يوميات محمد وزينب بالهجه البحرينيه

[قيثارة]

ههههههههههههههههههههههههههههه
صج ثنائي مخاريش ...

كملي حواوه متابعين ..

 

 

[حواوه]

يوم فاني مر محمد على زينب عشان يروحون يختارون الاغراض الي للخطوبه و وياهم ساره

انزين الحين بيركبون السياره ,, و زينب تركب قدام

زينب : السلام

محمد : عليكم السلام

ساره : شحواك محمد

محمد : بخير الحمد لله

و بعدين مشوا راحوا السوووق

في السياره

ساره : محمد نبغي نرووح ........... عشان نحجز فستان تدليه ؟

محمد : اي لا

ساره : اشوى عجل

و زينب طول الوقت ساكته

و صلوا المكان الي ياخدون منه الفساتين

و نزلت ساره و زينب

دخلوا و هناك الفساتين الكشخه معروضين

زينب :

ساره : اختاري

زينب : صبري باشووف توني داخله

البنيه الي تشتغل : من العروس .؟

زينب : اني

البنيه : خطوبه او زواج ؟

زينب : لا لا خطووبه

البنيه : عجل تعالي هني و بتلاقين فساتين توها نازله اخر موضه

راحت زينب و شافت انواع و اشكال من الفساتين الكشخه

و طاح عيونها على فستان وردي ,, هي ناويه تاخد وردي لا

زينب : باخد هذا عجبني

ساره : اي ,, حليو

و بعدين قعدوا يتكلمون وي البنيه عن الاجار و حاله

و حجزت ليها الفستان الوردي

بعدين ركبوا السياره

ساره : الحين تبغون تروحون وين ؟

زينب: ابغي اروح احجز صالون

محمد : اوكي

و وداهم و حجزا ,, وبعدين بعد راحوا حجزوا صاله و استديو للتصوير

و كل الاجراءات كملوها , وبقى عليهم يروحون سووق الذهب و يا عيني على الذهب

دخلوا المكان و وياهم محمد عشان يختارون الطقم و الدبل

ساره : يلا يا محمد انطق بجلمه ,, هي تحارسك تختار

محمد : انا عجبني هذا

زينب : اي واحد

محمد : هذا

ساره : الله الله ذوقك يا محمد مو سهل

زينب : حليو ,, عجبني

ساره : اكيد بيعجبش مدام مختارنه محمد

زينب :

محمد :

بعدين اخذوا الطقم و خلصوا المشواار و رجعوا البيت تعااااابه

و صلوا البيت

ساره : مع السلامه

محمد : اله يسلمش

زينب : مع السلامه

محمد : الله يسلمش

و دخلوا البيت ,, في دخلتهم هناك الجده

الجده : رحتون و جيتون و ما اخذتون الا هل الجيس بس ؟

ساره : رحنا كل نحجز ما نشتري ,, بس اشترينا ذهب

الام : باااشووف الطقم

زينب : ها

الام : حلاااااااوته ,, يبرق ,, اللهم صلي على محمد وآل محمد

زينب :

مريم : هاويش صاير ؟

زينب : مشتريه طقم الذهب

مريم : باشوفه , بلبسه

الام : وي ؟ هذا دون لأختش

مريم : احسب ليي

ساره : يا علي على الهباله

الام : يلا يا خلف عمري خشيه اهو

زينب : انزين

الام : اسمعي ,, متصله خالتش مستحمقه عليش

زينب : من ويش ما تستحمق عليي و السوسه فاره مخها عليي

الام : لا تقولين سوسه

زينب : الا سوسه و نص

علي : من هي السوسه ؟

زينب : مرتك

علي : مي سوسه ,,ندى طيبه اطيب منش و احسن منش

زينب : شفتين اماه ,, ندى سيطرت عليه و فرت راسه بعد ... تالي بتفر راسه عليش ,, جاينش الدور

