[سكون الصمت]

طلعوا الشباب وحرك عزوز سيارته وراح يشوف الرنج اليديد
ونزلوا البنات وراحوا مع خلود ومها السنما .. رغم ان خالد عصب عليهم ليش ماقالوله من قبل بس بعدين رضى ونزلوا سلموا على خالتهم وراحوا وكان الفلم حلوو . والكل طلع متأثر الا خلوود طبعا

بسيارة خالد البي ام
خلود وهو يضحك : بس بس ترى الفلم خلص .. للحين تبجون ؟
شيخه ماسكه الكلينكس وتمش دموعها : وين نلاقي مثل شاروخ وفي !!
منيرة : شفتيه يوم مات عند باب بيتها .. صج موقف يبجي اهي اهي
شيخه : ايييييي .. خلاص انا بتزوج هندي احسن لي
خلود : هههه مالت عليج كفوج عاد .. يسوالج والله كومار سايقنا
شيخه وهي ترز ويهها بين منيرة وخلود يداام وتطقه على جتفه : هذا اللي ناقص بس
خلوود وهو يشغل الرادوا وطلع برنامج عالمرينا حلو قعدوا يسمعون وكلشوي يعلق عليهم ويطنز على اشكالهم وهما يبجون وقبل لايوصولون البيت بشوي
رن تلفون خلوود ..شاف المتصل اسما حطه صامت
منيرة : اقول خلوود .. ماتدري متى بنسافر دبي ؟
خلوود : أي تعالوا صج .. شسالفه دبي بعد .. اكو احد يروح بهالحر ؟
شيخه : اوووف .. بدينا عاد .. شوف اذا ماتبي تيي لاتخرب علينا وتسويلنا سوالف بالغصب ابوي وامي رضوا
خلود : صج انتي مو ويه نعمه .. الحين يقول مسكينه محبوسه بين اربع اطوف .. وبعدين تعالي وراج تسجيل بالجامعه ولا نسيتي ؟
شيخه : ادري ادري .. مظبطه كلشي انا .. التسجيل بيبدا يوم الاربعا .. يمدينا نروح اربعه تيام ونييي
خلوود : يالخبله خلي السفرة بعطله الربيع تقعدون اكثر والجو حلو وفيه مهرجان .. ونقدر انا وعزوز نروح بعد
شيخه : ايييييييييييييييه قوووووول جذي .. السالفه فيها عزوز .. لاتيون مو لازم .. خلوود لاتخرب علينا
منيرة: والله صاج خلود .. شرايج شيخوووه .. والله السفررة تصير احلى .. الحين ماراح نستانس
شيخه وهي تناقز ورى : مابي مابي .. ابي اسااااافر
خلوود يضحك : ههههههههههههه ايي بعد بعد ناقزي خل يضحكون علينا العالم يقولون شاذيه اشوه انه سيارتي مغيمه
منيرة تلتفت ورى : شفييج ؟ ههههههه
شيخه بتبجي : يانحسكم ..
وعقبها اسكتت .. تفكر بكلام خلود .. اهوا صاج جذي مراح نسافر .. بس عاد شيخه شلون تكسر كلامها.. ماتقدر تسافر يعني تسافر ..

