مر شهرين و زينب و محمد هم على هل الحال تلفونات و مسجات واتصالات
و جا اليوم الي محمد لازم يقول الى امه انه بيخطب
محمد : اماه انا ابغي اقول لش شي
الام : اي قوول
محمد : انا ابغي اخطب
الام : صدق منهي سعيدة الحظ ؟
محمد : تعرفين بيتحجي ناصر ’’ الي كانوا ويانا في السفر
الام : اي
محمد: بتهم زينب
الام :
محمد : اماه ويش فيش ؟
الام : لا ما فيي شي ,, بس مستغربه يعني انت شفتها في السفر و عشقتها
محمد : اي
الام : باجر باروح الى امها
محمد : لويش باجر ,, روحي الحين هي سالفه
الام : عطني صورتك
محمد : لويش الصوره
الام : عشان تشوف البنيه شكلك له
محمد : هههه اي لحضه
راح محمدو يدور له احلى صوره
محمد : ها
الام : حلاوة ولدي
راحت الام بيت حجي ناصر
و طقت الجرس
طلعت الام ليها ودخلتها داخل و قعدوا يسولفون و تنط ام محمد في الموضوع
ام محمد : اني جايه يا ام علي هني ,, اخطب بنتش زينب الى ولدي محمد
ام علي : يا هلا ويا مرحبا فيكم ,, هذي الساعه المباركه
ام محمد : و هذي صورة ولدي محمد جان تعطينها زينب تشوفه
ام علي : اي , ما عليه
ام محمد : ولدي يشتغل في شركة ...... و عمره 21 سنه ,,
ام علي : اي ,, الرجال بشغله وبأدبه ,, احنا بنسأل البنيه وبنعطيها صورته وبنعطيكم خبر ان شاء الله عقب فلافة ايام
ام محمد : ان شاء الله
و هم جدي الا بقبلة الجده
الجده : شحوالكم
ام محمد : حياش الله والنبي ,, شحوالش ام ناصر
الجده : حياش الله ,, عفر انتين من ؟
ام محمد : اني ام محمد له
الجده : الي كسر ايدي و خلاني ماليي حال
ام علي : عمتى هو ماكان يدري
الجده : ايه ’’ الله يسامحه
ام محمد : احنا جايين يا ام ناصر طالبين القرب منكم
الجده :
ام علي : ولدها محمد طالب ايد زينب بتي
الجده : ايه ,,
ام محمد : يلا اني الحين باقوم ,, و الي فيه خير بصير
ام علي : ويش عاجلنش ؟
ام محمد : ما عال عليش عدو ,, باقووم الجهال بروحهم في البيت ’ مع السلامه
ام علي : الله يسلمش
و طلعت
الجده : تعالي شوفي ايدي صارت زينه وداني خليل الدختر و داووها
الام : اي هاكي شكلتها زينه صارت
الجده : اي ما تعورني مفلات لول
الام : الحمد لله
راحت الام داخل حجرة زنبوو وهناك زينب حاطه الاغني على حدهم
و من دخلت الام قصرت على الاغاني
زينب : ويش اماه
الام : بندي هل المنكر
زينب : هدحنا بندناه
الام : امشي قعدي باقول لش شي
زينب : قولي
الام : تعرفين محمد الي صار ويانا في السفر
زينب : ايي
الام : جايه امه ,, خاطبتنش له
زينب :
الام : هاش صورته شوفيه
و اخدت زينب صورة محمد لو تشوفونه في الصوره حليو مصور ديجيتال
زينب في قلبها : ويش هل الجمال
الام : فكري و بنرد عليهم عقب فلافة ايام
زينب : انزين
من طلعت الام برا ,و على طوول قامت زنبوو اتصلت الى محمد
محمد : الوو
زينب : لويش ما قلت ليي ان امك بتجي
محمد : مفاجأه
زينب :
