[سكون الصمت]

.
.
.

خلي هجرني تكفى ياموت زرني ... وان ماقدرت دلني مكانك وانا اجيك
مابي حياتي دام خلي هجرني ... مابي حياتي دامه يقول مابيك
يدري بظلم الناس يدري وظلمني ... واكد كلام اللي يقولون ناسيك
لكن قبل لاتاخذ الروح مني ... بسأل حبيبي كم سؤال واخاويك
وشلون قلبك ياحبيبي تركني ... وتدري بخفوقي كم له سنين هاويك
وماتدري بعادك وصدك ذبحني ...وما تدري عن دمع نثرته وانا ارجيك


منقول **






.
.
.

((حسيـن ... 5.30 مساءاً ))

معصومة: are you crazy? انت توك طالع من المستشفى شلون تبي تطلع! الجوّ بارد، اليوم بنقعد بالبيت
[ الترجمة : أنت مينون ؟ ]
حسين: انا ابي اطلع، هالكم يوم اللي قضيتهم بالمستشفى خنقوني، قومي خلينا نشم هوا شوي
معصومة: اني مالي خص اذا صادك شي
ضحك: على مسؤوليتي، قومي بنروح نحضر فلم بالسينما
معصومة: والله؟ فلم شنو؟
حسين: بدر يقول منزلين فلم مصري كوميدي، قومي نروح سينما الدانة
معصومة: بغير ثيابي وبجي
وركضت عنه، قال لها وهو يرفع صوته عشان تسمعه: اوكي، ولا تنسين! لا تحطين ميك اب!
ظل ينتظرها لين ما اجت له، كانت لابسة تنورة ذهبية، وبلوزة ناعمة، ولافة الشال بطريقة مرتبة، ولابسة كعب رفيع شوي، وميك اب ثقيل، قال لها وهو يطالعها بنظرة: مو قلت لش لا تحطين مكياج؟
ضحكت وراحت له: حبيبي لا تنكدها، قوم نروح نتونس
نزل راسه للارض وهو ويوجه كلامه: when I say something for you... you must do it ok,
[ الترجمة: إذا أنا أقول شي لج، انتي لازم تسوينه! اوكي ؟! ]
قالت وهي تحرك رجلينها على الارض بقهر: حسيـن! يالله عـاد لا تنكدها خلنا نطلع
حسين: انا مستغني عن الطلعة اذا بتطلعين جذي، روحي خففي الميك اب شوي
قالت وهي مبوزة: اوكي!
وراحت خففته ورجعت له، ابتسم لها بحبور ومسك ذراعها ومشى معاها، اهي ساقت السيارة مراعاة لظروف ريوله، وراحوا حظروا الفلم، وطلعوا اشتروا لهم خفايف واكلوا، كان الجوّ بـارد، والهوا قوي شوي، ابتسم وهو يحضنها من كتفها ويقربها منه، وقال لها بهمس: شرايج يا حلوتي نروح مكان تفصيل عبايات ونفصل لج عباية يديدة عشان عيونج؟
رفعت راسها وطالعته: هههههههههههههه لا تلعبها، تدري اني ما ابي
قال بحلم وهو يبتسم بجاذبية لها: ليش عاد؟ انا خاطري اشوفج بالعباية، تصيرين حلوة بها
ضحكت بقوة اكبر: هههههه لالا لاتحاول بليز، عارفة حركاتك بيبي، اني مرتاحة جذي، ما ابي اخنق نفسي اكثر
ابتسم لها بخبث وقال: اوكي الايام بينا
وغمز لها، ضحكت وتشبثت فيه، بيقنعها يعني بيقنعها، يعرف يلين راسها شوي شوي .. بالمعاملة الحلوة يقدر يقنعها ...

.
.
.

(( مُـنى ))