علي : هي انتين حدش ها ,, انا محترمنش لانش على ذمة رجال جان من زمان كفختش هني

زينب : اذا مسيتني بتشووف

الام : بس روحي حجرتش ويش هل الحاله ,, و انت علي اسكت

علي : انا اصلا بطلع الحين

زينب : اطلع ,, ابركها من ساعه

و هم جدي و يرن تلفون زينب محمد متصل

تقوم زينب تروح حجرتها

مريم : هذا اكيد محمد

الام : و انتين ويش يهمش خليها ولا تراقبينها

مريم : اني ويش قلت يمه

ردت زينب على التلفوون

زينب : الوو

محمد : هلا

زينب : هلا و غلا

محمد : هههههه عجبش صدق الذهب .؟

زينب : ايييي لان انت مختارنه

محمد : انا اصلا ما اعرف شي بس قالت ليي اختش اختار شفته في ويهي و اخترته

زينب : و لو , بس لانك اخترته عجبني

محمد : اسمعي ,, الليله نبي نطلع

زينب : انزين ,, وين بنروح

محمد : السينما

زينب : اوكي

محمد : بمر عليش الساعه 9 ,, ويش تبغين تطالعين ؟ يعني تبغين كوميدي , رومانسي , اكشن , رعب ويش تبغين ؟

زينب : رومانسي

محمد : انزين

و قعدوا يهدروون واااااااااجد ,, ولا يشبعون من بعض مساكين بحسدهم

تالي بألف وقعه سكرو التلفوون

طلعت زينب برا

الام :

زينب :

مريم : باروح وياكم

زينب : ويش دراش بنطلع ؟

مريم : سر المهنه

زينب : قولي تصوختين

مريم : اي

زينب: هذي اخر مره لش تتصوخين

الام : مريم ,, مره فانيه لا تتصوخين فاهمه

مريم : لويش

الام : عيب

زينب : والله

الام : وين بتروحين زنوب الليله وي خطيبش؟

زينب : السينما

الجده : ها ,, السينما ؟ حرررااااام ,, لا تروحين و تطالعين مناكر

زينب : يلا عاد ,, ويش يسكتها

الجده : لا تروحين

زينب : مو على كيفش ,, بروح وي خطيبي مو بروحي

الجده :

الام : عادي يا عمتي

الجده : خلكم ,, اني امرت بالمعرووف و نهيت عن المنكر ,, ما يهمني

***************************************

 

 

[حواوه]

***************
جت الليل و قعدت زينب تجهز و تتكشخ ,, بتطلع وي الحبيب هع

و قعدت تحارسه

و محمد في الطريق جاي ليها

وصل محمد و قعد يضرب هرن احم

طلعت زينب و ركبت السيااره

زينب : هااااي

محمد : هااااياات

و قام محمد يمشي السياااره و حط اغاني

محمد : هل الاغنيه اذا اسمعها اتذكرش

زينب : ههههه ليش

محمد : ما ادري ,, ايام التلفونات وياش كل اسمعها

زينب: ههههههه

محمد : لان الحب فطر قلبي شسوي

زينب :

و قعد محمد يمشي السياااره لين ما وصلوا السينمااا

دخلوا هناك و اخذوا بطاقات و دخلوا ,, اخدوا فلم روووومااااانسي هع

عاد زينب و محمد وراهم صبياان مرااهقين هههههه تعرفون المراهقين له ما يسوون سوايه قاعدين يفوشروون على بنات صوبهم صدق ما يستحوون

واحد من الصبياان يقول الى رفيقه : تصدق انا احب الافلام الاكشن و الرومانسيه

رفيقه : ايييي عشون عيل ,, احم

صبي فاني : سكتوا الحين ببدي الفلم

محمد : والله حاله الله يعينا عليهم طول الفلم ,, كل شي بعلقون عليه بعدين

زينب :