و قعدوا يسولفوون << صدق ثنائي مصرقع
جا علي و وياه ندى
سمع علي صووت زينب تضحك فووول و تتكلم وي واحد يعني الكلام الي تقوله الى صبي
و قعد يتصوخ
ندى : علي ويش صاير ؟ لويش تتصوخ
علي : زنبووو بطلي الباب
زينب : محمد ,, باي
وقطعته
زينب : نعم ؟
و يقوم علي ويسطرها هداك السطار
علي : تتكلمين وي من ها,, حمودي هذا من يطلع
زينب :
ندى :
علي : اتحجى وياش انتين ,, هذا من
زينب : ما لك حق تضربني و تهيني قدام هذي
علي : هذي مرة اخوش وبنت خالتش مو غريبه لا تغيرين الموضوع هذا من لا اقتلش
زينب : ما ادري يلا روح ول
و توها بتدخل الحجره يقوم علي يستحمق و ياخدها و يطيح فيها ضرب
ندى : علي لا تضربها بس خلاص
علي : بتقولين من لو تبين ضرب بعد ؟
و زينب ما قدرت تتحمل الضرب هو ما ضربها واجد بس لانها واجد دليعه قامت طاحت دوره
ندى :
علي :
الام : علي ويش فيك واقف هني << ما تدري بشي كانت فوق
علي :
الام : زينب بتي قتلوها يمه ويييييييليييييييي على بتي ماااتت
قامت ندى تصبصب عليها مياهه و اوتعت
زينب :
علي : هكي اوتعت ودوها حجرتها
و شالوها و ودوها حجرتها
عقب مده
الام : انت لويش ضربتها بدل ما تبارك ليها وي على افادي تطيح فيها ضرب يا الخانس
علي : ابارك ليها على قلالة ادبها ,, لو على وقاحتها
الام : ويش صاير
علي : بتش ,, سمعتها تتحجى وي صبي و يوم قلت ليها تتكلمين وي من قامت سوت روحها طايحه دوره
الام : بتي زينب تتحجى وي صبي ,,, صاااااااقعه غمرتني
علي : هذي التربيه السنعه
الام : هي هاكي متقدم ليها صبي ويش ليها تحاجي صبي فاني من حاله
علي : من متقدم ليها ؟
الام : هاكو ابوك قول له يعلمك
الابو : ويش صاير
قالوا له السالفه
الابو :
علي : خوش تربيه
الابو : و انت مقتنع من الكلام الي تقوله
علي : اذا مو مصدقني روح سحب من عندها جلام و بتعترف
راح الابو وي زنبوو و زينب مسكينه تصيح
دخل وياها و قعد
الابو : صدق الي سمعته
زينب :
الابو : من اليوم ورايح ما في تلفون ... ولا طلعه من البيت ..فاهمه
زينب : ابويي اهييء اهييييييء
الابو : كل هذا يطلع منش يا زنوووب ما هقيتها منش
زينب : بس بس اهييييييييء
الابو : جيبي التلفون
زينب : عاد ابويي خله عندي
الابو : ما في عقب الي سمعته ما في ولا شي
زينب :
صار بيت حجي ناصر هديك الحزه معفووس الجده تصرخ مني تبغي يحطون ليها عشا و الام والابو و علي ضايق خلقهم و ساره برا وي خطيبها رايحين يتعشون و زينب ميته من الصياح
الابو : هكي ساره ما شفتها سوت مفل الي تسويه هالنحيسة هي
علي : انا للحين ما فترت حرتي فيها كل ما ادكرها جيفه تضحك عن بدي اقتلها
الام : بس انت اسكت مو كفايه فشلتها
ندى :
الابو : انا الحين خليتها بروحها هكي ميته من الصياح ,, تلفونها عندي و قلت ليها ما في طلعه
علي : تستاهل
عقب مده قاموا حطو العشا
الجده : ما هي حاله هي ,, كل ليله اني من زمان نمت و الليله حظنا على الله
