تابع ما سبق
طلال: اقولها وكلي فخر في بلادي...احم احم..
انا سعودي
سعودي وافتخر بارضي ولا ني بالفخر مغرور
الى من قيل لي وش ديرتك قلت السعوديّه
رفيع الراس بافعالٍ حقيقه ما تعرف الزور
تسطرها تواريخ الفخر صفحات ورديّه
كتبنا المجد بعد المجد سنينٍ ماضيه ودهور
على صدر الزمن مكتوبةٍ بحروف ماسيّه
لنا الماضي لنا الحاضر لنا مستقبلٍ من نور
لنا التأثير في الدنيا ببصماتٍ حضاريه
من الإسلام منبعها فمنهاجه لنا دستور
على درب الموحّد صادق الأفعال والنيّه
ابو تركي سليل المجد نور الكون في الديجور
ومن بعده رجال ارواحهم للدار مرهيّه
توحدنا بعد كنا ضحية جهلنا والجور
وصرنا كلنا اخوه نعيش بكل حبيّه
من الآمر إلى المأمور منهجنا الإخاء والشور
على درب التساوي والعدل باوضاع مرضيّه
وقدوتنا رجالٍ لاجلنا لو داسوا المخطور
يبون الدار مثل الشمس في الأكوان مرئيه
والى من بانوا الحسّاد واللي بفعلته ماجور
يبان الجد وقت الجد بافعال النداويه
لتبقى ديرتي رمز الرخاء تحيا امن وحبور
بفضل الله وفضل اللي رعاها بكل حنيّه
ابو متعب ابو كل الشعب في برّها وبحور
اذا ناموا بقى ساهر لتبقى الدار محميّه
عزيز النفس متواضع ولا يرضى بحني ظهور
ولا تقبيل يدّينه من اللي جاه لتحيّه
حماك الله يابلادي لتبقي حصننا المعمور
تعيشي لو فنينا كلنا نفدي السعوديه
الكل يصفر ويصفق..
ريم: وشرايكم ناخذ بريك ونغني اغنيه اوه يا سعودي..
الكل: اوكيه...
ريم: واحد ..اثنين..ثلاثه..
مكانتك يا بلادي دوم في القمه
من يوم كنتي الين اليوم يا بلادي
بالعزم يا سعودي وبالجد والهمه
كلن شهد لك وكلن بأسمك ينادي
اوووه اووووه اوووه اوووه
اووو ياسعوودي
اوة ياسعودي
وبعدها الكل قعد يضحك لان اصواتهم نشاز..
ريم: اقول اسكتوا لا يسمعكم رابح صقر ومحمد عبده ويعتزلون الفن مباشره..
العنود: بس والله فله...
ريم: نرجع لبرنامجنا ما يطلبه المستمعون..
عبير: شكل المخ عندك تعطل...اتذكر انك قلتي اسمه بيت القصيد...
ريم: ما عليه كلها واحد...نختار اسم...العنود بنت عمي تفضلي..
العنود: احم احم زاد فضلك..
ريم: وش اسم القصيده اللي راح نسمعها...
العنود: والله مالها اسم ما ادري وش اسمها..
ريم: ما عليه حبيتي تفضلي اذا ما عليك امر..
