عرض مشاركة واحدة
قديم 04-02-2011, 09:40 PM   رقم المشاركة : 41
إشراقة أمل
مشرفة داري يؤثثها اختياري وMobily وشاشة عرض
 
الصورة الرمزية إشراقة أمل
 






افتراضي رد: ودّك تنـآمين ؟ نـآمي | روايــــة ]|~

الجزء السادس والعشرون ( ستة وعشرين ) :.

- تتعقد المسألة بين دانة ورائد .. يوم تكتشف انه لسه مخبي عنها أشياء وما قال لها عنهم ....
- ثامر بدا يدور على حقيقة خلود ..
- ام سعود و ابو سعود قرروا السفر لاستراليا ..
- دلع اكتشفت انه سعود ما يغار عليها .. وقاعدة تحاول جاهدة انه تحصل ف قلبه الغيرة اللي تثبت لها حبه لها ....


>> الفصل الأول <<

(( بيت ابو سعود ))

( الساعة 1 الظهر )




ام سعود تصارخ منفعلة : ومين سمحلك تاخذ هالقرار بدون ما تشاورني...؟؟
سالم مستغرب : وليش اشاروك..؟؟ هذا مستقبلي مو مستقبلك ... وانا حر ف اختياره...!!!

ام سعود : يا غبي انا كنت مخططة اخليك تدخل احسن الجامعات ف اوروبا وتتخرج وترفع راسنا .... مو تدخل جامعة محلية .. ايش الفايدة..!؟!؟

سالم مو عاجبه كلامها وزهق منها ومن تسلطها : يما .. انا قررت وخلاص .. وهذي حياتي .. اطلعي منها .. مو كل شي تبغينه لازم يصير ....!!!

ام سعود فتحت عيونها ع الاخير : هذا آخر كلام عندك ...؟؟
سالم عقد يدينه باصرار : أي ...

ام سعود وهي طالعة للدور اللي فوق : اجل هالمرة مو انا اللي بتفاهم معاك .. خلي ابوك يتفاهم معاك ...
سالم ماسك الضحكة " يعني ابوي اللي بيغصبني على شي ما ابغاه ...؟؟!! هههه والله انك تضحكين ...!! "


دق جواله ورد على طووول ...

فيصل : ها بشرني وش صااار ...؟؟
سالم : يعني ايش صار .. اخذت زفة منها .. وتقول انه بتخلي ابو ييتفاهم معاي ... كانه الموضوع هامها مرة ...!!!
فيصل : الله يهديك انا قايل لك شاروها قبل ... شوف الحين حطيت نفسك بمشكلة كبيرة .....
سالم : يا فيصل انا اعرف وش أسوي ... وبعدين ايش تقدر تسوي لي ... انا سجلت ف الجامعة وهم قبلوني وخلاص .... مالها دخل ف حياتي .. انا ابغاها تطلع منها .. !!


___________________________________


(( شقة سعود ودلع ))
( الساعة 2 الظهر )


دلع كانت كاشخة ع الآخر ومستعدة عشان تنفذ الخطة اللي قالت لها عنها نسايم قبل كم يوم ..

اخذت الصحن وودته لغرفة الطعام ... حطته على الطاولة قدام سعود اللي ابتسم يوم شافها ....

سعود : وش هالحلوووو ...؟؟
دلع ابتسمت وقعدت قدامه على الطاولة : شلون دوامك اليوم ...؟؟
سعود : بخير ... ما عدى القرررف والحر والكتمة ... انا بخير...
دلع : أي والله الجو صار ما ينطاق ...

سعود : أبشرك ... عندي إجازة بعد اسبوعين ...
دلع استانست : والله ..؟؟ وناااسه .. !!
سعود ابتسمت يوم شافها فرحانة : تسلم لي الضحكة ...!! فرحيني معك ..
دلع تسوي انها تتذكر : واااااااااو يا سعووووود ... اسكت لا تذكرني .. شفت جارنا العسكري اللي قلت لك عليه ...

سعود طالعها بنظرة مستغرب .....
دلع : هذاك اللي اخذت منه الزيت هذيك المرة ...
سعود وهو يكمل أكل : طيب ...
دلع شقت الحلق " بنذبح اليوووم ..! " : اليوم دق الباب وانا فتحت ...


سعود والوضع ايزي : طيب و ايش كان يبغى ...؟؟
دلع : كان يقول .. يبغى شوية سكر من يدي الحلوين ... شرايك..؟؟ بالله عليك كلامه ما يخقق ....؟؟!!

سعود طالعها وبعدين رجع كمل اكل وهو مو معطيها وجه : ما قال شي غلط ..
دلع " ما قال شي غلط...!؟!؟!؟!!؟ كل هذا وما قال...!؟!؟! اجل متى يكون اللي يقوله غلط ...؟؟؟ لما يقول تتزوجيني مثلا....؟!؟!؟ " : ا...أ .. أي صح .. وقال لي تتزوجيني؟؟

سعود قام من على السفرة : كانت قلتيله انك متزوجة .. وانتهى الموضوع .. !!!

تركها ودخل الغرفة عشان يتروش وينام شوي ... وتركها منقهرة منه ع الآخر ....
دلع " هذا من جده ولا يستهبل ..؟؟ بالله عليه احد يرضى يجي واحد يقول لزوجته كذا........!؟!؟!؟ صدق انا ماني عارفة وش اسوي معاه ....!!! انا اوريك يا نسايم انتي وخططك الفاشلة ....!!! "

قامت ودخلت الغرفة وشافته بالحمام ... اخذت التليفون ودقت على نسايم ...

نسايم : الووووو ..
دلع تصااارخ معصبة : مااااااالت عليك .. وعلى خططك الفاااااااشلة...!!!
نسايم : ليش ايش صااار ...؟؟
دلع : ايش صار ها...؟؟؟ ما صار شي ... بس عطاني كفين ....!!!
نسايم تضحك : هههههه قلت لك هالخطط احيان وراها ذبح ...
دلع تقلدها : هههههههه مااالت عليك مصدقة بعد ... يا غبية ما سوى شي .. يقول ما قال شي غلط ... وبعدين قلت له قال تتزوجيني ..؟؟ قال لي كان قلتيله متزوجة وانتهى الموضوع ....!!!!!!!!

