[سكون الصمت]

رد عليها واهو مبتسم .. وطلع من الصالة رايح شقتهم، وتم يسولف وياها شوي وقال لها عن قصة حوراء ... واهي قالت منصدمة : شوووو ؟!
هز راسه : اللي سمعتيه
وشوق: وانت بتوافق ؟
قال بحيرة: ما ادري يا شوق، هذي حياتها ...
شوق: لحظة اول، هذول متى يوو ؟
أسامة: من ثلاث أيام وانتي ما كنتي هني في بيت ابوش، اتصلوا العصر فجأة وقالوا انهم بيون البيت .. ودشت مقابلة وشكلها ارتاحت ... وانا ما حبيت اتدخل
شوق: أسامة هذي اختك !! حوراء هذي شلون ما تتدخل ؟! هذي مصلحتها
قاطعها: اختي ما عليه، بس هذي حياتها وانا ما اقدر اتدخل في قرارها !
شوق: وعمي موافق ؟!
أسامة: ما ادري ... بس حوراء شكلها بتوافق! انا حاس من ويها !
شوق: شكووو توافق أسامة !؟ ريال ما ايييب عيال !! تعرف يعني شنو عقيييم !!! يعني اتم طوووول حياتها بدون عيال! حراام تسوي بنفسها جيي
أسامة: بعد هذا قدره الريال شيسوي بروحه ...
قالت بدهشة: توك انت خايف والحين تقول قدره ؟
أسامة: أي قدره !!! استغفر الله بعد اهو يايب لروحه البلاء !
قالت واهي تستغفر: استغفر الله استغفر الله انا ما قلت جيي ، بس والله صعب، ما بتقدر تعيش طول عمرها واهي محرومة من الامومة
أسامة: اهي للحين ما وافقت، بعدين يصير خير
شوق: ليش انت بتنطرها تفكر ؟ اصلاً لازم على طول ترفضون !!
ابتسم اسامة: انا حاس انها الليلة بتقول لي انها موافقة
شوق: يعني شوو ؟!
أسامة: شوق ما ادري لا تحنين، هذي حياتها
شوق: حياتها ما عليه بس مب ترمي نفسها بالنار وانتوو ساكتين! حرام عليك هذي اختك
قال بنرفزة: ذبحتيني اختك واختك !! ادري انها اختي " وحنن اسلوبه " لكن شوق هذي حياتها اهي ! ألف مررة اقولها، انا مالي خص اتدخل في قرارها .... انا اصلاً استغربت يوم قالت انها بتفكر !! اقولها خية شلون بتفكرين ؟ توقعتش ترفضين ؟! قالت يمكن لو ما جفته برفض، بس عقب ما جفته وصارحني وكان بهالاسلوب العقلاني وياي أحس ان من حقه ان اني افكر !! واهي استحسنت اخلاقه ... واذا الله كاتب عليه جدي، ما يقدر يسوي شي!
قالت شوق بضيق: يوم بنت خالتك منى بترتبط بواحد منفصل زلزلت الدنيا وتميت تتحرطم على راسي ومنقهر من اخوانها، والحين انت اللي صدق بتدفن اختك واهي بالحياة ! مب عيال خالتك
أسامة : كنت غلطان يوم حكمت عليه .. المهم سكري هالسالفة وقولي لي ... ولدي شخبـاره ؟
ضحكت: هههههه زين يسلم عليه ومشتاق لك ...
أسامة: والله مشتاق لي ؟
ردت بدلال: اممم ايييه ، وخاطررره في صحــن مشويات دسم ..
أسامة: هههههههههههه ما تنكتين، لا تحلمين ....
قالت بزعل: أساامة والله خاطري آكل ، هني صاكين علي صكة وانت بعد بتصك علي ؟
أسامة: شحادنش على أكل بررره والخيرات كللها في البيت ؟!
شوق: انا خاطري، تعرف يعني شوو خاطري ؟
أسامة: آمرييني باللي تبين، فواكه ، حلويات من المخبز، كلشي .. إلا أكل المطاعم لا تحاولين ...
شوق: يعني والحل ؟
أسامة: أنا باجر أجهز لش لحم بيدي وأشويه واييبه
شوق: لااااااا انا خاطري من المطعم اللي ناكل منه
أسامة: لاااااااااااااا يعني لااا ماكو نقاش ..
قالت بغضب: اوكي عيل ، جووف من اللي بترمسك ... ولا تحاول تتصل لي او تييني ، لاني زعلاانة زيين ؟ باااي
وسكررته في ويهه واهو حررك راسه وضحك .. وسمع دق الباب وصوت اخته حوراء ... اممم أقوم أطلع هالفقيرة اللي كاسرة خاطري وشايلة هم الدنيا على راسها وافتر فيها على الممشى كم لفة .. واجوف قرارها وأريحها شوي ...