العنود: الله يرفع مقدارك...احم احم
سهرت الليل من كثر الهموم وكثرة التفكير
وقلت الخير في وجه الصباح بقدرة الرحمن
وتعبت من الصباح إللي يسمونه صباح الخير
وغنى شادي اللحن الجميل بعالي الأغصان
إلا ياطير ياعذب اللحن خل الغنا ياطير
ترى القلب الحزين يزيد حزنه بأعذب الألحان
وأنا بأعطيك مال وماملكته لك بلا تقصير
وبعطيك العهود الوافيه ما أنساك مهما كان
وبحلف لك على القرآن بوفا العهد ياطير
وأخذ مني كرم حاتم وعطني جملة جنان
تعبت أمشي وأحث خطاي في درب الأمل للسير
وأنا عندي أمل السراب يزيد في النقصان
وعندي حسره في الجو معناها يعجز التعبير
وعندي ذاكره ياطير عيت تقبل النسيان
وعندي جرح جاء بين الضلوع العوج له تأثير
وله مس مثل مس العطش ياطير للعطشان
أنا ياطير أمني النفس لو عمر الأمل قصير
أعيش بعمره المحدود ياطير الأمل فرحان
تلاهيني تباشير الأمل وليا أنقطع ياطير
أعيش الحزن من واقع حزين وعاد للأحزان
صحيح أن الحياه حظوظ لك حظ السعد ياطير
نسيك الهم وفجوج السماء والأرض لك ميدان
عطاك الله جناح به على هام السحاب أطير
وقلب مايشيل الهم دايم للغناء طربان
وأنا كني سجين طال سجنه في رجاء التيسير
صدر في حقه السجن المؤبد ظلم وبهتان
أنا دنياي حطتني سجين (ن) بلا سجن ياطير
لفتني وأبعدتني وأجبرت قلبي على الهجران
على هجران دار من غلاها كل ماجاء عصير
أهم النفس للممشاء وتجبرني على العصيان
على هجران دار كنت فيها يوم كنت صغير
نشيت بها وعشت بها وفيها كني السلطان
هذا وقت مضى واليوم لله العجب ياطير
تغير كل شي وكنها دار (ن) بلا سكان
ريم: وحده وحده..عنوده احلى وحده..
العنود: تسلمين يا بعد عمري...
ريم: مين باقي..
فيصل: انا......نواف: انا.........تركي: وانا...عبير: وانا.......نوف: وانا...
مشعل: وانا.....محمد: وانا............لين: وانا...
ريم: خلاص الباقي مو لازم..
فيصل: على كيفك..ايقوم واقول قصيدتي..
ريم: يله خلصنا...
فيصل:هذي القصيده لي زوجتي الحامل ومتنسيه بليمون..
ريم: احلف واصدقك..
فيصل يستهبل: والله واذا مو مصدقه اسأليها..
طلال: ترى ما يمدحون خفة الدم..
فيصل: احم..
يا بعد هلي وناسي..ويا بعد همي وحزني..
ويا بعد احساس صادق..
يا حبيبي في زمان لهجته لهجة تجني..
ويا ميره بين الناس..طبعهم حب الهلاك..
انت اسطورة زمانك.. ما مثل شخصك جذبني..
الكلام لسان طاهر..والوجه صورة ملاك..
الجمال اسمى صفاتك..ما ملك غيرك ملاك..
كل اوصافك خيال..لكن اجمل ما فتني..
لازعل مني غرورك..يبتسم لجلي حياك..
كيف اكمل في بعادك..والحزن بعدك غمرني..
وكيف احيا في غيابك..وانا انتفس هواك..
كيف اجلس في مكان..كل ما اجلس حضرني..
صورتك وانت بقربي..وضحكتك وانت هناك..
صوره من واقع حياتي..لو رحلت اليوم عني..
ينقطع تيار فرحي..وتحجب ادموعي سماك..
حزني لبعدك تراها..زعزعت بالخوف امني..
واليتميه دمعها يعلن ..نهاية كل فرحه هي بلاك..
انفجرت وباح سري..وقلت للعالم بأني..
افتخر لا صرت احبك..واعظم اطباعي معاك..
انا عندي يا حياتي..راحتك فوق التمني..
وانت عندي كل روحي..ومالها معنى بلاك..
ارجع اشكر كل لحظه..صادقه فيك اجمعتني..
وانا يكفيني بأني..عشتها لحظه معاااك..
الكل يصفق بحراره لفيصل لانه اكيد هو اللي كاتبها..
فجر قامت وحضنته: ويلومني فيك يا قلبي..
فيصل باسها من خدها: هذا ولا شي من حبي لك..
ريم: احم احم ترانا على الهوا مباشره..
فيصل عناد في ريم مسك وجه فجر وباسها من اليمين واليسار وجبينها: هاه وش عندك.
