بغيت أموت في نيوزلندا

[sar 103]

أهلين وسهلين ارجوان والله تستاهلين كل الخير بس ماحد قالك غبتي فتره عن القصه لازم انزلك في الدرجات
وشعندك غايبه؟؟؟؟؟؟؟ عسى خير إنشاء الله والله يعطك الصحه
مشكوره ياقيثاره
you are the best for ever and I like to be alone no need for gehad and I am
so happey because you are with me all the time
مشكوره أختي سكون الصمت وبشري بسعدك ماطلبتي شي المره الجايه بنزل مقطع طويل لعيونك تستاهلين

 

 

[زهور الريف]

اقتباس وأخيرا زهووووور الرررريف رجعت خلاص أنا طاير من الفرح زين حنيتي علي ورجعتي اتصدقين ولو مارجعتي كنت ماراح اكمل القصه لين ترجعين مانقدر نستغني عن راس المال وحاضرين نسويلك أحلى كبسه بس انت عطينا العنوان وتوصلك لبيتكم عندنا ترى خدمة التوصيل مشكوووووور ياعزف الدموع الله يعطيك العافيه على المتابعه والتعليقات الجميله واسمحلي راح انقص درجة المشاركه منك هالمره وبعطيها زهووور الرريف تستاهل زهورررر الررريف مفاجأه حلوه بمناسبة رجوع زهووووووور الررررريف إلى القصه بعد ماكانت زعلانه علينا ترقبوها قريبا coming soon

مشكورررر يا ايمن بصراحه غصب علي اقراء قصتك الجميله وما ني زعلانه خلاص دام نقصت عزف الدموع وعطيتني الدرجه الكامله ما تقصر من طيبك والله


يلا بس سوي الكبسه وطرشها احسن لك


ومشكوررر على الصور شفنا جوانا


والقصه كل يوم تصير احلى من اليوم الي قبله

ومشكوررر بعد على المفأجاه مفاجأه روعه وروعه


بتظار القصه على احر من الجمر

 

 

[ارجوان]

اهلين اخوي sar103 كنت مسافرة ليومين فقط بس اول مارجعت علي طول جيت اشوف ايش صار بالقصة بس انت صدمتني بموضوع الرسوب وانا عديت لك موضوع الدرجات بمزاجي بس مدام انت مصر لازم تزود لي الدرجات والا بضرب عن متابعة القصة

 

 

[قيثارة]

tanx brother but i fullo the story couse it is exited
على فكرة ارجوان انا ادري وين كنتي ...
اقول ليه ما عزمتيني على جمعه يوم الخميس ...يالسحر تسحرون من ورانا ...الاسبوع الجاي انا بروح بعد ...مالي شغل ...

ايمن ...انا ابي درجه كامله ..خل ارجوان تولي الراسبه ..خخخخخ

 

 

[عزف الدموع]

اقتباس الا ليت الشباب يعود يوماً واخبره ان نفسي اكون كيوي

حسبي الله عليك ههههههههه والله وخلتك نيوزلندا شاعر يحكي واقعه المر ,,,,و هههههه


المهم


اليوم الجزء من القصة حلووو وحماسي يعني حديثك بينك وبين ماجد وجهاد صديقك بالبيت وحكاية عيد الحب كلها اشياء جميلة واحداث حلوووة حصلت

اقتباس مشكوووووور ياعزف الدموع الله يعطيك العافيه على المتابعه والتعليقات الجميله واسمحلي راح انقص درجة المشاركه منك هالمره وبعطيها زهووور الرريف تستاهل زهورررر الررريف

العفووو خيوووه ماسوينا الا الواجب يلااا معليه تستاهل زهووور ولا يهمها الغالية بس بشرط المرة الجاية نقص عليها درجة وحطها لي ...اووووكي وحدة بوحدة ...



:::::::::::::::::::::::::::::::


وبالنسبة للبيت اللي ساكن فيه حراااااااااام عليك وش سويت فيني انا اموووت بمناظر زي شذي آآآآآآآآآخ ياليتني ساكن معك بس والله يعني بجد تخيل حالك من اول ماتفتح عينك الصباح الا وهالمناظر بوجهك وتقووم بعد وتاخذ نفس وتطلع الدخان من فمك وخشمك زي ماتسوي انت هههههههههههه شي عجيب


شي لايووووصف ........ مالي خص الصيفية الجاية خذني معك موشغلي دبرهااا انت ؟؟؟؟ >>>>>>>>>>ايه بس تولم

اقتباس الله يرزقنا حلاوة الروح طالما ماكسبناها في الشكل

آآآآآآآآآآآآمين ياخوي بس احب اقولك حاجة واتمنى تغبلها من اخوك عزوووف

عمر الجمال الظاهري ماكان مقياس للرجل أو لشخصيته

جمالك بأخلاقك وطيبك وتعاملك مع الناس وانا اخوووك

لايغرك شي ولا عليك من كلام احد !!!