نسايم استغربت : انتي متاكدة انه زوجك مو مريض ..؟؟
دلع : أي ليش...؟؟
نسايم : في واحد عاقل تقول له زوجته هالكلام وع الاقل ما يموت من العصبية والغيرة...؟؟؟!!
دلع : اففف ... انا شدراااني ... ترى والله تعبت ... ما خليت شي ما سويته ... بعدين ترى هالسالفة بدت تاثر ف علاقتنا ...
نسايم : طيب خلاص .. طنشي وانسي الموضوع ... مو لازم يغار عليك ....
دلع : لا والله ... في احد ما يغار على حبيبته ...؟؟ وش دراني انه صدق يحبني اذا ما يغار علي...؟؟

نسايم : سهلة .. ما يحبك ...!!
دلع سكرت بوجهها معصبة : ماالت ... قال ما يحبني قااال .. ( فكرت شوي ) معقوولة ما يحبني ... افففففف ... ( دموعها بدت تتجمع ) ليش..؟؟ انا ايش سويت عشان ما يحبني ..؟؟ والله ما خليت شي وسويته عشانه .... ضحيت بكل شي عشانه .

انا اللي وقفت جنبه لين ما وصل لهالمرحلة ... واللي ساعدته وحبيته ووثقت فيه .. ليش ما يحبني ..؟؟


طلع سعود من الحمام وعلى طول دلع مسحت دموعها ومسكت المجلة اللي جنبها.. تحاول تخبي وجهها الحزين عنه ...

اما هو فما عرف ايش يسوي ... قرب منها وقعد على السرير بملابسه اللي كان لابسها .. سحب منها المجلة وهو يضحك ....
سعود : هههههههههههههه... هههههاااااي ..
دلع مستغربة : ليش تضحك ...؟؟ وليش ما تروشت للحين..؟؟
سعود مسك ضحكته وقال : انتي ليش خشمك احمر ..؟؟
دلع لفت وجهها : ما فيني شي ...
سعود : اكيد...؟؟
دلع : أي ..

سعود لصق فيها وحضنها بقوة وهو يضحك : هههههههه ... هههههاااااي ...
دلع اللي كانت بحضنه وطاحت دموعها : لا تضحك ...!! ما في شي يضحك ..
سعود باس راسها وطالع فيها : الحين مين قالك اني انا ما احبك ...؟؟؟!! معقووولة .. انا سعود .. ما احبك ...!!!؟؟ من وين تجيبي هالافكار انتي..؟؟

دلع تدافع عن نفسها : انا من وين اجيبها ...؟؟ اسال نفسك ... تصرفاتك كلها تدل على هالشي ...
سعود مستغرب : انا..؟؟ انا وش سويت...؟؟
دلع انقهرت : شفت شلون .. وتقول لي وش سويت ..؟؟ لا ما سويت شي ابدا يا اخ سعووود .... !!

سعود : من جد دلع ... انا ضايقتك بشي...؟؟
دلع تنهدت وقامت : انسى الموضوع ...
سعود مسكها من يدها : لأ ... انتظري ..قوليلي انا مسويلك شي ... مزعلك بشي..؟؟
دلع مسحت دموعها وابتسمت ابتسامة مجاملة : خلاص سعووود .. انا صايرة حساسة شوي ... انسى الموضوع ..
سعود وقف : متأكدة ...؟؟
دلع : أي...
سعود باسها من جديد : طيب .. على راحتك ..

تركها ورجع للحمام .. اما هي " انا غبية ... احد يسوي زيي ..؟؟ صدق اني بزر ..! "


___________________________________


(( بيت ابو راكان ))

( الساعة 6 المغرب )

في الغرفة اللي يغطيها الظلام ... كل شي تغير عن ما كان اول .. الغرفة ما عادت مرتبة ... كل شي مرمي على الارض و ف الزوايا .. وصوت الصياح ما ينقطع .. هذي حالة مها من فترة ... بدت تنهار ... الاكتئاب استولى عليها .. والعظام بدت طلع من جسمها من قلة الاكل ....

قامت مها ترتجف والعرق يصب منها : ثامر ...!!! ثاااامر وينك ..؟؟ ...

قامت من على السرير زي المجنوونة تدور ف الغرفة على شي مضيعته .. رمت الملابس.. نثرت الاوراق ع الارض .. حتى العطور كسرتها وهي تدور بهستريا ف الغرفة وتصيح وتنادي : آآآآآآآآآآآه ... وييييييينك ..؟؟ ثامر وينك ..؟؟ ليش تسوي كذا..؟؟ ليش تهرب مني ...؟؟ انا مها يا ثامر .. مها مو خلووود....!!!! انا ما سويتلك شي عشان تسوي فيني كذا ...!! خلود ... خلود هي السبب والله ... والله ....

وبعد نوبة الصراااخ اللي جاتها .. بدى الباب يندق .. سمعت صوت الباب والتفتت بلهفة وشوووق : ثامر...؟؟

بس كلها ثانية وتحطمت من جديد يوم سمعت صوت امها الخايفة من ورى الباب : مهااا.... مها حبيبتي افتحي الباب شفيك..؟؟ الله يخليك يا مها ... يا مها لاتسوي فيني كذا افتحي الباب الله يخليك .....!!!!!!

مها بخووووف وهي فاتحة عيووونه ... رفعت شعرها الطايح على عيووونها .. وفتحت الدرج اللي جنب السرير .. وطلعت منه علبة حبوووب ... اخذت لها حبتين .. بلعتهم بدون موية ... وانسدحت وتغطت من فوووقها لتحتها .. وما عاد شي يبين فيها ... !!


___________________________________


(( سيار ة رائد ))

( الساعة 7 المسا )

سكر رائد عن ريم .. اللي اتصلت فيه من المطار .. تبشره انهم رجعوا .. وجاله خاط على طوووول وكانت دانة ...

رائد ابتسم يوم شاف اسمها : فديتك انتي .. مرة اشتقت لصوووتك ..

بس ما قدر غير انه يعطيها بزي ... " الحين لو رديت .. بتسويلي سالفة .. مو وقته .. بعدين بكلمها ....!! "


( من جهة دانة )

دانة " كذا يا رائد ...؟؟؟ هذا جزاتي متصلة اتفاهم معاك عشان نحل المشكلة سوا ...؟؟ "

حطت التليفون ف الغرفة وطلعت تغير جو وتحاول ترتاح شوي من التفكير اللي ذابحها ..

