[إشراقة أمل]

يتبع الفصل الثامن عشر


يَآربْ
يَآوآفيّ ( العطَا ) جنبنِيّ درُوبْ [ الخطا ]
وإغسلنيّ بــ ثلجّ " العَفُو " وألبسنيّ منْ ستّرك | غطَآ |

.
.


في المستشفى الممتلي بشخصيات مرموقة في الرياض .. وفي أحد ممراته

الواسعة .. واقفين ثلاثتهم بانتظار نوف ..

وش راح يكون مصيرها ؟؟

و وش فيها بالضبط ؟؟

و ليه جتها هالحاله فجأه ؟؟

وليه وليه وليه .. أكثر من سؤال يدور فبالهم .. ومالقوا له اجابة ..


بين كل فكره وفكره .. يدعولها بالشفاء العاجل .. وان الله يشملها برحمته ..

وللأسف دخلوها العناية المركزة وليلحين الدكتور ساكت ماهو راضي يقول

شي .. ولا يطمنهم ..

حالة ام خالد يرثى لها .. جالسة على الكرسي ومغطية وجهها اللي ماليته
الدموع ..


اما نايف يحس ان الدقيه اللي تمر سنة .. وده يفتح الباب ويقول اخلصوا علمونا ؟؟


وناصـر من اول ما دخل وهو يروح ويرجع .. يروح ويرجع .. ما حس بالالم . ولا
التعب .. ونسى النوم ..

مع ان صارله فترة ما نام ..

طول هالوقت وهو يردد هالجمله بداخله (عساه فيني مو فيك )

صحيح انه زعلان منها و حاقد على تصرفاتها و موقفها الاخيـر اللي ماهو قادر

يبعده عن خياله .. إلا انه رحمها

من اول ما شاف وجهها تعبان بالمرررره .. من اول ما ناظرها فالقصر حس انها
مريضة ..


عارف انه مني يا رب لكن وش ذنبي وش ممكن تكون ردة فعلي غير اللي
عملته ؟؟

يارب قومها بالسلامه ولا تحرمني منها يا رب .. ياليتني خليتك تحكين وتعتذرين

بأي سبب كان ما كانت هذي نظرتي لك


لا حول ولا قوة الا بالله ..


/
/



قتل الهدوء والتفكير اتصال جا لنايف ..

نايف بصوت مهموم : هلا جدي ؟

الجد سامي : هلا بك .. وش صار معكم ؟ نوف قامت ؟؟؟

نايف يتنهد : والله علمي علمك يا جدي .. تخيل لهاللحين محد تكلم ولا قاللنا حاجه ..

الجد سامي بعصبيه : كيف ؟؟

نايف : هذا اللي صل ..

الجد سامي : الحين اكلم مدير المشفى وارد لك خبـر .. لمتى راح ننتظر يعني ؟؟

نايف : لا يا جدي هي ماهي مسألة انتظار او تأخير منهم .. لكن الدكتور جوا ولسى ما طلع ..


الجد سامي : لا حول ولا قوة الا بالله .. الله يشفيها ..

نايف : الله يجزاك خير ..

:

ناصر : وش يبغى ؟؟

نايف : يسئل عن نويف .

ناصر تذكر كيف كان يناديها ويدلعها وناظر بالباب الكبير حق الملاحظه بحلقه
غصه ما يبغاها تطلع ..

نايف : ناصر وراك ما تجلس ياخوي .. عين خيــر .. !

ناصر بارتباك : ل لا لا كذا كويس

:
:









في شقة ابو تركــي


عزوز و الجوهره يناظرون برنامج أجنبي ..

الجوهره : يااااااااااااااي يشبه ناصر .. ههههههه سبحان الله

عزوز فتح عيونه وعدل جلسته : وشو ؟؟؟ مين يشبه ؟؟؟

الجوهره تبلع ريقها : ولد خالي راشد ..

عزوز : وانتي شايفته ؟؟؟ تعرفينه ؟؟؟ جالسه معه ؟؟؟

الجوهره تبعد الخوف : ياخي انت وش فيك ؟؟ خوفتني .. ايوه جالسه معه ..
وش فيها يعني ؟

عزوز : وين ومتى

الجوهره : اعوذ بالله انت وش فيك كذا .. لما جبته عندنا لبيتنا القديم

عزوز يهدا شوي وكنه تذكر : آهآ .. وليه حضرتك حفظتي وجهه من اول مره ؟؟

جد ما تستحين .. بعض الكلام ماله داعي

الجوهره فقلبها والله انت اللي مالك داعي عاملي فيها رجال .. لو رجال طلعنا

من هالشقة النكد

لو رجال جيب لنا شي ناكله بدل ما تاكل اللي بقى منه .. أجل كيف لو أقول لك

اني رحت قصرهم : ما اقصد بس لأن

المشترك حسيته يشبهه ..