كم واحد حلووو واخلاقه زفت والناس ماتحبه

وكم واحد مو حلو والناس تحبه واخلاقه عالية

شفت شلون وانا اخوك؟؟؟

الدنيا يبيلها من يسايرها !!!


الحلوووووووو بأخلاقه مو بجماله

وانت ماشاء الله باين عليك اخلاق ومحترم وهذا يكفيك ونص !!!!!!!!



شفيني سويتها محاضرة ههههههههههه



صح ولا انا غلطاااان ؟؟؟؟




::::::::::::::::::::::::::


مشكور خيوووه وتسلم يديك ويلاااااااا لاتتأخر علينا بالتكملة الجاية للقصة الاكثر من رائعة ... طيب








موفقين احبتي

 

 

[عزف الدموع]

اقوول زهووور عزميني معك على كبسة ايمن اوكي خخخخخخخخ

 

 

[sar 103]

مررررررررررررررحبا شباب شخباركم إنشاء الله بخير
هلا والله زهور الررريف كيف الحال والله إني جهزت الكبسه بس المشكله ماعندي عنوان بيتكم يله معليه خيرها بغيرها وترى القصه مش حلوه هذي عيونك الحلوه
مرحيا ارجوان الحمد لله على السلامه والله يتقبل ورجاء قبل ماتروحين أي مكان لازم تعطينا خبر علشان ماندور عليك في المنتديات وإذا تبينا نسامحك جيبي لي هديه والف شكر
هلا قيثاره
do not be worry I will give you full mark becuase you are number one on my list
هلا والله بعزف الدموع شخبارك دائما تحرجني بردودك الحلوه وإذا تبغى الكبسه عطني عنوان بيتكم وطرشها لك بدال زهوووور الرررريف

وتابعونا


وفالكم

طيب

 

 

[sar 103]

موقف اليوم



راح يعتمد على الاطفال



انتم كالاطفال في نقاوة قلوبكم

واحببت ان يكون موقف اليوم كنقاوة قلوبكم

لتسامحوني على تأخيري في عرض المواقف

وزودّت عدد الصور لعيونكم




.

.

.



احد الايام كنت متجه للباص

تقريبا الساعه الرابعه عصرا

وكان الوقت خريف

ملاحظه : الخريف ماقد شفته على الطبيعه :: حسب طبيعة بلادنا .. ماعندنا الا صيف وشتاء

عموما الخريف كان غير

الاوراق صفرا وطايحه والكل يلعب فيها



منظر حلو







المهم



رحت لموقف الباص ولقيت طفلين يلعبو باوراق الشجر

تفرجت فيهم

وكانت امهم موجوده واستأذنتها اني اصورّ اطفالها

ورحبّت بالموضوع وشكرتني على هالشئ << لو عندنا قالوا لا تصور عيالينا

نخاف عليهم من العين

خخخخخخ من زين عيالنا



قمت صورّت الاطفال كم صوره

ولعبت معاهم شوي لحدّ ماجاء الباص

ووصلني لمحطة الباصات







ماجاء الا بعد ساعه الا ربع ( اقصد الباص )



بحكم اني طلعت من البيت بدري اتمشّى على النهر
وقعدت اصورّ








رحت للسكوير

وتقابلت مع جهاد

واتفقنا نطلع نتعشى وبعدها نتمشى << قلت نتعشى لانهم بنيوزلندا يتعشوا 5 عصرا

والعائله الداشره تتعشى 6 خخخخخ

رحنا المواقف عشان يوقّف سيارته

طبعا اول ساعه مجانا

وثاني ساعه تبدا تحسب بدولار واحد

لكن السعوديين والخليجيين ايش يسوو ؟

يوقفّوا سياراتهم

وقبل ماتنتهي الساعه

يطلّع السياره

ويرجع يدخلها ثاني وياخذ كرت جديد !!

ويحسب له ساعه جديده مجانا !





بس انا رفضت انه يسوّي هالحركه

بحكم انهم الكفّار عندهم امانه واحنا المسلمين

من بجمب القدّه !! << بجمب القدّه تعني : ان الشخص بعيد كل البعد عن طريق الحق
<< من زين الشرح



.

.

.

دخلنا ماكدونالدز

وطلبت وجبة سمك << كعادتي في نيوزلندا خوفاً من الوقوع في الاثم واكل لحوم غير مذبوحة

على الطريقة الاسلامية

وجهاد طلب وجبة لحم طبعا كلنا طلبنا اكبر حجم





وبحركه خُطافيّه من اخوكم الدلخ ( انا )

كبيّت الكوكا كولا





اعذروني احياناً يمرّ اشياء تدوّخ

وكسعودي لازم يكون لي ردة فعل هبلا





.

.



جاني كم سبّه من جهاد على وزن

يادلخ

ياأهبل

يالوح




وانا اقول له

هياّ مسحّ !! ليه تكب الكولا !!