وصلوا البيت ولقوا ام خالد قاعده تقسم الرطب اللي يايبه ابو خالد من المزرعه وتوزعه على اهلها وجيرانها
خالد : السلام عليكم
ام خالد : وعليكم السلام .. هلا يما ييتوا ؟
شيخه : ايييي فديتج يينا .. ممم الله رطب من المزرعه ؟
ام خالد : اييه .. خذي يماا غسليلكم شوي .. منوور اخذي اللي بالصينيه ووزعيهم بعلب لان عقب باجر بنروح بيت خالتج ناديه وبوديه معاي
منيرة فصخت عباتها وشيلتها وقربت يم امها : ان شالله مامي
وشيوخ غسلت الرطب ويابته يم امها وخلوود وقعدوا ياكلون
ام خالد : ها شتفقتوا عليه ؟
شيوخ برطمت : بنسافر يماا .. الله يخليج
خلود : يالهبله .. ترى انتي الخسرانه
منيرة : والله .. شيووخه انا مقتنعه .. وبعدين يمكن حصوه وريلها ييون معانا .. ونقول حق خالتي ناديه بعد ..
شيخه من اسمعت اسم خالتها ناديه فز قلبها .. وقتها يكون ناصر خلص دراسه ويي معانا .. : زين خلاص .. بس مو تكشتون فيني ؟
ام خالد : شنو ماتبون تسافرون ؟
خلود : قاعد اقولهم اجلوا السفرة حق عطله الربيع . نقعد اكثر والجو يكون حلو
ام خالد : والله كلامك عدل .. خلاص على شوركم
شيخه للحينها حازة بخاطرها تكنسل السفرة .. بس يلله كلشي يهون عشانك ياناصر ..
قربت من امها : يماا زين خلنا نروح البحر عيل ؟
ام خالد : خلاص اقول لخالتج يوم الخميس ونحدد لنا يوم .. بعد تامرين الشيخه شيخه
ابتسمت شيووخ بونااااسه وباست امها على خدها وهي تقول : يعلني ماانحرم من هالويه .. محد يدللني كثرج ياحبي لج
ولزقت شيخوو اكثر على امها وتحضنها من ورى وام خالد تقسم الرطب
ام خالد : ههههه زيين .. قومي عني خليني اخلص شغلي
شيخه وهي ترص اكثر : مابي مابي
خلوود : وخري .. وخري هذي امي انا .. ام خالد مو ام شيخه
شيخه وهي تدز اخوها بعيد بس ماتقدر عليه : اووووف .. انتا عندك عزووز .. هوا بابا وهو ماما وهوا كل حاااااااااجه
الكل ضحك على شيووخ .. قالتها بالمصري بطريقه خبله ...
ام خالد : فجووا عني انتوا الاثنين .. منورة .. قومي نكمل شغل بالمطبخ احسن
منيرة : هههههههههه يله يله

في بيت عماد ابو شهد
شهد : يبا .. بغيت منك طلب
عماد : هلا يبا امري
شهد : ابييي .. مم .. بطاقه تلفون يديده
عماد : وشفيها بطاقتج ؟
شهد : اا .. ضاعت .. ماادري وين
عماد : هاا .. زين تبيني اطلعلج بدل فاقد !!
شهد بنفعال وبسرعه : لاا .. اقصد ودي اغير رقمي بعد
عماد : زين يبا خلص اليوم ايبلج بطاقه يديده .. بعد امريني
شهد بابتسامه : تسلم يبا مايامر عليك عدوا
وقامت من مكانها رايحه غرفتها
عماد : وين يبا !! قعدي معانا شوي
شهد وهي مالها نفس بشي : لا يباا .. معليه بروح انام شوي
وطلعت من غير لاتسمع رااي احد . .شفيني انا . .شقاعد يصير فيني !! الحين ليش بغير بطاقتي والكل يعرف رقمي من رفيجاتي .. وليش ابي اقطع علاقتي بغانم مع اني كنت ميته عليه .. !! وليش نظرة صلاح ماتفارقني ..!! ياربي شنو هالحاله ..
قامت تبي تفتح تلفونها .. بس شي منعها .. خليه مغلق احسن
راحت صوب المنظرة اللي بغرفتها وشافت روحها .. ليش احتقرني .. ليش شافني بهالنظرة .. ويهي مو قبيح .. كل الشباب يتمون نظرة مني .. ليش حتى ماالتفت لي يوم كنت ببيتهم ..
خنقتها العبرة .. شهد اول مرة تفكر بهالطريقه .. غطت ويهها بيدينها وقعدت تبجي بألم .. مابيه يشوفني جذي .. مااااااابي ..