بعديبن بدأ الفلم و الكل اصتاخ له يطالعه

و فعلا كل شي يصير في الفلم يعلقون عليه الصبياان ويضحكوون كروه

بعدين سكتوهم لان يمللون

و خلص الفلم و طلعوا

زينب : حليو الفلم

محمد : اي قصته حليوه تقريبا مفلنا

زينب : امممم , بس غير شوي يوم يتعرف عليها

محمد : اي

بعدين راح وياها مطعم عشان يتعشوون

محمد : ويش تبغين تاكلين

زينبب : اي شي

محمد : لا تستحين اطلبي زنووب

زينب : ابغي مثلك

محمد : انا باخذ ....... و ...... تبغين مفلي ؟ قولي لا تستحين

زينب : اي ابغي مثلك

محمد : اوكي بناخد بعد عصير و سويت

زينب : اوكي

بعدين جابوا ليهم الطلبيه و قعدوا ياكلوون

بعدين خلصوا وركبوا السيااره و وصلها البيت

زينب : مع السلامه

محمد : الله يسلمش ,, تيك كير

دخلت زينب البيت الا صخه كلهم نامو بس امها قاعده تحارسها

زينب : اماه مقعده للحين

الام : ما اعرف انام و انتين ما جيتين البيت

زينب : يا بعد عمري يا امي ,, هداني جيت

الام : استانستين ؟

زينب : اي طالعنا فلم حليو و تعشينا

الام : اي ,, عليكم بالعافيه

زينب : الله يعافيش

الام: باجر ندى معزومه على الغذا

زينب : بل

الام : صيري زينه وياها انزين ؟

زينب : اذا تعلفت بتعلف بها

الام : بس حاولي ما تسوين هوشه وياها ما نبى مشاكل

زينب : بشووف ,, يلا اماه تصبحين على خير

الام : و انتين من اهل الخير

راحت زينب تنااام و قبل لا تنام طلعت صورة محمد و قعدت تطالع في جماله

زينب : قمر

و بعدين نامت و هي تفكر فيه << الحب ويش نسوي بعد

و قعدت الظهر الساعه 1

طلعت برا الا مريم تراكض مني و مناك ويش صاير

زينب : مريم ويش فيش تراكضين

مريم : لان ندى بتتغذى ويانا

زينب : الحمد لله والشكر و الفرح يسوي فيش جده ؟

مريم : كيفي والله احب ندى

زينب: وي من قال لش لا تحبينها حبيها

و هم جدي الا علي جاي وي ندى

مريم : هي هي ندى جت هي هي

ندى : شحوالش مريم

مريم : زينه تعالي قعدي في الحجره

و جودت مريم ايد ندى و تسمت فيها

ندى : شحوالش زينب

زينب:

ندى :

و راحت قعدت في الحجره

الام : زينب امشي جهزي ويايي

زينب : اني توني عرووس و العروس ما تشتغل

مريم : هي انتين ما اخطبتين جان تقولين عرووس

زينب : بس بعد عرووس

الجده : اهوا حطوا غذا نبى ناكل جواعا

الام : الحين الحين بنحطه

بعدين حطوا الغذا و يكرمون في ندى و يجيبون صوبها كل شي و يقولون ليها اكلي و يدلعونها

زينب : مريم جيبي دقوووس ,, كل شي منصبينه صوب هي

ندى : تفضلي

زينب : اني قلت الى مريم مو الش

ندى :

الام : ما صار شي

الجده : هذا ويش من صواقع ؟

الام : ويش صاير عمتي

الجده : متروووس فلفل اني ما اقدر آكله

الام : اي لان صوبش مريم تارسه صوبها كل فلفل

الجده : عجل باقوم بقعد هني

الام : امشي

زينب : وييي على المصاعه الفلفل اصلا مو حار بس نكهه

الجده : لا الا حار يشلوط

زينب : عجل الله يعينش على ما بلاش

الام : زينب

زينب : زين ما يمدينا ننطق بجلمه

ندى : هههههه حتى جدتي ما تشتهي الفلفل ما تقدر عليه عادي

زينب : << تدور جلمه تقهر ندى

الام : ايي

مريم : لانهم عجايز

الام : مريم

مريم : لويش يستحمقون اذا قلنا ليهم عجايز هم عجايز صدق

الجده : يلا انطمي انتين

مريم :

زينب :

ندى : ههههههه

زينب : انتين ويش فيش تضحكين بالفوول ,, تفلتين عليي ويع

ندى مسكينه انحرجت

ندى : اسفه

زينب : اسفه هي وين اصرفها ؟

الام : زينب

زينب : اففففف اماه جيفه اسكت و هي تفلت عليي تفال لوع جبدي

و راحت زينب تسوي روحها كلش الله يغربلها تتعلف بندى مسكينه

بعدين طلعت و راحت حجرتها

عقب مده خلصوا من الغذا و راحوا الصاله يطالعون تلفزيوون

و ندى مسكينه رايحه تغسل مواعين طيبه و على نياتها

الام : يوو ندى لا تغسلين خلهم عنش اني بغسلهم

ندى : لا عاادي خالتي اني بغسلهم

و حاولت لام وياها و لا في فايده تبغي تغسلهم

طلعت زينب برا

الابو : زينب بتي اغسلي ليي هل القلاااص

زينب : ان شاء الله

راحت ليها

زينب : فجي بغسل قلااص حق ابويي

و الهبله غسلته مو عدل

الابو : هذا ويش يا زينب حتى القلاص ما تعرفين تغسلينه مو مغسول عدل

زينب : مو اني الى غسلته هذي ندى

ندى:

