[سكون الصمت]

اقتباس الله يعطيك العافية سكون الصمت في انتظار ما تبقى

الله يعافيك ,, مشكور وماتقصر على متابعتك ,, اتمنى متابعتك دائما واتمنى ان ارى تعليقاتك على الشخصيات ,, ’’ تحياتي ,,


.................................



الجزء الخامس

شيخه كانت تركض ورى شهد اللي انزلت وراحت بيتهم : شهد .... شهد !!!!
ام خالد وام شهد : شصاير .. شفيكم ؟؟
شيخه : مافي شي لاتحاتون
ام شهد : ماادري هالبنت شفيها صارلها مدة مو طبيعيه .. اكلمها تبجي وكله حابسه روحها بالغرفه
روحي لها شيخه .. شوفوها
وقعدت تبجي
ام خالد : لاتبجين ياخيتي .. روحي يما شيخه شوفي اختج ..
شيخه كانت مية شي وشي براسها .. شفيه صلاح على البنت .. مهما تكون هذي ببيتهم .. وليش ام شهد تقول انها من مدة حالتها مو طبيعيه ..
البست شيخه شيلتها وعباتها وراحت بيت شهد
اما ام خالد فتمت تهدي ام شهد الين ماقدرت فعلا ..

فوق وتحديدا في غرفة صلاح
صلاح كان حاط يده على على سكسوكته ( لحيته ويقال عنها قفل بالخليجي ) ويطالع الدريشه برى
شافها شلون تبجي وطالعه من البيت عقب شاف اخته رايحه صوب بيتهم
استحى من روحه .. مايدري ليش تصرف هالتصرف .. حس انه اللي سواه غلط بس صورتها وهي واقفه والشباب عند بيتهم ماتفارقه كلش .. حس انه مو بس يكرهها الا يكره حتى خواته يكلمونها .. ومع هالمشاعر يحس انه يبي يحميها
من عقب ذيج السالفه كان دايم يي الليل مبجر بس عشان يراقب بيتهم
مسك راسه بعصبيه وجنه يبي يطلع هالبنت من تفكيره ..
اهيا عندها ام وابوا .. اهما متكفلين بتربيتها .. انا ليش ادخل روحي .. بس مابي خواتي يعرفون هالاشكال
وللحظة فكر صلاح انه يمكن يكون ظلم البنت .. يمكن اهيا مالها شغل بكل هذا
غمض عيونه وهو يتذكر شكلها وهي تشوفه يتكلم بنظرة ازدراء واحتقار .. شلون كانت عيونها مليانه دموع وويهها كان احمر من الاحراج ..
خذا تلفونه بعد ماتعب من التفكير وطلع من البيت ماله خلق ربشه شيوخ .. اكيد تبي تعرف السالفه واهوا مو ناوي يقول لها شي لانها كونا وبتفضحه بالبيت

طلع من غرفته وراح للمطبخ وطلع من باب المطبخ الخارجي
منيرة اللي كانت تسوي عصير برتقال : صلاح ؟
صلاح وقف من غير لايلتفت لمنيرة : شتبين ؟
منيرة : بسم الله .. شفيك متنرفز ؟
صلاح : اووو ترى مالي خلقج
وطلع وخلاها
منيرة : شفيهم هذيل كل من يزعل ويعصب بروحه .. ناس مو صاحيه
وتكلم الخدامه : شوفي الفرن مو تنسين انا بشوف شيخه تساعدني بالسفرة
وطلعت منيرة من المطبخ ولقت امها وام شهد قاعدين
منيرة : عيل وين البنات ؟
ام خالد : طلعت شيخه مع شهد بيتهم
منيرة باستغراب : متى محد قالي ؟
ام شهد : روحيلهم يما .. مانتي غريبه البيت مافيه احد ترى
منيرة : مم خل ادق عليهم .. عندج رقم شهد خالتي ؟
ام شهد : أي يما . هذا رقمها اليديد ..
ودقت عليه منيرة وردت عليها شهد