( المطار )


ركضت ريم اللي طاحت بحضن اخووووووها مستااانسة ..
رائد : ههههه شوي شوي .. كل هذا اشتقتيلي..؟؟
ريم باسته على خده بدلع : وه فديتك مررررة اشتقت لك ...
رائد منحرج لانه الناس قاموا يطالعون فيه : يا بنت بس... شوفي الناس قاموا يطالعووونا...!!!

ريم ولا معطيتهم وجه : وين بابا ..؟؟
رائد : ابوي ف البيت ..
ريم : طيب ليش ما جا...؟؟

رائد التفت لامه اللي جاية وتحط اوراق بشنطتها : الحمدلله جيتي ... خليتا تسكت الله يخليك....
ام رائد ابتسمت : ما عليك منها مستانسة لانها شافتك ... ها وش سويت للعرس ...؟؟ ترى ما بقى غير يومين ....!!

رائد ابتسم : اتطمني ... كل شي تمام ... ما عليك .. كلها يومين زي ما قلتي .. وتشوفيني طالع ع الكوشة جنب دانة ...
ام رائد : حبيبي انتا ... وكيف دانة ..؟؟
رائد : الحمدلله بخير... ا... بتسولفون هنا ف المطار..؟؟ مو ناويين تروحون البيت ..؟؟

ريم : الا يللا .. الله سخليك ابغى اشوووف باابا ...
رائد ضحك والتفت لامه : هذي شوووفي شلون كبير ة ... ليش عقلها قد النملة كذا..؟؟ ههههههههههههه



@@@@@@@@@@@@@@@@@@@@@@@@@@@@@@@@@@@@@

(( اليوم اللي بعده .. بيت ابو رائد ))

( الساعة 4 العصر )


كانت دانة قاعدة ترتب اغراضها ف الشنطة عشان ياخذوووها بيت ابو رائد بكرة .. يوم دق تليفونها ..

اخذت الجوال وهي عارفة مين اللي متصل " ارد ولا ما ارد ..؟؟ اسوي زي ما سوى فيني واعطيه بزي..؟؟ لا لا لا ... هذا رائد .. ما يصير اسوي فيه كذا ...!! "

دانة : الووو ..
رائد ابتسم : فديت هالصوووت ... كيف حالك حياتي..؟؟
دانة " ياربيييي ... احبك والله احبك " : هلا ..
رائد : دانة روحي ... زعلانة ..؟؟
دانة : اكيد ...

رائد : خلاص حياااتي .. انسي الموضوع .. خلينا نبدا من جديد ونعيش حياة زي الناس ... ترى بعد بكرة عرسنا نسيتي ...؟؟
دانة : لا ما نسيت ... بس.. ما اقدر يا رائد ... اللي تقوله ماله تفسير .. شلون تبغانا نتزوج ونعيش حياة طبيعية وانت لسه ما عطيتني تفسير مقنع ....!؟!؟!؟
رائد " الله ياخذك يا بنت الكلب على اللي سويتيه ...!! " : دانة .. دانة انا احبك .. انسي اللي قلته .. وانسي انك شفتي أي شي .. خلاص .. انتي عطيني ثقتك شوي .. وما راح تندمين ... ها..؟؟ شرايك ..؟؟

دانة سكتت تفكر شوي : ............................... مين شهد ..؟؟
رائد سكر عيووونه منقهر : دانة .. قلت لك خلاص ... هذي وحدة مو مهمة ...!!
دانة باصرار : لأ مهمة .. بس قول لي الصورة هذي لمين و ايش كان موقعها من حياتك وانا بنسى الموضوع ...

رائد : يا دانة .. هذي وحدة من اللي كنت اعرفهم .. مو مهمة .. ما عادت ف حياتي ... خلااااص ....؟؟
دانة : طيب ليش كذا الصووورة ..؟؟ شلون العلاقة كانت نت وتليفون بس..؟؟
رائد : دانة مو قلنا انسي...؟؟
دانة : طيب قول لي .. ايش اللي خلاك تطلع معاها بصووورة وانت تبوسها ..؟؟ ممكن تفهمني بس...؟؟
رائد تنهد : كنت اشوووفها ...
دانة : وين ..؟؟
رائد : وين يعني ..؟؟ ف بيتها ..
دانة : وايش اللي خلاك تروح بيتها...؟؟
رائد : لا حووووووووول ... دانة .. خلاص يكفي ... ما صارت والله ...!!
دانة : ليش تضايقت ..؟؟ قول لي كل شي .. وانتهينا ...!!

رائد تضايق بزيادة : دانة .. والله هالوضع ما يحتمل ترى ... انا بسكر ..
دانة : أي يللا .. اهرب ... بس مردي بعرف يا رائد .. مردي بعرف .. !!!
رائد : باي حبيبي...
دانة سكرت بوجهه : قال الوضع ما يحتما قااال ..!! اكيد ما يحتمل ..لانك مو راضي حتى تنطق ....!!! بس انا قلبي مو متطمن ...!!


___________________________________


(( بيت ابو سعود ))

( الساعة 8 المسا )


ابو سعود بضيق : الله يهديك يا باسمة .. انا ما صدقت خفت المشاكل ف هالبيت .. لا تفتحينها من جديد ...
ام سعود مصرة : لأ.... شلون يقرر زي هالقرار بدون ما يشاورنا ... ولدك تمادى كثييير .. هذا مستقبل مو لعبة .. ومو من حقه يقرر زي هالقرار بدون ما يشاورنا .. إحنا أهله ونعرف مصلحته اكثر منه ...
ابو سعود : يعني ايش ..؟؟ تبغيني اغصبه يسافر برى ويتغرب .. أصلا الدراسة برى يبغالها نفسية تكون متقبلتها ... مو يروح مغصوووب .. ترى والله يخرب اذا كذا ..