طلعت من بيت سهى بعد ما اتصلت في زوجة اخوي صادق " زهراء " وركبت السيارة، التفت لها بابتسامة: ســلام عليكم
واختفت ابتسامتي واني اشوف ويهها، ردت بهدوئها: عليكم السلام، هلا منوي شخبارش؟
بلعت ريقي: بخير! انتي شلونش؟ شفيش ؟
زهرة: تمام .. ههههههههه شوية رومانسيات من اخوش!
سكت واني اشوف ويهها المشوه، كدمات بخدها وعند عينها، ذيك المرة ايدها مكسورة! وهالمرة ويهها كله ازرق واحمر!
قلت لها واني اطالعها بحزن: زهور لا تروحين البيت، خلينا نروح عند البحر شوي
زهراء: على امرش حبيبتي، من عيوني
ورحنا عند البحر وقعدنا، المايه كانت سقي والبحر مرتفع، والموج يتلاطم، من زمان ماجيت البحر، اكثر مكان يريحني، مثل المطر، يمكن لان فيني فطرة احب الماي! احس بالنقاء والطهارة لما اشوفه من جذي ترتاح نفسيتي، لما يطيح مطر احس براحة فضيعة، ولما اشوف البحر دائماً اسبح باسم الله، احسه شي عظييم سبحانه ربي، لما اتضايق احب اسبح لاني انتعش، ولما احزن احب اتوضأ لأن احس بالحزن يبتعد عني!
صدقت الآية الكريمة: " وجعلنا من الماء كل شيء حيّ "
طالعتها واهي سرحانة وساكتة، قلت لها فجأة: ليش صابرة عليه طول هالمدة؟
ابتسمت لي: لأنه زوجي ومالي غيره
قلت لها بألم: زوجش؟ كل اللي يسويه لش وبعد تصبرين؟ ما بينكم عيال ولا بينكم محبة ليش عيل عايشة معاه؟
عطتني انتباها وقالت: منى! لا تفكرين ان الحياة الزوجية تقتصر على العاطفة وبس، انتين مراهقة! واغلب اللي بسنش يشوفون ان الزواج عبارة عن عواطف واحاسيس ولذة ومتعة وكله فرح حتى لو كان في مشاكل! ... الحياة الزوجية علاقة مقدسة ووثيقة .. لها اساس ومبدأ .. الزوج أهم شخص بحياة المرأة بس حياتهم ما تقتصر على العاطفة وبس!
ـ بس هذا مو معناته انش تفنين عمرش معاه! ليش ما تشوفين حياتش؟ عيشي حياتش .. اشتغلي وأمني لش احتياجاتش وعيشي حرة
زهراء: الزوج عزوة وسند .. صعب المرأة تحمل لقب " مطلقة " في مجتمعاتنا .. تحس نفسها مثل المنبوذة .. منى اني عشت شهور ويا اخوش، يمكن شفت فيها المر أكثر من الحلو، بس هذا مو معناه اني اقطع الأمل واعيش على الياس، الله سبحانه قادر على كلشي، ويمكن يتغير الحال شنو دراش؟ اني ما اييب عيال، وماني جميلة ذاك الزود، من يبيني؟ وفوق هذا مطلقة! صعبة
قلبي عورني قلت لها باندفاع: لا تقولين جذي، بعدين الله يرزق من يشاء بغير حساب، والدكاترة ياما قالوا وما صدقوا، يمكن الله يرزقش بعيال
ابتسمت: اه الحمدلله على كل حال .. كلشي جايز! ولا ييأسُ من رحمة الله الا القانطون، واحنا تونا بالبداية، ما كملنا حتى 3 سنين يعني في أمل نصبر ويتعدل الحال
ـ الله يوفقش يارب
زهراء: آمين .. يالله قومي بأذن المغرب، شرايش نروح نصلي في مسجد؟
ـ امم اوكي ليش لا
زهراء: نروح شيخ عزيز في السهلة
ـ يالله
عورني قلبي عليها! آخر مرة كانت تعبانه منه وايد، للحين اذكر كلمتها وهي تشتكي لي: منووي تصوري يطلعني الساعة 3 الفجر عند الباب يبي يطردني وهو ذابحني من الضرب!
غمضت عيني متألمة ... ما اتصور ان في ناس بهالقسوة والوحشية .. فـ شلـون أخـوي!

.
.
.

(( غرفة جـواد .. 5.13 مساءاً ))