الطرف الثاني
شيخه : شهد .. اذا بتمين تبجين ماراح اقدر اكلمج جذي ولا افهم منج شي
شهد وهي للحين تبجي : معذور اخوج يقول هالكلام .. معذور
شيخه : يخسي ... اذا انتي عادي عندج انا لا .. سمعي شهد انا ادري انج متضايقه والله لو انا مكانج جان تضايقت بس دخيلج ترى صلاح طيووب وايد .. يمكن كان يتغشمر .. او ...
شهد : لاتكملين شيخه .. ماكان يتغشمر .. شيووخ ابي اقولج كلشي لاني احس ابي افضفض حق احد وماعندي غيرج اثق فيه
شيخه بابتسامه : وهذا اللي ابيه
ويدق تلفون شهد ..
شهد : هذي امي .. هلا يما
منيرة : يالخاينه انتي وياها وين رحتوا ؟
شهد تضحك وتمش دموعها : هههه بعد قلبي الله .. احنا بالبيت تعالي
شيخه بصوت عالي : منوور لاتييين فيه اسرار الصراحه .. انتي خلج بطباخج ولما نخلص بنيي
شهد : لا انا ماني يايه ..مراح ادش البيت مرة ثانيه
شيخه : مو على كيفج .. منور احنا يايين الحين
شهد : شيخه الله يخليج لاتحرجيني اكثر
شيخه تكلم منيرة : اقولج صلاح هني ولا طلع ؟
منيرة : لاطلع توه
شيخه : انزين عيل الحين بنيي
وسكرت التلفون
شهد : ماااااني رايحه يعني مانييي رايحه لاتحاولين
شيخه : صلاح طلع .. وانا مستحيل احطج بنفس الموقف شهوده .. تعالي نتعشى واوعدج نرد مبجر بعد شتبين
شهد تتنهد : زين ..
شيخه : اول قوليلي شسالفه ؟
شهد : بعدين .. امشي الحين نروح لمنيرة وعقب اذا صار وقت بقولج
شيخه تبتسم : اوكيه
راحوا البنات وتعشوا كلهم يميع .. وكانت القعده ماتتفوت .. ضحك ووناسه ..حاولوا البنات يطلعون شهد من جو الحزن اللي اهيا فيه .. قعدوا يسولفون عن شغلات وايده الين ماحست شهد ان الوقت تاخر ويمكن صلاح يوصل فماحبت تطول عقب العشى على طول ردت البيت عشان ماتصادف صلاح مرة ثانيه

بهاليوم ..
شهد ماكانت تقدر تنام ...طول الليل كانت تبجي .. تبجي حسرة وندم على اللي سوته بحياتها .. قامت ولبست ثوبها وصلت لربها ركعتين .. وقعدت تدعي الله يثبتها ويهديها ويدليها على طريج الصح
كانت تدعي ربها بكل قلبها .. وتبجي ايام ضيعتها بمعصية الله
وصورة صلاح ماغابت عن بالها وهو محتقرها ..
ياربي هذي توبه لوجهك يارب .. ساعدني وثبتني يارب
ونامت عقب ماتخذت قرار انها خلص بتبدى حياة يديدة .. بس هالمرة حياة قريبه من ربها وعبادته وبعيده عن أي شي يغضبه
بس شي واحد ماقدرت تشيله من بالها .. صلاح ..
نامت ونظراته لها كانت كفيله بدموع بللت قلبها وجروحها

الساعه 2ونص بليل في بيت عزوز
الاثنين نايمين بالديوانيه عزوز وخالد
خالد قدر ينام بعد ماخبر عزوز بكل شي طبعا اما عزوز ماقدر يناام
كان شايل هم خلود .. مايحب يشوفه مجروح ومايقدر يسويله شي .. تكلم معاه وفهمه ان اسما بدالها الف بنت ودام اهيا باعته بريال ثاني .. اهوا لازم بعد يبيعها ويرخصها ..
اهم شي انه مايعطي لموضوع مثل هذا أي اهميه .. بس بعد الجرح يظل جرح .. خالد وفي لقلبه وصاق لمشاعره لاسما .. بس الظاهر هالوقت مافيه احد يحب بصدق .. عشان جذيه لازم مانتعلق باحد ..
يت صورة امه في باله .. شلون كانت حياته حلوة يوم كانت عايشه .. صحيح كانت تنهان وايد من ابوه بس بعد كان يحس بطعم العايله ولو كانت مهشمه بعض الشي
امينه ام عزيز كانت صبورة حييل وتحب ريلها .. فكانت تتحمل كل الاهانه والطق والاهم اهوا عزوز بحياتها
ابتسم لانه عالاقل عاش لحظات حلوة بحياته .. تذكر شكثر العايله حلوة .. وده لو يعيش هالشعور ولو مرة وحده بحياته
التفت لخالد لقاه نايم وتلفونه يرن
خذا التلفون شاف اسم صلاح فيه
عزوز : هلا صلاح
صلاح : هلا عزيز .. ها خلود نايم ؟
عزوز : ايه نام قبل ساعه جذيه
صلاح : زين الحمدلله لان امي تحاتيه ترى للحين مانامت هاك كلمها تبي تكلمك
ام خالد : هلا يما عزيز
عزيز : هلا الغاليه .. لاتحاتين ولدج كاهو نايم على الكنب ومخليني انا عالارض
ام خالد تبتسم : طمني ياوليدي .. شفيه ؟
عزيز : والله شقولج .. مشكله خلود انج مدلعته واايد .. يعني شوي تضايق مع واحد من الربع والسالفه عدت على خير صدقيني .. وباجر بتشوفينه عندج وتلوع جبدج منه
ام خالد : ويي يعلني ماانحرم منكم واشوف عيالكم وازوجكم بيوم واحد قول اميين
عزيز يضحك : لااااااا ويين .. انا خليني .. ابي يحلالي الجو ماتدلعنا مثل هالدب
ام خالد : ههههه ياعلني فداك .. الا انتا الدلال كله لك .. يله يما اخليك الحين ترتاح وحطوا بالكم
عزيز : ان شالله الغاليه تصبحين على خير
ام خالد : وانتا من اهله مع السلامه
بوخالد اللي قاعد يمها : ارتحتي الحين .. نقدر ننام ؟
ام خالد : ايه الحمدلله