ام سعود : انا مالي شغل .. الولد هذا مين عشان يتحداني .. انا امه يقول لي انتي مالك دخل...؟؟ ولدك هذا يبغاله إعادة تربية من جديد ..
ابو سعود ضحك باستهزاء : بس سالم اللي يبغاله ...؟؟ اذا أخوه الكبير شفتي وش سوى لا بارك الله فيه.. والبنت ما فلحت ف دراستها .. وبنت أختك شفتي شلون طلعت ... تبغين الولد المسكين هذا يطلع أحسن منهم يعني ..؟؟

ام سود : انا ما قصرت معاهم بشي .. كل شي كان عندهم .. وماني بساكتة عن الوضع .. الولد يا يدخل جامعة زي الناس ... يا يقعد ف بيته أحسن .. هذا كله من ولد عثمان ... عبى راسه افكااار بطالية .. !!!!
ابو سعود : الحين فيصل المسكين يعبي راس ولدك افكااار..؟؟ المسكين ولدك اللي قاعد يسوووقه وين ما يبغى ... ولا هو يتيم الأم مسكين و أبوه ف السجن ولا داري عنه .. وبعدين انتي ابد ما قصرتي ف حقهم ...!!!

ام سعود : تتطنز....؟؟
ابو سعود تنهد بتعب : هـــ ما اتطنز ولاشي .. فكينا اسكتي بس واللي يرحم اوووومك...!!!!


@@@@@@@@@@@@@@@@@@@@@@@@@@@@@@@@@@@@@


(( بيت ابو رائد ))

( الساعة 11 الصباح )

قامت ريم وكل من ف البيت من الصباح عشان يتأكدون انه كل شي جاااهز اليووم ..
وهي تتمشى ف البيت شافت رائد يمشي ف الصالة داخل من برى ...

ريم بوناااسة : رؤووودي ..
التفت رائد عليها وابتسم : هلا ريم ..

قربت ريم وباسته : اووخص .. وجهك منووور اليوم ..
رائد ابتسم : أكيد .. مرررة فرحاااان ...
ريم باكتئاااب : يا حظك ... ابغى أتزوج ....!!!

رائد فتح عيووونه الثنتين ع الاخير : شوووف..!! يا ام راااائد ... تعالي تعالي .. تعالي شوفي بنتك اللي ما تستحي وش تقوووول ...!!!

ام رائد تضحك : ههههههه هبلة ....!!!!
ريم : ماني هبلة لا تقولووون هبلة .. والله اني قمر واهبل .. زوجووووني ....!!
رائد كاتم الضحكه : ههههه بس يا بنت .. لا اسمع منك هالكلام مرة ثانية .. عيب يا بابا عيب.....

ريم تركته ومشت وهي مادة بوزها شبرين : اففف .. محد يقدر يقووول الصدق ف هالبيت ..؟؟ يعني ايش فيها اذا قلت ابغى أتزوج ...؟؟؟ زوجووووووووووووووني ...!!


___________________________________


(( غرفة دانة ))

( الساعة 3 العصر )


كانوا البنات مجتمعين عند دانة ف الغرفة وداقينها سوالف وضحك ... سهى وخلود وغادة .. اما سمر وهيفا وعهود كانوا تحت قاعدين يستنونهم عشان يروحون الصالون سوا ...

دانة : هههههههه الله يقطع ابليسكم ... وين مها..؟؟
سهى : مها تقول بتلحقنا بعد شوي ... يللا خلصتوا ...
دانة قامت : بس باقي عبايتي يللا ..

نزلوا البنات تحت ... وشافوا ام بندر قاعدة ف الصالة تنتظرهم ...

دانة : ماما مين بياخذنا...؟؟
ام بندر : حبيبتي انا كلمت بندر يجي يوصلكم ...
دانة : اوكي ...

خلود حسن بشي يطيح ف بطنها : ا... ما اتوقع كلنا تكفينا سيارة وحدة ..
دانة : أي صح ...
ام بندر بتفكير : أي والله ... لحظة بدق على ثامر اشووووف وينه ..؟؟
دانة : ماما احمد وينه ..؟؟
ام بندر : عمك احمد يا بنت ...
دانة : ههه أي طيب عمي احمد وينه ..؟؟
ام بندر : راح مع ابووك مو فاضي ..

سهى : خلاص عادي بتصل ف عبدالعزيز يجي ياخذنا ...
ام بندر : الووو ... ثامر ووووجع ليش ما ترد بسرعة ..؟؟ ها..؟؟ طيب اسمع .. ابغاك انت واخوك تجون الحين بسياراتكم ... أي كل واحد بسيارته ... ابغاكم تودون اختك وبنات خالاتكم الصالون .. أي ... وبدوووون نقاااش ... يللا اشوووف دقيقتين وتكونون هنا فاهمين …. يللا سلام ...

التفتت ام بندر على البنات بابتسامة : يللا دقيقتين ويكونون هنا ... ماما دانة .. انا بلحقكم مع خالتك هدى ومها طيب...؟؟
دانة ابتسمت : اوكي ... بس لا تتأخري .. ابغاكي موجودة جنبي ...
حضنتها امها : يا حبيبتي انتي .. اكيد بكون جنبك...

وفجأة الكل التفت للباب اللي انفتح فجأة ودخل واحد بثوووبه الاصفر المخصر .. والشماغ اللي من الطريقة العشوائية ف لفته .. صاير طوله طول برج ايفيل فوق الراس..

ثامر ولا يدري وين داخل : يا يمااأ.... وينهم البـــــ

رفع راسه واندهش ... الكل موجود .. بنات .. عبايات .. ونظرات طفووولية .. وعيون مكحلة ....
ام بندر بعتب : الله يفشلك...!! احد يدخل كذا ..؟؟ افرض انه البنات ما كانوا متغطيات..؟؟

ثامر اللي حمر خده منحرج من اللي سواه عطاهم ظهره ونزل راسه : معذرة .. ا.. آسف .. م .. ما دريت انهم هنا يما ...
ام بندر : طيب شووووف ...

ثامر للحين معطيها ظهره وسااااكت ....
ام بندر : ياهووو ... ياربييي منك .. لا شفت البنات تنسى نفسك...!!!!!!

البنات كلهم مسكوا الضحكة...... اما ثامر فحمر خده زيااادة وكان يتمنى الارض تنشق وتبلعه : سمي ...
ام بندر عصبت : لف طيب طالع فيني انا واتكلم ...
ثامر : يما خلاص تكلمي اسمعك ...
ام بندر : لا حووووووول ... الحين اقووولك لف طالعني عشان تفهم زين .. لانه كذا عقلك مو معك ابدا ...