سمعت طق على باب غرفتها
قامت بكسل تبي تفتح الباب .. وعيونها محمرة من كثر البجي
شهد : هلا يماا
ام شهد : وييه .. ياويل حالي .. ليش تبجين يما شفيج ؟
شهد : مافيني شي يماا ..
ام شهد : امبلا فيج .. انتي من يومين مو طبيعه لاتاكلين معانا ولا تكلمين احد .. شفيج يماا قوليلي احد مضايقج
شهد لا شعوريا تذكرت غانم .. شلون يه يم بيتهم ومااهتم لسمعتها .. ماهتم الا بوناسته .. تتخيل لو شافه ابوها او امها بعد هالثقه اللي عطوها ياها .. شبيسون فيني .. انا مااستاهل .كل اللي يسونه حقي ..
شهد انفجرت تبجي بحضن امها وهي ماتدري ليش .. محد قالها شي .. محد مس شعره منها .. مافي شي .. غيرنظرة صلاح اللي ذبحتها .. ذبحتها من البجي

ام شهد : لاا البنت مو طبيعيه .. بسم الله الرحمن الرحيم قوليلي يماا شفيج لاتخليني جذي احاتيج !
شهد هدت شوي وابتعدت عن امها .. : يما بنام شوي خليني بروحي
ام شهد : خلص نامي وارتاحي .. وانا بسويلج ليمون يهدي روحج ..
طلعت ام شهد من الغرفه .. وحطت شهد راسها على المخده ونااااامت على طول من التعب .. وجنها مانامت اسبوع


يوم الخميس
حصه : يلاااااا شتسووون ؟ شيوووووووخ ترى بنمشي ؟
شيخه من وهي تنزل من الدري مستعيله : بسم الله زيين ماادري وين شحاطتي السودا !! شفتيها
حصه وهي تكتم الضحكه : احم .. انا لابستها
شيخه وهي تنافخ : الحين صارلي ساعه ادورها تطلعين انتي لابستها
حصه : هههه والله تلوق علي اكثر منج شيخوو .. شوفي انتي الفوشيا تلقو عليج
شيخه : اووووف . .. مابي
حصه وهي تمسك ايدين سلوم ولدها وتنحاش : لبسي مريوم جوتيها وتعالي كلنا ننطرج بالسيارة
شيخه : حصوووووووووووووووووووه
طلعت حصه وهي تضحك .. وشيووخ تتوعد فيها
هييين ياحصووص .. ولبست الفوشيا وشالت مريوم وطيران بره لانهم تأخروا ومها عيزت وهي تدق عليها
في بيت ناديه اخت ام خالد
الكل كانت متيمع .. بيت بوخالد .. ام خالد وشيخه ومنيرة و حصه وصلاح وخالد
وبيت الخالة العوده فاطمة وولدها الكبير جاسم ومرته ابتسام وبناتها رقيه وسميه وعيالهم .. وبيت ناديه خالتهم ومهاوي وخواتها بدريه ونورة وعيالهم وطبعا .. نااصر

البنات كانوا قاعدين بالصاله الصغييرة يدام صاله الحريم .. اما الرياييل فكانوا بالديوانيه

مها وهي تسلم على شيووخ : انتوا وينكم .. كلهذا طرييج !!
شيخه : علما لبسنا وجهزنا .. ويت حصوه ويينا كلنا .. شلونج ؟
مها : احم .. انا !!
شيخه تطقها على جتفها : جـــب
مها : هههههههه فاهمتج زيين انا .. بخير تراهم .. ويسألون
شيخه بقلبها بغت تمووت .. ياحبي لك يانصووور .. اتخيل بعد كل هالسنين شلون صرت .. اكيد احلى بواايد
مها : شيخوووه هههههه
شيخه نقزت على صوت مها : هااا
مها : وين رحتي ؟
شيخه : كااني بعد وين ..!!
مها : زيين تعالي نقعد مع الحريم