فجر استحت لان قدام اخوانها..
فواز: يا اخي احترمنا شوي..
فيصل: لا تخليني اتهور اكثر..
فجر: لالا واللي يعافيك..
ريم ابتسمت لهم: يله ارجعوا لاماكنكم بسرعه..بكره وش بتكتب الجرايد عن برنامجي..
جلست فجر وجهها احمر..
العنود تزيد عليها: يا ربيه الي استحوا ماتوا..
عبير معاها: بصراحه يا فجر اكتشفت ان الحيا انزع منك..
فجر حمرت خدودها اكثر: وانا وش دخلني..
العنود: ولو خلي عنك حركات المراهقه..
رغد: خلاص خلوها هي حره..
عبير: اكيد رغد تكلمت وتدافع عن فجر عشان اذا سوى شي تريك ما نقول لها شي..
رغد استحت من الفكره: يا بثركم بس..
ريم: نواف تفضل قول قصديتك.
نواف: قصيده قصيره لاحلى خطيبه في الكون..
مغرور انا من يوم حببتنبي فيك..
واشوف كل الناس باطراف طرفي..
دللتني..دلعتني كيف اجازيك..
ما عندي غي الحب ليته يكفيك..
عجزت افكر وودي اعطيك واعطيك..
ودي احبك فوق حبي..
بس اخاف كل هذا ما يكفيك..
وسلامتكم...
نوف وردت خدودها: تسلم والله..
فجر: احلى احلى والله يا نويف مانتي بسهله...
نوف: فجر خلاص عاد..
فجر: خليني احط حرتي فيك..مثل ما طلعوا الشيب براسي بطلعه فيك..
ريم: تروك ما ودك تقوم...
رغد: خير من متى تروك..
ريم:بدينا بالغيره..
تركي لف على رغد وابتسم لها ابتسامه تدوخ..
رغد على طول لفت على وليد تبي تشوف ردة فعله..
وليد منزل راسه ويطالع ايديه ويحرك اصابعه بتوتر..
رغد بلعت ريقها ورجعت تطالع تركي..
تركي يطالع رغد وحركاتها ومستغرب خوفها من وليد او حرصها على ردة فعله وهذا الشي اكيد ما عجبه..يعني الى متى ووليد ناشب في حياته ..الى متى وكابوس وليد ما انتهى ومتى بينتهي..
تركي: اكيد الكلام اللي بقوله ..يخص وحده ملكت قلبي ووجداني وتفكيري..وحده تعلقت فيها من اول مره شفتها فيه..انسانه غير..مميزه في كل شي بطيبتها وبحنيتها وبتفكيرها ..بضحكتها بمشيتها بطريقة كلامها..كل شي فيها غير..اكيد الانسانه هذي بتكون رغد لاني لو الف الكون كله مستحيل احصل وحده فيها شي من رغد..
ريم تستهبل: الحين هذا اللي قلته القصيده ولا ايش؟؟؟
تركي وهو يطالع رغد بحب: لا هذي مقدمه في حبيبة قلبي..
ريم: اهااا..طيب ممكن تخلص علينا وتقول قصيدتك..
تركي عطى وليد نظرة تحدي اللي كان هو بالمقابل يطالعه ببرود وجمود ولا كأن تركي موجود..تركي وجه بنظراته لرغد وابتسم لها بحب وبدا في القصيده..
تطلبون شئ مني وش تبون..
بس انتم ما لكم فيني شغل
ايه أحبه لا و حبي له جنون ..
واللى يمنعني ترى ماله أمل
قلتوا عنّه ناكر العشره ويخون..
قلتوا ساحرني وعامل لي عمل
موتوا غيره موتوا حسرات و ظنون..
ياحلو مرّه على قلبي عسل
شلي حارق دمكم خلي ويمون..
ما يقول حبيبي دايم عدل
لجل خاطر ضحكته كل شي يهون..
المهم أرضيه و لو غيره زعل
وطالع وليد وعلى فمه نص ابتسامه لها الف ومعنى ومعنى ورافع حاجب وعيونه تلمع بتحدي..
