[إشراقة أمل]

الجزء الخامس
<<<<<<<<<<<<<<<<<<<<<<<<<<<<


وائل " ركب سماعة البلوتوث على اذنه ..ودق الرقم وشغل السياره": الو ...عبدالله ..وينك ...؟!
عبدالله"بتعجب": حلوه وينك ..احنا ننتظرك انت وسعود من ساعه واخرتها وينك...
وائل "توه يتذكر انه نسي سعود": اوه ..وش هالنسوه ...
عبدالله "مستفهم ":وش نسيت ؟
سعود كان جالس بسيارته ينتظر وائل ... ولكن موضوع عبير كان شاغل بال وائل اللي ما انتبه لسعود ...
سعود "نزل من سيارته ..متجهه الى سيارة وائل ولمحه يكلم ..": افا شكل الرجال نسيني ..."قرب من سيارة وائل اللي مو منتبه له اصلا.. دق القزاز ..وائل انتبه له فتح له القزاز ...وسعود بوجهه متعجب ": على وين الاخ ..؟
وائل "ابتسم له ": معليش يا سعود ..فكرتك سبقتني عند الشباب "تذكر عبدالله معاه على الخط "عبدالله خلاص سعود معاي ..لما اوصل عندكم اكلمك ...باي
وائل "اشر على سعود يمعنى ": يالله اركب ...
سعود: وربي انت فيك شي ..ما تشوفني مشغل سيارتي من اكثر من نص ساعه انتظرك ..؟!! وفي الاخير تقول اركب ...
وائل "بنفاذة صبر مافيه يتكلم مع احد او يتناقش ": يعني كيف بتركب والا كل واحد يروح بسيارته ...
سعود" عصب من حركته ": لا بروح بسيارتي .. "وطالعه بنظره ملامه ": اشوفك هناك ..
وائل "فهم نظرته .. وحاول يكون طبيعي ..لانه مو رايق يناقش احد": على خير ....
وائل يطالع في سعود اللي راجع لسيارته ..وحس بتانيب الضمير كيف كسر بخاطره كذا ..بس صدقني يا سعود اللي جالس اسويه افضل لي ولكم و..و..لعبير .... لازم انهي الموضوع اليوم ..بدون أي تاثير من احد ...انتبه لسعود اللي حرك سيارته ...ولحقه بسرعه ..متوجهين للشباب ....

.................................................. ..

بيت ابو سعود...عبير وسمر..

عبير : هههههههههههههههههههههه
سمر : اضحكي اضحكي .. وش عليك .. مو انتي اللي ابوك ضحك عليك ..وطياح وجهك ...
عبير :ههههههههه تستاهلين عشان ثاني مره تقولين الصدق ...
سمر : ترى كنت بقول بس قلت بجرب اسوي اليوم الثاني الشاي واشوف بيميز والا لا ...
عبير : ترى اسهل شي الشاي .. من زمان وانا اسويه لـ بابا وسعود..عشان كذا ميزه بابا بسرعه فديتتته ..
سمر : يالله قومي سوي لي شاي ...
عبير :انا اصلا كاشفتك قولي علميني ترى عادي مو شي كبير ..ومافيه لا سر ولا شي ..
سمر"ترمي خداديه على عبير ": اقول ترا ذليتينا بهالشاي ..ما ابغى.
عبير"راحت جنب سمر وحضنتها": ما عاش من يذلك والله ..."وقفت " يالله تعالي معاي المطبخ ..
سمر " بفرح": يالله .............




..............................................
..................عند الشباب ..................

وائل وسعود دخلوا عند الشباب ..سلموا وجلسوا .. وائل كان واضح عليه انه مسرح ويفكر...
عبدالله : وائل ...وين وصلت ..
وائل " طالع في عبدالله وبدون ما يرد عليه ... ايه يا وائل ..لازم تبدا بالخطوة الاولى ..راح تكون صعبه عليك بالبدايه ..بس اكيد ما راح تكون اصعب من انك لو استمريت بهالوضع ..."
عبدالله "يحرك يده قدام وجهه وائل ": هييييييييي...وين سرحت ..؟!
وائل "كانه تاكد من اللي يبغى يسويه .. وبسرعه وقف ": عبدالله تعال معاي شوي...
عبدالله" متفاجأ ": خير ان شاء الله ...عن اذنكم شباب ..

طلعوا برا الكوفي شوب ...