ثامر " الله يفضحك يما زي ما فضحتيني ..!! مسحتي فيني الارض قدامهم ...!! " التفت ثامر وهو منزل راسه ومسكر عيوووونه والكل فاقع عليه ضحك ....

ام بندر : شووف ... ( تذكرت ) أي صح .. وين اخوووك ..؟؟

بندر من ورى الباب : انا هنا برى يا يما.......
ام بندر : ادخل انت بعد .. ادخل بتفاهم معاك ..
بندر وهو يدخل البيت منزل راسه .. كان لابس ثوووب بعد بس ابيض ومخصر .. مع غترة بيضااا انيقة .. " لا حووول ... جا دوري بالفضيحة يعني...؟؟ " :سمي يما .... !!


خلود واقفة ومتصنمة وماهي قادرة تشيل عيووونها عنه " آآآآآآه ما ملاآ عيني سوااآكــــ !! "
ام بندر : شوفوا انت وياااه .. الحين بتودون البنات الصالون ... نصهم ف سيارتك يا ثامر .. ونصهم ف سيارتك يا بندر ....

بندر وثامر : انشـالله ...!!
ام بندر : بندر ... سيارتك نظيفة ..؟؟ ريحتها زي الناس ..؟؟
بندر : أي يمااا ... توني جايبها من المغسلة ...
ام بندر : وانت يا شيخ ثامر...؟؟
ثامر :حتى انا...
ام بندر : حتى انت ايش..؟؟ مافي قشر فصفص ( حَب ) ف السيارة كالعادة ..؟؟
بندر انرسمت على وجهه ابتسامة تبغى تاخذ راحتها بس مو قادرة ..

خلود ابتسمت لابتسامة بندر .......

اما ثامر فراااح فيها من الفشلة : أي يما اكيد ...
ام بندر ... طيب .. يللا كل واحد يركب معاه نص البنات .. انتا النص وانت النص .. فاهمين ....

بندر وثامر جايين بيطلعووون : انشالله يما ...
ام بندر تذكرت : أي تعالوا تعالوا .... تعال انت وياااهـ...

بندر " متى بنخلص..؟؟ " : آمري...
ام بندر : شوووفوا ... هذولا بنات خالاتكم وبنات عمكم .. والله اللي اسمع انه سوا معاها حركة بايخة من حركاااتكم... والله ما يصيرله خير... فهمتوا..؟؟ حركات المغازل حقتكم واللعب البطالي لا اشوووفكم تسوونها ... فاهمين ..؟؟

ثامر وبندر اللي وجوووههم صارت ف الارض والكل ماااسك الضحكة عن يضحك قدامهم..


طلعوا بندر وثااامر وراحوا يشغلون السيارات ... اما ام بندر ...
ام بندر : يللا بنات .. انقسموا .. نصكم مع بندر .. ونصكم مع ثاامر .. وشوفوا .. اذا غلطوا بحقكم او سوولكم حركة سخيفة لا تخافووون ... على طول هزؤوووهم وقولولي انا اتصرف معاهم طيب...؟؟ لا تخافون منهم ...

البنات يضحكون : ههههه انشالله ..
دانة : حرااام عليك ماما .. فشلتيهم...
ام بندر بنص عين : يعني بالله عليك اخوانك يصلح معاهم غير هالاسلووووب ..؟؟؟!
دانة التفتت للبنات وهي تضحك : طيب بنات .. يللا انقسموا ...

البنات وقفوا مستغربات ....

دانة : طيب .. انا بقسمكم ... انا وسهى وسمر وعهود ... ف سيارة ثامر .. شرايكم..؟؟
سهى تضحك : هههههه أي والله .. خاطري اضحك شوي على ثاااامر بعد الزفة اللي اكلها .....
سمر جات : خخخخخ اليوم اخوك ما بيسلم من لساااني ...
دانة : طيب ... خلود وغادة وهيفا ف سيارة بندر ... موافقين ..؟؟

غادة : انا عادي عندي ... أي مكان اركب ..
هيفا : اووكي .. ما في أي مشكلة ..
دانة : ها خلود ..؟؟
خلود : ها..؟؟ ا .. ا.. اوكي..

دانة اخذت شنطتها : يللا اجل ...!! مشينا...

طلعوا البنات وركبوا ف السيارات ... وطلعوا من البيت ..


___________________________________

(( الحلاق .. ))

( نفس الوقت )

كان رائد قاعد بينما الحلاق يضبط له شكله ... ويحدد له سكسوووكة حلوة ... ويقصر له شعره شوي لانه طولان ... و معاه ناصر وجاسم و شويه من ربعه ..

ناصر : حركااااااااات بو الشباب ... شوووف شكلك شلون طلع كشخة ...!!!
جاسم : يا حظك والله .. اليوم عرسك ...!!
رائد : هههه انت للحين ما عطوك رد بيت عمك..؟؟
جاسم تنهد : هـــ .. الا بس .. يقولون ما يبغون ملكة الا قبل العرس بيوم او يومين ..
رائد ضحك : ههههااااااي .. طيب اصبر ما وراك شي...
جاسم : صاحي انت .. ما اعرفها ولا اعرف شكلها .. انا ما شفتها من كان عمرها 13 سنة .... بعدين .. يقولون فترة الخطوووبة احلى الفترات .. وشكلها بتروح علي...!!!

رائد سرح يفكر " فترة الخطوبة احلى شي...!؟!؟! انا فترة الخطوووبة كانت حلم ما كان ودي اصحى منه ... لولا اللي صار آخر شي ... حسبي الله عليك بس .. شلون بتفاهم مع دانة اليوم ..؟؟ اكيد زعلانة مني.. لازم أطيب خاطرها... الله يستر بس ما ترجع هتون لأفعالها بعد العرس ... يا رب يعدي هالعرس على خير ....!!! "


___________________________________


(( ف سيارة ثامر .. ))

( بعد 10 دقايق )

ثامر اللي كان متفشل مرة من اللي سوته امه فيه .. كان حاط عيووونه على الطريق ولا يرفعها مهما صاااااار ..

ثامر " الله يهديك يا يما .. كذا مسحتي صووورتي قدامهم ف الارض..!؟؟! وش خليتي..؟؟ اكلتيني بلحمي وعظمي .. ما بقى فيني شي ما قلتيه...!!! "

سمر اللي كانت فاتحة الكاميرا وتصور فيديووو قالت وهي تضحك : ثامر... حر .. شغل المكيف ...
ثامر مد يده على طول وفتح المكيف ولا يدري انها تصور : حاضر عمتي ...