يوم الخميس
.. كان تلفون شيخه يرن للمرة الالف
بصعوبه مدت ايدها ورفعت التفون وشافت المتصل وكانت مها
وردت بصوت كله نعاااااااس : الووووووووو
مها بعصبيه : الووووو ياخياس النوم انتي وينج ؟
شيخه : الله ياخذ اليوم اللي صرت فيه بنت خالتج .. يااختي ماعندج احساس بالناس .. تقومين من فير الله مع الدياي .. خلي العالم تنااام حرام عليكم
مها وفيها الضحكه : قوومي ... ترى ناصر ياييكم الحين بيسلم على امج لان طيارته بعد ساعتين
شيخه وجنه احد صب عليها ماي بارد نقزت بسرعه : منو وووو!!!
مها تصرخ متعمده : نااااااااااااااااااااااااصر
شيخه : حلفي !!
مها : والله .. يله ترى تلقينه قريييب
شيخه : اوكي يله باي
سكرت منها مها وميته ضحك .. شيخه فضحت روحها من غير لاتحس
اما شيخه وجنه بيروح عنها الباص ايام المدرسه .. سبحت ولبست بربع ساعه وانزلت تحت ولا تشوف الكل قاعد
ياسلام وانا اخر من يعلم يعني
شيخه : صباح الخير
منيرة وام خالد وبوخالد : صباح النور
ام خالد : شيووخ قاعدة مبجر اليوم .. جعله دووم يارب
منيرة وهي فاجه حلجها وعيونها وتطالع ساعتها : مااصدق روحي ياربي انا اكييد بحلم .. شيوخ قاعده من الصبح سجلوها بالتاريخ العرببي والميلادي
شيخه : هي هي هي سخيفه
وتقعد بين امها وابوها وتصب لروحها جاي
شيخه : هاا شيابنا شلونكم .. عيل وين الشعب ؟
ام خالد : عزوز وخالد بالطريج وصلاح بغرفته بعد ماقعد روحي قعديه الريال بيي الحين فشله
شيخه بقلبها الحين انا سألت عن اخواني .. شكو عزوز !!
وتشجعت تسأل وايدها على قلبها تبي تتأكد : أي ريال ؟
ام خالد : ناصر ولد خالتج بيي يسلم علينا اليوم طيارته
شيخه : لا انا مابي اقعد صلووح .. لاني ان شفت شيفته بقلب الدنيا عليه
منور روحي انتي الله يخليج
منيرة : ليش ؟
شيخه بشويش : اقولج بعدين
منيرة : هاا .. سالفه امس ؟
شيخه : شدراج ؟
منيرة : كلمني صلاح
شيخه : اهااا .. عيل روحي قعديه عقب تعالي قوليلي السالفه
منيرة قامت تقعد صلاح وشيخه قربت يم ابوها وهي حاظنه ايده
شيخه : يباااا . احم يعني ممكن اطلب منك طلب صغيييررررون
ابوخالد : احنا مانخلص من طلباتج .. آآمري
شيخه : يعني احم .. انا كملت ال18 شرايك يعني لو ..
ابوخالد : لاتكملين سواقه مافيه
شيخه كانت عارفه انه ابوه بيرفض .. مايحب بناته يسوقون بس توقعت عالاقل يعطيها مجال تقنعه : ليششش !!
ابوخالد : شيوخ فيه سايق يوديكم وييبكم لاتعلييني
شيخه تشوف امها عشان تتكلم
ام خالد : هذا ابوج تعرفينه ...انا مالي خص
شيخه فرت بوزها ... مافي حرية بهالبيت .. ياربييي الحين شنو فيها اذا سقت كل البنات يسوقون وبعدين منور خوافه انا عادي اسوق .. شبيصير يعني ..