الابو : اكلي اماه هكو حطيناه
الام : باروح باشووفها جان تجي تاكل ليها شي
راحت تطقطق الباب
زينب : اهيء من اهيء ؟ <<< مي قادره حتى تنطق بجلمه من الصياح
الام : اني يا خلف عمري بطلي الباب
بطلت الباب و دموووعها اربع اربع
الام : بس لا تقتلين روحش من الصياح ,, بخلصون دموعش وتالي بتعمين
و تقوم زينب تزيد في الصياح كأن قايلين ليها صيحي
زينب : اهييييييييييء اهيييييء
الام : يوو ,, امشي يا حبيبتي اكلي
قامت الام اخدت بتها وراحت وياها الصاله
علي : مسويه روحها كلش ,, الحمل الوديع
الام : انت يلا اسكت ما تشوفها حالتها حاله
الابو : علي بس اسكت
علي: ان شاء الله
و هناك مسكينه ندى تطالع في زينب
ندى :
زينب :
الام : اكلي له
زينب :
الام : بسش من الصياح يووووو
علي : انتين ولاخير وياش كأن ماكلين حلال ابوها
زينب : انت اسكت اهييييييء
الام : علي لا تتحجى وياها فاهم
قام الابو اخد بته زينب وراح وياها الحجره
الابو : ممكن تقولين ليي السالفه كامل لان انا الحين مو فاهم شي بس اشوفش تصيحين ولا ادري على ويش
زينب : علي اهييء
الابو : ويش فيه ؟
زينب : ما خلاني حتى انطق بجلمه سيده جا وعطاني سطار و ضربني قدام ندى
الابو : لويش ضربش ؟
زينب : هو كنت اني اتكلم وي رفيقتي
الابو : اي
زينب : تالي الهي تقول ليي هاش كلمي اخويي الصغير حمودي
الابو : انزين
زينب : اخوها صغير عمره 3 سنوات وقعدت ادلعه حمودي حمودي ,, و هو حليو يعني قعدت اضحك على كلامه
الابو : بس ؟
زينب : اي ,, ما شفته الا جاي و ضاربني
الابو : يعني الغلط من علي جا منا والطريق و ضربش
زينب: اي
الابو : الحين اراويش فيه , شككني في بتي الحليوه المؤدبه و فوق هذا ضربش ,,, الحين بشوف
طلع الابو و هو مستحرق على علي ولده
الابو : علي
علي : ها ابويي
الابو : جيفه تفتري على اختك جدي و تضربها
علي : انا افتريت عليها
الابو : تدري انها ما كانت تكلم صبي على قولتك
علي : ها عجل تكلم عمتي
الابو :
علي: و حمودي و الكلام الي تتكلمه الى صبي مو الى بنيه
الابو : اي كانت تكلم اخو رفيقتها الصغير اسمه احمد و تدلعه حمودي
علي :
الابو : لكن لو انت تفكر قبل لا تتهور و تسوي شي جان ما صار هذا كله من اساس
علي : انا ويش دراني ابويي من سمعتها تقول حمودي راح بالي الى شي فاني
الابو : ويش تبغاني اسويي فيك ؟ ها ؟
علي :
الابو : روح استسمح منها الحين
علي : ان شاء الله ,, ما يصير خاطرك الا طيب
راح علي حجرة زينب
علي : زينب
زينب :
علي : سامحيني حبيبتي اختي ,, و حقش فوق راسي
زينب :
علي : هاش هذي خمسه دينار .. لان ضربتش
زينب :
علي : اخديها لا
زينب : جيبها
علي : سامحتيي ؟
زينب : تقريبا مو اكيد
جا الابو و اعتذر بعد الى زينب على انه شك فيها
الابو : سامحيني يا بتي ,, وهذا تلفونش
زينب : مسموح ابويي