وائل "يطالع في عبدالله .. وهو مشبك يدينه واضح انه مرتبك ..."..
عبدالله "بخوف": وائل ...فيه شي ...أحد صار له شي ؟؟؟ تكلم ..تبغى شي ...
وائل : لا لا ..محد صار له شي ..بس ...بس
عبدالله "بنفاذة صبر": قول ياخي تراك خوفتني ....
وائل "اخذ نفس ": عبدالله الصراحه ..انا ...ابغى ...اكلم شيماء ..لان ودي نسوي ملكه في اقرب وقت ..
عبدالله " تغيرت ملامحه المشدوده ..الى ملامح هادئه ... وبعدين ضحك ": ههههههههههههههه .. كل هذا وطلعت السالفه فيها ملكه ..
وائل "مرتبك . ويحك راسه ": بصراحه ما كنت ادري كيف افاتحك في الموضوع ..
عبدالله : اي ياخوي ما عليك وترى احنا موافقين عليك من زمان بس سالفه الملكه المفروض الكبار يتكلمون فيها ..مو احنا ولا شيماء ..
وائل : ايه اكيد بعطيهم خبر ..بس ودي استشير شيماء اذا ودها ..والا عندها راي ثاني .."طالع فيه بنظرات ترجي " كلمها الحين ..
عبدالله "بتردد": امممم... اوكي ...بس مو تطول ...تسال عن الملكه وبس ..
وائل " ابتسم .. وياشر على عينه ": من هالعين قبل هالعين ...
عبدالله : ايه تو الكلام الزين يطلع ..ههههههههههههههه
وائل " بخجل ..": كلم بسرعه ...
عبدالله دق على جوال شيماء ..وردت عليه ...
شيماء : هلا عبدالله ..
عبدالله : هلا فيك ..كيف حالك ..؟!
شيماء : تمام ..لا يكون متصل تقول انك ما راح تجيب لي وجبه من هرفي ..
عبدالله :لا بجيب لك .. بس مدري يمكن لما تسمعين صوت وائل تغيرين رايك ...ههههههههههه
شيماء " بتعجب ": وشو ؟!
عبدالله "بصوت جدي ": شيماء ..وائل عندي الحين ويبغى يكلمك ..
شيماء "بارتباك ": وليه يكلمني ..واحنا لسى ما ملكنا ..
عبدالله : هذا هو الموضوع اللي يبغى يكلمك فيه .." خذي وائل معاك "..
وائل " اخذ الجوال من يد عبدالله ..وهو مرتبك ..يكلم شيماء قدام اخوها .. موقف محرج بس وائل كان مصر يسوي اللي حس انه قرار سليم ": السلام عليكم ..كيفك شيماء ..؟
شيماء " بتوتر ": وعليكم السلام ...بخير ...كيفك ؟
وائل "حس ان طيف عبير بدا يدخل خياله وهو يسمع صوت شيماء ويقارن بين اصواتهم ..بس اصراره على نسيان عبير .. خلاه يتكلم بسرعه.. عشان يمحي أي ذكرى لصوت عبير في عقله ": شيماء ..انا ودي نسوي الملكه في اقرب فرصه ..اذا انتي موافقه عشان اكلم ابوي ..ونحدد موعد الملكه .. ايش رايك ..
شيماء " بدت تكون طبيعيه .. وخف الارتباك ": مو احنا من اول نقول نبغى ملكه انت اللي مو راضي ..كلم ابوي وان شاء الله ما يصير الا كل خير ..
وائل "حس بجفاء شيماء ..بس كمل بكل هدوء ": بس انا حبيت اخذ رايك انا ابغى الملكه الخميس الجاي ..عندك مانع ..؟! ..يمديك تتجهزين في اسبوع ..؟!
عبدالله "يطالع في وائل .. مستغرب انه مستعجل على الملكه "..
شيماء : السالفه كلها ملكه فستان وانتهينا ...يعني يمدي ...
وائل "طالع في عبدالله وابتسم ": خير ان شاء الله ..بكرة بكلم ابوي.. يالله تصبحين على خير ..
شيماء "مطنشه وائل ": هات عبدالله ...
وائل "يعطي عبدالله الجوال ..وابتسم ": تبغى تكلمك ...
عبدالله : هلا شيماء ...هاه نقول مبروك ..
شيماء "بدفاشه ": بلا مبروك بلا خرابيط ..اذا ابوي كلمني وقتها يصير خير ...المهم لا تنسى تجيب لي وجبه من هرفي ..طيب..
عبدالله : طيب طيب ..يالله باي ...
وائل " كان مسرح ويفكر في اللي سواه ...وقطع سرحانه عبدالله لما حط يده على كتفه .. طالع في عبدالله .. ابتسموا لبعض ...و رجعوا لعند الشباب ....


.............................................


...............عبير وسمر يطالعون فلم .......................


