كان مستند على الطوف واهو يكلم سيف، ولما جافها تم ساكت ويلاحظها بعيونه ... واهي على طوول دخلت وحضنت يزوي وسلمت عليها ... وسلمت على منى وعلياء والكل ...
وسلطان ابتسم في ويه يزوي وراح جنبها وقال بصوت واطي: شحالج ؟
ابتسمت بخجل: تمام، انت شحالك ؟
هز راسه: بخير ...
قالت لجين بصوت عالي: يوووسف سيف شحالكم ؟
ردووا عليها: هلاا ، اوكي .. الحمدلله بخير
وجواد انقهر وقال بخاطره " يعني على الكل سلمت الا انا، شنوو يهودي انا !!! "
قالت لجين واهي تكلم يزوي: شكراً لخدمااتج صراحة، طرشتيلي احسن جنتل ماان
ضحكت يزوي واهي تطالع سلطان واهو قال بتواضع: ما سويت الا الواجب ...
علياء راحت وعطت سلطان ولجين التحف، ورن تلفونها وردت: هلاا خووك
وصلها صوت صادق: هلا خية، طمني الجماعة ... زهراء وضعت، ويابت [ غدير ]
ضحكت بوناسة: مبروووووووووووك ابو غدير، تستاهل سلامتهم، الله يخليها ويحفظها وتتربى بعزكم
صادق: الله يبارك في حياتش، انا بروح اجوفها الحين لان بيحطونها في غرفة خاصة ، يلا فمان الله
وسكره وعليـاء صرخت: جمااااااااااااااااااعة انتباااه، نزف لكم البشرى بمولد غديررر بنت صادق ... صلوا على محمد وآل محمد
استانسوا كللهم وتموا يسولفون واهم يتبادلون الفرح، واخيراً بعد سنين من الانتظار ... الله رزقهم والحمدلله ...



قال حمدان واهو يطالع التحفة: [ كُل المُنى أنتِ ] منو بعد مناي بهالدنيا غير أم عيالي نرجس ، صراحة هالتحفة لازم تكون لها ....
ابتسمت نرجس وهمست: فدييتك
ويوسف قال: يحيا بوو سيف والله ... انا بعـد هذي التحفة اعطيها لأماية، لان اهي مناي بهالدنيا ...
حضنته امه: حبيبي انت ... الله يحفظكم لي ... أنا هالتحفة أخليها لعايلتي لها، لان اهم مناي بهالدنيا ...
حضنتها شوق: بعددي والله هالأم الحنون ... لا خلا ولا عدم يالغالية ...
قالت يزوي: فدييتج ماما .. أنا تحفتي أعطيها باباتي " وراحت لأبوها وقعدت جنبه وسندت راسها عليه واهو حضنها وقال: الله يحفظج ويسعدج يابنتي ...
قالت شوق: وانا مناي اهم أسرتي، أبو عيالي أسامة وبجرري باسم فديته، وساروونة الدلوعة ..
ابتسم باسم اللي كان قاعد جنب عمته حوراء واهي لامتنه من كتفه، وقال: شكراً ماما ...
راحت له امه وباسته على خده: والله احبك وايد، سامحني جاان صارخت عليك وضايقتك
ابتسم: لا ماما مو زعلان، انا احبكم انتي وابوي
أبتسم أسامة: هذا الشبل من ذاك الأســد ...
ضحك حمدان: هههههه فديته حفيدي، تعال حبيبي ...
قام باسم وراح ليدّه وقعد جنبه وحمدان لمّه وهمس له: انت متضايق من شي بابا ؟
قال بهمس: لاا
حمدان: عيل بلاك يالس متضايج، عادة تسير ويا خالك ناصر وإلا تلعب ويا الشباب ..
ابتسم وسكت، وشوق تمت تطالعه وقلبها معورها، قال حمدان واهو يطالع شوق: انتو شمسوين بالولد ؟
قال أسامة بهمس: رحنا وطـي ، وصل اليدّ قرقوش ...
قالت شوق واهي تقوم يزوي وتقعد مكانها: بابا ماكو شي ...
قال: شكوو ماكو شي والولد مخطوف لونه وساكت ...
قالت بتردد: مسوي شوي شطانة ولقى عقابه ..
قال حمدان بسخرية: عقاب شوو ؟
وقف باسم وحمدان طالعه: على وين حبيبي ؟
رد بخجل: يدّي بطلع بره ألعب ...
هز راسه: زين سير يبة ..
وطلع باسم وشوق طالعت أسامة بنظرة اللي سوا روحه ما يجوفها واهو يسولف ويا محمد، وحمدان قال: يلا اسمع، شصاير ؟
شوق: ماشي يبة، بس البارحة اهو رايح ويا شباب أكبر من عمره، ويالس يلعب وياهم بالبقيات، وابوه هاوشه وخلاه ينام بدون عشا
طالعها بتحذير: خفوا على الولد شوي، انتو ما عندكم اساليب تربية، شقايل يخليه ينام بدون عشاا " والتفت لمكان اسامة اللي من زمااان شال نفسه وهررب "
ردت شوق بتبرير: يبة الدنيا ما لها أمان، أسبوع اللي فات ولد جيرانا كانو بيختطفونه، انا والله قلبي يرقع كل ما طلع خطوة بره البيت .. وبعدين بصراحة باسم ساعات يمد لسانه علي، ولو ابووه عرف بهالشي بيكسر رقبته ..
رجع نظره لبنته: ان سمعت يا شوقان ان انتي او ريلج مديتوا يدكم على هالولد، بتلاقون شغلكم عندي
بلعت ريقها: يبة والله ما رفعت يدي عليه، عسى يدي تنكسر جان اضربه ... بس ابووه حازم وياه ما يباه ينفلت من يده
نرجس: الحين سكروا هالسيرة، عيب تتناقرون قدام الجماعة، لا ردينا البيت تهاوشوا ... " وطالعت بنتها " وهذي حسابها عندي ..
ضحكت يزوي: اللااي فن شووقان ، بابا وماما صايرين ضدج انتي وريلج ... حسيت انها معرركة جميلة
شوق: مالت ويا هالويه، تشمتي .. بيييج يوم وتحسين

قال حسين: احم ... يالحلوة، يالجميلة ... يالقمر
طالعته منى بنص عين: عفواً، تقصدني ؟
قال بهيام: اكو حلا ، ولا جمال ، ولا قمر غيرج بهالمكان ؟
احمر ويها وردت: لا ماكوو ...
مد يده بالتحفة: تفضلي مناي ... حياتي
اخذتها: ويا منوو كنت تسولف بالتلفون ؟
ضحك: هههههههه شاكة فيني ؟ فروا راااسج علي العذال > وطالع عليـاء اللي قالت: أعووذ بالله ... منوو عذال ؟
حسين: والله ما ادري يابنت عمي، جان انتي تعرفينهم ...
ضحكت منى: انزيين وين ولدي ؟
حسين: عند خاله جواد
طالعت منى جوااد اللي حامل محمد بس عقله في مكان ثاني ....
قالت علياء: لاا الريال خالص ...
قالت منى: انزيين يالرزة انتي
قالت علياء بدلع: هلاا ياللطيفة ..
ضحكت منى: بتعطين منوو التحفة ؟
عليـاء: مكتبي أكيد
ردت منى بغباء: مكتب شنوو ؟!
عليـاء: يقولون لش [ كُل المُنى أنت ] يعني أول ما أستلم شهادة التخرج للصيدلة، أحط التحفة وأعلق الشهادة جنبها ...



=========


[ يتبـع ]