الابو : قومي باروح وياش السوق
زينب : انزين
مريم : اني بعد ,, عجل باصيح اني بعد وباطيح دوره و عاملوني مفل ما تعامولنها
الابو : انزين ويش قلنا ’’ امشي انتين بعد
قاموا راحو السوق و استانسوا
و محمد هناك قاعد على اعصابه ما يدري ويش السالفه
قام اتصل ليها و هي في السياره
زينب :
الابو : هذا من ؟
زينب : ها ,, هذي رفيقتي مسكينه الي كنت اتكلم وي اخوها الصغير
الابو : اها ,, مسكينه ردي عليها
زينب : هي واجد تهدر و اني الحين باوصل السوق و لا ابغي امشي في الطريق واني اتكلم
الابو :
زينب : بقطعه
و قطعته
محمد : اكيد كان اخوها او ابوها صوبها
رجعوا الابو و مريم وزينب البيت
يوم فاني
الام : زينب ,, الحين على سالفة الصبي انتين موافقه لو لا ؟
زينب :
مريم : اي صبي ؟
الام : تعرفين محمد الي ويانا في السفر
مريم : اي ولد ام محمد اعرفه
الام : متقدم الى زينب
مريم :
الام : ويش فيش
مريم : محمد بيخطب زينب
الام : اي
زينب : ويش مو تارس عيونش ؟
الام :
مريم : لا بس يعني ,, استغربت شوي
زينب :
مريم : و انتين موافقه
زينب:
الام : سأل عنه ابوش قالوا عنه خوش صبي ,, و بعد هو معروف في الديره
زينب : اي
الام : ويش الحين موافقه لو لا ,, على ما تطلع الجلمه طلعت روحنا
زينب : موافقه
الام : افضل الصلاة و السلام عليك يا حبيــــــــــــب الله محمد و أل محمد كلللللللللوووووووووووووووشششش
مريم : عرست زنبوووو عرست
زينب : للحين ما صار شي
مريم : وجهش صار احمر
زينب : اوووووه
الام : حناش عجين زنووووب حناش عجين ,, واذا زفووش غلى رجلش لا تستحين
زينب :
مريم : ايوه ايوه
ساره : ويش صاير
الام : اختش بتنخطب
ساره : حلفوا زينب بتنخطب
الام : اي بتنخطب على ولد اخو رجلش ,, يعني رجلش يصير عمه
ساره : بعد
مريم : و اسمه محمد بعد
ساره : بعد
الام :
اتصلت ام محمد عشان تشوووف رد زينب
ام محمد : شحوالكم
الام : حياش الله شحوالش
ام محمد : حياش الله , ها بشري ؟
الام : ان شاء الله موافقه
ام محمد : حصل خير
الام : تعالو الليله ,, وان شاء الله نحدد موعد الملجه
ام محمد : عقب الصلاه جايينكم
الام : انزين
ام محمد : يلا مع السلامه
الام : الله يسلمش
راحت الام تقول الى زينب
الام : زينب تعالي
زينب : نعم
الام : هكي ام المعرس متصله وقلت ليها تجي الليله هي و المعرس وابوه زين ؟
زينب : زين
الابو : بجون الليله ؟
الام : ايي مو تطلع عقب الصلاه لان بجي هو و ابوه هني
الابو : ان شاء الله
و زينب هي مستانسه و هي خايفه
راحت حجرتها وبطلت كبتها
زينب : ويش البس هذا لووو هذا ؟ امممممم
ساره : ويش عندش ؟
زينب : ساره اي احسن البس هذا او هذا ؟
مريم : اني بقول لش اي هو احسن ,, البسي الوردي
ساره : اي الوردي احلى
زينب : انزين ,, ساره سشوري ليي شعري
مريم : هي انتين مجنونه هذي مو ملجه هذا معااااادل
زينب : انتين روحي ويش فمهش