<< باللغه الانجليزيه وبصوت عالي عشان يبرىء نفسه من التهمه



طلعنا من المطعم بعد ماعوّضوني بكوب كبير ثاني مجانا





اتفقنا نطلع نتمشى

ورحنا لحديقة الماوريين ( نِسبة الى قبائل الماوري الاصلية )



ولقيت فيها كم طفل

وعجبني الطفل اللي يبغى ينقزّ في المويه

وامه تمسكه




ولقيت طفل ثاني عيونه وخدوده تهبّل

بوّسته وعضيته وصورّته وكنت راح اخطفه كمان

ولقيت طفل يبغى يطلع على الحمار

 

 

[ارجوان]

حاضر ياخوي قبل ماروح اي مكان اعطيك خبر والمرة الجايه اجيب لك هديه بس انت عطني العنوان وقيثارة حمدي ربك انك ماكنتي موجودة كل اللي راحوا قضوا وقتهم بالنوم الله علي هالصور عشب اخضر واطفال عز الطلب وصدقت ياخوي بالنسبة للتصوير عندنا بالسعودية حتي لو استاذنت من الاهل انك تصور اطفالهم يرفضون ويهزئونك بنفس الوقت اسالني صارت عندي خبرة ومن بعدها عقدة

 

 

[ارجوان]

استني استني تراني توني انتبه علي ردك لقيثارة الحين هي الاولي باللسته حقتك لا وبتعطيها الدرجة الكاملة والاولي كنت اتابع القصة باستمتاع بس انت خربتها علي بقصه الدرجات

 

 

[زهور الريف]

اقتباس اقوول زهووور عزميني معك على كبسة ايمن اوكي خخخخخخخخ

يؤ شلون جذيه يا عزف الدموع اعزمك






انت اصلا المفروض تجي بدون عزيمه انت الاساس وانا الضيفه عندك

اقتباس مررررررررررررررحبا شباب شخباركم إنشاء الله بخير هلا والله زهور الررريف كيف الحال والله إني جهزت الكبسه بس المشكله ماعندي عنوان بيتكم يله معليه خيرها بغيرها وترى القصه مش حلوه هذي عيونك الحلوه

خلاص اعطي الكبسه عزف الدموع انا وعزف الدموع واحد اذا كل الكبسه عزف الدموع انا اعتبر نفسي كلتها وبصحه والعافيه عليك يا عزف الدموع



ايمن الصور حيل حلوووووووووووو


يعطيك العافيه صراحه منظر رائع والخريف صوره تجنن والمصورهم هالعيال احلى واحلى

يلا بسرعه كمل القصه الروعه

 

 

[قيثارة]

هلا ارجوان ...عن الغيرة كيفي انا وياه نتفاهم ..
وبعدين ادري انهم قضوها نوم ورجعوا بيوتهم بدري ...
تعالي الاسبوع الجاي ..
وخل نفلها على كيف كيفك ..

يالله الجزء حق الاطفال حلو ..
بس ارجع لسوالف الكبار احسن ..

 

 

[sar 103]

مرحبا ارجوان خلاص ولايهمك راح اكنسل موضوع الدرجات بس أهم شي الحلوين مايزعلون
والعنوان مافي أسهل منه لو قايلتلي كان عرفتيه على طول سهل مايضيع
هلا زهوووور (صديقتي المفضله )بس لاحد يدري مشكوره ياعسل على التعليقات الرائعه
اقول ياقيثارع قلنا نكلمك بلانجليزي علشان ماحد يفهم طلعت ارجوان تعرف انجليزي
so what can we do? but I will not let any body to make you sad
اقول ياقيثاره بس تعزمين ارجوان عزميني معكم وراح اتشوفين الفله أوعدك شهر كامل ماتسكتين من الضحك !!!

 

 

[sar 103]

.
.
اتفقت اطلع مع الشباب
نشوف فيلم في السينما

لـ جيم كاري


تجمعنا على الساعة 6 مساءا

وتقريبا حضرنا السينما الساعه 10 م

وبدأنا نتابع الفيلم
اللي كان غبي
وماكان يعكس خلفية نجم مثل
جيم كاري

طبعا اصابنا الملل

جاني اتصال من السعودية
فطلعت من الصالة
للبهو الخارجي

وكانت المكالمة من بنت اخوي

وتبكي وتكلمني
وتقول لي
ارجع السعودية بسرعه
!!
حاولت اهديّها
وتقول ارجع على السعودية بسرعه


طبعا بنت اخوي هذي
دايم تقول اني طفلها

الله يحفظها

المهم بصراحة تكدرّ خاطري وكنت احاول انها ماتسمعني او تحس فيني وانا ابكي

قفلت منها وماكان لي نفس ادخل اكمل الفيلم

جات شابة جمبي
وسألتني ليه تبكي
؟؟
وكسعودي ( البكاء عندنا عيب )
قلت لها : لا انا ما ابكي !
بس دخل حاجة بعيني

