[أول الغيث]

بدون مقدمات .. بخش في الموضوع على طول
>>> ما تحسون أنها حجة بليد ؟ أو واحد ما عنده أصلاً كلام يقوله كمقدمة ..


بدايةً أشيد بهالمجهر .. إشادة صجية .. يعني مب رياء وتملّق

وأشكر الأخ القديم وسط النخيل على اختياري

وبالمرة بعد .. نشكر الأخت إشراقة أمل .. على فكرتها ومجهودها في هذا المجال ..

<<<< يبي يتنكّر باللي هو به ..


،،

،،


أول شي خل نجاوب .. على السؤال المتعلق بوسط النخيل ..

اقتباس كـنـت تـنام بـين الحـصـص .؟؟.

اقتباس الجـواب هـذا مو عـندي أنـا / عـند أول الغـــيث ..

لا ما يرقد وسط النخيل ..>> أخذوها تزكية مني ..




،،،،،،،،

اقتباس مرحلتك الدراسية؟

خلصت الجامعة آنا ..

اقتباس هل التحقت برياض الأطفال؟؟

ما يبيله .. لا ومن زود درست سنتين في الروضة ..

اقتباس أجمل مرحلة في سنوات عمرك؟

يمكن المتوسطة .. وتحديداً ثالث متوسط ..

و أحد أسباب جمال هذي المرحلة .. هي وجود مجموعة مكونة من 4 طلاب تقريباً

وكل واحد منهم له كركتر مميز ،، لدرجة أنهم يصلحون يسوون سلسلة أفلام كرتونية

على غرار أفلام لوري وهاردي ... إلخ ، ولعل وسط النخيل واحد منهم .. ويعرف سوالفهم زين ما زين ..

اقتباس مادتك المفضلة؟السبب

تقريباً ماكو مادة محددة .. لكن أظن أنها التفسير

<<< خفيفة وحليوة ،، ومتروسة إثارة وتشويق

اقتباس مادة ما تحبها ؟السبب

بيني وبينكم .. ما عندي مشكلة مع أي مادة بشكل عام

لكن في بعض المراحل الدراسية تكره بعض المواد

لذلك المواد اللي تقريباً ما حبيتها في بعض الفترات .. هي الرياضيات و عقبها الفيزياء ..

اقتباس موقف مضحك حصل لك في المدرسة لا يمكن ان تنساه؟

موقف مضحك ومحرج في نفس الوقت ،، وأذكر أني ذكرته مرة في المنتدى ..

وهو يوم كنا في الصف الثالث ثانوي ،، وكنا في حصة الرياضيات ، والأستاذ يشرح

ولا أحد منا ملتفت عليه ، والفصل كله فوضى في فوضى

المهم : قام ولد خالي اللي جنبي يـنـشّـد

وأنا صاير الكورال والمؤثرات له

ومندمجين وخاشّين جو .. وما أحد حولنا !!

و ما أنسى أن القصيدة كانت " تشعشع النور في دنيا الهدى وصفا ..


فجأة .......!!!

وبدون سابق إنذار ،، سكت الأستاذ وسكت جميع الطلاب

وساد الصمت كل أرجاء الفصل ،، وما بقيت إلا أنا وخويي مستمرين في ضلالنا القديم !!!

اشوي ويلتفت علينا الأستاذ ويقول : ( بالمصري طبعاً ) .. أيــــه أيـــه انتَ وهوَّ .. يبأى نإلبها مسرح ولاّ أيــه ؟؟

اقتباس موقف جعلك تبكي داخل المدرسة؟

يوم كنت في أولى ابتدائي .. أذكر عطانا أستاذ أحمد الجمعات طريقتين للجمع

وحدة عادية .. 1 +1 = 2 ،، والثانية هي طريقة الجمع العمودية << صح اسمها شذيه ؟

المهم .. مرة من المرات .. طلّعني مع ولد خالي << نفسه الأولي ،،

عشان يبي يختبرنا في الجمع ،، فكتب لكل واحد مسألتين .. وحدة عادية ،، و وحدة عمودية

آنا ما أعرف إلاّ للأولى .. أما الثانية فما أتذكّر كلّش أني خذتها

فحليت الأولى .. و وقفت ..

أما ولد خالي ما شاء الله عليه .. حلّهم ثنتينهم

عاد آنا حينها .. انصدمت و قعدت أصيح ،، لأني أيقنت أن البلا مني ،، وشكله في عقاب ينتظرني ..