زينب : جيب بغسله اني ابويي

راحت زينب و غسلته عدل ما عدل

زينب : ابويي تفضل

الابو : اي هذا الغسال العدل مو هذاك

زينب : اي هذاك ندى غسلته

ندى استحمقت و حس في قلبها و جتها الصيحه بس جودتها

و راحت الى زينب في حجرتها

و زينب تتكلم وي محمد

طقطقت ندى الباب

زينب : حمودي لحضه بشوف الباب

فتحته الهي ندى قامت زينب تتدلع عليها

زينب : الوو حبيبي حمودي الحين بسكر التلفوون و بعدين بتصل لك اوكي ؟

محمد : اوكي

زينب : نعم ويش تبغين خليتيني اقطع كلامي وي حبيبي على حسابش

ندى :اولا : ما يحتاج تفوشرين بحبيبش لان عندي اني بعد حبيب ثانيا مو من حقش تجدبين على عمي و تقولين له ان اني الي غسلت القلاص مو عدل


زينب : و الله عاد انتين الي غسلتينه مو عدل اني ما جدبت

ندى : جدبتين ,, اني ابغي اعرف ليش تسوين ليي جدي مو احنا كنا ربع ليش من ديك اليوم تهاوشتين ويايي

زينب : لا تسوين روحش ما تفهمين ,, ترى انتين ساحره وعقربه تحت الحصير من تحت لتحت تسوين روحش طيبه وانتين ما فيش اسم الطيب ,, اظهري على حقيقتش

ندى : انتين تتكلمين عن ويش مو فاهمه شي

زينب : ويش يخصني فهمتين لو نار تحرقش ,, يلا برا اطلعي من حجرتي

ندى : ويش السالفه فهميني

زينب :

*******************************************

انتضروا الحلقه القادمه
__________________

 

 

[أنثى مخملية]

اووووووووووه حماس شي شي


خخخخخخخخخ

[COLOR="DarkOrange"]الجده : خلكم ,, اني امرت بالمعرووف و نهيت عن المنكر ,, ما يهمني[/COLOR]<<< هذي الجمله موتتني ضحك هههههههههههههههه

حلوووه صارت الجده تشتغل في الهيئه


الله يعطيك العافيه

ننتظر التكمله

 

 

[قيثارة]

هههههههههههههههههههههههههههه لووووووووووووووووووووول مفتخر
كملي حبوبه

 

 

[حواوه]

--------------------------------------------------------------------------------

و ندى و زينب يتهاوشون و يقوم يرن تلفون زينب ,, طبعا محمد متصل ليها

زينب : اوكي اذا عندش حجي قوليه ليي بعدين لان الحين ابغي اتكلم وي خطيبي

ندى : لا ,, الحين ابغي اقوله ما ابغي أأجل

زينب : ويييييي اطلعي اطلعي ما ليي خلقش اففف

ندى : يعني ما تقدرين تقولين له ان عندش كلام وي بنت خالتش ؟

زينب : لأ ,, ما ابغي اكسر بخاطره توه متصل ليي و اقوم اطلع له اعذاار تافهه

ندى : ويش قصدش

زينب : قصدي الي فهمتينه يلا براا

ندى: اني بطلع ,, بس حسابي للحين ما صفيته وياش

زينب : اففف برااااا ,, طلع لش لسان بعد

بعدين طلعت ندى و ردت زينب على التلفون

محمد : زنوب ؟ ويش فيش ما تردين

زينب : هذي ندى بت خالتي مأذيتني كل تتعلف و تتهاوش ويايي

محمد : للحين ما تطيقون بعض؟

زينب : اي

محمد : من الي يبدي بالهواش ؟

زينب : اكيد هي

محمد :

زينب : تمللني

محمد : انزين انتين صيري وياها زينه و حاجيها ها

زينب : احاجيها ؟

محمد : اي ويش فيها

زينب : محمد انت تدري ان اني ما اشتهيها جيفه احاجيها

محمد : عشان خاطري

زينب : كل شي و لا كسار خاطرك يا الغالي

محمد : بتحاجينها؟

زينب : بشووف

محمد : ما عندي خاطر عندش ؟

زينب : بلى عندي و نص .. بس ابغي اعرف شي

محمد : ويش

زينب : انت ليش تدافع عنها

محمد : هههههههه

زينب : ليش

محمد : بل صحتين ؟ بسم الله عليش لا تصيحين

زينب : عجل ليش كل تبغاني اصالحها و تستانس ليها و .. و...