شوي ويوصلون عزوز وخلود وقعدوا بالديوانيه وصلاح لحقهم
خلود : يمااا .. فيه شي ناكله نبي ريوق
ام خالد : قومي يما شيخه سوي لاخوانج ريوق
شيخه ماتبي تعتفس كشختها وحبيب القلب في وصول : منور قومي انتي الله يخليج
منيرة : سوري .. هزي طولج شوي ودش المطبخ مو كلشي على راسي
شيخه : يالخايسه ماتقدرين الظروف
منيرة : ههه أي ظروف تعالي !!
وانحاشت شيوخ المطبخ وودها تكسر المواعين .. اووف مو وقته
منيرة : شيووخ .. انتي شسالفتج ؟
شيخه ارتبكت : أي سالفه ؟
منيرة : امس مع شهد ؟ شصار ؟
شيخه تنهدت وجنه ردت لها الحياة عبالها بتقولها ناصر .. ماتدري ليش تحس روحها مفضوحه: شنو قالج صلاح ؟
منيرة وهي تساعدها : قالي ان دخل عليكم وهو مايدري قولي لشيخه تعتذر من البنت اللي معاها لاني ماشفتها
شيخه طلعت عيونها : بس !!
منيرة : أيه
شيخه : معقوله ماقالج انها شهد
منيرة : لا .. انا مامشت علي السالفه بس اهوا كان مرتبك ومو عارف شيقول
شيخه : شوفي .. اخوج قليل الذوق طرد شهد من بيتنا
منيرة تشهق : حلفي !!
شيخه : مو طردها بالمعنى الصريح ... بس قط عليها كلام
منيرة : امووت واعرف ليش هالنظرة لشهد ؟
شيخه : البنت بجت مسكينه وراحت بيتهم وانا لحقتها .. تبين الصراحه كسرت خاطري صج انا ماكنت متقبلتها في البدايه بس حسيت اني ظلمتها .. ماعندها احد يعلمها واللي ونسني قرار حجابها حسيت انها تبي تتغير بس مو عارفه شلون وتبي احد يساعدها
منيرة وهي تطقها على جتفها : عشان ماتحكمين على الناس من الظاهر شيووخ
شيخه : ويوم رحت عنها البيت تخيلي كانت تقولي معذور اخوج بالكلام اللي قاله بيني وبينج استغربت لو انا مكانها جان سبيته وماخليت شي ماقلته عليه
منيرة : وماسألتيها السبب
شيخه : سألتها وكانت بتقولي بس انتي دقيتي وقالت بقولج عقب
منيرة : الله يهديه صلوح .. فشلنا مع البنت .. بس تهقين صلاح ليش يسوي جذي
شيخه : ماادري .. خل يولي الصراحه بط جبدي بس حلوة سالفه الاعتذر شكله افتشل من تصرفه
منيرة : ايييه
وتلتفت لين الدريشه .. شكله ناصر وصل
شيخه ركضت بسرعه : اشوووف
كان ناصر واقف يم سيارته والشباب واقفين يمه ويسولفون ويضحكون
شيخه كانت تشوفه بنظرة حالمه ... ولا شعوريا عيونها تنتقل لعزيز من بين النظرات بس تجبر عيونها على حبيب القلب و تشوفه شلون يضحك ويسولف
اليوم مخفف لحيته ولابس كاب وجينز وتي شيرت ابيض وباينه عضلاته وشكله صج صج كان كووول
منيرة : يله شيوخ كلهذا تشوفين .. ترى البيض بيحترق
شيخه : ييي .. زين زين ..
والقت نظرة تفحصيه على ناصر عالسريع ورجعت تشوف كل شي زاهب

تريقوا الشباب عقب دخلوا عند ام خالد وبوخالد
خالد : سولنا درب ..!!
طلعت منيرة وشيخه .. وهي بوزها شبرين :.. ليش نطلع لازم اللزقه يدش معاهم يعني !!
منيرة : ههههه حبيبتي .. اهوا فرد من العايبله حاله حالج
شيخه : اخاف صج !!! ..