لكن اشوا .. أستاذ أحمد الجمعات .. قام يسكّتني ويتحنّن علي بلهجته السورية ..

اقتباس مشاغب ام هادىء داخل الحصص؟

لا هذا ولا ذاك .. يعني مب صاخ مررة مثل وسط النخيل .. ومب مشاغب

اقتباس مستواك الدراسي ( ممتاز..جيدجدا..جيد..مقبول )

ممتاز .. بس مب متفوق

يعني غالباً .. بين 90 – 95 % ..

اقتباس راضي عن مستواك أم تطمح للأفضل ؟

لاراضي ولا صادق ..

راضي إلى حدٍ كبير ..أو بالأحرى ما تضررت من مستواي

لكن بالتأكيد أطمح للأفضل ..

اقتباس علاقتك بالمدرسين /المدرسات؟

علاقة تتفاوت مابين جيدة و ممتازة

اقتباس تحب المدرسة ( نعم أو لا ) السبب ؟

أحبها جزئياً بس .. لأنها مملة و ركيكة ..

اقتباس تحب المواد العلميه أو الأدبيه؟(السببب)

أحب المواد الأدبية أكثر من العلمية

لأني أتلذذ بها .. وهمّ سهلة بالنسبة لي ..

اقتباس وش رايكـ في المدرسين في تعاملهم مع الطلاب ؟واذا كان في سلبيات لبعض المعلمين وش هي ؟

على قولتهم .. أصابعك مب سوى..

لكن الكثير من المدرسين يجتمعون في أسلوب واحد في تعاملهم مع الطلاب

وهو الفوقية .. والاستعلاء النسبي

يعني كثيراً ما يحسسونك أنهم أفهم منك في أي شي ،، وأنك ما توصل مستواهم

أو مثل ما نقول ،، دائماً يتعاملون معاك بسياسة الحاكم و المحكوم ..

اقتباس أجمل وأعلى نسبه حصلت عليها في مسيرتكـ الدراسيه؟

أولى إبتدائي ..

طبعاً ما كانت فيها نسبة ذيك السنة .. بس أذكر أنه ما نقصتني غير درجتين تقريباً ،، وأخذت الأول مكرر

وللمعلومية .. احنا من الأجيال اللي درست واختبرت شفوي وتحريري .. من أولى ابتدائي

<< يعني دراستنا ما كانت أي كلام ..


أعلى نسبة مسجلة .. تقريباً هي 95.86 .. أخذتها في ثالث متوسط ..

اقتباس عمركـ أخذت دور ثاني ؟ وليه (اذا كان ظلم أو حقد خخخخخخ) ووش هي الماده؟

لا والله .. ما قط أخذت ..

اقتباس وش رايك بتعامل بعض الطلاب مع المدرسين؟

أي نوع فيهم عاد ؟

اللي يحترم نفسه ويحترم أستاذه ويتعامل معاه بموضوعية .. أكيد بنقول له والنعم

واللي بيطلع فيها .. وبيرفع صوته ويرادد ،، ويتعامل بقلة أدب ،،

وبيسوي فيها بو عرام على قولة ذاك .. أكيد بنقول له : لا يكثر ..

اقتباس هل حصلت على شهادات تميز خاصة وفي أي سنة؟

ايه .. أتذكر يوم كنا في رابع و خامس إبتدائي .. كان المرشد الأستاذ / عبد المحسن الحمود رحمة الله عليه ..

يعطينا شهادة تفوق شهرية ،، وأذكر بعد في ثالث متوسط .. حصلت على شهادة تميز في الرياضيات

وفي أولى ثانوي بعد .. حصلت على شهادة تفوق ..

بس والباقي كلها من الحوزة وملتقى الشباب الصيفي ..

اقتباس ما هو ابرز عقاب مر عليك طوال فترة الدراسة وبأي سنه وليهـ ؟؟!

ما أخبر فيه عقاب بارز مررة .. لكن انطقيت أكثر من مرة

وأتذكر منها .. في ثالث ابتدائي .. انطقيت لأني ماحفظت جدول الضرب ..

اقتباس ع’ـضو كآإن مع’ـكـ بالمدرسهـ ؟؟!

:: وسط النخيل ::


طبعاً اسمحوا لي .. بهذر اشوي عند هالنقطة ..