محمد : والله ما احبها ,, ويش فيش

زينب : بلى

محمد : دلع عيني دلع ,, دلع روحي دلع يناسبها الدلع

زينب :

محمد : هل عندك شك انك احلى و اغلى امرأة في الدنيا .. هل عندك شك ؟

زينب : ههههههه الا صرت كاظم الساهر ,,, صوتك عسل

محمد : اصلح مغني .؟

زينب: وي حتى لو تصلح ما بخليك

محمد : لويش

زينب : بكبرك حليو و تصير مغني .. تبغي البنات ياخدونك مني لا لا تخسي

محمد : ما تفوتين شي ,, دااهيه

زينب :

محمد : انزين زنووب صدق ها حاجيها

زينب : بصالحها على شانك بس

محمد : عمري المطيعه

زينب :

محمد : اقوول الليله تعالي بيتا

زينب :

محمد : بمر عليش و بوديش بيتنا عشان تشوفين بيتنا و تشوفين الشقه

زينب :

المهم قعدوا يسولفوون واجد وبعدين سكروا التلفون

طلعت زينب الصاله و هناك ندى قاعده

زينب : ندى تعالي

ندى: نعم

دخلوا الحجره

زينب : سامحيني ندى ,, اني غلطانه في حقش و اتمنى ان نرجع مفل اول

ندى: مسمووحه يا بت خالتي

و بعدين صاروا زينين وي بعض مفل اول و قعدوا يسولفون

مريم : ندى قاعده وي زينب ؟

زينب :

مريم : يعني تصالحتون

زينب: اي تصالحنا

مريم : باروح اقول الى امي و علي

راحت مريم تخبرهم

الام : صدق ,, الحمد لله

علي : زين ان شاء الله دووم

جت الليل

و زينب معدله و مكشخه و مكيجه

الام : زينب على خير ؟

زينب : بروح بيت خطيبي له

الام : لويش ما قلتين ليي

زينب : هداني اقول لش

الام :

مريم : باروح وياااش عااااد

زينب : تجين ويايي ؟

مريم : اي ابغي اشوف ايمان

زينب : انزين الحين لويش تصيحين ؟

مريم : لان ابغي اروح

زينب : عاد صحتين لو لا ما بوديش

ويجي محمد ديييييد ديييييييد

زينب : يلا ماه مع السلامه

الام : الله يسلمش

مريم :

طلعت برا زينب و ركبت السياره

محمد : هلا هلا

زينب : هلا وغلا

محمد : هكم بيتنا يحارسونش

زينب : صدق

محمد : اي ,, اول ما ندخل بجبون على رجايلنا ماي ورد و مشموم

زينب : ادري

وصلوا بيت محمد و من دخلت زينب الباب الا كلهم يصفقون وينفرون حلاوه على العروسين

زينب :

ام محمد : بالمبارك كلووووووووووووووييييييي

و بعدين جبوا عليهم ماي ورد و مشموم و سلموا على بعض و دخلوا داخل

و قعدت زينب وياهم و جابوا ليها القدووع و بعدين بعد عشوووها

فاطمه : زينب ,, ويش لون فستان مال الخطوبه

زينب: ههههه بخليه مفاجأه ليكم

محمد : انزين قولي ليي انا

زينب : تدري اني ما ابغي اقول ليهم عشان انت لا تعرف

محمد : و انا اقوول

فاطمه :

*************************************

انتظروا الحلقه الأخيره

 

 

[أنثى مخملية]

يؤؤؤؤؤ عاد حيل حيل قصيره
تعرفين لازم تسردين القصه سرد الحين لان مافي وقت
نقعد عا النت كثير بنروح الحسينيه وبنجي ونرتب ووو<< قامت تتمسكن هههههههههه



الله يعطيك العافيه
البارت كان روووعه

تحياتي

 

 

[قيثارة]

لالالالالالالالالالالالالالا عاد ما يصير ..
كملي حبوبه نبي نشوف نهايتها مع هالثنائي المخرووووش ...