عبير "بتردد": سمر ممكن اسالك سؤال واذا تضايقتي من السؤال اتخيلي اني ما سالتك ...
سمر" وهي تاكل بطاطس وتناظر التلفزيون ": اسالي ..الله يعينني عليك ..
عبير : ايش سالفه ولد جيرانكم اللي خطبك ...
سمر " طالعت في عبير ورمت البطاطس على الطاوله ..وزفرت زفره طويله ": اوف ..وبعدين هالسالفه ما بتنتهي ...
عبير"بندم ": خلاص سمر ..انا اسفه ..ما ابغى اعرف ..بس لا تزعلين ...
سمر "حست انها عصبت على عبير ..وهي مالها ذنب ": اسفه عبير ..بس ..سيرتهم ترفع ضغطي ....
عبير: خلاص مو مشكله لا تقولين .. " وحاولت تبتسم " اصب لك شاي ..
سمر: عبير لا تزعلين مني ..بس تدرين" وبحماس" بقول لك بس خلينا نطلع غرفتك ايش رايك ...
عبير "متعجبه": وليه بغرفتي ..؟!
سمر "تغمز لها ":هههههه لان فيها سوالف بنات ما ينفع هنا بالصاله ..اخاف احد يسمعنا ..
عبير : هههههههه يالله قومي نطلع قبل لا يجي اخوك ...

وطلعوا غرفة عبير .. وحكت سمر لعبير سالفتها مع ولد جيرانهم ..

{ طبعا بيت ابو وائل ... وبيت ابو عبدالله ...هما اللي كان عندهم جيران ..بمعنى البيت جنب البيت ..فله ابو وائل ..جنبهم بيت ابو سمير..وفله ابو عبدالله السوريين ...اما فلل اخوانه ابو سعود وابو خالد ..فللهم بالوسط ..فعلاقتهم بالجيران هذولا علاقة جيره سطحيه فقط ...}

سمر " وكانها تتذكر ": اسمه سمير .. كنت اشوفه دائما وانا رايحه المدرسه ..كان كشخه وشكله حلو ..قدر يلفت انتباهي .و" بخجل" قدر يخليني احبه ... صرت كل يوم اشوفه وما انبسط الا اذا شفته ...
عبير " تسمع باهتمام بدون ما تقاطعها .. "..
سمر : تجرأ يوم وارسل لي رساله مع اخته الصغيره .. " ضحكت بسخريه" يقول احبك وخرابيط فاضيه ... لحد ما تعلقت فيه ..
وارسلت له رساله انه اذا يبغاني يدخل البيت من الباب ..وان أي رساله ثانيه منه راح اخبر بابا او وائل .. وبعدها حسيت اني ما صرت اشوفه كثير لما اروح المدرسه ...
وفي يوم جاني وائل ..وقال ان سمير كلمني انه وده يخطبك.. بس يبغى يعرف اذا انتي موافقه والا لا ...طبعا قلت له مدري اللي تشوفونه ..ومن هالكلام ..وانا باطير من الفرحه ...

عبير " مفتحه عيونها مو مصدقه اللي تسمعه ": يوه كل هذا يصير وانا ما ادري ..!! ........كملي كملي

سمر : طبعا من بعد ما كلم وائل ..وائل سال عنه في كل مكان ..لانه قال اذا تقدم رسمي نعرف ايش نرد عليهم يا موافقين يا لا ... بس انا كنت اقول له لا تدقق ..وهما جيراننا من خمس سنين ما شفنا منهم الا كل خير ...بس وائل ما كان مرتاح له ..خاصه بعد ما خطبني منه ولا عاد سال .. وانا كل يوم انتظره يجي .. ويتقدم رسمي هو واهله..وقتها جاتنا خالتي وقالت سمعنا ان سمير خطب سمر ..تخيلي في الحي اللي جنبنا انتشر الخبر ..وقتها كل العايله عرفت ..بس وينه وين اهله محد جاء ...تخيلي بعدين عرفنا انه اساسا خاطب بنت خالته .. وهو قبل كذا كان متزوج وحده خليجيه بس انفصلوا ومعاه ولد ..بس هو مع امه ...
عبير " تمسك على راسها ": ول ول ول ..كل هذا يطلع منه ..
سمر : ايه وقتها احنا عرفنا انه ما يناسبنا.. بس ..ما قلنا لاحد ..والمشكله ما رجعوا جونا حتى نعطيهم رفضنا في وجيههم عشان الناس تعرف اني انا رفضتهم ..مو مثل الحين البعض يفكرونه هو اللي رفضني .." ودمعت عيونها " وانه تركني عشان فيه عيب او اخلاقي مو تمام او ...
عبير " تقاطعها ": بس بس ..ليه يقولون عند كذا ...صدق ناس فاضيه ...اتركيك من كلام الناس وربي لو تسمعين لهم بتتعبين طول حياتك"ما تدري ليه تذكرت صاحبتها ريم " اللي بيشوه صورتك وانتي مظلومه ربي راح ينتقم منهم ..
سمر: الحمدلله على كل حال .. عشان كذا صرت ما اعطي احد فرصه يضحك علي حتى لو بنظره ..اطنشش على طول .. ولا اخلي واحد ما يستاهل يلعب بقلبي ومشاعري ...
عبير" تذكرت وائل .. وقربت من سمر وحضنتها ": ان شاء الله ربي يرزقك بالزوج اللي يحبك ويقدرك ...
سمر " ترفع يدها للسماء ": آمييييييين ...ومن قال ..
عبير وسمر :ههههههههههههههههههههههههههههههههههه