قالت اوكي اذا احتجت تفضفض انا موجودة
فخفت
ودخلت الصالة اكمل الفيلم
< خواف

بصراحة لما دخلت حسّوا فيني الشباب اني متكدر خاطري
طلبوا اننا نمشي وانا رفضت
بحكم ان الصالة مظلمة والواحد ياخذ راحته

ويجيني اتصال ثاني بنفس الوقت
مارديت
الرقم من نيوزلندا
دق مره وثنتين وثلاث
ورفضت ارد

في الاخير رديت

وتجيني مكالمة
من رب العائلة سوني

يقول لي

أيمن : تراني ميت جوع وانا في مطعم
fish and chips
( مجموعة محلات شهيرة في نيوزلندا تقدم السمك والبطاطا )
طبعا مرّ هالمطعم مخصوص لانه يعرف اني ما اكل اي لحم

انا قلت له
سوني !! انت وصلت نيوزلندا !!
( نزل الخبر عليّ كالصاعقة )

قال ايوه خلصنيّ ايش اجيب لك
وانا اقول له لا كذاب انت ماوصلت
ولو وصلت ليه ماتدق من جوالك ؟
قال مو مصدقني ؟
اوكي الحين اتصل من جوالي
وعشان اتأكد اتصل من جواله
وانا رجيّت اللي في الصالة
وانا اقول
لالا كذاب لالا تمزح لالا توترّني
المهم اكّد لي انه توّه واصل من المطار وميت جوع ويبغانا نتعشى سوا

قلت له بس انا متواعد مع الشباب
قال مو شغلي
تصرّف
انا طلبت لي ولك

قلت له اوكي
ماتتخيلوا قد ايش اسعدني هالخبر
!!
شهر كامل وانا ساكن ببيت وحدي
والخوف متملكني
والوحدة ذابحتني

خليت الشباب يوصلوني بس قبل اوصل مريت محل واشتريت هدية بسيطة
وغلفتها

ورحت للبيت
ما اقدر اوصف لكم قد ايش كان العناق حار
!!
سبحان الله
نشأت بيني وبينه معزه غريبة
دفعته انه يتبحرّ في امور الاسلام

اعطيته الهدية
وقال لي تعال

انا كمان جايب لك هدايا
المهم
جاب لي
علبة توفي
ومأكولات من جزيرة فيجي
تشمل شيبس وبسكويت وشطه
< يعرف اني احب الشطة
فجأة تذكرت شئ
!!


تذكروا المقطع السابق
؟؟
اللي قلت فيه

انه اعطاني فلوس ولقيتها بدرجه ؟
وشلتها لما جو الشباب ناموا عندي
؟؟
( اللي مو متابع معناها ماراح يتذكرّ

كل واحد على فصله
ماعلينا نرجع للموضوع


قلت له لحظة ياسوني
ورحت جبتها

واعطيتها له

قام قال
انا هالفلوس اعطيتها لك
وقلت له انا ما احتاجها
قال بس هذي كانت للشهر اللي انا غبت عن البيت فيه
قلت له
ماتلزمنيش << يعني انه قالها بالمصري

سكت دقايق
ورجع قال لي
انا قد شفت عالم كثير وقابلت ناس كثير
بس مثلك انا عمري ماشفت
!!
قال لي ايش عندك بكره ؟
قلت له ولا شي

قال اوكي انا بكره مسوي حفله لك
قلت له
لي !!

انت اللي جاي من سفر
قال اسمع
انا راح اسوي ديك رومي
<< يكره شئ اسمه ديك رومي
بس مجاملة قلت له


اوكي نسوي حفلة بكرة

جا اليوم الثاني

وانا طلعت مع الشباب لانه اعز اصدقائي وافي راح يسافر
ومسوين له بارتي صغير
وبالاصح
هو مسويّ
وجامعنا
بحكم انه طبّاخنا في الغربه

اعتذرت من الشباب بدري للرجوع لـ sonny
لاني عارف انه مجهزّ حفلة صغيرونة


ولا تنسوا اني طلبت منه
انه مايجيب خويته
لاني اتشاءم منها


رحت البيت لقيته جامع كم شخص من زملائه بعوائلهم
وكم صديقه له وطبعا كان لازم يعزم خويته

لقيته مجهز الديك الرومي اللي كأنه خروف !!
وبعض الاشياء البسيطة
والايسكريم اللي كان دايم يخلطه لي مع فواكه ويقول انه
مفيد لي بهالحركة اكثر
وكانت الطاوله تشتمل على مأكولات من جزيرة فيجي

راح اعترف لكم
اني ماطولّت

يعني يادوب اكلت كم حاجة
واول مابدأو يتلذذوا بمشروباتهم الروحية
استأذنت ورجعت اكملّ السهره عند وافي
....