 

 

[حواوه]

الحلقه الاخيـــــــــــره

****************************************
مرت الايام مر السحاب و جا اليوم الي زينب تروح فيه الصالون حق ليلة الخطوبه

قعدت مريم الساعه12

مريم : امااه ,, زينب راحت الصالون ؟

الام : اي من زماان و انتين في سابع نومه

مريم : احنا متى بنرووح ؟

الام : يعني متى فدمتش ؟ بنتغدى و بنرووح كل مره جدي

مريم :ساره وين ؟

الام : في حجرتها

راحت مريم الى ساره

مريم : ساره ,, انتين بتروحين ويانا الصالون .؟

ساره : اي كلنا حتى خالتي في مثل الصالون الي فيه زينب

مريم : اها

ساره : يلا روحي اسبحي لان بعدين بنتغذى و بنروح

مريم : انزين

و زينب في الصالون قاعده تاكل اجبااس حضرتها و وياها ندى

بعدين تغذوا بيت حجي ناصر و خلصوا و تجهزوا

مريم : امااه ,, شعري احط فيه كريم لو لا ؟

ساره : لا تحطين فيه شي لأن بسشورونه يا الهبله بس مشطيه

مريم : انزين

علي : ما جهزتون انتون انا عندي اشغال بعد لا

الام : جهزنا يا حبيبي

ساره : تدلي الصالون ؟

علي : اي هدانا مودي ندى

ساره : اها

بعدين جهزوا كلهم و ركبوا السياره

وصلهم علي الصااالوون

الام : رحم الله والديك ويسر الله لك

ساره : مشكوور علي حبيبي

مريم : مع السلامه

دخلوا الصالون و هناك زينب مبديين في شعرها فيه الرولات

مريم : انتين هبله لويش صابغه شعرش

زينب : ويش فيها لو صبغته يعني

مريم : بس حليو لون الصبغه

زينب : مشكووره

مريم : اماه شوفي بصبغ شعري جدي

الام : مافي ويلا سكتي

المهم بعدين قعدوا في الصالون واجد يسوون شعرهم و يكميجونهم

و جت الساعه 8 , زينب جهزت

صايره حليوه كشخه ,, و فستانها كان اروع من الفساتين حتى البنات الي في الصالون انبهروا من حلاوته ,, وفستانها كان لونه
فوشي (( وردي غامق )) مع وردي فاتح مرعص بالفصوص الورديه ,, ومكياجها كان رووعة ,, واللي زاد من جمال عيونها الكحل المرسوم حوليها كان بطريقة فينة ودقيقة ,, أما عن التسريحة كانت تجنن ولا أروع ,, لان شعرها طويل وناعم فما حبت ترفعه بالكامل ، طلبت من الموظفة تسوي لها تموجات على طول شعرها وتخليه على الجنب وبالزاوية وقريب من أذنها حاطه 3 ورود ورديه طبيعية ومن نفس نوعية الورود الي في الباقه ، وحطت فوق راسها الطرحه لونها وردي فاتح نفس لون الفستان ومرعص فيها فصوص من نفس النوع .. و طلعت ويش حلاوتها
اتصلت الى محمد عشان يجي ليها و يروحون الاستديو يصورون

محمد : هلاا بالعروووس

زينب : هلا حمود .. تعال الصاالون ليي عشان نروح نصور

محمد : جهزتين

زينب : اي توني جاهزه و اتصلت لك

محمد : اوكي الحين باجي لش

الام : ساره انتين بجي لش خطيبش ؟

ساره : اي و باخد ويايي مريم عشان انتين و ندى و خالتي وي علي

الام : اي

ساره : الحين بجي ؟

زينب : اي بنروح الاستديو نصور

بعدين جا محمد

ديد ديد

ساره : هكو جا ,, يلا زينب

زينب : لبسيني المشمر الاخضر و فوقه الدفه

ساره : انزين

زينب : لا تتعفس التسريحه حاسبي

ساره : لا ما بتتعفس ,, امشي بروح وياش السياره

زينب : انتون متى بتروحون الصاله

ساره : عقب شوي لان كلنا جهزنا بس امي عليها المكياج

زينب : انزين

و ساعدت ساره ختها زينب في ركووب السياره ,, لان فستانها مال عرووس ,و مو فستان عادي تعرفون يعني