=========


(( يـزوي ... 4.55 مساءً ))


تـارة أسبح في خيالاتي ..
وأخرى أعيش واقعي ،
لكني دوماً أحـــلق ...
| فـأخالنـي حينهـا بيـن يديك | *

* منقول ...





كانت قاعدة مع علياء ويسولفون، وعلياء على طاولة الدراسة قاعدة تكتب واهي تسولف، قالت يزوي: وينها منووي ؟ من يييت فحصت ويل وما جفت الا غبارها
ضحكت علياء واهي تصفح الدفتر: في التلفون ..
يزوي: مب هينة هذي .. شتقول طول هالوقت ؟!
علياء: ههههههههه اسأليها ..
يزوي: بسير اجووفها ..
هزت علياء راسها ويزوي طلعت من الغرفة، رايحة لغرفة منى، ولما جافت غرفة جواد دق قلبها ... وتذكرت يوم تدخلها، ويوم يجوفها .. وو ! وقفت .. ما ابا اتذكر، وكملت طريقها لغرفة منى، دقت الباب ودشت بدون ما تسمع جوابها: شتسوين
التفت لها منى واهي قاعدة على فراشها بعد ما كانت منزلة راسها وتحررك صبعها على الفراش ومندمجة في مكالمتها، دشت يزوي بهدوء وقعدت جنبها وهمست: حسين ؟!!
رمشت منى بعينها واهي ساكتة، وهمسات من صوته توصل لمسامع يزوي ... ومنى ساكتــــــة وتسمع بهدووء !
قامت يزوي تطالع من دريشة الغرفة، وابتسمت لما طرى خيال جواد ببالها اول ما جافته ... أخذت نفس، هذا هو ما تغير، نفس الشكل، والملامح، والوجوم اللي بويهه، حسيته يتهرب من نظرات باباتي ... بابا ؟!؟! آآه شلون انا نسيت انه تحت الحين ويالس يحترق بسببي !!
يـاربي انا ما لازم أفكر في جواد خلااص ، شرات ما كنت بالامارات متناستنه، ردتي الحين ما لازم تذكرني فيه، جواااد لازم يطلع من بالي من عقلي من قلبي من كلششي !!! انا ما ابا هالحب، ما اباه ... عقلي ما يباه، نفسي رافضتنه، مستحيل أعصي أبوووي لو على قطع رقبتي ، أضحي بـ كل شي عشانه ... حتى لو كان في سبيل اني ادوس على قلبي ومشاعري، لجيين كلامها صح، أنا لازم أنسى جواااد بأي طريقة !
مستحيل يكون لي في يوم من الأيام، والمستحيل الأكبر اني اكون له، دام ابوي عرف ما عرف ... مافي أي ذرة أمل ممكن تجمعنا، وتذكرت علياء .... ليش ماكو أمل ؟! يعني علياء كان عندها أمل ان تجتمع بعلي الله يرحمه مع المشاكل اللي صارت ؟! هزت راسها اففففففف لا لا لا لا ! كلشي مختلف !!
خالي كان موافق، ومرت خالي بعد ... الا جواد !! واهي كانت تحبه ومقتنعة فيه ومصرة عليه، واهو كااان يبيها من قلبه، انا غير عنهم ... انا حبي من طرف واحد، وما اقدر ارخص بكلــمة باباتي مهما كان الثمن ..
شنو يعني جواد ؟! شنو يعني حب ؟! إذا ما كان بابا مرتاح ...
اهو يعرف مصلحتي، ويحبني ، وأوثق فيه أكثر من أي شي، أكثر من روحي !! هذي مو ثقة وبس! هذا يقين وإيمان ..... بابا اهو الانسان الوحيد بحياتي كلللها اللي اقدر امشي معاه وانا مغمضة، عيني وقلبي !!
أحب عايلتي كلها، وأوثق فيهم وبحبهم لي، بس بابا غير ... شلون ازعله مني ؟! ماشي يسوى ان يزعل بسببي!
يـاترى كلامي معاه اليوم وصل ؟! أقتنع باللي قلته ؟! وبينسـى عن جد ؟!
بينـسى وقفتنا بالمطار ؟! ينسى الكلام اللي إنقال له من جوااد ! يتناسى نظراتي اللي اجوف جواد فيهـا قبل ؟! واهو يدقق فيني كل ما جفته !! شلون أخليه ينسى كل هذا ... ويقتنع إني ما أباه فعلاً وأبا أمسحه عشانه .. معقولة اللي صـار خلّى علاقتي بأبوي تهتز ؟! وتتلاشى شوي من ثقته فيني ، لدرجة انه اليوم يقول لي انه مب اهم شخص في حيـاتي ؟!
يـارب ساعدني ... رجيتك تساعدني وتخلصني من هالهم اللي كامن فيني .. يـارب ...