عزوز : طيب لا تجيبين طاريه فاهمه

الجوهره فقلبها انا غبيه كيف ما فكرت انه متهاوش مع ناصر عشان كذا رجع
لنا .. كيف طافتني ؟؟؟؟ : اقول زووو ليه ؟؟؟ انت متهاوش مع ناصر !!


عزوز : هذي اللي تبغاني اقتلها هنا .. قلت لك لا تجيبين طاريه فاهمه والا لا
؟؟؟؟ بعدين وش هالدلع التافه ذا ؟؟ ها ؟؟


الجوهره ببلاهه : ها ؟؟

عزوز : صقها ما تسمعين زين ؟؟ اقولك وش ذا اللي زوووو ؟؟؟ شايفتني
حديقة حيوان ؟؟؟

الجوهره : ههههههههههههههههههههههههههه

عزوز : قايل نكته انا ؟

الجوهره تحاول تمسك ضحكتها : ههه لا بس هههه توني انتبه هههه


عزوز : وجع ان شاءلله انقلعي غرفتك ..

الجوهره طلعت تركض : هههههههههههههه

:
:








قصـر سلمآن .. أبو سالم ..


الكل طفش من الانتظار الساعه جت 12 بالليل .. حس ولا خبر .. أكيد فيه شي !!

سلـمى جالسه بالصاله اللي فيها ام دانه و نوره و ام سالم و دانه ..

سلمى : وراهم طولو كذا ؟ اخاف ان فيهم شي ؟؟

ام دانه تهديها : لا يا عمه توه متصل فيهم عمي يقولون زينه الحمد لله

ام سالم بفرح : من جدك يا ام دانه ؟؟؟

ام دانه تأشر لها انه كذب بس عشان ما يرتفع ضغط العجوز : أيوه أيوه ..

سلمى : أجل ليه ما رجعت ام خالد لهاللحين ؟

نوره : يمكن انشغلو بالاوراق والا حاجه .. (قامت وطلعت عند خالد ) الحين يجون يا جده


بالصاله الثانية المقابله لها الجد سامي وعياله الاثنين وابو سالم وسالم
نوره تنادي خالد اللي طلع وراح لها


خالد قرب : هلا ؟؟؟

نوره بهمس : فيصل وريتاج ناموا فوق بغرفة بتول ورانا ما نطلع للقصـر وننتظر
عمتي ونايف هناك ؟؟؟

خالد : اطلعي مع السواق .. عيب اترك جدي هنا و هو جالس ينتظر .. هو
سهران مع انه ما يحب السهر ..

نوره : طيب كيف اطلع ..؟

خالد : لحوووول يعني تبغيني اطلع واتركه ؟؟ خليهم نايمين فوق وين المشكله ؟؟ والا انتي طفشتي ..


نوره : خالد ؟؟ من جدك انت ؟ انت عارف اني متضايقه عشان نوف وعارف انها
غاليه علي مره بس جلستنا هنا وش

بتغير ؟؟ هناك أحسن .. بعيدن عمتي بتجي تعبانه من بيجلس عندها ؟؟؟



خالد : كلامك منطقي يا بنت .. لكن انتي عارفه جدي .. تبغين ادق على فارس يوديك ؟


نوره : ليه هو ماهو فيه ؟؟

خالد : لا طالع ..

نوره : لا خلاص انا بطلع وبآخذ معي ألماس و محمد والعيال .

خالد : اذا وصلتي دقي علي ..

نوره تاخذ عبايتها : ابشر ..


:

نوره طلعت تنادي الماس من فوق ..

دخلت الصاله اللي بالدور الثاني .. اللي فيها البنات ..

كان شكلهم غريب اول مره كئيبات كذا .. ؟

اول ما دخلت نوره ركضت لعندها لمو تسئلها عن نوف ..

نوره : لمو حبيبتي للحين ما قالو شي .. انا جايه اقولك تجين معنا القصر ..