و السياره مالت محمد مزينه بالزينه

ركبت زينب وي محمد و محمد متكشخ لابس بدله ويش حلاوتها

محمد : الله الله , ويش هل الحلاوه

زينب : حلوت ايامك

بعدين محمد قعد يمشي وحط اغنية :: كل ما تكبر تحلى ,, تصير احلى و احلى :: و هو يغني وياها و يطالع في زينب

زينب : انت موتك كاظم الساهر

محمد : اي لان اغانيه فن

بعدين وصلوا الاستديو ,, و صورو لمدة 3 ساعات

و هناك الفلبينيه تقول ليهم سوو جدي و جدي و هم مساكين يسوون , و يطخطخونهم صور

بس لو تشوفون الحركات طلعت حلوه فلته

نرجع لبيت حجي ناصر و الخاله و ندى

ندى : يلا هكو جا علي عشان نروح الطاله

الام : يوو جا ..

ساره : اي يلا اماه ,, يحارسكم

طلعت ندى و الام والخاله و ركبوا السياره و راحو الصاله

مريم : و ان شاء الله احنا متى نروح ؟

ساره : يو الحين بجي محمد ويش فيش

مريم : اتصلي له

ساره : انزين

اتصلت ندى الى محمد خطيبها

محمد خطيبها : الحين جاي ليكم

ساره : اوكي

مريم : بجي ؟

ساره : اي الحين

بعدين جا محمد و ركبوا السياه و راحو الصاله

وصلوا الصاله و هناك الصاله فيها خوات محمد و اهله و اهل زينب بس للحين ما جو المعازيم ,, و توهم واصلين الا جايه الملايه الي تغني في الحفله و قعدت تقرأ المولد و بدأو الناس يجون الصاله شوي شوي لييييييين ما انترس المكان بالنسوان و الجهاال و الفوضه

و مريم كالعاده تراكض وي ايمان << زين ما ينشق فستانها مره فانيه

و ساره واقفه وي ندى و الام واقفه وي الخاله و ام محمد يسولفوون مستانسين ,, و لابسين الفياب الكشخه و تساريحهم بعد حليوه ويش حلاوتها كشخه كشخه

و الموضفات يوزعون الوجباات والعصير و الحلاوه

بعدين قعدت الملايه تغني : يا باني الغرفه على السيف بنها على ساس قويه ,, محمد مجمع له الافات ناوي على عرس البنيه

الام : كلللللللللللللللللووووووووووووووووووويي

و كل حين تغني الملايه اغنيه فانيه : هلي هلي هلي يا نجمة البحرين هلي هلي هلي عروسنا من وين ,, من لبنان لا لا لا من الامارات لا لا لا من البحرين اي نعم اي نعم هذي عرووس الزين

سمها غدير لا لا لا ,, سمها ايمان لا لا لا ,, سمها زينب اي نعم اي نعم هذي عروس الزين

و مريم المشدوخه هي و ايمان مو مسويين سوايه كل ياخدون وجبات

مريم : اني اخدت فلاف وجبات

ايمان : اني بعد

مريم : امشي نروح نراكض على المسرح

ايمان : يلااااا

بعدين جت الساعه 11 و جو المعاريس

الام : جو المعاريس

و تقوم الفوضه في المكان كل من يبغي يشوف العرووس كلهم يوقفوون و الجهال كلهم تاكضوا عشان يشوفون الملاك الهي العرووس يعتبرونها ملاك

ساره : ويش هل الغفصه انزحوا شوي بندخل العرووس ما يمديها حتى تتنفس

زينب : ساره تعالي عدلي طرحتي

ساره : انزين ’’ هل الجهال غافصينا غفااص

و زينب مجوده ايد محمد ,, و الباقه في الايد الفانيه و لو تشوفون محمد جيفه مستحي و في نفس الوقت مستانس

بعدين جو اهل محمد و زينب وراهم يزفوووونهم

و المايه تغني : يا هلا ويا مرحبا بجية الزينه يا هلا و يا مرحبا باركوا لينا ,, لا اله الا الله ,, حضر محمد وعلي و الشر عنه ينجلي

و الناس يصفقوون و يجببون و يغنون

الملايه : بارك الينا يا علي بارك بارك

و مريم و ايمان يصفقوون ويتقمزووووون

مريم و ايمان : زنووب دللوها دللوها بغت حموود عطوها عطوها

بعدين ركبوا المسرح و قام محمد شال الطرحه من على زينب

و بعدين لبسها الدبله وقام الصفااااق و التجبب

و نفروا حلاوة و مشموم و بيزات عليهم و مريم تلاقف هي و ايمان

مريم : حصلت ربيتين

ايمان : اني فلاف

و محمد و زينب يضحكون

بعدين لبسها الطقم كاامل ,, و افنينهم مستحيين ,, وبعد تالي قصوا الكيكه و مريم تبغي قطعه منها