[ لا تنصدم لا قلت أنا اليوم ما بيك ..
القلب عافك وإنتهى اليوم دورك ..
مرتاح أنا بليـاك لا صرت ناسيك ..
خل الهموم اللي زارتني تزورك ..
يالله توكل لا تجيني ولا أجيك ..
يالله حبيبي روح رتب أمورك ... ! ] *

* منقول ...

رن تلفونها وانقطع تفكيرها، جافت المتصل [ مهـرة ]
ابتسمت وردت: ألوو ..
وصلها صوت مهرة: سلاااام
يزوي بفرح: هلاا مهروو، عليكم السلام ، شحالج ؟!
مهرة: بألف خير، انتي شحالج ؟! عموو بو سيف شلونه ؟ كل اخواتج واخواانج واهلج والبحرين ؟!
ضحكت يزوي بصوت عالي، والتفت مرة وحدة لمنى اللي طالعتها بعين مفتوحة، وقالت واهي تعض على شفتها بحيا: لاا بس يزوي تتكلم في التلفون ... انفعلت شوي
احمررر يزوي ويها وقالت : لحظة مهررو " والتفت لمنى بصدمة " صوووتي وصل له ؟!
هزت منى راسها ورا بعض واهي كاتمة ضحكتها، ويزوي ضربت على خدها: ياويلي ! غربلات عدووج ..
وطلعت من الغرفة ومنى ضحكت بمكالمتها بالتلفون : هههههههه اتفشلت
قال حسين: الله يدووم ضحكـتها ..
ابتسمت منى: لااا والله، يدوم ضحكتها اهي مو انا ؟!
ضحك: انتي بعد لاااه
منى: غررت اني ... ما اسمح لك تتغزل في غيري
قال بدهشة: انا تغزلت الحين ؟! ههههههه انا بس دعيت لها بالخير
حركت كتفها: الي اهوو ، ما ارضى انا ...
حسين: انزين احبج ..







[ فديت رُوح من ذبحنــي وداده ، أفديـه أنا بـ مـالي وحـالي والأقــراب ...
حبّه سكَن قلبـي وعمّــه وســاده ، وأصبح بـوسط القلب وتحلل وذاب ...
كل ما نبض قلبي أحبّــه زيــادة ، حتى عرفت إن عشــرته طبّ الأحبــاب ... ، ]*

* منقول ...