فتح عينه وهو يشوف ضوا الشمس بعيونه، ظل متمدد ومغمض عينه ويتذكر اللي صار، كان يصرخ يحاول يبتعد بس ما قدر، قوة غلبته وخلته ضعيف يرتجف تحت رحمة شهوة حيوان، حيوان في جسد بني آدم، وارتجفت شفايف وهو يذكر الوحشية والألم اللي صاده، اشلون انقتل شي بريء بداخله، شلون عاش 3 ليالي مرعبة تحت رحمة خاله اللي مافي قلبه رحمة! المخدرات والخمر نسته الرحمة والضمير، واعتدى على طفل صغير! ومن يكون! ولد اخته ... بعمر الـ 5 سنوات! انقتلت احلـى برائة لطفل مميز !
هالسر اللي محد يعرفه إلا ثلاثة! الله سبحانه وأمه وأهو
حتى اقرب الناس له، حسين وزينب ما يعرفون عن هذا الشي، كتم السر سنين طويلة، وانتظر لين ما كبر وفهم الدنيا وشرورها شلون، وقرر ينتقم، يحس ان اللي سواه ما اشفاه غليله، ما قدر ينسيه وجع السنين اللي طافت، ما قدر يمسح الصور المشوهة في الليالي المشؤومة، آآه من هذيك الليالي اللي انتحب فيها على صدر أمه، وآه من هذيك الليالي الي عاش فيها مثل المريض، ينسى نفسه والعالم، ويعيش حالة الرعب، تبـول في الفراش، حالات تشنج قاسية، وإحساسه بالألم في ريوله اللي تأثرت بضربة المنجل لما كان صغير .... تجرع آهة وهو يخفي دمعته، شلون صار منجل على ريول طفل صغير ... ويلوموني ! يلوموني .. يحسبون ان هالقلب قاسي! يحسبون ان الضمير معدوم .. ما يدرون بالمتخبى واللي ذابحني ويقتل كل ذرة أمل بصدري .... أحتاجج يا زينب جنبي! والله محتاجج!
قام من سريره يبعد هالافكار، ما يبي يضعف، حتى لو قدام نفسه، تروش بالحمام ولبس ثياب انيقة، بلوزة برتقالية دافية، وبنطلون جنز مضبوط، وشعره اعتنى فيه وهو يرجعه على ورا، لبس الكابس وحمل سويج سيـارته وتلفونه ... وإلى ،،، صـالة البليــارد ....
سلم على الجماعة، سمعته بين كل الشباب قوية، والكل يشهد بوقفاته معاهم، لعب معاهم، ووقف لعبه دخول الشرطة واستجوابه ... وانتهـى الأمر إلى مركز الشرطة!
ولين نص الليل بسبة الكلب خاله سعيد ... اللي كان يحتضر بالعناية المركزة ...!
الدكتور يقول الرضوض كبيرة بجسمه ... وينزف وايد .. وبسبب نسبة الكحول اللي بدمه .. صاده نزيف داخلي بالمخ! والأمل بسيط لحياته!
حس جواد بالانتصار والمرارة بنفس الوقت ... ما كان وده هالايد تقتل نفس .. بس يحس براحة لانه طلع شوي من الغضب والقهر المكتوم بداخله ...
طلع بكفالة بعد توسط صديقه وحبيب قلبه " حسين " والتفاصيل كانت طويلة اهو في غنى عن شرحها ....

.
.
.

(( الإمارات محمد ... 8.15 مساءاً ))