وافي بالفعل هالشخص وافي

اتذكر انه كان بنيوزلندا من قبلي بـ 4 اشهر

كان مايعرف غير بعض الكلمات
yes
no
ok
you

!!
استغربت
ولما قويت علاقتنا قبل سفره بشهر او اكثر

كلّمته كلام اخويّ
( وكان محروق دمي بصراحه )
وقلت له
حرام يضيع هالوقت من عمرك وانت بس جاي تستانس هنا وتتمشى !!

وفقّّ بين الدراسة والتمشية
وانا اعرف انك انسان سوي وعاقل والاّ ماكان كلمتك من اساسه
وطلبت منه طلب

انه قبل كل اختبار
يجيني البيت ويقعد معاي ساعه وحده بس

اتفقنا
وصار يحقق معدلات عالية بشهادة نفسه والجميع
بحيث انه اول اختبار بعد ماذاكرنا سوى

جاب

75
بينما بالعادة كان يجيب 40 او اقل
من 100 طبعا

قاموا المدرسين والمدرسات يسالوه عن سرّ التطورّ في مستواه
وجو شكروني
وصاروا دائما ينادوني
بأني
( الصديق الوفي )


<< خلاص كافي ياعم مدحت نفسك كثير .. غيرّ الموجة تكفى

طيب طيب


رحت المطار
اليوم الثاني

لوداع اخي وافي
( اللي كان سندي بالغربة بعد الله )

ما استغربت لما لقيت مجموعة من الاصدقاء واصرار وحدة من الطالبات مرافقتي
عشان نروح له
خخخخخخخ هالطالبة احدى معجباته
وصلت المطار انا وهالطالبه وانا من اول اقول لها
بليز بدون دموع !
لكن تفاجأت لما شفت جهاد لابس نظارات شمسية قاتمة في الصالة الدخلية !!
عرفت انه يخفي دموعه

وقتها ماقدرت امسك نفسي !!

شافني
وكان يأشرّ من بعيد
ويقول
لو ماتسكت راح اجي اخنقك
!!

جا وجلسنا شوي
واستغليت فرصة وجودة
واستأذنت منه ورحت اشتري له دبدوب للذكرى

وبعدها
سافر

بصراحه كنت متحطم

كان متنفسيّ جهاد

جلست استرجع ايامنا سوا

اول مره تعرفت عليه لما قال لي اترك الباص وانا اوصلّك للبيت ..
ووقتها ماعرفت وين البيت
وكيف انه كان يضحك عليّ ..
واضطر انه يرجّعني لموقف الباص عشان انا حافظ الطريق من هناك
<< غبي

تذكرّت انه كان يجي ياخذني ويوديني السينما ونروح نتمشى وبالاخير يرجعني البيت ع الفجر

تذكرت لما يوم من الايام شغلّ شريط قصائد في الأم واحنا نلف بالسياره
وقعدنا انا وهو نبكي


تذكرّت لما كان يقول لي ياأيمن .. انا هذي اول سفره في حياتي ..
يعني من الديرة الى نيوزلندا !!
( هو قحطاني عموما )

وكيف انه لما كان يشوف اي مشهد غير لائق
كان يقول
الله يفضحكم !!
وانا اموت عليه من الضحك

تذكرت انه لما صوّرّنا بكاميرا الفيديو قبل سفره بليلة لما قال لي أيمن ايش راح تفقد ؟
وقلت له انا حزين انه مين راح يطبخ لنا بعدك !


تذكرت لما كان يفتخر انه ياكل بأيده وكانوا الناس هناك يستغربوا من تصرّفه هذا

تذكرت لما تحدينا انه ندخل الكنيسة ونصورّ واني مثلّت دور القسيس وهو المذنب وقام هو خطب في الناس الوهميين التماثيل
( الكنيسة كانت فاضية والا ماكان قدرنا نسوي اللي سويناه )


تعبت وقطع حبل تفكيري الطالبة اليابانية لما قالت
يالله عشان موعد المحاضرة

طبعا ماقدرت احضر محاضراتي
رغم اني وصلت للكلية

لكن رحت على البيت يومها

ورحت في سبات عميييييييييييييييييييييييييييييييييييييييييييييييي ييق

ماصحيت من هالنومه الا اليوم الثاني

وحمدّت ربي انه خففّ عني الالم

صحيت الصبح وتذكرت موقف حلو صارلي أنا ووافي وماج

الى المركز القطبي
انتاركاتيكا سنتر
( كانت اول طلعه لنا ومابعد تعرفنا تمام التمام )

ناخذ معلومات اكثر عن طبيعة المدينة
كرايست شيرش
christchurch

وكيف انها هي البوابه الوحيده الى القطب الجنوبي

وانه القطب لا يبعد عنها سوى بضع مئات من الكيلومترات

وغير كذا
انهم يعرضّونا لعواصف ثلجيه

ودرجات حرارة تصل الى 25- تحت ال

المهم قطعنا التذاكر
وبالتخفيض بعد
بحكم اننا طلاب <<< ميزة حلوه في الدول المتقدمه

حتى السينما ناخذ عليها تخفيض << لاتطلع عن الموضوع

المهم

رحنا وشفنا المركز وقعدنا نتصورّ

ونشوف الاحفوريات والتحف
واشياء القطب

مركز ابدااااااااااااااااااااااااع بمعنى الكلمه

ودخلنا العاصفة الثلجية

وكررنا الدخول لها
<< سعوديين ذبحهم الحر !!