سمر : خخخخخخخ ...
سهى ميتة ضحك : هههههااااااااااي ... الله يقطع ابليسك يا سمر ...

دانة التفتت عليهم وما تدري انهم يصورون : شفيكم ..؟؟
سمر : لا بس تذكرنا خالتي شلوووون تتكلم ...
دانة : هههههه دايما كذا ماما .. تغسل شراعهم ...!!

طالعها ثامر بنص عين ... وبعدين رجع يسووووق ..



___________________________________


(( سيارة بندر ))

( نفس الوقت )

كانت عيون خلود طول الوقت على بندر .. تتامل وجهه اللي صارلها زمان ما شافته .. جققت ف كل حركة يسويها وهو يحرك الدركسون حق اليسارة بكل احترافية وهو يسوق ..

غادة قالت لها بصوت واطي : بالله عليك مو نسخة من ثامر ..؟؟ اللهم لون العيون غير...!!

خلود التفتت وسرحت ف عيووونه من المرايا اللي قدام ..


دانة " الله يستر من اللي بيصير اليوم .. انا مدري وش بسوي...؟؟ اخاف نتهاوش..! لا لا لا .. ما اتوقع .. انا ما بعصب .. بسكت اليوم .. خلي هالليلة تعدي على خير .. صح للحين انا زعلانة منه ... بس .. مهما كان .. هذا رائد .. هذا روحي .. هذا النفس اللي اتنفسه ... "


غادة ضربت خلود : هيييييييييييييييي اكلمك انا ...
خلود النتبهت : هااأ....؟؟ انتي شفيك...؟؟ خلاص اسكتي ..

دانة التفتت على ورى : شفيكم ...؟؟ شصاير ...؟؟
غادة تفشلت : ها..؟؟ ل .. لا ولا شي..

رفع بندر عيوونه يشوف شصاير ورى .. بس شاف عيون خلود تراااقبه ... تالم مرة .. نزل عيووونه وركزها على الطريق " اخخخخخخ .. تطالعيني بعد...؟؟ بعد ما هدمتي كل شي بيدك..؟؟!! "

دانة التفتت تكلم بندر : اقووول بندر ..
بندر التفتت وطالعها .......
دانة : شغل لنا شي .. ما احب اقعد كذاا ... بعدين خلينا نستانس شوووي ..
بندر مد يده وضغط على play ف المسجل حق السيارة ... وعلا الصوووت ..

الحكـــاآيه بختصرهــا بكلمتيـــن
أنا حبيــتكـ وانتآ خــــــنتنـــــي
وآعتــقد في فرق بيــن الحاآلتين
قلبي ذآق المر.. وقلبٍ مهتــني..

خلود نغزها قلبها .. حست انه المكان ضااآق فيها.. خصوصاآ لما شافت عيووون بندر تراقبهاآ وكانها تنتظر ردة فعلها ... فهمتها على طوووول انها الاغنية هذي لهــاآ ..

آآآه .. ياليتــكـ تصورت الحنيــن
والعذاآب اللي بغيابــك مرني..
شايفكـ تضحكـ واناآ بهم وانيــن
يا هني القلب .. ليتكـ شفتني..

صورتــك ذكرى على الرفـ الحزيــن
كآنه شي برمــش .. عينك شدنــي
الحكـــاآيه بختصرهــا بكلمتيـــن
أنا حبيــتكـ وانتآ خــــــنتنـــــي

نظرتــكـ ذيك البريئــة والجبيـن
اللي من روووعة جماآله هزني..
يللي انهيــت الحكايهـ بطرف عيـن
واختصرت سنيــن عمري ... وبعتني
ماآ اصدق حتى لو مرت سنيــن
مستحيــل يكون قلبكـ حبنــــي ..


خلصت الاغنيــة وخلود تتمنى انها ماتت ولا عاآشت هاليوم ... حست بضيق مو طبيعي... حست انه ودهاآ تتكلم .. ودها تدافع عن نفسـها ... بس ما تتوقع بيصدقها.. لانه اللي شافهـ غير اللي بتقول له اياه ...

دانة التفتت على بندر متضاقة : والله لو تحطلي رابح من جديد لا انزل من السيارة .. اقوووولك ابغى استانس رحت حطيت لي خيانة ومدري ايش... فال الله ولا فالك يا بندر.. حط لنا شي زي النااااس ...

بندر طالعها وابتسم : طيب .. انتي ما يعجبك غير راشد الماجد ..
دانة : ايوووا .. هواا داا... حطه حطه بسرعـــه .. ما بقى شي ونوصل ..


___________________________________



--------------------------------------------------------------------------------

(( شقة سعود ودلع ))

( الساعة 8 المسا )

طلع سعود من الغرفة بعد ما غسل وجهه وصحصح شوي .. وتفاجأة يوم شاف شكل دلع اللي يخررررع ...

كانت قاعدة ع الكنبة قدام التلفزيووون .. وتصيح صيااااح يقكع القلب ...

سعود مستغرب : دلع حبيبتي شفييييييييك ..؟؟
دلع تحاول تمسح دموعها بس كلما مسحت وحدة نزلت ثانية : م .. م .. ما .. ما فيني .. ش .. ش .. شي....!!

سعود قرب وقعد جنبها ومسح دموعها بيدينه : شلون ما فيكي شي...؟؟ شوفي شكلك كانه احد ميت ... تكفين قوليلي لاتخليني كذا ....!!
دلع انهارت بحضنه تصيح وتشااهق وتبكي بحراارة : اهئ .. م .. ما .. ما ادري.. اهئ..

سعود حضنها وهو خايف عليها .. وقعد يطبطب على ظهرها شوي شوي عشان تهدى" ياربي شفيها...؟؟ والله ما صرت اعرف ليش قاعد يصير فيها كذا..؟؟ " : ششش .. خلاص حبيبي .. خلاص يا روح سعود انتي... ششش... خلاااص ..

وفجأة شوي وسكتت .... ما طلع منها ولا صوووت ..
طالعها سعود وشافها مسكرة عيووونها ... بس دموعها للحين ما نشفت من على خدها ..