راحوا الثنتين وقعدوا مع الحريم وسوالف وجاي وقهوة وحلو .. كان وناسه صج بس شيخه كان قلبها هنااك .. بالدويانيه .. شكلي اليوم مراح اشوفه .. مالت على حظي

تعشى الجميع .. وعقب العشا .. دخل ناصر يسلم على خالاته وبنات خالاته

مها : شيووخ .. لبسي حجابج ترى ناصر بيدش
شيخه قلبها قام يدق : زين
ولبسوا الحريم .. ودخل ناصر .. ياحلات ناصر بالدشداشه والغترة
ناصر طويل وعريض اشقر .. وعنده شوارب بس .. كان شكله بالدشداشه يــــــــنن خلا شيخه تذوووب بمكانها
ناصر : السلام عليكم .. شلونج خالتي فاطمه
قرب وباس راسها وهو يبتسم لها
خاله فاطمه : بخيير فديت هالطول انا . . شلونك يما شخبارك ؟؟
ناصر : انا بخير دامني اشوف هالويه ..
والتفت لام خالد
ناصر : خالتي شلونج .. ولهنا علييج والله
ام خالد : يابعد قلبي .. شلونك انتا .. تعال يماا اقرب ماكو احد غريب كلهم اهلك
اقترب ناصر وقعد يم خالته ام خالد .. وعقب التفت بسرعه لكل البنات واسلم خطااافي
ام خالد : هاا يما متى بتخرج ان شالله .. ماعفت امريكا ؟
ناصر : قريب خالتي .. كلها شهر بس وبتمليين مني
قالها وهو يضحك
ام خالد : فديتك ماينمل منك ..
ناصر : شلون عمي بوخالد .. ماشفناه ؟
ام خالد : ماقدر يي بس ان شالله بسير عليكم .. قريب
ناصر : لا انا بمره ان شالله باجر واسلم عليه ..
وعقب التفت للبنات اللي قاعدين وسأل عن احوالهم وقام
وشيوووخ عينها عليه .. حده معطيها طااف ولا اسئل حتى ..
ناصر قام يبي يمشي نادته مها
مها : نصووور ..
ناصر التفت لها : هلا
واتسعت ابتسامته : هلا ببنت الخاله .. شيخه شلونج ؟
شيخه وعيونها متحطمه فيه : احم . انا بخير انتا شلونك ناصر ؟
ناصر بصوت واطي : ولهنا عليج .. شخبار الدراسه ؟
شيخه ماسمعت غير .. ولهنا علييج .. ياويل حالي قالي ولهنا عليج .. وين اروح انا ..
ناصر وللحينه مبتسم : همم .. شيوخ ؟
شيخه : اا . انا .. خلصت ثنويه .. السنه اليايه ان شالله بكون بالجامعه
ناصر : والله .. !! ماشالله ووين ناويه تدشين ؟
شيخه : ماادري .. انتا شرايك ؟
ناصر : هههههههههههههه
شيخه وهي تطالعه وتبتسم .. يعلني ماانحرم من هالضحكه فديييييتهااا
ناصر : انصحج .. حقووق هههههههه
شيخه اختفت الابتسامه من ويهاا :.فهمت قصدك انا .. مالت على هالويه
والتفتت تبي تقوم بس ناداها
ناصر : هههه تعالي تعالي . اضحك معاج شيوووخ
شيخه بقلبها .. خلاص طاح الحطب من سمعت اسمي على لسانك وابتسمت ورجعت قعدت
ناصر قرب شوي منها وهو للحين يضحك .. ويكلم منيرة : شلونج منورة شخبارج ؟
منيرة : بخير الحمدلله .. وانتا شلون الدراسه
ناصر : كلوو تمام والله ..