طبعا لبسنا لبس خاص
عشان ندخل لهالعاصفة بالاضافة الى احذيه من البلاستيك المقوىّ

طبعا بالذات انا ووافي طلعنا من العاصفه واخشامنا حمرا !!


واحنا في نصف المتعه هذي

الا وتعترضني امرأة كورية

تطالع فيني وتبتسم
وعاد انا من باب الاحترام طالعت فيها وابتسمت وفتحت فمي لحد ماغطتّ فتحة الفم كل مافي وجهي
مو مابقي الا الاذنين تمسك فمي
<< يتابع دعاية ريد بل كثير خخخخخخخخ


طبعا محدثكم .. موزّع ابتسامات من الدرجة الاولى

ماعلينا

انا مشيت خلاص

وقاعدين نتصور انا وجهاد
الا والاقي وحده تطمر من ورانا
وتاخذ الكاميرا من ايدي
وتقول انا اصوركم

طبعا نفسها الكورية
انا متأكد
لانه تقويم اسنانها يلمع
خخخخخخ
المهم صورّتنا
وجيت اخذ الكاميرا واقول لها شكرا
لكن رفضت تعطيني الكاميرا
بحكم انها تبغى تصورني في اكثر من مكان

<< قاعد يقول في نفسه ما ابغى اتصورّ !!

المهم اصرّت انها تصورني في اماكن هي تختارها !
طبعا اللي قاهرني الى الان
هما جهاد ووافي.. لما شافوني اتكلم معاها راحوا وتركوني !! على بالهم اللي سووه اتيكيت
وهم وهقوني معاها !!


المهم ادورّ على اصحابي ومالقيتهم

وهذي الهبلا
تعال هنا
طيب تعال هنا
وتصورني
وتصويرها زي وجهها
وانا فاتح فمي مو فاهم ايش الموضوع

المهم قمت اخذت كاميرتي منها وشكرتها على لطفها
ورحت قاعة السينما عشان فيه شرح عن الانسان البدائي في القطب الجنوبي
والقاعه كانت مظلمه ماعرف وين اصحابي جالسين
فجلست في اقرب مكان قبل اطيح

وانا اتفرجّ

الا الكوريه جمبي تقول
عرض ممتع صح ؟
وش ذي اللزقه ؟؟
مسكت على قلبي وانا اقول بسم الله عليّ
من وين طلعت هذي

طبعا اكرر واقول عرفتها من طقم اسنانها
كان يلمع من انعكاس شاشة السينما
خخخخخخخخخخ


طبعا طفشت منها
قلت يالله ايش تبغى هذي
؟؟
طبعا عدت ادراجي << تعبت لين جبت هالجمله

رجعت مكان ماكنت .. رغم انه ممنوع العوده الاّ اني استأذنت من الموظفات وسمحوا لي

وبعد مارجعت كم مرحله من اللي قطعتها سابقاً
تنفّست الصعداء

الاّ ويدّ تربّت على كتفي

واطالع الاّ هي الكوريه

!!
ماتتخيلوا لو قلت انه تملكني الشعور بالخوف !!
قالت وين رايح ؟

قلت لها ولا مكان ادورّ عل اصحابي
<< من جد خاف

قالت تعال اوريك مكانهم

استسلمت ومشيت معاها وهي ماسكه ايدي بقوه
<< كنت راح انحاش والله

المهم قالت

ابغى اعرفك على زوجي
الاّ وانا اضرب كفيّ على جبيني واقول في نفسي ظلمت ام تقويم

<< الحرمه متزوجة بس انتوا يالسعوديين تفكيركم زنخ ...
طيب لا تستعجلوا في الحكم

طلعنا لاخر صاله في المركز الا والاقيها تعرفني على 8 اشخاص تقريبا بالاضافة لزوجها

هذا أيمن من السعودية
هذا فلان من امريكا
وهذا من كندا
وهذا من المكسيك
وهذا وهذا وهذا
وعرفتني على زوجها
وقالت انها مقيمه في نيوزلندا من 9 سنوات
وانها تبغى رقم جوالي عشان تعمقّ الصداقه
اعتذرت لها
وقلت لها جوالي مايرسل

قالت هالكلام على سيندي ؟؟ << هذا اسمها
مادري ليه حسيتها عاشت في السعوديه قبل كذا !! احسها فاهمه حركاتي !


قلت لها اوكي
الجوال في شنطتي اللي بظهري لحظه انادي صديقي عشان يطلع الجوال >> الله من كسلك ياأيمن !! طيب نزلّ الشنطه من ظهرك !!