قاعد على أعصابه مقهـووور .. صار له ثلاث ايام ما كلمها، وكل يوم يتصل كله مقفل، معقولة صادوها بيتهم؟ بيقتلها اخوها وأبوها اذا درى عنها ... ظل ينتظر بلهفة خايف، شفيها! ليش ما دقت! لا اتصال ولا مسج ولا حتى مسكول! وما تدخل المسن بعد ...
فتح لابتوبته وظل على وجل .. الافكار تدور براسه، من امس مو قادر ينام يفكر فيها، يحس بشوق فضيـع لها، افتقد ضحكاتها وحيويتها ومزاحها وجرأتها في التعبير عن مشاعرها،
شاف اخته " علياء " داخلة المسن وابتسم، اشتاق لمنى اخته بعد، الحين شنو يفكه من زعلها! هذي دلوعته وان زعلت صعب ترضى ... الله يعينه عليها
كلم علياء شوي وبعدها قالها تنادي منى، رجعت وقالت له: تقولك اذا تبيها يالزطي اتصل فيها على تلفونها
ضحك هههههه، حركاتها معروفة، بدينا بالدلع الحين، اتصل فيها وظل يرن يرن وما ردت، ورد اتصل وبعد 6 رنات ردت، قال بصوت راقي وهو مبتسم: مســاء الخيـر والطيبـة لأحلى أخت بالدنيا
ردت بجفاف: مساء النـور
توسعت ابتسامته اكثر: شفيها حبيبة قلب أخوها؟ شفيها دلوعة البيت زعلانة؟
قالت بزعل: يهمك مثلاً يعني؟
محمد: امم انتي شرايش؟ دلوعتي واحلى اخت بالدنيا تزعل وما اهتم؟
منى: شدراني عنك! طول هالفترة مطنشني ولا اني عالبال، قول يسأل عني، أيـه خلاص صرنا مال اول الحين، في ناس اهم منـا، في نـاس رضاهم الاهم وقربهم احلى حشى ما ابي شي! ما بخسرك اني متصلة مو انت وبعد ما ترد علي
ضحك عليها، محد يعرفها كثره، هالانسانة غيوووورة بشكل غير طبيعي، تغار حتى من نسمة الهوا، الله يعين ريلها عليها، قال وهو يضحك: افا يختي افـا ما عاش والله
قاطعته وهي تصيح: لا تقـص علي! ادري انك نسيتني زيـن ... هذا وانت ما كملت الشهرين، وهدى بعيدة عنك، إذا خطبتها واجتمعتوا شنو بصير؟ ادري بتنـساني ولا بتذكرني
قال بحنان: منووي! افا ! تصيحين وانا اخوش؟ منى تطيح دمعتها ومحمد اخوها؟ وينها بنت الرجال واخت الرجال؟
برطمت بزعل: مو انت ما تدري شقاعد يصير فيني! اني احتاجك وايد، انت الوحيد اللي اقدر اكلمه عادي، ما تدري شقاعد يصير هني
قال بخوف: شصار؟
قالت وهي تصيح: بعد ما سافرت بيوم صارت مشكلة بين صادق وجواد وأبوي طرد صادق، وصديقتي أبوها توفى، وصارت مشكلة بيني وبين جواد، وهالايام جواد وايد تعبان، وحسين اخوي مدري شفيه متضايق، علايه صايرة منعزلة عنا ما ادري ليش
ابتسم برقة: خلاص لا تصيحين، انا وش قلت لش؟ مو قلت لش اذكري الله على طول .. لو داومتي على ذكر الله وقراءة القرآن وصلاة الليل كنتين بتحسين بشعور افضل .. لانش ما تسمعين الكلام وعنيدة!
قالت بدلع: حموودي ارجع البحرين! تعال لنا ياخوي الله يخليك احنا نحتاجك!
محمد: ما صار لي حتى شهرين وتبيني ارجع! ما يصير وشغلي؟
تنهدت: اوكي تحمل بروحك زين، انت مرتاح حبيبي؟
ابتسم براحة، والله حنونة هالبنت: ايه مرتاح دامكم بخير، اهم شي تتحملون بنفسكم كلكم، واللي وصيتش عليه لا تنسينه، ابوي شخباره؟
منى: الحمدلله، بس وايد مشغول هالايام ما نشوفه وايد
محمد: الله يكون بعونه، يدتي وحنين وأمي شخبارهم؟
منى: كلنا زينين، أمي هذي هي ما تغيرت مسكينة شايلة شغل البيت على راسها، حنونة حفظت نصف جزء عم، أمي مشترية لها هدية ومستانسة عليها
محمد: انا قلت لأمي تلبسها حجاب من السنة الياية
قلت بصدمة: محمد حرام عليك، لا تعقدون اختي للحين صغيرة! شلون تلبسونها حجاب خلها تاخذ راحتها شوي
حس بضيقة لتفكير اخته، قال بصوت متزن: صح صغيرة، بس حنونة وايد جميلة ما شاء الله عليها، الشعر اشقر والعيون زرق، وبشرتها اللهم لا حسد، خلنا نعودها على الستر من الحين وكل ما علمناها على العفة من الصغر يكون احسن
منى: بس مو جذي! بعدين تتعقد وبتتملل وبتعاند وبتسوي عكس الشي
محمد: ما ادري على امي، امي تفهم بهالسوالف وعندها خبرة بتربية الاجيال، اهي بعد قالت مو اكيد، بس قالت بتشوف الموضوع وبتدرسه
منى: يدتي مو مقصرة تعلمها الصلاة وأمور الدين، فديتها الله يحفظها لا لبست حرام الصلاة تصير كأنها ملاك والله
ابتسم محمد: الله يحفظها وحشتني العفطية، زين مناوي انا بسكر الحين، الشباب وصلوا بنروح نتعشى
منى: بالعافية، وتحمل بروحك زين
محمد: إن شاء الله وانتي بعد، ولا تنسي ذكر الله، سلمي على البيت كلهم وبالخصوص أمي، يالله مع السلامة
منى: الله يحفظك ويوفقك
.
.
.
.
.
.
" نهاية الجزء الـ 20 "