.................................................. ....................


وائل طلع من عند الشباب ..لوحده لانه وده يفكر شوي بدون ازعاج الشباب ..طبعا بعد ما وصى على عبدالله ما يخبر احد من الشباب عن اللي سواه لحد ما الكبار يتفاهمون ...
وائل "في السيارة وصل البيت ..طالع في بيت عمه صالح ابو سعود .. تذكر عبير .. واول مره شافها ..وتذكر ": يوه الكيس عندي ...وبكره مسافرين ...لازم اعطيها ... جتني فكره بس ان شاء الله تتم على خير ...

نزل بسرعه من السيارة ..قبل لا يجي سعود او احد من اولاد عمه .. طلع الكيس من الدولاب ..وقف شوي وافكارة تتضارب مع بعض ..مره يبغى يطلعها ويشمها ويحضنها لاخر مره ..وجزء منه يقول له يثبت على ما فكر فيه ..ويبعد عبير واي شي يربطه بعبير..
اختار الخيار الثاني ..وقاوم فتحه للكيس ..وبسرعه دق على اخته سمر بالجوال ..تطلع من بيت عمها ...

عبير وسمر في الحوش ...
سمر : يالله عبير اشوفك على خير ..مسافرين بكره صح ..
عبير : ايه ان شاء الله بعد صلاة الجمعه ..
يدق جوال سمر >>> وائل يتصل بك ..
سمر : هذا وائل اكيد عند الباب ..يالله مع السلامه ..
"سلموا على بعض ومشوا لحد بوابة الحوش وفتحت لها عبير الباب ..وتلاقي سمر وائل ينتظرها عند الباب وفي يده كيس ...
عبير : مع السلامه سمر .. لا تقطعيني بيننا جوال " استغربت ان سمر تطالع في وائل ولا ترد عليها ...وسمعتها تقول اها طيب طيب "
عبير " متعجبه ": سمر ! وش فيه ...
سمر "ماسكه الكيس ": هذا وائل يقول هذا كيس سعود نسيه في سيارته من لما كانوا في المزرعه .. " لفت تسمع وائل ايش يقول .. ورجعت طالعت في عبير" ويقول طالعي انتي في الكيس كل ثيابه سعود موجوده ؟!
عبير " مدت يدها وهي ترتجف تشوف الكيس ..لانها حست انه مو غريب عليها . فتحت الكيس وشافت ثوبها والشماغ .. شهقت ": أأأأ ...يؤؤؤ..
سمر : وش فيك تشهقين ؟!
عبير "حاولت تغطي على ارتباكها ": لا ولا شي .ايه ايه هذي اغراض سعود ...
سمر"بلا اهتمام": يالله مع السلامه عبورة ...وتوصلون بالسلامه ..
عبير : مع السلامه ... الله يسلمك ..
قفلت عبير البوابه وهي تطالع في الكيس ..مو مصدقه ان وائل تجرأ وسوا اللي سواه..لو سعود شاف الموقف وش كان بيصير ...
حطت يدها على قلبها ...اوف ..هم وانزاح ...وهي واقفه سمعت سمر وائل يتكلمون ...

سمر "بخبث": وائل ...كفايه قز في عبير ..تراك اخذت راحتك مرره هاليومين ...
وائل " وبلا أي تعابير في وجهه ": اقز .. ما باقي الا اقز وحده بزر مثلك .." وهو متجهه للبيت .." انا ما في بالي غير شيماء.. شيماء وبس .." وكان هالكلام يقوله لقلبه وعقله قبل اخته "...
سمر : غرريبه من متى تذكر سيرة شيماء .." ومشيت وراه للبيت "..

عبير "دمعت عيونها لما سمعته يقول لسمر انها بزر مثلها ...وسمعت اسم شيماء ": بزر يا وائل ...يا حسافه على الاوقات اللي اشغلت نفسي افكر فيك ..اتاري نظراته لي وحركاته كانت تسليه وما يفكر الا بشيماء ...من اليوم مالك في قلبي مكان يا وائل ...