مو اقول لكم متلخبط ؟

قالت لا تنادي احد انا اعطيك الجوال بس اعطيني ظهرك

اوكي
سجلت رقمي ياأيمن ؟
ايه سجلته
طيب اديني رنه
<< مو اقول لكم عاشت في السعوديه !!

اوكي
اعطيتها رنه

وقالت اقدر اقابلك اليوم ؟
هاه !!
لا مشغول


ليش مشغول ؟ ابغى اشوفك اليوم راح نقيم حفله بحكم اننا بعد 6 ايام مسافرين اجازة لكوريا الجنوبيه
ليه ؟ رايحه تفكي التقويم ؟؟ ( مزح سعودي ثقيل )
خخخخخخخخ << يقال انه يستخف دمه بينما في الحقيقه قلبه طايح برجوله

قالت انتظرك اليوم
قلت لها ما اقدر احضر حفله فيها شراب ورقص واساسا راح اتأخر عند صديقي الى مابعد 10 الليل

قالت اوكي
اقابلك بعد 10
حتى الجو العام يكون هادي

هاه !!

قالت لا تنسى
قلت اوكي
قالت وين ساكن ؟
قلت لها عند النهر البيت رقم 434
قالت معقوله ؟
انا على النهر البيت رقم 600
قالت اهلا اهلا

طيب على خير
وواعدتها اني اقابلها وفي الحقيقه عشان افتك من هالنشبه
وانه اصحابي ينتظروني ودمهم محروق مني بحكم انه المركز بيقفل وينتظرونا ننقلع ونطلع

طبعا جات الساعه 7 وانا بالبيت

وجات الساعه 10 وانا قاعد بالبيت
وتتوالى الاتصالات
لكن يمدحوا السيفونات ( السيفونات جمع سيفون .. وبالسعوديه اذا احد قال سيفون .. معناها انه كان متواعد مع واحد وسحب عليه )

واسحب عليها
وترسل رسايل
وينك
وتختم رسالتها
بـ
حبيبتك سندي


الله من الزحفان
كنت بارسل لها
المتيمّ بتقويم الاسنان

بس مادري ايش يعني تقويم الاسنان بالانقليزي كنت باكتب
( calendar teeth )


تذكرت موقف فرعي لما واحد كان يقول
( اي هاف اينفلوبز كايرو )
i have envlops cairo
يقصد
انا عندي ظروف قاهره !!


ماعلينا
نرجع لموضوعنا

بس ما اكذب عليكم
اذا قلت انه قعدت اسبوعين امشي عكس ارقام بيتها
يعني رقم بيتي 434
امشى عالنازل
الى 200 تقريبا

ولا اطلع عن 434 بتاتا

هذا احد المواقف الصعبه

لاني ماعرفت ايش نيتها
ولان الشباب افتكروني لعاّب وانهم تركوني على بالهم اني داق صحبه معاها

بس بعد هالموقف كبرت في نظر اصحابي
وكبروا في نظري


عندي موقفين تذكرّتهم امس
وانا اتكلم مع اخوي

خلوني اضيفهم

الموقف الاول

خرجت انا واحد الاصدقاء الساعه 4 الفجر
ميتين جوع

وكرايست شيرش بهالوقت
مافيه شئ فاتح عدا
البارات وكنتاكي


طيب احنا نبغى كنتاكي
بس مابي اقولكم ايش الخطر في الخروج بهالوقت



ماعلينا

اول شئ مالقينا موقف قريب
واضطرينا نوقّف على بعد
200 متر تقريبا



احنا نمشي ونشوف سب وكلام من شباب وبنات
والله حتى البنات طلع لهم لسان


بس ياما احلى سبّهم


يعني مثلا تقول
ابعد لا تدعس على ظلي
مادري ايش الظل هذا اللي يطلع الساعه 4 الفجر !!

وصلنا للمطعم ووقفنا بالسرا

كان بدون مبالغه سرا كبير
لسببين
انه هو الوحيد اللي فاتح 24 ساعه
السبب الثاني وقالها لي احد الاصدقاء
ان اللي يسكروا يجوعوا كثير

فكان يوجد 4 مسارات
واقل مسار
11 واحد فيه
!!
عموما وقفنا في السرا
وكانت روائحهم استغفر الله
منتهيييييييييييييييييين
كان قدامي
وحده تقريبا عمرها 50 سنه
ماخلّت احد في حاله
سكرانه ع الاااااااااااخر
ومن قرادتي كنت وراها
لفتّ وطالعت فيني
وقالت لي اشفيك مبوّز
؟

مبوّز = يعني مبرطم خخخخخ اقصد يعني متذمر يمكن

قلت لها عادي
بس مو متعوّد اشوف هالاشكال

قالت اهااااا
وفجأة
قالت كلمة غريبه





.
.
.
.
.
.
.