كان الكل ثابت في مكانه..حاسين ان في قنبله موقوته بتنفجر في أي لحظه..
رغد بلعت ريقها ونظرات الخوف باينه عليها..لفت على الهنوف عشان تمدها بالقوه لقتها الثانيه تبي من يفهمها وش اللي حاصل..وتصرفات اخوها الغريبه..
وليد وقف في مكانه وصفق ببرود: بصراحه ابدعت يا تركي وانا اهنيك على أبداعك..بس احب اقول لك شي..ترى كل هالمصخره اللي انت سويتها ما حركت فيني شعره..اللي تتكلم عنها"ويأشر على رغد بأحتقار" تراها ما عاد تهمني..واحب اوضح لك شي وللجميع ان لما رغد رفضتني كانت ردة فعلي عنيفه شوي..طبعا مو لاني احبها..لالا انتوا فهمتوا غلط..انا كنت منفعل لانها رفضتني بس..يعني لا يروح بالكم بعيد..يله عن اذنكم انا بروح ارتاح..
الكل كان منصدم من كلام وليد..الكلام اللي قاله كبير..ومو شي هين...تركي علامات الغضب ارتسمت في وجهه..
رغد احتقرت نفسها انها رحمت واحد ما يستاهل الا الاحتقار وكثير عليه..البنات ودهم ينقذون الموقف بس العين بصيره والايد قصيره..
مشاري كان ضاغط على اسنانه..قاعد يتكلم عن اخته وكأنها حشره عنده..طلال حط ايده على كتف مشاري عشان يهديه ولا ينفعل...ماجد ما يدري وين يودي وجهه من الفشيله من فعايل اخوه..
ريم كان ودها تلحق وليد وتتفل في وجهه عشان يعرف ان الله حق...
تركي من بين اسنانه: الواطي...لو انه رجال قعد..بس عشانه جبان انحاش خايف من المواجهه...
سليمان راح لصديقه ومسكه وجلسه..:اهدا يا تركي..ما عليك منه هو يبي ينرفزك..
تركي: ودي اقطعه قطع بأيدي الثنتين..
ريم: ما عليكم منه خلوه يولي..ترى هو يبي ينرفز الجميع.. فاذا انتوا عصبتوا وخربتوا عليكم سهرتكم تحققتوا مراده.. عشان كذا خلوه هو والجدار واحد..عبير تعالي قولي قصيدتك..عشان نعرف من راح يفوز بالمليون..
عبير فهمت قصد ر يم عشان تلطف الجو: انا قصيدتي لاختي وحبيبتي عنوده..
العنود: احم احم اهم شي انها سنعه...
عبير بنظرات جديه: صدقيني من كل قلبي...
&&&&&&&&&&&&&&&&&&&&&&&&&&&&
وليد قام من المكان لانه لو قعد اكثر من كذا يمكن دموعه خانته وفضحته..فهو رمى هالكلمتين وراح عشان يكون عذر له..جلس وليد قبال الخيل..طلع باكيت دخانه..صديقه من لما رغد قتلت حبه بسكين القدر اللي ما قدر يجمعهم..حط في فمه سيجاره وطلع الولاعه وبعد كم محاوله اشتعلت..اخذ منها نفس ووبعدها نفثه في الهوا..تمنى ذيك اللحظه انه يقدر يطلع رغد من قلبه ومخه وعقله وروحه ومن دمه وعروقه مثل هذا الدخان..اليوم رحلته لكندا..اليوم اخر له في الوطن..وما يدري متى القدر يرجعه له مره ثانيه..