فتحت يزوي الباب: منوووي ابا جارج بسرعة ..
قالت منى بتأفف: يارربي يزوي، فتحي المجرر واخذيه
دخلت الغرفة واهي حاطة التلفون عند اذنها: انزين لا ترمسيني جيي بنزارة
قالت منى: مسررع ما رديتي على ترمسيني، قولي تحاجييني احلى
يزوي: هههههه انزين باجر ... كملي تلفونج حبوبة عن لا اقطع عنج غرامياتج، بسير احااااااااجي بنت عمي ... واهي تسلم عليج وايد، وانا بعد اسلم على حسين وايد
منى: اوكي اوكي، عطيني عرض اكتافش لو سمحتين
طلعت يزوي من الغرفة رايحة لعلياء واهي ترد: هلاا مهروو، سوري رحت اييب جارج لا ينقطع بويهج
مهرة: لا عادي، قولي لي شو الاخبار اليديدة اللي عندج
دخلت يزوي غرفة علياء وصفقت بالباب وعلياء طفرت: ووجع ... يزوي بالهوون شوي على بابي
طنشتها يزوي وقالت لمهرة: اول شي احبسي انفاسج ...
دق قلب مهرة : يزوووي عن الخربطة ويلااا ارمسي ..
يزوي: اول خبر ، انا بصير خالة !
قالت مهرة: هاااااااااا ؟ من عرس ؟! اقصد من بيييب ياهل !
قالت يزوي: ميثا !! يعني منوو انتي يالخبلة ! اكيد شوقان .. ياربي ليش ما تفهمينها واهي طايرة !
صرخت مهرة: احلفـــــــــــــــــــي! بذذذذذمتج ؟! مبروووووووووك ألف مبرووووووك ! اللاااي شوقااان الدبة حامل ؟!
ضحكت يزوي: هيييه ! تصدقي! توها امس عرفت بالنتايج، واعلية ما سرت لها الا واهي ترجع، نووع اللي متوحمة يعني!
ضحكت مهرة: هههههههههههههههه اللاااي ، نفسي اجووفها بس !
يزوي: ههههههههههههه اصورها لج ؟
مهرة: لااااااا ويا ويهج ابا اجووفها جييي live يعني
يزوي: ههههههه حلوة حلوة ، عيديها بعد
مهرة: انزييين شوو بعد في اخبار ؟!
يزوي: انا ادري ان انتي الحين تحوسيييييييين وتلوسييييييين ! تبين تعرفين شي عن الحبايب!
قاطعتها مهرة: shut up يزوووي ، الف مرة قلت لج لا ترمسيني عن هالشي زين ؟!
وصلها صووت سلطان: أي شيي؟!
عضت يزوي على شفتها: امبيييه ! سلطان وياج ؟!
قالت مهرة واهي ترجف: هيي يالغبية يالتافهة .. تبين توديني بداهية انتي!
قالت يزوي بتوتر: اففف منج، لا تسبين انتي صايمة
مهرة: انزييين هذا هو سلطاان يبا يرمسج
قالت يزوي واهي تفتح عينها: مهروووو!! ضروري ضروري بعد ما اكلم سلطان اكلمج، وتسيرين الغرفة اروحج وتسمعيني! وقسم لازم تعرفين هالخبر ! مستحيل ما اقووولج ! تفهمين يعني شوو ؟!
دق قلبها وقالت بهدوء: طيب
قالت يزوي واهي شوي وتصيح: ياربي مهرررة من ويين تيبييبين هالصبر وهالبرود ؟! انا لو مكااانج كفخت سلطان وسرت غرفتي عسب اعرف الخبر في الحال ! وانتي بكل برود تقولين لي طيب ؟!
قالت مهررة بهدوء: يزوي هذا هو سلطان ع الخط معااج ...
وعطته اخووها اللي ابتسم وقال: مرررحبا بأهل البحرين
ابتسمت يزوي لا ارادياً كانها تشوف ابتسامته: مرحبااا بك ولد عمي، شحالك ؟!