بالصاله
سلموا الشباب على ابو خالد وام خالد
ام خالد : هلا وغلا بعيالي .. حياك ناصر تفضل
ناصر يسلم على خالته ويبوس راسها : زاد فضلج خالتي .. ماقصرتوا والله .. جذي بتأخروني ترى بتطير عني الطيارة .. انا ياي اسلم .. خليتوها ريوق وجاي .. جذي نهون ترى
خالد : اقعد شوراك طيارتك تو الناس عليها
ابو خالد : ها ياولدي .. شكثر بتم هناك ؟
ناصر : شهر علما اخلص اوراق التخرج وبييكم .. ان شالله
ابو خالد : الله يسهل ان شالله .. ويوفقكم
ام خالد : عاد مايبيله .. بس تطب الكويت .. بنلقالك ذيج البنت السنعه ونزوجكم ثلاثتكم بيوم واحد
ناصر : لا عاد انا زوجتي زاهبه ومنقيها على ذوقي
عزوز يشوفه بنظرة .. شقصده هذا اخاف حاط عينه على شيخه بس ...
ام خالد : ويييه انتا بس تعال ورد بالسلامه ومن ثاني يوم اخطبها لك
عزوز : يما وبطريجج .. اذا لقيتي وحده عانس ميته عالزواج .. زوجي ولدج خالد خلنا نفتك من هالدلع
يمكن يلاقي وحده تدلعه وتفكنا
خالد : لا خلص .. عفنا الجنس الناعم احنا
ناصر : واحد يعاف الجنس الناعم ويا ويهك .. اقول خالتي وين البنات خلني اسلم عليهم لاني ماشي خلص
ام خالد : قوم يما صلاح ناد خواتك قولهم يلبسون ويون
صلاح قام ومو بخاطره يروح بيشوف شيخه وهو ماله خلق اسئلتها : ان شالله
قام صلاح ونادا البنات بسرعه ونزل
شيخه كانت تمشي شوي وتحاول تخبي دموعها .. ياويلي الحين بجي انا راح انفضح .. شيوخ ثقلي الريال ماهو طاير شهر وبيرد
منيرة كانت عاديه .. نزلت اهيا وشيخه اللي من الارتباك والخوف ... كانت تفكر ان اليوم ناصر يايب لها هديتها .. شلون بتاخذها شنو بتقوله وشنو بيقولها .. شلون بتقدر تسيطر على روحها يدام اخوانها
اول ماوصلوا الصاله ارتفعت عيون شيخه مع ابتسامه تهبل لناصر
وجنها ماشافت غير ناصر .. سلموا وقعدوا
ناصر : ها شيخه ومنيرة .. ماتوصونا على شي من امريكا
منيرة : بالسلامه ان شالله ..
شيخه : سلامتك ناصر
عزوز بقلبه : قومي قعدي بحظنه بعد ..
عزوز وعينه عليها من اول مادخلت كان وده يقوم يكفخها على هالابتسامه .. ماتحترم اخوانها وابوها اللي قاعد ويتغازلون جدامنا .. شكلها تحبه .. اكييييد تحبه .. من عيونها يبين
كان يطالعها ولا هامه احد ... سلامتك ناصر ..!!! هيين ياشيوخ
نزل عيونه وحاول يلهي عمره باي شي لان مايحب يهتم في هالبنت يحاول كثر مايقدر ان مايفكر فيها ولا شعوريا يلقى كل اهتمامه اهيا .. ويرد يكرر بقلبه .. انت مالك شغل شيخه مثل اختك وبس ..
ناصر : شيوخ .. على وعدنا ... موتنسين
شيخه ماعرفت أي وعد يقصد بس ماحبت ترد ابتسامته اللي تذوب : اكيييد
منيرة تطقها : أي وعد ؟
شيخه بشويش : بعدين اقولج
هني قام ناصر وسلم على الكل وطلع .. واللي قهر عزوز نظرات شيوخ له وهو يقول بقلبه .. شناطره بعد روحي لحقيه.. وده ييرها من ايدها ويصعدها فوق .. بس طلع مع الشباب وسلموا على ناصر وتم اهوا بالديوانيه قاعد مع خالد
في الصاله
منيرة : شسالفه الوعد ماقلتليلي ؟
شيخه : ششش لايسمعج ابوي .. قومي فوق
وصعدوا الصاله وقعدوا وقالت لها شيخه عن السالفه اللي صارت باليخت والسوق
منيرة : ممم شيووخ ليكون اللي ببالي صج ؟
شيخه ابتسمت : ماادري ..!!
منيرة : ولو ان ناصر احسه غامض بس فاجأني شعوره .. ماتوقعت ان بيحب يوم من الايام ومنو .. شيووخ !!
شيخه : فضحيني انتي بعد .. لاتطلعين اشاعات .. مجرد احساس بس
منيرة : زين عيل ليش ماعطاج الهديه ؟
شيخه : ماادري ..
منيرة بابتسامه : يله كلشي يبين بعد شهر
شيخه : صح