وسط النخيل من الزملاء القدامى .. ودرس معاي سنين وبنين

وكان فيه شي مميز يجمعني فيه .. وإلى اليوم لاجينا نسولف .. لازم نعرّج عليه

وهو أن أسمائنا كانت ورى بعض .. وكانت دائماً تتذيل قائمة أسماء الطلاب حسب الترتيب الأبجدي

وكنا نضوق الويل .. في الاختبارات الشفوية ..و تطق چبودنا من الانتظار

خصوصاً أن فصول مدرسة الچبرة كانت كبييرة حييل ،، وكل فصل فيه ما يقارب 45 طالب ..

لكن في المقابل .. كان عندنا زميل محسووود ،، لأنه كل سنة يصير اسمه أول واحد ،،

وبسرعة يخلص أثناء الاختبارات الشفوية ويمشي بيتهم من حينه ..

<<< هذا اللي قاطع قلبنا ..

اقتباس ع’ـدد سآإع’ـآإت استذكآإركـ ؟؟!

ما كو عدد محدد .. بس توصل في الاختبارات إلى 5 – 7 ساعات متقطعة ..

اقتباس كنت تنآإم بين الح’ـصص ؟؟!

لا والله .. ما أعرف أصلاً

بس مرة .. وذكرتها بعد في المنتدى ،، وهي في صف ثالث متوسط ..


طبعاً كانت علينا الحصة الثانية ... وبعد ما انتهت قلت حطّ راسك على الطاولة على ما يجي أستاذ الحصة الثالثة

أنت أصلاً ماراح تنام ولا شيء ،، كالعادة ..

لكن للأسف .. رحت في سابع نومه ...

المهم : دخل الأستاذ و شافني نايم ...

لكن بما أن نومتي مستغربة ،، فقال أكيد انه تعبان أو مريض أو فيه شيء ..!!

فقال لي : أول الغيث ... عسى ما شر ؟؟

تعبان ؟؟... مريض ؟؟

قم استأذن وروح بيتكم ،،، عشان ترتاح ...

فقلت دام الأستاذ يعتقد انك مريض .... ضبّط السالفة وخلّها صج .. عشان ما يزعل عليك ...

فقلت له وأنا أتأوه أتظاهر بالتعب والهوان ...

لأ لأ يا أستاذ .. إن شاء الله إني قادر أواصل إلى نهاية الدوام ...

اقتباس ج’ـآإكـ تهزيء من مدرس بدووون سبب ؟؟! ( طرآإنات بع’ـض المدرسين )

اممم .. يعني هو شبه تهزيء .. ( مرتين .. ومن نفس الأستاذ )..

سلمكم الله يوم كنا في ثاني متوسط .. كان جنبي واحد ( عفلنقي ) ،، ما يهكّر من الحركات والتسبب والكلام ..

المهم .. كنا في حصة الإنجليزي .. و المدرس يشرح

اشوي وخوينا أصدر صوت ،، أو سوّى حركة معينة

والظاهر الأستاذ ما لمح الوضع عدل .. وأعتقد أنه آنا اللي مرتكب الجريمة .. فقال لي بكل عنجهية : اطلع بره

قلت : أستاذ مب آنا ... قال : رجاءً اطلع بره ...... أستاذ ،، غيّر بدّل .. يمين شمال

قال : اطلع برّه ....... قلت يلّا أمري لله .. وطلعت برّه


عقب أسبوع .. وفي نفس الحصة .. تكرر نفس الموقف

وقال لي : اطلع برّه ... قلت له : مب آنا اللي متكلّم ... قال : اطلع برّه

قلت : لا ما أطلع .. مب آنا اللي متكلّم .. <<< خلص بلغ السيل الزبى

اشوي إلاّ والجماعة ما قصروا .. فزعوا معاي .. وقالوا له : مب هو يا أستاذ ..

هذا فلان بن فلان .. هو مرتكب الجريمة ... بس عاد مدرسنا انحرج وسكت

وقال حق ذاك .. اطلع برّه ..

<<< حتى اعتذار ما اعتذر مني .. ( أكيد الفوقية امنعته )

اقتباس أمنيتك ؟

أصير دكتور ..

اقتباس كم ريآل كآنت فسحتك .؟!

ريالين ..

اقتباس كلمة أخيرة لمن تهديها داخل المدرسة؟

:: حسبي الله عليكم ::

أهديها لبرادات الماي .. اللي في مدرسة الطرف الابتدائية

بعد أن ذبحتنا لسنوات طويلة

بسبب مياهها الكبريتية .. الغير صالحة للاستخدام الآدمي !!





ختاماً .. أدعو الأخت " أحسائية " للاستجواب

وبالمرة للخروج من أجواء مدارس البنين ..