شعر عبد الرحمن بن حاشر وعلي الخوار
 

السلام عليكم قرأت هالشعر وحبيت انقله لكم واتمنى ينال اعجابكم


بن حاشر
وش رأيك أتزوج على أم العيال
واخذ عليها يارفيقي عديله
أنا معاها دوم عايش في ولوال
ماريحت راسي من الهم ليلة
الخوار
ياصاحبي وش فيك متخبل خبال
هذا جزاها بعد عشرة طويلة
متحملة همك من سنين طوال
وانته همومك مثل دمك ثقيلة
بن حاشر
حاولت أطورها على كل الأحوال
عشان عيني ماتدور بديلة
لكنها ترفض تغير من الحال
لو جيتها غضب ولو جيت حيلة
الخوار
من حقها ترفض وتربطك بحبال
تضربك لين الدم منك تسيله
ترفض معك تنزل على كل منزال
بنت المعاني والطباع الأصيلة
بن حاشر
كل يوم عالشاشة صور تشرح البال
وأبحلق عيوني شرات الهبيلة
ويرن قلبي كل مايرن خلخال
فيهن وأحس إن الليالي بخيلة
الخوار
ياخوي لاتتبع بعد هالعمر لال
عن لايغرك صبغهن والجديلة
من قبل مايتجملن كانن أشكال
خسفات مافيهن ملامح جميلة
بن حاشر
يعني خلاص اصرف نظر واطرد الفال
واترك جفون العرس واخلي سبيله
لو كان عندي مقدرة واملك المال
واقدر أعيش ألف عيلة وعيلة
الخوار
من مالك اصنع للوطن جند ورجال
وعيالك أصلا هم جنوده وجيله
والله يزيدك مال ويزيدك عيال
من لي غدت لك في حياتك حليلة
منقول من زهرة الخليج
تحياتي
زهور

الجميل في هذه المساجلة أن الأبيات تتحدث عن الزواج من ثانية

حاشر يريد الزواج والخوار يرفض

وقد كتبت بطريقة طريفة ورائعة ..

الله يعطيك العافية على هذا النقل ..





وفق الله الجميع ..

يعافيك اخوي الغريب
شاكرة تواجدك الكريم
تعطيرك لصفحتي بهذا الرد هو الاجمل من هذه الابيات
دمت للمنتدى
تحياتي
زهور

حلووووه بجد

وانا احب هذا النوع من الشعر وياليت فيه احد يقبل يتساجل معاي

الف شكر