قامت شيوخ تدق على مها وتعطيها اخر الاخبر وهي تحاجيها
مها : ياااااااااي اخوي رومانسي وحركااات .. ماستحى من اخوانج والله
شيخه : هههه .. ماادري ويهي قلب الوان .. حسيت كل الانظار علي تخيلي
مها : ياعيني عالحب ..
شيخه : اقوووول جب
مها : هههههههههه لا تدارين مشاعرج . .الحب مو عيب
شيخه : اقول مهاوي .. شرايج ازوجج عزوز .. ونفتك من شركم انتوا الاثنين
مها : اخخخ ياليت .. وفي احد يلاقي مثل عزوز ويرفض .. ياختي يوم شفناه بطلعه البحر هالريال شكله جنتل وفوق هذا حلو مراح اقول لا ترى
شيخه : بلل .. البنت ميته عالزواج .. ماصدقتي
مها : والله اذا ياني واحد مثل عزوز .. طبيبعي بموت عالزواج
شيخه : صج الطيور على اشكالها تقع .. الله لا يبلينا بس
مها : ههههههه .. اموت واعرف انتي ليش تكرهيه
شيخه : وانا كل ماكلمت وحده قلتولي ليش تكرهينه .. يعني ولا عمره سوالي شي زين عشان اذكره
مها : بس بعد مااذاج بشي ترى .. الصج ينقال
شيخه : جذي كره من الله
مها : الحمدلله والشكر عقد طفوله هذي
شيخه : انا قايله يوم برتكب جريمه يافيج يافيه
مها : هههههه اقول ترى انا قريبا بصير اخت ريلج احشميني
شيخه : ههههههه فضحيني بعد بالسي ان ان .. لاتروجين اشاعات الله يخليج
مها : زين زين .. يله بسكر واكلمج بعدين مامي تناديني
شيخه : ياشين السرج عالبقر .. اوكيه يله باي
مها : بطوفها لج بس لانج مرت اخوي ... باي
شيخه : يالخــــ ـــــ
ومداها تكمل الا سكرت التلفون مها بويهاا
اضحكت على هالتفكير .. الله متى بيي هاليوم بس متى

نفس اليوم بليل .. كانت ماسكه كوب حليبها كالعاده وكل لحظة حلوة جمعتها مع ناصر كانت يدام عيونها
تتخيل شنو الكلام اللي بيقوله لها وبيوفي بوعده لها ولا لا ..
امسكت دفترها وكتبت فيه

عيونك اخر آمالي وليلي اطول من اليم
كيف القى كلام عذب يوصف دافي احساسي
عشقتك قبل مااشوفك وشفتك صرت كلي حلم
ابي رمشك يغطيني وابيك اقرب من انفاسي
انا من كثر مااحبك ابيك كثر رمل اليم
وابيك فوق الناس وابي ماينحني راسي




مر شهر على الاحداث السابقه
شيخه ومها داوموا كل وحده مرتبشه بكليتها والدوام اليديد واتصالاتهم صارت عالسريع
منيرة ماخذه مواد وايد هالكورس لان كورس تخرج ولاهيه بدراستها
شهد مع بدايه سنه رابعه ثانوي .. كانت مفاجأة البنات فيها وبحجابها وتغيرها غير متوقعه .. رفيجاتها انتقدوها بس عدد حلو من البنات والمدرسات شجعها ووقف معاها وهالشي رفع معنوياتها وايد
علاقتها بمنيرة وشيخه كل مالها وتصير للاحسن .. حتى مها صارت من اعز صدقياتها
صلاح بعد مابدت السنه ماعاد ينشاف .. يبي يب نسبه ويدش هندسه طيران ويدرس بره وهذا كان طموحه من يومنه صغير
خلود نسى تقريبا اسما وبدى يعيش حياته من يديد بمساعده عزوز طبعا اللي كان يبين عليه الراحه ولكنه من الداخل ناقصته اشيا كثيرة واولها اهي الراحه اللي مالقاها في بيتهم ويحس انها في بيت خلود رفيجه لكن مو عارف مصدرها




اليوم كانت يمعه الاهل في بيت الخالة العوده فاطمه
حصه قاعده يم امها على اليسار وفي بدايته اشهرها الاولى للحمل ونفسيتها زفت كانت يايه بس عشان امها ولا هي مالها خلق شي
خاله ناديه : الله يعينج ياام خالد على حصوص عاد .. الحين ماتتحاجى
حصه : والله مو مني ياخالتي
خاله فاطمه : معذوووره ياابنيتي .. الله يلوم اللي يلومج كلنا مرينا مثلج
ام خالد : بس عاد حصوص تتدلع شوي
حصه : ماادلع حسوا فيني ..
بدريه اخت مها : هههههه حاسين فيج لا تقلبينها مناحه الحين

في الجانب الاخر
كانوا البنات كلهم متيمعين
مها ومنيرة وشيخه وبنات عم مها .. هدى وليلى .. هدى عمرها 14 سنه وليلى بعمر منيرة
مها : بناااات .. عندي لكم خبر احم احم
منيرة : شعندج ؟ قولي ام الاخبار
مها وعينها على شيخه : الدكتور ناصر بيوصل باجر ..
محد من اللي قاعدين كانت متلهف غير ثنتين ليلى وشيخه وثنتينهم نطقوا بوقت واحد : صج !!!!
مها : ههههههههههههه شفيكم ؟
شيخه اتفاجءت بليلى .. هذي شتبي .. يماما ناصر حقي مو لج انتي بعد مابقى غير عيوز النار
ليلى : يحيليه .. واخيرااا بتنور الكويت والله
شيخه .. هذي مصختها : اكييد بتنور لانها هاليومين ظلمه خرمس .. ماادري منو مظلم علينا
مها تطالعها بنص عين وعقب ضحكت ومنيرة تقرصها عشان تسكت
شيخه : انا بروح عند الحريم احسن
راحت شيخه وهي بتموت .. مابقى غير ليلى بعد ..
وانتهت القعده على سوالف ووناسه كالعاده ...