قالت

ابتسم
!!
قلت لها نعم
!!
قالت ابتسم
قلت لها سوري مافيه شئ يستدعي اني ابتسم

عصبّت وزمّت حواجبها

قالت بصوت عالي جدا

smilllllllllllllllllllllllllllllllllllllllllllllll llllllllllllllllllllllllllllllllllllllllllllllllll llllllllllllle
اسمااااااااااااااااااااااااااااااااااااااااااااااا ااااااااااااايل

الكل لف يطالع فينا
وانا وجهي ضاع

وفجأه صديقي يقول
ياخي ابتسم وفكّنا
!!
قلت له ماني مبتسم
!!
<<< مسّكت غلط معاي

رفعت يدها على فمي
وسوّت شكل ابتسامه
مادري اذا فهمتوا وصفي او لا
اقصد
حطت ايدها على اطراف فمي
وسوّت ابتسامه كبيرة
انا متقرّف طبعا
رحت غسلت ورجعت ثاني

لقيت فيه واحد صار بيني وبينها شايب كبير تقريبا عمره
50 مثل الهبلا السكرانه
وطبعا هو نفس الشئ سكران

هالرجل كان حاط معطف على رقبته
قالت له شيل المعطف
!!
قال لها ماني شايله
وفجأة
ما اسمع الا صوت كف ماشي مليون


وطاح المعطف منه
اعطته كف لانه ماسمع كلامها
نزل على الارض يشيل معطفه
ورفع راسه وهو يضحك !!
قال لها انتي سكرانه ماراح اعمل لك شئ
طبعا هو بعد سكران ولا داري عن الدنيا

فجأة طلع من المسار

ماصار فيه الا اانا وهي


طالعت فيني قالت
ابتسم
!!

بصراحه طوالي فكيت خشتي وابتسمت




ياحبي للتواضع
<< كذاب خايف من الكفّ

ووقتها قلت لصاحبي
امشي الله لا يبارك في هالبطن
تراهم يمدحوا التوست والجبنه

وطلعنا وبعدها توّبت ما اطلع بهالوقت

 

 

[sar 103]

طبعا نزلت لكم اليوم مقطع طويل لأني بروح الدوام وراح انقطع عن المنتدى
سامحوني القصور إذا ثقلنا دمنا عليكم تقبلوا تحياتي
وراح اشتاق لكم
ولاحد يحش فيني
اشوفكم على خير ياحلوووووووووووووووووووووووووووووووووووووووووووووو وووووين

 

 

[قيثارة]

خخخخخخخخخخخخخخخخخخخخخخخخخخخخخخخخخخخخخخخخخخخخخخخخخخ خخخخخخخ

تروح وترد بالسلامه ..
ومن طول الغيبات يسلم عليك ..
مانوصيك بالغنايم ..

وبالنسبه للعزيمه .. حاضرين للطيبين ... الخميس الجاي بالاستراحه عندنا... وكل واحد يجيب قهوته وياه ..
وجيب كاميرتك
وخل نضجك شوي شنو ورانا
مع ان الثلوث ببدي اختبارات لابارك الله ببليس وهله ..

 

 

[حلى الشرقيه]

<<<<< متأخرهـ مرررررررررهـ


يالله



وش ذا القصه


من جد روووووووووووعهـ


يعطيك العافيه أخويه


بجد رحله حلوووووووووووهـ عشت معكم والله,, والا الصور وااااااااااااو



قصه طريفه وحلوهـ مووووووووت


والله متت من الضحك على


7

اقتباس المتيمّ بتقويم الاسنان

هههههههههههههههههههههههههههههههههههههههههههههههههه هههههه


ماقدر عليك ههه



يعطيك العافيه ونشوفك على خير

 

 

[زهور الريف]

الله روعه القصــــــــــــــــــــــــــــــه


بصراحه ضحكتني على ام التقويم وعلى السكرانه الغبيه خلاص كان ابتسمت وفكيت عمرك منها



ايمـــــــــــــــــــــن لا طول الغيبه تري القصه روعــــــــــــــــــــــــه وتهبل ومشوقه


الله لا يحرمنا منك

 

 

[سكون الصمت]

مشكوووووووووووور خيووووووووووووو


والله رهييييييييييييييييييبه



من جد ضحكت على القصه رهيبه مع اني مالي خلق اضحك انا اليوم بس قصتك بصراحه خلتني اضحك




عالعموم ننتظر الجزء الجاي على احر من الجمر



تروح وترجع بالسلامه




بالتوفيق



تحيااااااااااااااااااااااااااااااااااااااتي

 

 

[ارجوان]

هههههههههههههههههههههههههههههههههههه عجبتني قصة التقويم الله يعطيك العافية ياخوي وتروح وترد بالسلامة بس لا تطول علينا ترانا ننتظرك وننتظر باقي القصة وقيثارة غسلي ايدك من الروحة للمكان اللي رحناه لان مثل ماتعرفين ماينفتح للزوار الا مرة بالسنة يعني الحجز يتم قبل سنة من الروحة والله يوفقك يارب في الامتحانات