الام : تالي بنعطيش سكتي و مرض

مريم :

الهي جايه الجده تصفق و تغني و تقول : اعطونا من هل الكيكه

الام : تالي عمتي

وقاموا زينب و محمد يأكلون بعض من الكيكه يشربون بعض من العصير

و عقب ما خلصوا من جدي قامت الام عطت مريم تودي العصير و هي الهبله اخدته تبغي توديه بدفاشه و يقوم وينكسر واحد منهم

ندى : يوو ويش سوتين يا مريم

مريم : اني كنت ما ادري و انكسر

الام : ويش هل الحاله ,, لازم بلوى وياش خليه بتشيله الفلبينيه

مريم : انزين

تالي قاموا النااس جوا يباركون الى العرووس و المعرس و من ضمنهم ابرار راحت تلم على زينب

ابرار : الف الف مبروووك

زينب : الله يبارك فيش

ابرار : مبرووك

محمد : الله يبارك فيش

بعدين صورو الاهل صوره جماعيه على المسرح

و قعدوا الاهل و يصفقوون وااااجد للعروسن
http://paginas.terra.com.br/lazer/d...asal/casal2.gif


هذي احدى الصور لمحمد و زينب

عاشوى حياة سعيده و جابوا بت اسمها حنان و ولد اسمه عبدالله
http://paginas.terra.com.br/lazer/d...asal/casal5.gif

و هذي ساره و محمد ,, جابوا ولدين ناصر و احمد ,,
http://paginas.terra.com.br/lazer/d...asal/casal6.gif


ندى و علي جابوا توام بنات سموهم بيان و بينات

و عاشو كلهم حياااه سعيده مليئه بالحب و الفرح و السعاده

مـــــــــــــــــــــــع تحيااااااااااااتيييييي

و اشكركم على حسن المتااابعه

و اتمنى انكم استمتعتوون بقصة محمد و زينب

*************************************
__________________

 

 

[أنثى مخملية]

يؤؤؤؤؤؤؤؤؤؤؤؤؤ

حسافه لو ادري ماقلت لج اسرديها يرد

وربي جووووونااااان
الف شكر لك
بس حسافه ماطلعت الصور عندي الموقع محجوب
<< تحس الصور مقلب حاطين صورة فله والا باربي ههههههههه

ربي يسعدك ويهنيك على القصه الروعه

 

 

[قيثارة]

ههههههههههههههههههههههههه
ايه والله الموقع محجوب ..
حسافه خلصت الهباله وما تونسنا اكثر خخخخ

مشكورة حواوه على هالقصه الفن ..

 

 

[حواوه]

حياكم الله ..

ومشكووورين على متابعتكم ..

وان شاء لله تكونون استمتعتو بقصتهم اللي عن جد كانت حلوووة ..

والصور ما ادري ليش ما طلعو بس كانو صور عاديه من الانترنت لعروسين ..

شكراً لكل الأعضاء اللي تابعونا وماردو

واشكر شكر خاص ل قيثارة وشموخ امراه

وكل واحد فينا طبعاً فرح للنهايه السعيده

لكم خالص تحياتي

 

 

[نور البتول]

كمليها
قصة رائعة

 

 

[قاهر المستحيل]

إنقطاع بسيط أدى لعدم المتابعة

ولكنني إن شاء الله سأقراها كاملة


يعطيكِ العافيه أختي حواوة .. وقصة بل رواية من النوع الرائع والقصير بعض الشيء رائعة جداً

واصلينا بالكثير من مثل هذه الروايات والقصص الرائعتين

لم تقصري .. إن شاء الله دائماً متألقة












والله ولي التوفيق

 

 

[حواوه]

نور البتول << يسلمووووووو على المرور الرائع -خلصت القصه غاليتي جديدي ينتظرك -نورتي صفحتي
قاهر المستحيل<<بصراحه اول بدايه اخذت على خاطري لانك اول الردود وماواصلت معي -بس الحين عرفت ان عندك ضروف وسامحتك هههه - اذا قريتها عطني رايك في القصه - لك ودي وحترامي

تحياتي لكم