[إشراقة أمل]

/


قصر ابو دانه


نجود تحوس في الصاله رايحه راجعه رايحه راجعه .. وعيونها متعلقه على المجلس .. والجلسه

الشعبيه اللي قباله .. اللي كان جالس فيها نايف وفارس وخالد .. بس تناظرهم وترجع .. وعيونها

مركزتهم على نايف اللي تشوف ابتسامته وهي بعيده

وتناظر باسلوبه وحكيه و ضحكه وكيف يأشر بيديه ويسولف ..

و كل ما يبتسم تبتسم معه .. !!!






وقفت السيارة البورش ونزلو منها البنات .. اللي مرو بجنب الجلسة



الهنوف والعنود : هاااااااااااي


....... : وعليكم السلام ..


نايف : عمي وعمتي مو فيه .. عند تبوله ..



فارس : انت وراك ماسك هالجمله من الصباح هههههههههههههههههه انا اقول لو تسجلها ازين


خالد : هههههههههههه


نايف انحرج وجلس يجمع وجهه : لا والله لان عمي موصيني خبرك المبزره خوافات ..


الهنوف : اي والله هالمبزره يخافو حتى من الهوا

فارس : تكفين يالقويه .. ناسيه اللي انحاشت ايام المزرعه من الارنب اللي مع ناصر ؟؟


نوف هنا دخلت بسرعه

نايف مستغرب : مين هذي اللي دخلت ؟؟

العنود : ههههههههه نويف

نايف وقف : علامها ؟؟؟

الهنوف بجديه : من اول ما ركبت السياره وهي كذا .. ؟؟

خالد : دلع بنات تلاقيها متهاوشه مع خويتها لانها ضربتها بالفاين .. يا سخف البنات

الهنوف والعنود ودهم يمسكونه ويعلقونه بالنخله

نجود تناظر فيهم .. واستغربت حركة نوف !!! وراها كذا ؟؟ اكيد فيها شي ..

طلعت من القصر بسرعه وهي تركض ..

ومرت بجنبهم بس ما حاكتهم

خالد : بشووووووويش لا تطيحين

نجود خففت ركضها : السلام عليكم

الكل : وعليكم السلام


دخلت لجوا بسرعه بنظرات دقيقه من نايف .. عارف ان نوف فيها شي واللي اكد له جية نجيد عندها ..


/
/





نوف دخلت غرفتها وجلست تصييييييييييييييييييييييييح ..

تبكي قهر ..


وتبكي من الغبن ..

وتبكي جرووووووووووح توها استجدت


تبكي وتبكي من اشياء كثير راح تتغير عليها بكره ..



تبكي من حظها .. وتبكي على كل حاجه حلوه راحت مع روحة ناصر عنها ..


لهالدرجه انا رخيصه عنده ؟؟


لهالدرجه ما كان يثق فيني ؟ ويدور على الزله مني ؟؟


لهالدرجه انا صفر على الشمال عند ناصر ؟


:
أبكي قهر وابكي من الغبـن والضيم
وابكي من طعون ٍ ' بقلبي ' قديمه
:


ليه يا ناصر وانت كل شي بالنسبه لي انت والله اغلى من نفسي وروحي .. وفيه اغلى من الروح ؟؟؟


نجود تسمع بكيها وهي تحت .. وكل ما قربت على السلم زاد الصوت أكثر وأكثر .. وش السالفه ؟؟ ربي يستر ..


جلست تضرب الباب على نوف لكن نوف مستمره بالبكي .. تحاكيها لكن نوف ما ترد عليها .. تناديها لكن نوف ما تلبيها

نجود خافت مرررررره .. حست ان بكي نوف هالمره مو زي بكيها كل مره .. حست ان اللي جوا مو بنوف وحده ثانيه

نجود : نويف حياتي افتحي وش فيك ؟؟؟

نجود : نوف افتحي .. تكفين اوجعتي قلبي ..



(نايف واقف على زاوية يبغى يعرف ايش فيه ؟ نوف وراها تبكي هالبكي اللي يخوف ؟؟؟ )



نجود تعبت وهي تضرب الباب جلست على الارض وقامت تحاكيها : نويف ؟ ردي علي ؟ بس
علميني ليه تبكين ؟ مين اللي مضايقك ؟

والله مافي شي يستاهل دموعك الغاليه ..