سلطان: بخيررر ونحمد الله، شحالج انتي ؟! عسى مرتاحة ؟!
يزوي: هيه الحمدلله واايد ...
سلطان: الحمدلله على سلامتج .. عسى ما صار لج شي وتعطلت امورج ؟!
قالت بسرعة: ابد لااا ... كل شي تمام، ووصلت بالسلامة وعلى طوول تلاقيت بأبوي ..
تسند على الكنبة ورفع ريوله على الطاولة وتغيرت نبرته: وشو كان شعوورج ؟!
أخذت يزووي نفس واهي تترك دفتر علياء اللي بيدها: امممم شقولك سلطان! محد يتصور شكثر ارتحت وفرحت غير ربي ... تميت قابضة رقبة بابا ولا ابا افجها! وانا ميتة من الصياح، والناس كللها تطالعني! اللي يجوفني يقول هذي سايرة أستراليا والا امريكا وتوها راادة! ما كاني كنت بالامارات ما صار لي حتى شهر وشي!
ابتسم سلطان: اكيد عمي استانس !
قالت واهي تحوس باظافرها: بابا ؟! هيييه وايد .. بس ما اعرف، اممم حسيت ان انا مشتاقة لهم اكثر من ما اهم مشتاقين لي، يمكن لأن انا بروحي ومسافرة ومتولهة عليهم، لكنهم مع بعضهم
قال سلطان: لاا شو هالرمسة، عمي بو سيف ما عنده أغلى منج ..
ابتسمت: حبيبي باباتي ... وانا بعد ما عندي أغلى منه ....
قالت علياء: يالله وش هالبنات، كل وحدة ويا واحد من صووب ...
ضحك سلطان ويزوي تفشلت وراحت لها وضربتها: سخيفة، ارمس ولد عمي ...
طالعتها علياء: واني ما قلت شي ! هذيييك ويا حبيب القلب، وانتي ويا الجنتل مان على قولتش
سلطان: ههههههههههههههههههههههههههههههههههه
يزوي: انت بعد جب ... علاية صخي احسن لج
سلطان: حبيييييتها هههههه عطيني اكلمها شووي
ضحكت يزوي: علاية، سلطان يبا يرمسج
علياء: هههههههههههاي ، حلووة بس لا يعيدها
يزوي: سمعتها ؟!
سلطان: ههههههه هيه .. سلميلي عليها
يزوي: يسلم عليج يالهبلة
ابتسمت علياء: الله يسلمه ..
قالت يزوي: انزييين سلطااان شوو رايك تيي البحرين انت ومهرة ؟!
قال: لاا والله ؟! يوم سرتي تحجزييين قلت لج قلتي لاا ! وفشلتي بويهي ! والحين تقولين تعال ؟!
قالت يزوي برجاااء واهي تتذكر صورة اخوها يوسف واقف: يارربي سلطاان، الحين عااد تغير الحال، بليييز تعال
قال بصدق: يزوي ما اقدر، شي مشاكل بالشركة هاليومين، ومهروو عندها دراسة وإهي ثانوية عامة لازم السنة تييب معدل اوكي
قالت بسرعة: اصلا كل هااا عشان مهرة
قال باستغراب: شقايل ؟!
ارتبكت: افففففففف سلطان ما اعرف بس يلاا حاوول عااد
قال بهدوء: انتي متى بتردين الامارات ؟!
قالت بحيرة: ما ادري .. انا كنت مخططة ارد السبت، بس يوم جفت اهلي بعد خاطري أقعد زوود ..
قال باهتمام: يزوي لا تنسين دراستج ...
يزوي: انزين ما بنسى بس انت بتحاول اولا ؟!
سلطان: ان شاء الله ان شاء الله احاول ... شحال بنت خالج ؟!
هزت راسها: اوكي الحمدلله ... دعواتكم لخطيبها بالشفاء العاجل