ساره : ويش فيها اذا سشورته
مريم : تسشوره الى من يا حظي ما بشوفها احد
ساره : اي بس بتشوفها ام المعرس له ,, واذا طلع شعرها يعني هههه يطلع ناعم و مرتب ما يطلع معفس
مريم : ويييي دلاعه
زينب : من فضلش انتين اطلعي من هني
مريم : بطلع بدون ما تقولين
زينب: يا فاك فك
و قامت زينب تحاتي و تجهز من عصر
انزين مريم قاعده تاكل جبس وعسكريم
زينب : اذا اكلتين هذا لا تفلتينه هني افلتيه في الخمام زين
مريم : لويش كل هل الاهتمام
زينب : احم احرص على نظافة بيتنا
مريم : لا والله تونا سامعين هل الخبر
زينب : مريموووو ما ليي خلق ها ,, اني مشغوووله
مريم : يمه بتنخطب وبتغربلنا
زينب : وييييي مشكل عاد
الجده : هذا ويش هل الريحه
الام : هه هذي ريحة البخور
الجده : مره ريحته قويه تدخل في حلقي ,, شيلوه من هنه
زينب : اماه انتين ويش عليش منها ,, خلي البيت يتبخر عدل
الجده : شيلووه دخل في بوزي اح اح
وقعدت تساااعل
زينب : والله حاله
ساره : بس خلاص شيلوه لصقت الريحه في البيت
بعدين اذن الاذان و زينب بسرعه صلت هالصلاة العميه
زينب : اماه يلا
الام : ويش؟ ما لحقنا حتى نصلي صلاتنا
زينب : الحين بجون الاوادم له
الام : مو الحين ههههههه صبري الناس يصلوون حالهم حالنا
زينب : انزين
بعدين عقب ساعه طق الجرس
الابو : تفضلو ,, حيا الله من جانا
ابو محمد : الله يحيك
دخل محمد و زينب تطل من حجرتها
شافت محمد
زينب :محمد
ساره : زينب هكم جو
زينب : ادخل المجلس ؟
ساره : لا الحجره,, هناك ام محمد و خالته و فاطمه اخته
زينب : ايي
ساره : بس مو الحين تدخلين بعدين عقب شوي
زينب : انزين
قعدوا النسوان يسولفوون في سوالف مني و مناك تعرفون يعني مو ينطون سيده في الموضوع
و الجده مقعده وياهم و كلحين ما قالت (( ها ))
الخاله : وينهي العرووس بنشوفها
الام : ههههههه الحين بقول ليها
راحت الام الى زينب و هي هناك في حجرتها
الام : يلا زنووب امشي دخلي
زينب : انزين
الام : عدلي شعرش
زينب: هكو عدل له
الام : اي افصخي الشال لويش تلبسينه
زينب : استحي
الام : يلا بلا دلاعه افصخيه
دخلت زينب والام وياها
زينب : السلام
ردوا عليها : عليكم السلام
الجده تطالع في زينب
الجده : هذا حاط لش ديرم ؟ << ديرم يعني حمره
زينب :
ام محمد : ايه ,, ويش طلباتكم آمرو
الجده : احنا ما نبى شي ,, الرجال بأدبه مو بيزاته يمه
الام : احنا ما نبغي يعني نتشرط ,, و لا نبغي واجد ,, الف و 200 بس
ام محمد : اي,, محمد مستعد يدفع
الجده : اكيد مستعد يدفع ,, عجل جاي لويش ,, المفرووض ليي بيسات على كسار ايدي يعوضها ,, انتين ما تشوفين اذا واحد دعمووه و انكسر منه شي يعطوونه حقوق ,, اني بعد ليي حق و لا ببري دمته ليوم الموقف
الام :
زينب :
ام محمد : ايه بنعطيش ان شاء الله اذا الله احيانه
الجده : ويش قصدكم يعني اني باموت ؟
ام محمد : لا شرعنش ’’ انتين تبغين جم ؟