سعود هزها : دلع . دلع حبيبتي ..
دلع : ............. ولا حركة وولا رد ..

هزها بقوة اكثر ... بس ابد .. ما تحس بولا شي ... !!

خاف سعود " شفيها..؟؟ ليش ما تتحرك ..؟؟ لا يكون صار لها شي...!! "

شالها من حضنه وخلانها تنام ع الكنبة ... وطلع من الشقة بسرعة .. دق الجرس حق الشقة اللي جنبه بس محد رد عليه

سعود " يوووه .. توهقت .. وش اسوي الحين..؟!؟! "
شاف واحد مع حرمة جايين بيدخلون الاصنصير .. ولا اراديا قال : لو سمحت اخوووي ..

التفت الرجال : هلا..
سعود منحرج : بغيتك بخدمة ...
قرب الرجال : آمر ..

سعود متوهق : لو سمحت .. زوجتي مدري وش فيها .. طاحت فجأة لاتتكلم ولا تتحرك .. ممكن اذا مافي مانع تخلي زوجتك تشوووف ايش فيها .. لاني مدري اوديها المستشفى ولا ما يحتاج ...؟!؟!؟

ابتسم الرجال : طيب دقيقة بس ..

راح الرجال شوي بعدين رجع لسعووود وقف معاه يطمنه : خلاص الحين بتدخل تشووفها انت بس هديلي بالك شوي...
سعود مرتبك : تسلم .. والله ما اعرف اتصرف بهالمواقف .. يوقف الدم بعروووقي واتشنج..
الرجال : توك متزوج صح ..؟؟
سعود مو قادر يوقف ويثبت بمكانه : أي تقريبا ..

شوي وتطلع البنت بسرعة وهي خايفة : بسرعة ودووها المستشفى ضروووري ..

سعود فتح عيووونه ع الاخير : ليش شفيها...؟؟؟؟
الرجال : الله يهديك تحرك.. الحين وقت الأسئلة ...؟؟؟ بسرعة طلعها وركبها السيارة ..

الحرمة : انا لبستها عبايتها .. بس شيلها بسرعة ووديها المستشفى ضرووري..

سعود ركض لداخل الشقة مرعوووب .. كان لونا اصفر .. شالها ونزل فيها للسيارة ....


___________________________________


(( ف الفندق ))

( الساعة 9 المسا )


الناس اللي كانوا حاضرين كثار .. والكل كان كااشخ ع الآخر ... البنات كل وحدة احلى من الثانية ... حتى مها .. مع انه التعب كان مبين عليها .. بس المكياج كان مخبي السواد اللي تحت عيووونها .. والفستان من فووق وسع عليها .. لانها ضعفت كثير ف آخر يومين .. بس كانت طالعة بشكل عااام حلوة ..

وصلت اروى اللي جات مع امها لانه غادة عزمتها ولزمت عليها تجي .. وكانت طالعة قمر ..

غادة فتحت عيووونها الثنتين : اوووخص ... وش هالحلا يا دووووبه ...!؟!؟
اروى مستحية : اووووص .. ولا كلمة .. مو لهالدرجة ..
غادة : مااالت عليك .. غطيتي علي والله ..

اروى طلعت لسانها تغايضها .....
غادة مسكتها وسحبتها : تعالي سلمي على خالتي خليها تشوووفك ..
اروى : استحي يا غادة ..
غادة : امشي بس ...

راحت غادة مع اروى وسلموا على كم وحدة موجودة ومنهم ام غادة وام بندر ..

ام بندر شافتها وطالعتها باعجااب : اروى..؟؟ بسم الله ما شالله عليك متغيرة مرة .. وش هالحلا...؟؟
اروى منحرجة حدها : تسلمين خالتي ...
ام بندر : اعترفي يا منى بنتك وش مسوية عشان كذا طالعة قمر ...؟؟
ام عوض : والله ولا شي.. بس من زمان ما شفتووها كاشخة عشان كذا شكلها غريب عليكم شوووي...
ام بندر : بس ما شالله .. الله يحفظها لك .. سبحان الله .. فيها لمحة من اخوووها الله يرحمه ...
ام عوض ابتسمت مع انه قلبها معورها على ولدها : الحمدلله .. ربي عوضنا فيها ..
ام بندر : الله يرحمه .. ماشالله عليه كان رجال عن 10 رجال.. شكلها اخته طالعه عليه صح ..؟؟

ام عوض تتامل بنتها : أي.. مرة كانت مع اخووووها .. ماخذه منه كل شي .. حتى الشخصية والتصرفات ..


___________________________________

(( المستشفى ))

( الساعة 9 وربع )



سعود اللي كان واقف ويمشي ف الممر رايح جااي.. مو عارف وش يسوي ..
سعود : الله يستر .. يارب ارفق فيها يااااارب ..

طلعت الدكتووووورة .. وعلى طول راح لها سعووود : ها دكتووورة .. عسى ما شر..؟؟
الدكتورة مستغربة : شر ايه...؟؟؟ ( شقت وجهها تضحك ) يا اخي المدام حامل ف الشهر الثاني ....!!!!

سعود وقف متفاجئ وعيونه مفتووحة ع الاخير : ايش...؟؟ دكتووورة بلا مزح الحين .. قول لي الصدق ...
الدكتوور ة: اييييه ... فيك اييييييه ..؟؟ بؤووولك مراااتك حاااااامل ... حااااااااامل يا سيدي.. افرح ........!!!

شوي شوي بدت الابتسامة تنرسم على وجه سعود لين ما تحولت لضحكة : الله يبشرك بالخير... وينها الحين..؟؟
الدكتووورة : ف الغرفة ..
سعود مو قادر يوقف مكانه من الوناسة : طيب .. ا .. اقدر اشووفها..؟؟

الدكتووورة : ايووااا طبعا .. اتفضل ..

دخل سعود على طوووول الغرفة وهو شاااق وجهه مبتسم .. مو مصدق عمره ..
وشافها منسدحة وخشمها احممممممر ... واول ما شافته .. طاحت دموووعها ..