سلطان: ما يجوف شر ، مسرع ما شاء الله من وصلتي سرتي بيت خالج !
قالت بدهشة: سلطاااان ! انا وصلت من فير الله ، وماباجي شي عن أذان المغرب ... يعني تقريباً يوم كامل من وصلت
تنهد: انزين .. وشو بتسوين بالبحرين الحين ؟!
ردت واهي متضايقة: سلطان شوو هاا ؟! تحقيق ! يعني ياية لأهلي أجوفهم وحبايبي هني، شوو بسوي يعني ؟!
قال بندم: زيين بلااج حرجتي !! ما قصدي شي
يزوي: لا اتم تتصرف وياي كأنك وصي علي ! رجاءً ...
انحرج وانجررح !! وتم ساكت، قالت : سلطــان !!
ما وصلها صوته، رددت اسمه وبعدها قال: هلا يزوي ، السموحة .. مهروو خلص الشحن مالها، انا بسكر !
فتحت عينها على اقصاها: بس انا ابا اكلم مهرووو ضروري ! سلطااان عفية اتصل من تلفونك!
قال: لااا ابوووية ! ما اصرف عليكم !
قالت بانفعال: سلطاااااااان ياللي ما تستحي على ويهك! صار لك ساعة ترمس وياية من تلفون الفقيرة ! ويوم خلصت كردتها قلت ما تصرف علينا ! انا لازم اكلم مهرة، تفهم اولا ؟!
قال بنغزة: شوو من اسرار امبينكم ؟!
قالت بسرعة: وانت شوو يخصك ؟! يا خي حنااا بنات ، وبنات عم بعد، ننياز ويا بعض، انت ليش تدخل عمرك ؟!
سلطان: اخذتيني بشراع وميداف ! خلاص بتصل بج من تلفوني ..
وانقطع قبل لا يكمل كلامه، ويزوي تأففت: اففف حزته ! صدق انه ما يستحي هالانسان !
قالت علياء واهي تطالعها: الحمدلله والشكر لك يارب، يعني هالعائلة فيها ميانين أشكال والوان ... واللون اللي قبالي، تحب تتحجى ويا روحها وايد !
رمت عليها المخدة: قلبي ويهج انتي ، درسي درسي ابوووية عن لا تسقطين
قالت علياء: عساش الا انتين، تدعين علي حق ليش يالسخيفة ؟! افففففففف انتي شـاللي يايبنش من الامارات لنا ؟! كنا مرتاااااااحين بدونش
قالت يزوي بصراخ: تعرفين شوو ؟! الشره عليي اناا اللي عاطتنج ويه وحاطة لج قيمة وياية يالسة عندج وانتي مطنشتني ويالسة تخربطين بهالدفاتر الخايسة
ضحكت علياء: الحين شدخل دفاتري سويتيها خايسة !؟ انتي شميتي ريحتها !
يزوي: يعني انتو شوو ما عندكن احساس ؟! انا والله على نياتي وطيبة، ياية ولهانة عليكم، وهذيك القطوة يالسة لي بغرفتها بهالتيلفون وغرامياتها، وانتي يالسة تاكلين بهالكتب، اصلاً انا شوو اللي حادني عليكم !؟ انا لازم اسير بيتنا، ايلس ويا اخوي حبيبي، اللي فاجئني ، واختي فديييتها اللي محتاية رعاية ..
ضحكت علياء: بعد بعد ؟ كملي ؟! حشى ما جف بلعومش؟! جنش راديوو وانتي تتحجين ورا بعض ورا بعض !! هذا لو شريط متعلوج ما سوا مثلش!
يزوي: تعرفين انج سخيفة ؟!
قامت علياء من بين دفاترها وراحت قعدت جنبها: توني ادري، المهم .... جفتي الشيخ ؟!
قالت يزوي: أي شيخ ؟!
علياء: هههههههه اخوي ! جواااد ؟!
طالعتها: أي جفته !