نجود ضمت رجولها لعندها وجلست تبكي مع نوف .. بكيها كان مره يخوف كن أحد ميت عندها ..

نجود & نوف : جلسو يصيحون




نايف ما خاف إلا مات رعب (هذولا علامهم ؟ وهذي للحين ما عرفت السبب وجلست تبكي أجل لو تعرفه وش راح تسوي ؟؟ احساسي يقول انه شي تافه) : علامها ؟


نجود انصدمت هذا ليه اوقاته كلها غلط فغلط ؟؟؟ : ها ؟


نايف : اقولك علامها تبكي ؟ وش فيها حبيبتي ؟

نجود ماتدري وش تقول : مادري ..

نايف : طيب وانتي ؟؟ ليه تبكين ؟

نجود استغربت سؤاله ما توقعته نهائيا : ما كنت ابكي .. كنت جالسه اكلم نويف بس شكلها نامت .. عن اذنك

نايف يبغاها تجلس ما يبغاها تروح : وتتركي نوف لوحدها ؟

نجود باحراج : اكيد لا بـــــــس

نايف : الحين اخليها تفتح لك ...

نايف قرب لعند نجود وصار قبالها .. يناظر بعيونها ويحكي مع نوف : نوف ؟ نوف حياتي افتحي
الباب .. اذا مو لي لنجود ..

نوف تحاول تكتم بكيها : ................


نايف : نويف قلبي افتحي ..

نوف توقف بصعوبه وتفتح الباب .. وترجع تجلس على سريرها .. ما حبت تكبر الموضوع اكثر من كذا ..

دخلت نجود وناظرت بنوف .. وعليها علامة استفهام .. ؟


نايف دخل وجلس بجنب نوف اللي ماسكه دموعها بالغصب : وش فيها حبيبتي زعلانه ؟

نوف نزلت دموعهااااا ورا بعض مره وحده : ..........




انا ادري ان اللي حصل شي مقسوم
لكــن .. قلبـي وش يخفـف .. عذابـه ؟

وآه ياقلبي ياللي من عنآ البعد محكوم
حكمٍ .. رضابه غصب لو ما رضابـه

دمعة عيون .. وعضّة ابهـام .. واهمـوم
وضيقة صدر .. وافكار حزن .. وغرابه



نايف جلس يمسح دموعها اللي وده يعرف وش اللي يبكي وحده زي نوف بهالطريقه هذي ؟؟

نايف : نوف حبيبتي انتي مو بصغيره .. انا عاذرك وعارف انك مانتي بقايلتلي السبب الحقيقي ورا

هالدموع . . لكن اسمعيني كويس .. ياليت تكلمي نجود وتقوليلها وش اللي ابكاك

وانا اذا احتجتيني بشي علميني .. والله لو اعرف منو اللي مزعلك لأقتله ولا اشوف دموعك زي

كذا .. ولا يشوفك خالد زي كذا مو حلوه بحقك ..


/

/

/







في المستشفى




الاثاث الراقي والجو الهادي .. والسوالف الحلوه تقول ان هي مو بأي عايله ..

صحيح ان كل واحد منهم راسم حاله .. وعامل لحاله بريستيج خاص فيه .. الا ان كلهم قلوبهم بيضا ..

تعكس طيب معدنهم


بتول : انا زعلانه على البنات .. اليوم طلعتي من المشفى ولا جو ..

ام دانه : والله كلهم من اكبرهم لي اصغرهم جايين من الكليه تعبانين ما قدرت اجيب الا ريومه ..

واصلا راح يستقبلونك اليوم فالقصر ..

بتول : لهم وحشه وربي .. والقصر له وحشه .. ياااااي كرهت شي اسمه مستفى وادويه وابر

الجد سامي : اللي يسمعك يقول كنتي تحبينهم ..