سعود جاته الضحكة : هههههه شفيك ..؟؟ لسة ما وقفتي صياح..؟
دلع مسحت دموووعها : سمعت ايش قالت الدكتووورة ..؟؟

سعود قعد ع الكرسي اللي جنبها ومسك يدها وقعد يتامل وجهها ... وهو مبسوووط ..
دلع : شفيك ...؟؟
سعود مبتسم وهو يبوس يدها : أي سمعت ... مبروووك يا رووحي
دلع طاحت دمعة زياادة : ماني مصدقة .. احس الدكتووور يكذب..
سعود : هههه لا ما يكذب .. وبعدين وش قصة الدموووع معاك ..؟؟

دقت الدكتووورة الباب ... ودخل ..

الدكتووورة : ايه الاخبااار ...؟؟
دلع : بخير دكتوورة ..
الدكتوورة : بصي ... دنتي دلوأتي بئيتي حامل .. عارفة يعني أيه..؟؟
يعني مش لازم تتعبي نفسك ابدا .. الاشياء التئيلة .. ما تحمليهاااش ولا تأربي عليها .. والادوية ابتعدي عنها نهائيا الا ازا رحتي لدكتوورة متخصصة وعطتك دوا خاص للنساء الحوامل ..

التفت الدكتووورة لسعود : سمعت يا اوووستاااز سعود ..؟؟
سعود : أي سمعت .. انشالله ما بتعبها .. بس يا دكتوورة في شي يعورها..؟؟
الدكتوورة : بتحسي بحاجة يا دلع ..؟؟
دلع مستغربة : لا دكتوورة مرتاااحة ..
سعود طالعها : اجل هالدموووع اللي من الصباااح ليش..؟؟
دلع منحرجة : مدري .. والله تنزل بنفسها ...

الدكتوورة تذكرت : آآآآآآآه .. وفي حاجة كمااان .. النفسية .. النفسية مهمة جدا .. لازم تكون مرتاحة ونفسيتها زي الفل عشان الجنين ما يتاثر بنفسيتها ... يعني لازم تداريها وتاخد بالك منها .. واي حاجة تطلبها .. لازم تتنفز ...
سعود : اووخص .. رحت فيها اجل... هههههههه

دلع ابتسمت : شفت شلوون .. لازم تسمع كلامي من اليوم ورايح..
سعود بحب : انتي تآمرين امر ...

الدكتوورة : وبالنسبة للدمووع والعياااط دا .. دا حاجة طبيعية لانه الست بتصير حساسة شوية فترة الحمل .. وطبعا درجة التاسر تختلف من ست للتانية .. والواضح انه دلع حساسة شوية أبل الحمل ..عشان كدا زادت بشكل وااضح فترة الحمل ..



___________________________________


(( ف الفندق .. ))

( الساعة 11 )

وقفت دانة تنتظر تنزف هي ورائد .. اللي واقف جنبها .. وشاق الحلق..
رائد لدانة : مين قدك .. بتنزفين الحين معااااي ...!!!
دانة ابتسمت وبنص عين : قصدك انتا اللي يا حظك ... !!
رائد وقف بغرووور شايف عمره : لا والله انا احلى منك ..
دانة لفت وجهها عنه : هللي ناقص تصير احلى مني...

ام رائد : هههه خلصتوا هواش انت وياها ..؟؟
رائد : يما بالله عليك مين احلى انا ولا هي...؟؟
دانة : أي يللا عمتي قولي .. صح انا احلى...؟؟
ام رائد : كلكم حلوين .. يللا اسكتوا الحين واشبكوا يدكم بيد بعض اشوووف ..

سووا رائد ودانة اللي قالت لهم عليه ...
رائد : مو كانك طولانه ...؟؟
دانة طالعت فيه : اصلا انا طويلة ..
طالع رائد ف رجووولها : هههه مو منك .. من الكعب اللي لابسته ..

ام رائد : يعني مت بتسكتوون ..؟؟ ما تبغوا زفة..؟؟ نكنسلها يعني..؟؟
دانة : لا لا عمتي .. والله هذا ولدك مو راضي يسكت ..
رائد : شوووف ...!؟!؟ طيب طيب.. خلاص بسكت ..

سكت رائد وسوا شكله زعلان ..
ام رائد : ياهووو ابتسم ...
رائد مسوي زعلان : ما ابغى .. انا زعلت ..
ام رائد : بلا دلع عاااد .. يللا ابتسم .. مو حلوة تنزف وانتا مكشر .. بعدين يحسبونا غاصبينك ..
رائد بعناد : ما ابغى .. واذا مو عاجبكم .. الغوها .. مو لازم ننزف مع بعض .. زفوها لوحدها اول ... بعدين زفووني لوحدي على كيفي ...

دانة فتحت عيووونها الثنتين على الاخير : رائد ..!! انت من جد تتكلم.. خلاص عااد بلا لعب اطفاال .. خلينا نخلص والله هالفستان ثقيل يالله قادرة اوقف ..

رائد سكت ومو عاجبه الوضع << يتدلع شوي ...

دانة " استغفرالله .. الحين وقتها يعني..؟؟ " : رائد ... رائد حبيبي .. خلاص آسفة .. والله ما كنت اقصد .. بس ابغى اخلص بسرعة .. الله يخليك ابتسم .. خليني اشوووف الوجه الحلوووو ....!!

رائد " فديتكـ انتي...!! خليكي شوي .. خاطري اتغلى!! " : حتى لو ما يصير تسكتووووني .. هذا وانتي زوجتي تقومين تكلميني بهالطريقة..؟؟!!

دانة نست انه ام رائد هنا .. باسته على خده وهمست ف اذنه بكل جرأة : ما ودكـ نخلص عشان نطلع الغرفة ونكون بروحنا...؟؟!! عشان الله يخليك يللا خلصنا ..

رائد طالعها بحب وابتسم : تدرين انك قمر اليوم ...!!
ام رائد : اخيــــــــراً....!! يللا بسرعة استعدوا ..


وانفتح الباب ... وعلا صوت الموسيقى .. وانزفوا الاثنين جنب بعض وسط نظرات الاعجاب والفرحة .... وبالرغم من المشاكل اللي كانت بينهم .. الا انهم من شافوا بعض .. نسوا كل المشاكل ... وما كان بينهم غير الحب اللي يبين من نظراتهم ...

 

 

 توقيع إشراقة أمل :
"وَأُفَوِّضُ أَمْرِي إِلَى اللَّهِ إِنَّ اللَّهَ بَصِيرٌ بِالْعِبَاد".
إشراقة أمل غير متصل   رد مع اقتباس