لمو تبكي : ما ابغى اروح الا مع نوف .. كيف تبغيني أدخل بدونها (يزيد البكي )

نوره بهدوء تضمها : لمو حبيبتي نوف مافيها الا العافية هذا اغماء يصير لنا كلنا ..

بس المستشفى عندهم زحمه شوي

بعدين مو حرام عليك .. امك تجي مع نوف وما يلقون اللي تساعدهم .. يلا

حبيبتي امشي هناك ننتظرهم ..

لمو بحزن : يعني احتمال ترجع اليوم البيت ؟؟

نوره بابتسامه : باذن الله بس انتي ادعيلها .. يلا اخذي عبايتك ..

لمو طلعت حتى بدون لا تودع البنات .. نادت محمد وطلعوا بالسياره ..









طلع الدكتــور السعودي ومرافقينه من الملاحظه بعد مدة ماهي قصيررررره ..

الدكتور ريان : ابوها فيه ؟

نايف : لا بس انا اخوها ..

ام خالد جالسه تسمع ..

الدكتور : حياك الله .. تفضل معي داخل ..

مشى نايف وناصر معه لغرفة الدكتور وطلع من امه ما تدخل لانه ماهو عارف
الدكتور وش راح يقول .. !


قبل لا يدخلون المكتب ناظر الدكتور بناصر وكنه يقول وش يبغى هذا ؟ نايف
فهم عليه : ما عليه دكتور هذا كمان اخوها ..


ريان بابتسامه : حياكم الله ..

يبدا ريان يتكلم : أخ .. ؟

نايف : نايف معك ..

ريان : والنعم .. اسمعني يا اخ نايف .. انا مستغرب صراحه انكم ساكتين عنها ..

ناصر بخوف : وش فيها يا دكتور ؟؟؟

ريان يلتفت لناصر : اذكرو الله يا جماعه باين عليكم ان هذي اول مره تمر
عليكم هالحاله ؟

نايف : اي والله يا دكتور ..

ريان : على العموم تطمنوا البنت مافيها شي .. لكن بسئلكم هي مرت بصدمه
نفسيه ؟؟؟

نايف : كيف يعني ؟

ناصر وكن كل الامور تأكدت عنده عقد حواجبه (مثل ماكنت عارف انا سبب كل هذا )


ريان يشرح : يعني موت عزيز لا سمح الله .. او صدمة مقاربه لها ؟؟؟

نايف : لا يا دكتور محد توفى عندنا لكن هي بالكم ساعة اللي فاتو كانت مره

متضايقة وطول يومها وهي تبكي ..


حاولت اسئلها افهم منها لكن مثل مانت عارف البنات صعبه تاخذ منهم اجابه ..

ريان : هو في الحقيقه المفروض ما اجبرك تعرف وش اللي خلى اعصابها تتلف
لدرجة انها تفقد السيطره على نفسها

وعلى أجهزة التحكم عندها .. لكني أطلب منك انها تبقى تحت رعايتنا كم
يوم ..


ناصر وده يحكي بس هو وعدها ما يحكي شي واصلا حتى لو يقوللهم ما هو
نافعهم بحاجه .. فضل السكوت ..


نايف : طيب يا دكتور ريان يعني هي مافيها شي لا سمح الله ؟؟؟


ريان : تطمن .. مثل ما قلت لك .. اعصابها تبغى راحة تامة .. و لازم محد
يضايقها او يحاول يرفع نسبة الضغط


عندها .. لأن اذا تطورت الحاله راح تؤدي الى تشنجات مرحلية ..

ناصر بصوت مبحوح : طيب تقدر تشوفها امها الحين ؟؟

ريان : احنا عطيناها منوم ومهدئ وماراح تقوم من غير شر الا بكرة الصبح على
الساعه 9 او 10 بالكثير يعني دخلتها

ماراح يكون لها داعي .. ويمكن تتأثر الوالده اكثر ..

نايف : لازم تشوفها يا دكتور و تتطمن .. بس 5 دقايق ..

ريان : براحتك يا اخ نايف .. بس ياليت ما يكون بصوت او ازعاج .. الهدوء أهم حاجه

نايف يوقف ويصافح الدكتور : ولا يهمك أبشـر .. يعطيك العافية

ريان : الله يعافيك ..

طلع نايف عشان يقول لأمه ويفرحها ويريح بالها ..

لكن ناصر وقف على الباب ورجع للدكتور مره ثانيه

ريان يرفع راسه : آمـر ..

ناصر بتردد : ممكن سؤال يا دكتور ؟

ريان : تفضل ..