هزت علياء راسها: ايووووووووووووة ! وصار connect eyes ?!
يزوي بصدمة: علاية مصخنة ؟! شو هالمصاخة ! بـ رمضان احنا ؟!
علياء: آهـــاااا ! يعني قلبش ما يدق في شهر رمضان، بس في باقي الشهور هاا ؟
ضحكت يزوي غصب عنها: علياء وقسم منتي على بعضج ... هيه جفته، وما تأثرت ! وسلم علي ومشى ، شوو يعني ؟! مب ولد خالي ؟!
علياء: افاا من قال؟! ولد خالش وسيد القلب بعد، محد يقدر ينكر
قالت يزوي : انتي شيطان رجيم " وكملت بجدية " علااية بلاها هالسيرة، فجيها لي ربي يرحم والديج
ابتسمت علياء: صدق تبين تنسينه ؟!
يزوي: باين علي ؟!
هزت علياء راسها: اممم ايي ، وانا اقول احسن لش ، تذكرين مرة وش قلت لش ؟!
يزوي: شوو !؟
علياء: قلت لش انتي وجواد مثل الشمس والقمر ... قبل لاتسافرين، تذكرين ؟!
رمشت بعينها: هيه ! آآه صعب النسيان
ابتسمت علياء بمحبة: سأليني عن النسيان ... بس صدقيني، يكون أسهل لما انتي تبين هالشي، لكن اذا انتي ما تبين، ابـــداً ما راح تنسين !
يزوي: وانتي تبين تنسين ؟
ردت بصدق بدون لا تلف ولا تدور: لاا ما ابا
يزوي: بس اهو راح ، توفى .. وانتهت حياته، وانتي لازلتي موجودة ...
قالت علياء: يزوي ، عقد الوفاء لازال موجود ... ما أقول إني بخلد ذكراه، لكن ما اجا الوقت المناسب للنسيان، أبا أعطيه حقه ، أبا أعيش حزني عشان ما يجي يوم من الأيام وأحس اني ما وفيت حزني قدره ...
يزوي بحذر : ندمتي ؟
ردت باستغراب: على حياتي معاه !؟ أبـداً ! مستحيل أندم ... فعلاً كنت صغيرة، ولازلت، وفي مرحلة متغيرة، لكن عمري ما راح أندم ... علي أول حب في حياتي، حبيته بصدق ، حبيته بكل جوراحي، ووفيت له في الحضور والغياب ... وبـتمّ وفية
اعتدلت يزوي واهي تلم شعرها كلله في جهة اليسار: كنت أحس إنج تتعذبين، ومنتي مرتاحة ... صح ؟
علياء: ما أبا أجاوب ..
قالت يزوي بابتسامة: يعني صح ؟! امتناعج اجابة ياعلياء ...
ابتسمت: أسمتي ما جاوبت ... افهمي مثل ما تبين، بس أني ما جاوبت ...
سكتوا، وعلياء تفكر ، يمكن تعذبت، بس بعد كنت مرتاحة : )
قالت علياء بهداوة واهي منزلة راسها: يمكن يكون الامر متناقض ان انا ما ابا انسى، واقولش انتي انسي، مع ان احنا تقريباً نفس الحالة، مع اختلاف الاوضاع بس في تشابه كبير .. والأول اهو الأمل المعدوم، يعني انا مستحيل اجتمع مع علي مرة ثانية بهالدنيا، وانتي بعد مستحيل تجتمعين مع جواد ... لكن أنا من وجهة نظري أجوف النسيان أهو خيار موفق لش ...
يزوي: أنا أبا أنسى، بس أخاف ما أقوى !
ابتسمت: بتقوين لو انتي تبين مثل ما قلت لش ! لما يكون الدافع والارادة أقوى، بتنسين !
يزوي: الارادة تكون أقوى في الأمور الثانية، لكن في الحـب ؟!!؟ .... ما اعتقد
علياء : maybe