&&&&&&&&
عبير وعيونها مليانه دموع..ضميرها ما ريحها يوم:
صار الخطاء وشلون ما هو بيدي
لحظة غضب نفقد بها أعز انسان
عزيت نفسي كنت احسبه تحدي
ولا دريت انك بطيبك تحدان
صحيح انا يمكن تعديت حدي
واسرفت بالغلطات وكان الذي كان
وشلون ابنسى من خذا كل ودي
واقفى وخلاني على حد الاحزان
دمعي مكانه بعدكم فوق خدي
شفقان قربك ياهوى البال شفقان
صار الحزن مابين جزري ومدي
مرات ارده واكثر الوقت يقوان
ردي علي ارجوك يابنت ردي
لا تتركيني في متاهات الازمان
اول معي بالشوق واليوم ضدي
بديت بالمكسب وعودت خسران
امدلك قلبي واشيلة بيدي
يفداك قلب من سبايبك ينهان
دامك سحابه في سمايا تعدي
لا تبخلي بالماء وانا حيل عطشان
العنود غرقت عيونها دموع ما تدري ليش عبير تعتذر منها..وليش باين في عيونها صدق احساسها بالذنب..طالعت ريم تدور الجواب لقت اكبر علامة استفهام فوق راس ريم..طلال حاس ان عبير عارفه بكل شي عشان كذا تعتذر منها..
عبير رجعت مكانها وما طالعت احد..
العنود ما قدرت تصبر اكثر ورمت نفسها في حضن عبير: ليه..ليه يا بعد الدنيا هذي كلها تعتذرين..انتي ما سويتي لي شي..
عبير بعدت العنود عنها: حتى لو كان..ودي انك ترضين علي..قول مسامحتك..
العنود: وربي اني مسامحتك مع اني ما ادري ليش....
عبير حست براحه نفسيه وابتسمت: فديتك يا احلى اخت في الدنيا هذي كلها...
وبعدها الهنوف:هذي انا كاتبتها اكيد لحبيبة قلبي رغوده جعل ربي يخليها لي ولا يحرمني منها قولوا امين..
مشاري: الله...كل هذا لرغيد وانا وش بقى لي..
الهنوف مستحيه: ميشوووووو خلاص..
مشاري: قولي قولي وبشوف لي حل مع رغيد..
الهنوف:
انا ما غبت ولا افكر عن عيونك اروح الحين..
ولا فكرت ابد اجفاك...واحسك قطعه مني..
حقيقه افتخر فيها رفيقه لي ليوم الدين..
تواسيني..تضحكني..وازعلها ..وترضيني...
انا ما همني ربعي لو هم عني مقفين..
انا همي بعد عمري تكون جنبي وتحبني..
لها قلب يعز قلبي ..وحنا كأننا اختين..
ولي قلبا يبادلها نبضات الوله فيني..
ادلعها..واولعها..وتقول بخوفها تكفين..
الا مني رحلت بعيد تعالي وارحلي يمي..
صحيح لزمن وقفه..دايم تنرسم لثنين..
وخوفي هالزمن يوقف ويرسم دمعة فراقي...
رغد دمعت عيونها: لا ان شالله ما يجي هاليوم..."وراحت وضمتها"
تركي:لازم تشوف حل لحرمتك..
مشاري: لازم نلقى حل ما يصير كذا..
وبعدها قصيدة مشعل...
أنا في الشعر..
أنا في الشعر ابن هذاك إذا إنته تعَرْف الشعر أهيجْ في البحور أمواج، أمشّيها على كيفي
واقول لك لا تجاريني ترى أمشي بدربٍ وعر واذا تبغي تجاريني ترى لك صامدٍ سيفي
ولا تضمن تحوز النصر وانا بحرٍ وانته نهر واذا عارضت تيّاري تبرّى موجي وْسِيْفي
وكم من واحدٍ غيرك تعرّض لي وجاه الكسر ودارت به هبوب رْيَاح في أقوى عواصيفي
تهاجم سايل الأقلام وسطرٍ ما يهزّه سطر وإنته وينها افكارك عن بْيوتي وْتهديفي
تبا روس العلا وانته تحوّل في طريقك حدر تحاول بس ما تِقْدَرْ بأن توصل مشاريفي
نجوم الليل ماتنوِرْ إذا بيّن شعاع البدر وش اللي يجمع الوسمي على سحب ورْعد صيفي
تشوف الجاذبيّه لي في هالدنيا تجرّك جر أنا عكسه أفرّك وين ما أبغي على كيفي
وبعدها نوف..