بتول تفشلت : ههههههههههههههههه شوي مو كثير

الجد سامي : اعذريني يا بنتي اليوم ماراح اجي للقصر استقبلك .. انا وعمامك عندنا شغل كثير في
الشركه .. لكن عماتك وبناتهم بيقومو بالواجب

بتول بحيا : تسلم يا جدي ما تقصـر ..

فواز : يلا يا ام دانه انتي والريم خلينا نمشي .. احطك في البيت واطلع للشركه ..

ام دانه : ابشر ..



/
/




شقة ابو تركي

المكان نظيف مره .. والسبب ان منيرة بنت سلمى تحب شي اسمه نظافة وتعشقه ... رغم بساطة
الاثاث

ابو تركي جالس على الارض وفارش سفرته وقهوته وشايه وجالس يفكر .. بس بإيش ؟؟؟


يفكر بتركي ؟؟ قلبه يوجعه كل ما يذكره .. ماهي عاده له انه يتركهم كذا اياااااااااااااااااااااااااام واسابيع
بدون لا يطمنهم عليه ..

ويا حرام ابو تركي ماهو قادر ينقل احساسه لزوجته لا تخاف هي بعد .. هي كذا وكذا تحاتيه و
تسولف فيه وتهذري به



/

الجوهره : وش فيه الحلو يفكر ؟؟؟؟؟

ابو تركي يبتسم لبنته : فيك يا قمر

الجوهره تقهوي ابوها : ههههههههههه يا حظي والله كانه حقيقه

ياخذ الفنجال منها : عشتي ..

الجوهره : يبه .. ليه ما ترجع العلاقات مع جدي ؟؟

ابو تركي بصدمه من جرأة بنته .. صار له سنين محد يتجرأ يفتح هالملف معه : الجوهره .. ما احب
احكي فهالموضوع

الجوهره تقرب لأبوها بنية انها تقنعه : لييييييييه طيب ؟؟


/
/

\
\








طيب وين ناصر من هذا كله ؟






في الشرقيه .. ( الدمام ) ..


ناصر جالس بالفندق .. يناظر من البلكونه .. و شريط احداث اليوم يمر فوقه ،، عزوز / نوف
نوف / عزوز

عزوز / نوف

نوف : عزوز



وده يشق ثوووووبه .. غدرو به اليوم .. اهانو قلبه اليوم .. حطمو حياته اليوم .. وهو ساكت


طيب وش جايبني الشرقيه؟؟؟ ايش معنى الشرقيه .. والله اني امشي بلا عقل وافكار ..



ليه يا نوف ليه .؟ اول مره اشوف حالي منهار زي كذا .. الزقاير ما اشربها وخليتيني اشربها



حقد ما كنت احقد .. ! كره ما كنت اكره .. !

وخليتيني اكره عبدالعزيز


حط يديه على راسه لما ذكر عزوز وسالفته اللي نساها لما دخلت نوف فيها



كل تفكيره صار بنوف كل تفكيره ابتعد عن عزوز وراح لنوف

بدال ما يسمع منها اهان كرامتها

وبدال ما ينتظر منها اي اجابه تشفع لها حكم عليها بالاعدام

وين الحب ؟ ووين العشق ؟ وين الوفا ؟ ووين التسامح ؟

كل هذا راح مع الهوا .. ؟ كل هذا ايش يسمونه اذا ما كان متعدي مرحلة العشق ؟؟


يا ترى وش تسوين الحين يا نويف ؟؟

الاكيد انك تبكين .. وتلعنيني بالدقيقه الف مره .. الاكيد انك كرهتي الساعه اللي حبيتيني فيها


ياربي انا وش سويت فيها .. ليه ما سمعت لها .. ليه ابعدتها عني لما ركضت تحتمي فيني ؟؟؟

بس هي تحبه ؟؟ ايوه تحبه .. الجوهره تقوله وعزوز يقوله ..

بس نويف ما تحب الا انا .. كيف اصدقهم واكذبها ؟؟.

لكن انا انا شفتها معه بمكان واحد وغرفه وحده و ....

انا ان جلست هنا راح يطق فيني عرق واموت

سحب جواله ومحفظته اللي على الطاوله وطلع بسيارته يشم هوااااااااا


//