رمت يزوي بدنها على السرير وفتحت ذراعاتها واهي تاخذ نفس: ليش احنا جيي نحب ونتعذب، وندخل بمتاهات احنا مب قدها، ليش بالذات احنا البنات ؟! هل لأن عندنا نقص عاطفي ؟! أو لأن احنا عاطفيات وحساسات ! والا في سبب ثاني ؟!
ابتسمت علياء بثقة: صدقيني مافي ولا سبب من اللي قلتيه أهو سبب رئيسي، ممكن يكون عامل مساعد .. لكنه مب السبب الرئيسي
طالعتها يزوي واهي تتكأ على كوعها: عيل شوو السبب الرئيسي؟!
عليـاء: الفطـرة ....
يزوي: الفطرة ؟!
عليـاء: أي الفطرة .. الحب فطرة، عند الناس كللها، باختلاف اجناسها واعراقها ... ما عليش من أي كلام ينقال، انا اؤمن انها الفطرة والاشياء الثانية تيي عقب !
قالت يزوي: لازلتي تؤمنين بالحب ؟!
وقفت علياء رايحة لطاولتها تشيل دفاترها: ولا راح ينعدم هالإيمان ...
يزوي: يعني تهقين انتي بتحبين مرة ثانية ؟!
علياء: توو الناس على هالكلام ..
يزوي: يلاا جاوبي، متشوقة اعررف
ابتسمت علياء واهي تلف لها: انا احب الحين ... أهلي، صديقاتي، دراستي، الأشياء اللي اسويها، البيئة اللي حولي ...
يزوي: افففف انتي تعرفين شـنو اقصد جاوبي !
علياء: مشكلتكم تحصرون كلمة الحب على specific person ، صدقيني اهوو اكبررر من هالشي ...
هزت يزوي راسها: آآهـــا ! الحين انا قبال علياء والا منى؟! تررى بديت اشك ... صرتي تتفلسفين شرات اختج
ضحكت علياء واهي تسكر مقلمتها: عن جد ؟
رمشت بعينها: هيه والله، كأنج منووي لا تفلسفت بكلامها .. لايق لج بعد انتي
علياء: ههههههه زين والله ... تأثرت بأختي ...
حركت يزوي شعرها بدلال: ما هقيت انج مثقفة جيي ، يعني اقصد ان تتكلمين بثقة، وعندج قواعد وأساسيات في حياتج !
قعدت علياء مرة ثانية بعد ما شالت اغراضها: كل يوم نكبر، ونتعلم شي يديد ... لازم يكون للإنسان دستور بحياته، يمشي عليه ... عشان ما يضيع !
يزوي بتنهيدة: احس كل ما كبرت عقلي يتم صغير بهالدنيا .... ما اقدر استوعب هالتداخلات كلها بهالعالم! احس عقلي صغير ...
هزت علياء راسها: تماماً ، اهو فعلاً صغير
كفختها يزوي: وجع .. سخيفة جامليني شووي !
علياء: هههههههههههههه امزح معاش، انتي تحسين جيي ... ترى انتي ما عندش ثقة بنفسش !!!
يزوي: ويهج !
علياء: عيل ليش تقولين تحسين عقلج صغير ؟!
قالت بلا مبالاة: اففف شدراني انا ... المهم، خلينا نسكر هالسالفة ... وقولي لي شصار في حسين هذا خطيب اختج !؟ انا ياية لها واهي تاركتني وسايرة ترضع بهالتلفون !
علياء: ههههههه وش لش بالتفاصيل، اشياء تعور القلب !
يزوي: تعرفين علاية !؟ صار لنا شهووووور ما جفنا أفلام هندية، وحشنا شاروخان واميتاب وآشواريا، فـ ارمسي احسن لان متشوقة انا
وقطع عليهم تلفون يزوي ، وكانت مهرة متصلة ... اتحمست يزوي وقالت : دقايق بكلمها وبرد لج
علياء: اني بروح تحت شوي وبرجع ...
هزت يزوي راسها وعلياء طلعت ... ردت على التلفون: هلاااا






========

[ يتبـــع ]