اعذب كلام الحب كلمه أحبك= لاقلتها لي ياهوى النفس باحساس
وارق كلمه ياحبيبي بقلبك= انسى بها نفسي على طول والناس
احب تنطقها الى جيت جنبك =اربع حروف عطرها فوق الانفاس
ينتابني منها شعور بقربك= حروفها عقد ومنظوم من ماس
أسلوبك اللي شدني فوق دربك =يطرد عن أيامي معك نظره اليأس
ياخف دمك قلبي اللي يحبك= فيك الحلى يا فاتني ماله قياس
من صادق إحساسي أحبك وأحبك =من حافة اقدامي الى هامة الرأس
وبعدها لين..
أحبك حب مثل العسل صافي .... أحبك من قلبي وكل مافيه
اسرح فيك وانا لحالي وانساءاني الحالي....ولا احس ولا وانت ياحبيبي مقابل اعنيه
من عرفتك بلهواء مدري وش جرالي .... سلبت عقلي مني بكل فن وكل حنيه
ارتب كلام في قصايد بلحاني .... ولا شفتك ماعرفت اقول ولا جمله عربيه
آه على بسمتك هدة فيني كل اوزاني....خلتني ماعاد افرق بين الثراء وبين الثريه
وبعدها مها
مدري انا صح ومخطي زماني
ولا الخطا مني وزماني هو الصح
تتغير الدنيا وانا في مكاني
ماغير انا وحدي والاهات والجرح
ما أعرف ابدل بداخلي شئ ثاني
وماأعرف ابدل طيبتي وطبعي السمح
أحلم وليلي يمتلي بالأماني
ويهدها فجأه على راسي الصبح
مليت وماملت عذابي الثواني
عمري قضى كله خساره بلا ربح
وتعبت ادور له جواب في كياني
ذاك السؤال اللي ذبح خافقي ذبح
ياهل أنا صح ومخطي زماني
ولا الخطأ مني وزماني هو الصح
وبعدها محمد..
أبوي
في ليل موته جيت انا بيوم ميلاد
طفل يتيم والبكى في عيونه
صدر عن الدنيا وانا جيت وراد
لاشك نجمه لامع وسط كونه
كني انا والحزن في وقت ميعاد
فقدت فيها غالي يذكرونه
لو يسألوني يوم انا كنت بمهاد
افز بسمه كل ماينطقونه
ياقبر وش ضميت من ذيك الاجساد
الله ياضمت ابوي الحنونه
محتاج له وادري انا عنه ببعاد
النفس بعده بالحياة مغبونه
ادوره باعايده في يوم الاعياد
لاكن تذكرت البشر يدفنونه
كان الألم في داخل الصدر يزداد
وقلبي على الوالد تصافق شجونه
اعاني الحرمان في صبر وجهاد
وانا أحمد الله والملا يشكرونه
اعاند الدنيا وانا بيتم بعناد
نفس العزيز اللي يدوس المهونه
كثر البكا بفقد العزيزين مافاد
ودمعي على خدي تسايل مزونه
ابوي ملفى للأكاريم الاجواد
الطيب ساسه كلهم يمدحونه
بالطيب ماخذها على روس الاشهاد
حر ولد حر طوال ردونه
عساه بالجنه على انهار ووراد
مقره الفردوس والله يصونه
وغرقت عيونه دموع..
سليمان طالع اخوه اول مره يحس انه فاقد ابوه ..اول مره يتكلم عنه..
راح له على طول وضمه..
سليمان: حمود قول الله يرحمه..
محمد: الله يرحمه..
مها راحت معاهم: خلاص محمد وسليمان وربي بأبكي الحين..
ريم: الله يخليكم اللي فينا مكفينا لا تبكون وتبكونا معاكم..
سليمان :لا عاد كل شي ولا تبكون..
ريم تصرف: الحيت ننتظر نتيجة تصويت الجمهور اللي بتحدد مصير كل شاعر معانا
نهاية الجزء