اليوم المنتظر
كانت العايله الكريمه كلها تنطر الدكتور ناصر يوصل
الكل كان بالمطار يترقب وصوله ... واثنين كان قلبهم يدق ليلى .. وشيخه
شيخه كانت تنطر هاليوم من زمااان .. شلون بتشوفه .. وشنو بتقوله !! تحس الحجي بيضيع اذا شافه بنظرته اللي تموت عليها وابتسامته اللي تذوب ..
بعد مااعلنوا ان الطيارة وصت ... كانت الانظار كلها صوب البوابه وفرحه الاهل كلها تترقب بس دخول ناصر

دقايق مرت ولا ناصر كان داش يير عربانه الشنط وعلى وييه ابتسامه تيين
الحريم كانوا يببون والبجي والدموع .. صج سنين دراسه تستاهل هالفرحه كلها
شيخه خنقتها العبره .. لكنها كانت واقفه بعيد شوي يم امها وخواتها والشباب كانوا طايرين بناصر ..
الجو كان ربشه فعلا .. والتهاني من كل صوب

سلم على الكل ورجع الجميع بيت الخاله ناديه اللي كانت مسويه عزيمه عشا كبيرة عشان ولدها


بعد اسبوع
الساعه 11
الجامعه
منيرة كانت تيمع كتبها بعد ماخلصت محاضرتها وماحست الا بواحد يناديها
فيصل : احم .. صباح الخير منيرة !!
منيرة استغربت منو اللي يعرف اسمها رفعت راسها : نعم !!
فيصل : ممكن .. نتكلم !
منيرة خزته وعقب قالت : فيه شي يخص المقرر ؟
فيصل : لا .. يعني ممكن نقعد شوي وو
منيرة قاطعته : اسفه
وشالت اغراضها وطلعت واهيا بتمووت من الخوف .. اول مرة واحد يتجرأ يكلمها وبهالطريقه حست برجفه بجسمها كله ..لا وعارف اسمي بعد ..
طلعت بسرعه وراحت الكافتيريا وين ماالبنات متيمعين وقعدت معاهم

في الطرف الثاني بعد ماطلعت منيرة من القاعه
قعد فيصل على الكرسي يتنهد
علي : انا مو قلتلك البنت باين عليها مو راعيه سوالف .. ليش تكلمها
فيصل : اووف .. ماقدرت امسك روحي الصراحه من شهر واهيا معاي بالمحاضرة .. عاجبتني .. تعرف يعني شنو عاجبتني !!
علي : بس اهيا مو من البنات اللي تعرفهم .. يعني وخر عنها احسن
فيصل : مااقدر علي .. والله حاولت ..
علي : هههه اقول .. لايكون مسوي فيها حب وغراميات
فيصل : ماادري .. بس هالبنت ابيها ابيها ..
علي : امش عن الينون .. واعقل ولا تسوي شي تندم عليه يالغبي
فيصل : قوم خلنا نطلع نشرب لنا شي احسن

وقاموا الاثنين وفيصل بعالم ثاني .. فيصل طالب كورس تخرج وطبعا اهوا متاخر بالجامعه سنه بسبب اهماله الدراسي وركضه ورى البنات .. ريال ولد ناس وعايله لكن عايش حياته بالطول والعرض ومافي بنت الا مرقمها ومغازلها ..
واللي يساعده شكله الرجولي .. ونظراته وكلامه اللي يعرف شلون يخلي البنت تطيح فشباكه مثل مايقولون .. يعني راعي سوالف ومو هين

شاف منيرة لاول مرة معاه بهالمقرر .. عجبه فيها ويهها البريئ وجمالها الهادي .. ماعمره سمعها تضحك ولا تعلق وعيونها دايما في الارض لدرجه انه كانت تيله ايام يقضي طول المحاضرة يطالع عيونها يبيها ترفعهم صوب الشباب لكن ماشافها ابد
وهالشي خلاه يتعلق فيها زيادة .. استغرب منها معقوله ولا مرة ياها الفضول انها تشوف منو وياها بالقاعه ..
عرف طبعا انها بنت ناس ومؤدبه ومو راعيه سوالف بس اهوا يبيها ..يحس يبي يكون يمها او يكلمها
انتابه شعور من الاعجاب يخالطه شويه ضيج .. معقوله فيه بنت ماتبيك يافيصل ولا تنتبه لك