يله انا ماشي الديوانيه ..
وسلم على الجميع من بعيد ودخل الديوانيه
شيخه كانت بعالم ثاني .. ياويلي .. قالي ولهت علييج .. صج وله علي ؟؟!!
أأخخ يانصور .. متى تحس بس

الساعه 12 ونص بليل
الكل رجع البيت
شيخه غيرت ملابسها وراحت المبطخ تصب لها كوب حليب عقب اصعدت غرفتها وقفلت الباب وانسدحت على الفرااش وبيدها حليبها تشرب منه وهي تذكر نصوور .. فديته متوله علي .. حتى انا متوله عليه
فتحت درجها وطلعت دفتر صغير متعودة تكتب فيه كل شي يمر بخاطرها
اكتبت التاريخ واليوم وعقب اكتبت
احبـــــــــــــك


ورجعت الدفتر مكانه وقامت من مكانها تطالع القمر اليوم .. كان مكتمل وهي تذكر يوم ناصر كاني هني قبل مايسافر شكثر كان يقعد معاهم وييهم ويسولف معاها ..
نقزت على دق البااب
خلوود : شيوووووخ .. انتي قاعده ؟
شييخه : اييييييه شتبي ؟
خلوود : فجي الباب شوي
شيخه : لحظة
راحت صوب الباب وفتحته : هاا ؟
خلوود : اقولج ماشفتي لحاف عزوز .. بونجوم وينه ؟
شيخه بلعت ريجها .. شقول الحين .. : هاا . ماادري ليش وينه ؟
خلوود : ماادري عيزت وانا ادوره عاد هذا ماينام الا فيه
شيخه : خلاص روح انتا وانا ادوره
خلوود : زيين .. لما تلقينه يبيه احنا بالديوانيه .. بس طقي الباب وروحي
شيخه وهي سرحانه : هاا .. زين
سكرت الباب وتنهدت وتسندت عليه عقب راحت تحت السرير وطلعت اللحاف ورتبته .. ماتدري ليش قربته منها .. احساس غريب ياها صوب هاللحاف . . بس وقفت بسرعه وطلت من غرفتها وراحت من صوب غرفه الغسيل وعطرته عشان مايشكون انه مغسول واتجهت للدوانيه
طقت الباب
خالد : لحظة
قرب وفتح الباب : اوو وين لقيتيه ؟
شيخه : كان بغرفه الغسيل الخدامه مغسلته
خالد : غريبه رحت انا ومالقيته
وهو يكلم عزوز : لقيناااه بس بس لاتبجي ههههه
خلود : يبيييه عطيني
دخل وسكر الباب وهي ضحكت ماتدري ليش .. الله لايبلينا بس
وسعدت غرفتها كملت حليبها وراحت عند منيرة بغرفتها قعدوا يسولفون شوي

عزوز هالليه ماقدر ينام
ماسك اللحاف ومتغطي فيه وكلشي يشوف الساعه .. تم الين الفير مو يايله نوم
سمع كل كلمه قالتها شيخه وهي عند الباب .. كان قلبه يطق بقووووة .. هالبنت شقاعده تسوي فيني ..
بسرعه فز من مكانه ودش الحمام توضا وصلى ركعتين .. عقبها رجع تلحف بلحافه وقعد على الكنبه
فتح التلفزيون وقعد يطالع برنامج ثقافي وهو سرحااااااان .. يفكر باشيا وايده .. شيخه وابوه وحياته

خذا بوكه وافتحه .. كان في صورة مصورها اهوا وخلوود يوم كانوا صغاار مع بعض قعد يتألمها وهو يضحك على اشكالهم .. انا بيتي هني .. وهذيله اهلي .. ماعندي غيرهم في الدنيا
سكر بوكه وحط راسه على المخده وطرد صورة شيخه من باله .. لازم مايخون رفيجه حتى بمجرد انه يفكر فيها
تلحف بلحافه وهو يبووووسه ويشمه وناااام



~~~~~~~~~~~~~~~~~

توقعاتكم ؟؟ رايكم يهمني ؟؟


اتمنى لكم قراءه ممتعه


لكم خالص تحيااتي