الام : لا تكلفون روحكم ما يحتاج
الجده بصرااااخ: ويش لا تكلف روحها ,, كسار ايدي مو بلاااااااااااااااش ؟
ام محمد : تبغين جم ؟
الجده : جان تعطوني 200 دينار
و تضرب ام علي نغزه الى ساره انها تطلع الجده
ساره : جدتي يبغونش في التلفون
الجده : من يبغاني ؟
ساره : عمي خليل
الجده : وي على عمري باقوم اشوف ويش يمبى
طلعت الجده وي ساره
الجده : وينهو التيلفون ؟
ساره : تعالي جدتي شوي
الجده : وين ؟
راحت ساره وي الجده حجره فانيه وقعدت وياها جان لا تفشلهم يا ها الربع
بعدين اتفقوا على كل شي
ام محمد : ان شاء الله الملجه ليلة الجمعه
الام : ان شاء الله
و هناك الرجال بعد اتفقوا و صار لازم الحين كلهم يطلعووون خخخخخخ
توهم بيطلعون الاوادم
الجده : تعالوووو
ام محمد : خير ؟
الجده : هاكم هل الگسام ,, بركه من المولد مفضل عندي
ام محمد : الله يغنيش
الجده : اي ’’ انتين بعد نبى نقول لش الله يغنيش ,, جان تعطوني بيسات كسار ايدي
ام محمد : ان شاء الله ما يصير خاطرش الا طيب
الجده : الحمد لله على كل حال ,, اني خاطري كل طيب
ام محمد : يلا مع السلامه
الجده : الله يسلمش من الشر
و اخيرا طلعو
زينب : انتين ويش في حبايبش ؟
الجده : حبايبي يمه ,, هداني اباكم تدفنوني صوب حبايبي
زينب : مخرفه ما عليش شره
الام : زينب عيب
زينب : اي عيب انتين , فشلتنا قدام الناس
الام يصوت خفيف : ما تفهم
الجده : اني ما افهم ,, لكن الشره مو عليش الشره عليي الي قاعده في بيتش ,, والي فيه خير يقول ليي تعالي ويانا جان انعل جنيزه ,, باروح بيت خليل ولدي ,, هناك كل من يحبني و يعزني ,, مرته و جهاله ما احد قال ليي ما افهم ,, بس انتون تزمرون عليي ,,, يلا
الام : عمتي ,, انتين مو من جم يوم تقولين مرة خليل كل تزمر عليش له
الجده : ها ؟ لا ما زمرت عليي ,, وحتى لو تزمرت لان فالصه ولدها فلصه و صارت زرقه و مسكينه استحمقت عليي و تزمرت ,, يعني ما تزمرت قالت مو عدله عليش يا عمتي تفلصين جاهل
ساره :
الام :
زينب : انتين مخلوقه من ويش امبى اعرف
الجده : مخلوقه من طين ,, ما شفتين ابليس ما سجد الى ادم لان ادم من طين و هو من نار ,, طاح حظه يقول انا من ناااااار اسجد الى واحد من طين ,, قلاعه الي من طين احسن منه
زينب : اففففف
ساره : بس خلااص ,, الحين الملجه ليلة الجمعه
الجده : لاني حاضره ملجتها ولا ملجة الي كسر ايدي
زينب : صدق ,, وا فرحتاااااااه
عقب ما طلعوا الاوادم ,, قعدوا بيت حجي ناصر يصفقون ويغنون
الام : هذا المبارك بينهم لا فرق الله بينهم ,, كللللللللللللوووووووووش
ساره : مباركين عرس الاثنين ليلة ربيع ليلة قمرا
مريم : عرست زنبو باركو اليها ,, عرست زنبو باركو اليها ,,
زينب :
الام : الحين ليلة الجمعه الملجه له
ساره : اييي
الام : روحي يا مريم جيبي ورقه وقلم خل نكتب اسامي المعازيم
مريم : انزين