نفس اليوم
كانت شيخه تعابل بالهوم وورك اللي معطيهم ياه الدكتور وراح تتأخر الين الساعه اربع بالجامعه .. عشان جذيه ردت منيرة مع السايق واييها عقب .. شوي ولا تدق عليها مها
مها : صباح الورد
شيخه : صباح النوير .. هلا مهاوي
مها : شكلج مشغوله .. !!
شيخه : أي والله عندي هوم وورك وابي اخلصه
مها : ممم اهاا .. متى بتخلصين عيل ؟
شيخه : على الاربع جذيه
مها : صج ؟؟ زين عيل شرايج تردين معااي ؟
شيخه : لا السايق بيمرني انا .. شرايج انتي تردين معاي ؟
مها : مم والله فكرة .. زيين ادق على نصور واكلمج اوكيه
شيخه فز قلبها : ناصر بياخذج ؟
مها : ايه
شيخه : انزين يله دق وانا ناطرتج بلغيني
مها : اوكيه بيباي
شيخه : باي

سكرت شيخه من مها وقلبها يدق بالقوة .. ولهت عليك وينك فيه اسبوع اشفتك .. من عقب المطار وانا ماشفتك .. وقطع عليها تفكيرها رنه موبايلها
شيخه : هلا مها ؟
مها وهي تضحك : ممم .. اقول
شيخه : الحمدلله والشكر .. شفيج .. !!
مها : ناصر يقول انا بمرج انتي وشيخه
شيخه طلعت عيونها : منووو !!
مها : ههههههههههه رجااءا لاتموتين .. تزوجي اخوي عقب موتي
شيخه : ياحماااارة .. تحجي عدل .. شنو تقولين ؟
مها : قلت لنصور اني برد معاج لاتمرني .. قالي شيخه بتطلع معاج ..قلته ايه قالي خلاص انا بمركم قوليلهم لاني بغيت شغله من خلود
شيخه : بذمتج مهااوي ؟.
مها تبتسم : ايييه
شيخه : زين يمكن امي ماترضى ؟
مها : جب ... نصور حسبت اخووووج
قالتها وهي تضحك
شيخه : يالخايسه والله مااروح معاكم ترى .. تحجي عدل
مها : احم .. اسفه اخوج في الاسلام
شيخه :زين قبل لاتوصولن بخمس دقايق دقي انزين
مها : اوكيك .. يله باي
شيخه : باي


في السيارة
ركبت شيخه ورى ومها كانت يدام يم ناصر .. اللي من وصلت سيارته عند باب الجامعه وعيون البنات عليه .. كان لابس بدله الدوام ونظارة شمسيه وباللكزس .. وشكله حده حلو
شيخه : السلام عليكم
مها وناصر : وعليكم السلام والرحمه
ناصر : هلا ببنت الخاله .. نورت السيارة
قالها وهو يبتسم
مها تلف على شيخه من ورى : اقولج .. دقيتي على امج وقلتيلها احنا بنمرج
شيخه : ايه
ناصر : انا متعمد اليوم امرج لاني ابي اكلمج بموضوع ..
مها : موضوع شنو .. ياسلام ماقلتلي يعني
ناصر : لما انا والشيوخ نتحجى . .لاترزين الويه رجاءا
مها هني دزلت لشيخه مسج ((( الله يعينج عالاحراج اليوم )))
شيخه ماقدرت ترد على مها .. لان قلبها كان بيوقف خلاص .. اشيا وايد في بالها
وكلام ناصر اليوم كان غييير .. خلها تعيش بدنيا الاحلام خاصه الاغنيه اللي حاطها ناصر انسان اكثر لعبد المجيد.. وتمت ساكته الين ماوصلوا البيت ..
هني وطى ناصر على صوت المسجل وعقب قال .. مها نزلي شوي بكلم شيخه بموضوع
مها : تطالع اخوها بنص عين .. : مردني بعرف اسراركم انتي وياه
شيخه اضحكت على خفيف
ناصر : شيخه تعالي قعدي يدام شوي
فتحت شيخه الباب وكل مافيها يرجف من الخوف والحب والاحراج وقعدت يدام
ناصر : شيخه .. انا الصراحه مالقيت احد يفهمني فهالعايله غيرج .. احس اني لازم اقولج كلشي قبل الكل ..مااعرف صح اللي سويته ولا لا .. بس انا محتاجلج
كل هالكلام وشيخه تسمع .. قول يابعد طوايف شيخه قووول

بعد عشر دقايق كانت شيخه بره السيارة تمشي بهدوء الين مادخلت بيتهم .. شافت خالد قاعد قالته
شيخه : خالد ... ناصر يبيك بالديوانيه
وصعدت غرفتها بنفس الهدوء



....................................



أتمنى لكم متابعه ممتعه ,,


بانتظار تعليقاتكم ,,


لكم خالص شكري ,,

اختكم في الله


سكونـــــــــــــــــــــه



..