ناصر وهو مرتبك : اذا صاحبتها اللي سببت لها الصدمة تبغى تشوفها عادي ؟

ريان باستغراب ما مر عليه من أول : كيف ؟ يعني حضرتك عارف القصه ؟

ناصر بتردد : ايوه .. بس ما هي قصه لكن هي فيه خلاف بينها وبين أعز صديقاتها ..


ريان ما يدري وش يقول : والله ياخوي ماني فاهم حاجة .. لكن صديقتها هذي

لازم ما تشوفها نهائيا على الاقل الفترة الجايه .. لأن لو الصدمة كبيره راح ترجع
لها هالحاله

ومثل ما انت عارف هالاشياء نفسية يعني مالها علاقة بالشخص نفسه .. حتى
لو هو سامح ونسى الحاله تبقى ..


ناصر : الله لا يهينك يا دكتور وسامحنا على الازعاج


ريان : لا عادي حياك الله بأي وقت ..



سكر الباب ناصر وهو وده يصيح بأعلى صوته .. الله ياخذني وارتاح من تأنيب
الضمير .. الله لا يردني للبيت وترتاح مني نوف ..

كيف يعني ماراح اشوفها ؟ ماراح اسلم عليها ؟؟ ماراح امزح معها ؟؟ ماراح
تشوف وجهي بعد كذا ؟؟ ليه طيب انا وش سويت ؟؟؟؟

ليه هالعذاب ليه ..


استغفر الله يا رب .. يالله سامحني والله اني مدري وش اقول .. الاكيد اني
تعبان .. تعبااااان مره


:


كمل طريقه بخطوات مش ثابته كمل طريقه وهو فكره توديه وفكره تجيبه .. قرب
من غرفتها يبغى يناظر فيها لو بس يلمحها ..


قرب للشباك لكن ماهو قادر يشوفها لأن نايف واقف ومغطي عليها

وقف ناصر برا ..

انتبه فيه نايف اللي لاحظ عليه اشياء غريبه اليوم ؟؟ سفرته للدمام وسكوته
الغريب و صرخته لما طاحت نوف وجيته معهم ..

و سياقته السريعه للسياره وهم فطريقهم للمشفى .. تأخره عند الدكتور ..
نظرات عيونه .. الحزن اللي باين بملامحه .. !!


كل هذا خلت نايف يقول : ناصر ؟ وراك واقف هنا ؟ ما تبغى تطمن عليها ؟

ناصر وكنه ما صدق خبر : بس ..

نايف : من جدك انت ؟ تعال

ناصر دخل وقلبه من جوا ينبض بقوه .. حاول يكون طبيعي بس ماهو قادر .. دخل

لأنه حس انها فرصته الوحيده اللي يملا عينه من نوف من دون لا تبعد نظرها
عنه أو تهرب منه او

حتى يسبب لها صدمه ثانيه وثالثه ورابعه


دخل ماهو عارف وش يسوي ..


امها طبيعي تناظرها وتمسح على راسها وتطمن بالها ان بنتها بخير

ونايف طبيعي يملا عينه من نوف بحكم انها اعز خواته واقربهم لقلبه ..


أبغى اناظرها بس والله مستحي .. ناظرها النظره الاخيرة وهي نايمة بهدوء

وراسها لافته على اليمين و باين انها تتنفس بصعوبه .. ناظر بشكلها اللي

يوحي لك ان اللي نايمة بزر ..


ناظرها بسرعه و باس راس خالته : الله يقومها بالسلامه ..

طلعت امها وراه مع نايف ..

ام خالد : ابغى انام عندها .. والله هي تخاف .. كيف نتركها هنا لوحدها ؟

نايف : يمه وش دعوه تجلسين عندها .. ماهي حاسه فيك وراح تقوم بكره

الصباح الساعه 10 ووعد اجيبك قبل حتى ما تصحى من نومها ..


ناصر وده يقول روحوا انا مستعد اسهر معها الليل بطوله .. لكن !!


رجعوا بالسياره لقصر سلمان .. عشان ياخذ نايف سيارته اللي هناك ..

نايف يبغى يكلم ناصر لوحدهم شوي : يمه .. انزلي طمني اللي جوا .. احراج
جالسين ينتظرون ..


ام خالد تنزل : انت بتجي ؟

نايف : لا يمه .. بس قولي لجدي يطلع انتظره بالسياره ... ولا تصيفين يا قلبي ..

ام خالد: أبشر ..

: