[اليازيه]

.

الفصل الحادي عشـــر



الكل قام من السفره ..

وبعد الصلاه ..

نوف : نجيد تكفين تعالي معي اوريك بدلي الجديده وانتي اختاري وش البس بكره ..

نجود تزين مكياجها : والله يا نويف مالي نفس .. خلينا نروح للمملكة زمان عنها ..

نوف : يوووووووووه ناظرو انا وين وهي وين ؟؟

الماس : ونجيد صادقه .. امشو نطلع نتمشى انسو العيد شوي ..

بتول بألم : بنات بطني يعورني مره ماني قادره ..

نوف : من الجوع .. جالسه على الطاوله تنكتي وتضحكي وتمزحي
وماكليتي شي ..

بتول تمسك معدتها : لا والله كليت .. بس والله ألم .. آآآآخ

الهنوف :ههههههه تخففين على الاقل

بتول : وجع فوفا انا رايحه رايحه .. وش يقعدني هنا بين هالعجز ..


نوف : اجل يلا خلونا نستأذن ونطلع

الماس : وع وش يطلعنا هالحزه مافي ناس !! خليها الساعه 9 ازين

نوف : ان جت 9 منتي بطالعه .. عندك خالد انتي

الماس بزعل : لييييييييه ؟ صديقاتي بيكونو هناك انا متفقه معهم !!

نوف وهي طالعه من الصاله : والله عاد صديقاتك الله راضي عليهم وما
عندهم شي اسمه خالد ..



بتول : انا عن نفسي بحاكي بابا انتو كيفكم

الماس : والله حتى انا نازله لجدي الحين .. وبالطقاق في خالد

نوف تطل عليهم من الصاله : اتحداك تقنعيه وخالد موجود ..

الماس : ههههههه تعالي وشوفي


البنات كلهم وقفو ولحقو لمووو يبغو يناظرو ويضحكو

الماس لابسه جينز غامق ستريت وضيق مره .. ولابسه بدي سلفر على
اكسسوار فوشي وبالورينا فوشيه

ونازله على السلم تتمخطر ..


عيونها يمين وشماال تدور على جدها من بين الرياجيل والنسوان .. اول
ما طاحت عينها عليه ابتسمت بخبث وركضت لعنده



هنا البنات ما قدرو يناظرو فيها من الدور الثاني لانها بعدت مررره قررو
يناظرو بالحدث مباشره من قدامها

نزلو لتحت


الماس : هاي جدو كيفك ؟

سامي ساند ظهره على الكنب : وش بغيتي يا الماس ..

الماس تناظر بفارس اللي ماسك ضحكته : احم .. جدي انا وصديقاتي
متفقين نروح للمملكه وجايه آخذ الاذن منك طال عمرك

سامي : المملكه بهالوقت زحمه مانتي عارفه ان بكره العيد ؟؟؟ وش
يطلعك بين امة لا اله الا الله ؟؟؟

الماس بإصرار كثر : تكفى جدي والله طفشنا .. مهي بحاله .. اول انت
اللي تطلبنا نطلع ونتمشى الحين مادري وش تغير

نوف بصوت هادي لنجود : وش هالجرأه يا لمووو ؟؟؟

نجود: عند حاجتها تعمل اي حاجه ..

سامي يناظر بنوف اللي حس انها انصدمت منه بعد حركته مع ناصر ،،
واللي تغيرت عليه مره ..

سامي : وانتي يا نوف وش رايك ؟؟ مالك صوت

سالم : نوف اول وحده تركب السياره .. لا تحاتيها

فارس : ههههههههه

نوف ناظرت بسالم وفارس نظرة سكتتهم : انا ما عندي مشكله اجلس
والا اطلع كله واحد بالنسبه لي

سامي و بعيونه الحاده : ومن متى هالحكي ؟؟؟

نوف : .......

سامي يحاكي الماس : مافيه روحه اطلعو فوق


طلعو البنات لفوق .. الا نوف حبت تعانده مع انها عارفه انه ما يقصد الا هي ..


خالد وقف وجا بيطلع ..

سلمى : على وين يا بو فيصل ؟؟

خالد : طالع ادخن و أجي ان شاءالله ..

فيصل : بابا ابغى اجي معك

خالد بعصبيه : اجلس مكانك .. (ولما مر من عند نوف ما ناظرها و
طلع )


نوف جلست بجنب عمتها ساره و ام دانه ..

الحلا والقهوه والشاي والعصاير والفطاير كان متواجد على الطاولات ..


ام دانه وقفت تبغى تقهوي الجد سامي .. وطبيعي قامت نوف لانها

الاصغر واخذت القهوه وراحت له


نوف مدت الفنجال بدون ولا كلمه ..


سامي : كان ماودك تقهويني ترا عادي يا نوفه .. ماني زاعل


نوف عور قلبها جدها : لا يا جدي من يحصل يقهويك ويرفض ؟؟ سم
طال عمرك


سامي بابتسامه : سم الله عدوك يالغاليه ..

/

سحب سامي صينية الحلا و أشر لنوف تعطيها فارس اللي مندمج بالحكي مع سالم ..

نوف مدت له الصينيه بس ما انتبهت : ناصر .. !

التفت الجميع عليها ..

ناظر فيها فارس بصدمه واخذ الصينيه ..


نوف لأنها كانت سرحانه ماهي عارفه وش قالت !!!


ناظرت فيهم .. وكلهم عيونهم عليها ..





سامي ترك فنجاله وطلع الحديقه معصب .. كان يعتقد انها كانت متعمده


وساره خنقتها العبره وطلعت .. ما تنلام شهر ما شافت ولدها .. !



الباقي ظلو يناظرو فيها ..



نوف مرخيه يديها وواقفه وتناظر في سالم وفارس .. تبغاهم يفهموموها

وش صار ليه هذا كله ؟؟؟؟



ام دانه حبت تغير الموضوع : نوفه حبيبتي ذقتي هالحلا ؟؟

نوف كشت وجلست بجنب مرت عمها : عمه انا وش قلت ؟؟

ام دانه : ما قلتي شي الحمد لله والشكر .. ذوقيه تكفين وقوليلي رايك

نوف ودمعتها نزلت : عمه انا وش قلت ،، احلفك بالله وش قلت ؟؟

ام دانه بصوت هادي : ماقلتي شي يا عمري بس لأنك يمكن ناديتي فارس

بإسم ناصر الله يذكره بالخير وجدك وعمتك تذكروه بس ..


نوف حطت يدها على فمها ودموعها ماكنها صدقت نزلت وحده ورا

الثانيه ..


اما سالم وفارس اول مره يناظرو بنوف كذا .. كل واحد منهم يناظر
عيونها ومعلق عليهم ..


ام دانه : نوفه مايصير وانا عمتك اتركي البكي للبزارين .. والله انه باين
انك مو متعمده وين المشكله ؟؟


نوف ناظرت بفارس منحرجه منه مره وش يقول عنها الحين ؟

وناظرت بسالم اللي حست انه ما صدق ان نوف غلطت هالغلطه


طلعت فوق تركض ..



وهي تركض تفكر اهلها كيف راح يفكرو ؟؟ راح ياخذوها من اي باب ؟؟

باب انها ما تفرق بين فارس وناصر ؟؟ او باب انها متأثره بخروج ناصر

من حياتهم كلهم وانها فقدت شخص من العايله ؟؟ او من باب انها

عاشقته وما تنطق الا اسمه ؟؟



رغم كل الافكار اللي خطرت فبالها ورغم كل هالحكي الا انها ما كانت

متأكده الا من شي واحد وهو ان ناصر استحوذ على كل تفكيرها
وعقلها ..

/


/



في الصاله الواسعه اللي فوق .. التلفاز شغال .. واصوات البنات اعلى
منه ..


الماس : افففففففف هذي طولت ..

نجود : انا ما يقتلني الا لما تعمل حالها كبيره وتجالسهم ..


بتول : بنات العن يومكم بطني يعورني محد حاس فيني ..


سالم : السلام عليكم

.... : وعليكم السلام ..

سالم : وراكم ما افطرتو معنا اليوم ؟؟ المفروض يكون ختامها مسك ..

بتول ماسكه معدتها : لا حبينا نعمل حاجه غير .. ملينا منكم ..

سالم : افا ,, بس حنا ما ملينا منكم !! .. وراك ماسكه بطنك ؟؟

بتول : يعورني يا سالم ..

سالم : اكيد مكثره من الاكل .. اعرفك

بتول : ياويلك من الله كليت شوي وربي .. بس يعورني

سالم : عارف انك خوافه بس لازم اوديك المشفى

بتول : لااااااا ما ابغى اكرهه اخاف منه .. والله ما احبه

سالم : بدون حلفان عارف ..


نجود تحاكي الماس بصوت خفيف : غريبه سالم تارك نوف وجاي هنا ..
العاده ما يطوف هالوقت


الهنوف بلقافه ما تعرف هالبنت تجلس ساكته : اقول سالم تعرف للنت ؟؟


سالم : ايه .. ليه ؟ محتاجه شي ؟؟


الهنوف : لا بس ..

نجود خافت تجيب العيد وتخرب كل شي .. الهنوف فضيحه ..

نجود : لا بس هي حابه تتعلم ..

سالم : انتي ما تعرفيله نجود ؟؟

نجود : إلا بس مو مره على خفيف : )


نجود فقلبها (الله يقلعك يا الهنوف كانك مصيبه)

سالم : اها ،، الا وين نوفه ما اشوفها معكم ؟؟؟؟

نجود لألماس : شفتي قايلتلك .. ههههههه

الماس : ليه هي مو تحت عندكم ؟؟

سالم : لا طلعت فوق تبكي ..

الماس : لييييييييييييييه


سالم بنذاله : تبغى تنادي فارس غلطت وقالت ناصر .. وعصب جدي
وطلع .. وهي مادري وش صار لها



نجود وهي توقف تبغى تدور عليها : وانت ليه فرحان ؟؟؟



سالم : هههههه ماهي مسأله فرحان ،، بس انا مستغرب وش جاب اسم
فارس لناصر .. : )





/

نوف طلعت من الغرفه على دخلت البنات ..



نجود : نوفه حبيبتي وش فيك ؟؟


نوف بابتسامه تجمع شعرها .. : دقايق بنات نازله الحديقه وراجعه ..

نجود تناظر بألماس .. ايش فيه ؟؟


بتول كانت خايفه عليها : هبله ذي ؟؟


/




في الحديقه الساعه 8 ونصف ..


سامي جالس ويدخت أرقيله .. والجو مره جنان


النسوان كلهم في ا لصاله المقابله لباب الحديقه ..

نوف اول ما جت تبغى تطلع وقفوها الحريم : نوف حبيبتي جدك برا
ويقول لأحد يجي ..


نوف : ماراح اطول بحاكيه شوي واجي ..

سلمى : على راحتك روحيله ..


افتحت الباب وناظرته معطيها ظهره .. ووجه للبوابه الخارجيه ..


نوف اقتربت منه وظمته من دون لا يناظرها عرف انها نوف ..


سامي : غمض عينه بصعوبه : هلا نوفه


نوف بايت راسه : هلا فيك


جلست قباله ..


نوف : وش قلنا عن هالدخان ،، ما قلنا انها ألعن من الزقاره ؟؟ صحتك
يا جدي حرام ..



سامي يتنهد ويترك الارقيله : ........


نوف بحزن باين عليها رغم انها اخفته بابتسامتها الحلوه وغمازتها ا
لمميزه : اقول جدي ..


سامي : قولي

نوف : ليه شايل هموم الدنيا على راسك ؟؟ انا احيانا اشوفك تهتم فينا
مره وتخاف علينا وتجلس تضحك معنا وما كأنا اصغر منك بأعواااااام ..
تحسسنا وكنك صديقنا مو جدنا .. تطلع تتمشى معنا وتحاول تحمينا حتى
من الهوا الطاير ..


سامي : واحيان ؟؟

نوف تكمل وبصراحه : واحيان لا ،،(نزلت راسها ) احيان احس شغلك
وشركتك اهم منا كلنا ،، احيانا احسك مو انت .. تهاوش وتصايح .. على
حساب صحتك ،، تبعد فلان عنك .. وتقرب فلان منك .. تترك فلان بستين
داهيه و تطرد فلان .. جدي انا ما الومك على شي ولا هو من حقي اتدخل
فخصوصيتك ..


انا ما عمري حاكيتك بهالوضوح لاني ما شفت منك الا الوجه الاول ..

بس قبل كم يوم حسيت ان انت واحد ثاني .. واحد اول مره بحياتي

اقابله .. جدي انا كنت ولازلت احبك ..

والله لولاك ما كنت انا كذا .. ولا كنا كلنا كذا .. بس بس انا ما احب تكون
عصبي و ... (سكتت)




سامي بألم : وظالم ؟؟



نوف : انا ما اقصد ظالم .. انا عن نفسي والله اشوفك أرجل واحد شفته
بحياتي .. مواقف كثيره مرت علينا اثبتت لي انك صابر وحقاني
وماترضى بالظلم مهما كان ،، مواقف اثبتت لي ان مصلحة الناس اهم من
مصلحتك ..



بس فيه اشياء عجزت افهمها .. عجزت افهمك لأول مره ..



سامي : نوف دامك صريحه وواضحه .. احكي على طول .. قولي ليه يا
جدي تطرد ناصر ؟؟ وليه تتخلى عن بنتك منيره ؟


نوف بخوف : ... أ



سامي : اسمعيني يا نوف .. كل الكلام اللي حكيتيه يحتمل الصحه
والخطأ .. انا مهما كنت انسان والانسان بطبعه خطآء ..


نوف : دايم اقول لبابا جدي مافيه عيوب كيف يكون كامل استغفر الله
وجلست افتش على عيوبك بس ما لقيتها لكن بالفتره الاخيره عرفت ان
كل انسان مش كامل ..


سامي يبتسم : الا قولي شفتك كلك عيوب وعجزت القى ايجابيه وحده

نوف : لا والله يا جدي بالعكس .. انت غير عن كل هالناس .. مهما كنت
ومهما سويت تبقى فعيني كبير ..



نوف وقفت : عن اذنك


سامي : نوف ..


نوف تلتفت له : قولي لألماس مافيه روحه للملكه الا اذا وافقتي انتي ..
اطلعي فوق وقررو ..



نوف تضحك بقلبها (يوو يا جدي تفكر بكل شي ،، وتربط اشياء بأشياء مالها علاقه .. ياحبني لك)





/



الماس : نوفه الله جابك .. امشي نطلع لبيتنا ناسيه جوالي هناك بحاكي
صديقاتي


نجود برجاء : لا خليكم شوي ..


الماس : بيت جدي يطفش .. احس اني بلوحة فنية راقيه مكتوب عليها
ممنوع اللمس .. ما آخذ راحتي ..



نجود : ههههه اجل جيبي جوالك وتعالي بيتنا ..


نوف : طيب ممكن احكي ؟؟

نجود : من متى تاخذي الاذن ..

نوف : احم احم . . لمو حياتي انا جبت لك الاذن من جدو .. بس بشرط
ما تروحو الا لما اوافق اروح معكم انا هههههههه



الماس تركض لاختها : وانتي طبعا راح توافقي عشان اختك حبيبتك ..
صح ؟


نوف : مممممم مادري افكر وارد لك خبر


الماس : نويف تكفين وغلاة الغالي .. تكفين وافقي لا تمني علينا ..


الهنوف : يعني ما تعرفو نوفه اكيد بتوافق . . حبيبتي انتي عمري


نوف : ههههههه اذا بوافق .. بوافق عشان هالخبله فوفا ..


الهنوف : انا خبله ؟؟؟؟؟؟؟


الماس تهمس لفوفا : خبله عادي بس اهم شي نطلع .. يلا بسرعه البسو عباياتكم .. يبغالنا ساعه عشان نمر عند الجمارك .. خالد ..

نجود : احس ماهم تاركينا لوحدنا بيرسلو حد معنا


نوف : ماهو على كيفهم .. انتو بس اخلصو


الماس ( تاخذ جوال نجود وتتصل فأمها عشان تجيب جوالها من بيتهم ..)


بتول نايمه في الغرفه الثانيه .. وراحت لها نوف


نوف : تبوله تبوله

بتول : ........

نوف : تبووووووووله .. ؟؟؟؟

بتول : مممم ها

نوف : قومي ..

بتول : ليه

نوف : بنروح للمملكه .. تجي معنا

بتول : لا تعبانه ..

نوف : امشي يا مصخك ..

بتول : طايب قايمه




نجود وهي تدخل : اقول نوفه ليه طلعتي لجدي ..

نوف تسحب لها لبرا : لما دخلت الغرفه منحرجه من اللي صار .. ناظرت
بالشباك لقيته جالس لوحده وعيونها كلها حزن عور قلبي يا نجيد والله
رحمته ..


نجود : واللي عمله بناصر .. ؟

نوف : هذاك ناصر وهذا جدي كمان .. انتي ماشفتيه كيف كان جالس ..
والله نسيت موضوعي وطلعت له

نجود: الله يردهم زي ماكانو واحسن ..

نوف تسكر عبايتها : يلا طيب ..


/




خالد : وين ؟؟


الماس : ط طالعين ..

خالد : لا بالله ؟ احلفي .. ؟ اذا ما تعرفي للساعه اعلمك ؟؟

نوره : يمكن اخذو الاذن من جدي ..

خالد ناظر نوره نظره وسكتت ..


نوف نازله من السلم


خالد : اطلعو فوق والا ارجعو للبيت مافيه طلعه

نوف : جدي برا تقدر تحاكيه .. ما كنت ناويه اطلع بس هو اصر

خالد : ههههههههه ايه غصبك ،، والا انتي ماودك ههههه

نوف ناظرت فيه وطلعت .. انقهر كيف حاكته قدام الناس .. ولحقها للباب
ومسك يدها بقوه


نوف صرخت بقوووه آلمها مرررره : آآآآه خاااالد


سامي التفت وهو بالحديقه : ايش فيه .. ؟؟

نوف اتركته وطلعت لبرا ..

سامي : وش صاير ؟

نوف : ولا شي .. بس كنت راح اطيح ..

سامي : انتبهي على حالك .. وارفعي عبايتك لا تطيحين فيها والا
تنكسرين لا سمح الله

نوف تصطنع الابتسامه : ان شاءالله

سامي : وين البنات ؟؟؟

نوف : جايين الحين ..


نجود & الماس & بتول & الهنوف & العنود طالعين مايعرفون هم
رايحين والا لا ؟؟؟




نجود لنوف : جدي نطلع والا ؟؟

سامي : واحد ماسكن ؟؟ يلا بس لا تأخرن


البنات بابتسامه وحده : باااااااي جدووو

/



بالسياره طلبو من السايق يرفع على التكيف ..


نوف تمسك يدها : الله يسامحه يدي توجعني ..

الماس : الله يكسر يده

نوف : استغفري يا غبيه

الماس : اسكتي بس ..

نجود : بنات انا غيرت رايي ما ابغى المملكه .. مشتاقه للحياه مول .


بتول بغير عادتها كانت هاديه مره : ايوه بليز ابغى الحيااه مول والله احلى ..


نوف : حتى وانتي تعبانه تناقشين .. وش رايك يا لمو ؟؟؟ انا عادي
عندي ..

الماس : لا والله ؟؟ من جدكم انتو الحين عاملين كل هالفلم عشان
صديقاتي واخرتها تطنشوني ؟؟؟



الهنوف بيدها كوفي : والله اهم شي انه مول وفيه شباب على الاقل
اناظرهم واتشمت بذاك وامدح ذاك واعجب بذاك


العنود : صادقه اختي .. ما تقول الا الصح

نوف ناقده عليهم : إلا ما تقول الا الخراب ، هذا تفكير بنت عمرها 18 سنه ؟؟؟ امحق



نجود جوالها يرن ..


نجود بتردد : أ لو !!

دانه : هاي نجيده كيفك حبيبتي ؟؟

نجود : وش بغيتي ؟؟

دانه : داقه اتطمن عليك هههههههه

نجود بقهر بصوت عالي : دانه ترا ماني ناقصتك والله لو ما انك اختي
الكبيره لأكون مسكره الجوال فوجهك ..


وش شايفه نفسك عليه ؟؟؟ اذا فيه حاجه فقلبك مضايقتك وتبغين تطلعيها
طلعيها ياختي وفكينا ترا ماقمتي عندي ولا قعدتي .. بالطقاق باي

دانه هنا انصدمت من تصرف نجود .. نجود يا حرام مهما صار بينها
وبين دانه يكون لدانه احترامها وتقديرها بحكم انها الكبيره بالسن ماهو
بالعقل طبعا .. لأن عقل اصغر واحد في العايله أكبر من عقل دانه


انسانه مصلحتها اهم شي في الدنيا .. واذا جا فيوم وتعارضت مع مصلحة احد حتى لو كان ابوها تقتله ..


/

،


البنات في السياره منصدمين ما عدا نوف والهنوف لانهم عارفين السالفه


الماس بخوف : نجيد ايش فيه بينك وبينها ؟؟؟ اول مره تحاكيها كذا


بتول من كثر ماهي منصدمه : تلاقيها وحده من صديقاتها لا يمكن تكون دانه اختها .. !!!



نوف تأشر لهم بيدها : اووششششششش




نجود تناظر بالسيارات اللي تمر بجنبها وبصوت مبحوح : بنات تكفون اسكتو .. بالله عليكم اسكتو



ما تسوى عليهم هالطلعه .. وش ذي المصايب .. كل شخص فهالعايله متهاوش مع الثاني ..



ليه تغيرت حياتهم زي كذا ؟؟؟؟

/





دخل سامي جوا ولقى في الصاله ابو سالم جالس لوحده ..

سامي : السلام عليكم

ابو سالم : هلا وعليكم السلام ..

سامي : وين راحو ؟؟

ابو سالم : النسوان طلعو فوق .. والعيال كلن طلع مع خوياه

سامي : ااها .. طيب


ابو سالم : تامر على شي يا عمي .. !

سامي : لا بس بغيتك بموضوع .. !

ابو سالم عرف لان سامي يبان على تعابيره مشاعره : آمرني يا طويل العمر

سامي بغصه يحاول يخفيها باللامبالاه : ياولدي انا عارف انك شايل
بخاطرك مني !! عشان موضوع ولدك ناصر .. يعلم الله اني ماارتحت
ثانيه وحده من بعد خروجه من هنا .. الكل يعتقد اني جبار وظالم .. بس
والله ماهو هذا الموضوع .. الناس تتغير يا بو سالم بين يوم وليله وانا
والله متغير من زمان متحسف اني عملت كذا فبنتي .. ابغى اقولك شي
محد يعرفه .. !


ابو سالم باهتمام : قول يا عمي ..

سامي : والله العظيم .. ويشهد علي الله اني قبل 3 سنين بعد ما صحيت
من جبروتي و لما صحى ضميري .. عرفت الله ورحت ادور على بنتي
بكل مكان والحمدلله ما طولت في البحث عنها .. طلعت لأبو تركي ..
وحاكيته واعتذرت له .. لكن هو الله يسامحه ما عفا عني ..


ابو سالم يناظر فأبو راشد وكأنه يقول له احكي يلا كمل لا توقف

سامي يكمل : الله يسامح كيف هو ما يسامح ؟؟ انا عارف ان اللي عملته
معه مو شوي والله عارف .. لكن خلاص كل انسان يغلط .. صحيح انه

استقبلني فوظيفته استقبال يشهد له الكل بالطيب والاخلاق لكنه رفض
عرضي عليه الصلح

ابوسالم : طيب ليه ما رحت له البيت ؟؟

سامي : ما قدرت .. في شي كان يمنعني .. !!

ابوسالم : وبعدين ؟؟

سامي : وبعدين طلعت منه بهدوء ولما وصلت البيت عصبت .. كيف
يعمل كذا ؟؟ كيف ما يقبل عرضي عليه ؟؟ واسفي له ؟؟؟ وبعدها كأني
رجعت لحالتي ولعظمتي .. اللي ما ترضى بالخضوع لحد


ابو سالم : اها وزعلت من ناصر لانه استقبل ولد ابو تركي في القصر
ومن دون اذنك ..

سامي يهز راسه بالايجاب ..


ويكمل : انا اتصلت بناصر وانا برا ..

ابو سالم فتح عينه عالآخر وش هالانسان الغريب اللي محد قادر يفهمه
كيف صاير ذا ؟؟؟؟

ابو سالم : حاكيته !!!



سامي : ابغى اعتذر منه ومجهز له حكي .. صحيح اني راح اصغر بعينه
وبعين نفسي .. وصحيح اني راح اكون متنازل عن عزتي .. لكن ماني
بقادر اناظر بعيونكم بعد اللي صار .. كلام ناصر صحاني بشكل ماهو
طبيعي والله كل هالسنين اللي فاتت محد حاكاني بهالطريقه .. وبدال ما اشكره عملت فيه حاجه ماهي بسيطه

ابوسالم : ناصر يا عمي ولدك واعمل فيه اللي انت تبي وصدقني مهما
صار بينك وبينه ناصر يشوفك مثاله بكل حاجه والله ان لك فقلبه معزه ما
يعلم فيها الا الله



سامي وتغير صوته : وانا ماذبحني الا هذا ..


ابو سالم : والله لو اعرف مكانه لاجيبه لك يحب رجولك .. بس المشكله
مادري وينه .. حتى انا ما يحاكيني ..



سامي يوقف على رجوله بصعوبه : انا طالع ارتاح فوق .. عن اذنك ..


/



ابو سالم قرر ما يخبر ساره بشي اتصل فيها على طول: يلا يا بنت الحلال تأخرنا مره ..


ام سالم : تبوله ما جت .. خلنا ننتظرها ..

ابو سالم : لا .. يجيبونها بنات خالها البيت على طريقهم انا احاكيها .. انتي امشي بس ..

ام سالم : على امرك .. نازله

..


ام سالم : سلمت على امها ونوره وام دانه ودانه وطلعت ..




/
/



دانه بتنورتها اللي تحت الركبه بشوي حاطه رجل على رجل وماهدت

جوالها بالمره : ماما وش يقعدنا حنا يلا تأخرنا خلي جدتي ترتاح

سلمى : وين ارتاح خليكم شوي والله اطفش لوحدي ..

ام دانه : خلاص خلينا شوي يا دانه ابوك لهالحين ما اتصل انتظري
عشان جدتك ..

سلمى : عز الله شانك يا عمري ..

نوره : انا خالد راح وتركني .. مادري ارجع للقصر والا انتظره ؟؟

سلمى : خليكم يا ناس علامكم تبون الفكه ؟؟

نوره : لا والله يا جده .. بس فيصل وريتاج لازم ينامون .. بعدين البيت
بجنب البيت بس انومهم واتطمن على عمي ابو خالد وارجع اجلس عندك
ولا يهمك

سلمى : الله يجزاك خير ويخليلك عيالك ..

نوره : تسلميلي ..

/


عبدالله : مرحبا

تركي : ياويلي على اللي يمسكك ويفضخ راسك بالجدار ،، وش مرحبا
استح على وجهك .. تارك السلام لمن ؟؟


عبدالله : لك .. ؟

تركي : متى راح تعدل الفاظك ابغى افهم ؟؟

عبدالله : بالله عليك يا تركي متى بتترك خطبك وشعاراتك ومبادئك اللي
ناظر وش سوت فيك ؟؟

تركي بابتسامه : الحين اللي عنده مبادئ صار سلبي وماهو طبيعي ؟؟؟
اذا هي كذا اجل انا افتخر اني سلبي يا بن الحلال ..


عبدالله توهق : المهم بشرنا عنك ..

تركي وهو يتمغط في الصاله : والله كل شي تمام الحمد لله انت بالسياره ؟؟

عبدالله : ايوه طالع للاستراحه .. تعال الشباب كلهم هنا ك..

تركي : من زينهم الله يخليك كلهم مصابن وتافهين .. انا ما يقهرني الا
خويك ابو راس كبير يالله لك الحمد مايبقي احد ما يتريق عليه ما شاف
حاله .. !


عبدالله : ليه حاكي عنك شي ؟؟؟

تركي : يخسى الا هو .. بس اقولك ماصخين ماهم برياجيل ..

عبدالله : يابن الحلال انت تعال الحين وجيب خوياك ترا عادي الاستراحه
مفتوحه ..

تركي : اشوف .. وارد لك خبر ..

/

/





نايف جالس فـ ستار بوكس ..



نايف : والله يا احمد ودي اغير سيارتي ..

احمد : عاد انت آخر همك المظاهر وش لك بالتغيير توها سيارتك جديده
ماصار لها سنتين !!


نايف : بالعكس مو هذا القصد ،، سيارتي امتيازاتها قليله .. وفيها اشياء
تغث ..

احمد : وش ناوي تاخذ ..

نايف : افكر بورش ..

احمد : يا كرهي لها .. خلك على مجنونك لا يجيك اجن منه والله سيارتك ازين و أجد منها ..


نايف : تدري وش ودي .. ! ودي آخذ اجازه من حضرتك واسافر لي شهر .. وبعدها ارجع وتروح انت شهر ..


احمد : لا يا بن الحلال .. المكتب بواحد منا ما يمشي .. لازم كلنا نكون متواجدين .. وخاصه ان تونا داخلين السوق .. خلنا نثبت نفسنا اكثر ..


نايف : اكثر من كذا ؟؟؟ يصير طمع ؟؟ لا ياخوي وارداتنا تبشر بخير
الحمد لله .. والله ما كنت احلم فيها ..

احمد : اجل اترك عنك السفر وخلك في الزواج .. واخذ اسبوع عسل ..


نايف : هههههه والله انك نذل !! اسبوع ؟؟

احمد : احمد ربك .. والله لو بيدي ما تطلع من المكتب نهائيا .. والله
ليوقف الشغل .. ونحط يدنا على خدنا


نايف: ياخي انت تكبر المواضيع مره .. ،‘ انت متى ناوي تزوج ؟؟

احمد : والله اذا عندك عروس إلي مستعد اتزوجها الحين بهالكوفي ..

نايف : ههههه وانا من وين اجيب لك ؟ شايفني خطابه !! انت اختار وتزوج وفكنا وانا عن
نفسي اعطيك شهر كامل اجازه ..

احمد : ليه ما عنك خوات ؟؟

نايف وكأنه حس الموضوع جد : اها هههههههه اشوفك تميلح عندي .. !

احمد : لا والله ما طرت فبالي الا الحين .. جد عندك خوات لزواج

نايف : ههههههههههه ماني متخيل وجهك مع وحده من خواتي .. والله
لشيبن فيك ..

احمد : لهالدرجه ؟؟؟

نايف : لا بس هن مدلعات شوي .. بعدين ماضنتي بياخذهن غير عيال
عمي !

احمد : يعني مافيه نصيب !

نايف : علامك وكنك تشحذ ؟؟؟ هههه والله لو انها ذبيحه ما عشتك .. اذا انت جاد تقدم لهم واخطب وتوكل على الله

احمد : لا يا بن الحلال اجيب ابوي واخواني وانحرج هناك .. !

نايف : لا ياخي ماحنا من اللي تعرفهم انت .. ترانا طبيعيين مره ..
ولايمكن ابوي يحرج احد او يقلل منه بعدين وين يحصل رجال زيك ؟؟
والله لو تاخذ وحده من خواتي ان الله يحبها ..



احمد : هذا من طيبك والله يا بو راشد ..

نايف : وش فيك استحيت هههههههههههه

احمد : على هوى .. وش استحي منه ؟؟ انا عرقت يا ولد .. حسيت
الموضوع قلب جد .. انت جس النبض وعطني خبر .. تراي انتظرك تكفى


نايف : ابشر ولا يهمك ..


نايف جلس يناظر باللي يمرون .. وطاحت عينه على نوف ونجود
يتمشون بالمول

سكت شوي والتفت ورى وناظر فبتول والماس وباقي البنات .. وتأكد انهم هم ..

استأذن من احمد ووقف ..


نوف تناظر بالمحل تبغى تدخله .. والخبلات الهنوف والعنود ما يمر

بجنبهم رجال الا قزوه قز والدليل انهم شايفو نايف وهو جايهم على بعد
10 امتاااااار





الهنوف غصت بالحكي : ن ن ن نوفه نواف مهو نواف مين نايف .. نايف


نوف التفت لها بهدوء : وينه ؟؟

العنود برعب مبالغ فيه : مااااااااماااااا

نوف : وجع انتي وياها .. علامكم خايفات كذا ؟؟ ماسكم بمرقص ؟؟؟
تعدلي انتي وياها

نجود : شاكين بنفسكم انتو ؟؟ اثقلو يا البزارين

بتول جالسه على الكرسي وحاطه رجل على رجل : اسمعو عاد النشرة
الجويه بمناسبة الزحمه ..


نايف : سلآم ..

الكل : هلا

نايف : وش جايبكم

نوف : زي ما انت شايف نتقضى للعيد ..

نايف : نويف ؟؟ وفيه احد صاحي يطلع لحاله قبل العيد بيوم ؟؟ ماتشوفي
الزحمه وكنه الحج استغفر الله عن هالتشبيه .. !

بتول تلوي فمها وبهمس : شفتو ؟

نجود : والله يا نايف حنا نسينا العيد هالسنه وتونا نصحى اليوم وأخذنا الاذن من جدي ..


نايف : حتى ولو شوفي الشباب كيف واقفين .. ياناس كم مره اقوللكم فيه
مولات ارقى من كذا ..


نوف : يا نايف يا قلبي انت مو بوقته .. وربي جايين نتقضى مو
نتمشى .. بعدين انا معهم لا تخاف ..


الماس وهي فاكه الشيله عن وجهها : نايف يرحم والديك اتركنا خلنا نخلص عندنا وقت نمشي عليه .. ترا هذا ما ينحسب


نايف :يا دمك الخفيف انتي ..



احمد دخل المحل منصدم !!!!! نايف يغازل بنات !!! كيف ؟؟ ما عمرها صارت ؟؟؟





احمد دخل وقرب مره : نايف ؟؟؟؟ أنـ



نايف التفت باستغراب أهبل هذا والا ايش : وين جاي يا الحبيب أهلي
هنا .. !!



احمد انحرج مررررررره وطاحت عينه بعين الماس اللي من دون حيا جلست تناظره وكنه وحده من صديقاتها



نايف : وجع ان شاءالله الماس نزلي الغطا .. حماره انتي ؟


الماس نزلت الغطا : زعلت كيف يحرجها قدام البنات وقدام صديقه ..


احمد اخذ بعضه وطلع بسرعه (وش ذا الغباء كيف ما فكرت انهم اهله ؟؟؟ وش يقولي عني هالحين ؟؟؟ كمخه ؟؟ والا اهبل ؟؟ والا قليل اصل ؟؟؟ لا حول ولا قوة الا بالله اللي يكفينا شر اللقافه)






نجود متنحه وتناظر بنايف مصدومه اول مره تناظره عصبي (ياماما يخوف وهو عصبي )



نايف : اسمعو انا طالع استأذن من خويي وجايكم .. لا تتحركو

بتول : ما حنا بزارين حنا

نايف التفت لها كانت واقفه وراه : ولا كلمه ، حسابي معك في البيت
على هالكلمه ..


بتول خافت بس ارتاحت لما عرفت انهم راح ينزلوها فبيتها اول شي ..



/





طلع نايف للكوفي ..

نايف ما حاكى احمد بالموضوع لانه يعرفه اكثر من نفسه عارف انه مو متعمد ..

نايف : احمد مضطر اطلع الحين اخلص كم شغله مع الاهل وبينا تلفون ..

احمد : نايف ترا والله ما قصد ما علمتني انهم أ

نايف يبتسم : والله عارف ،، اصلا شكلك باين عليه .. سلام

احمد يضحك بقوه تذكر حاله : هههههههه سلام


/





في السياره بعد ما خلصو البنات .. وطبعا بسرعه بسرعه لان الاخ نايف
اكثر انسان عجووول فحياته يكره التسوق مع النسوان .. آخر مره طلع مع الريم للسوق وما طول كمان ..



نوف تنزل السيله في السياره : يوووه يالرياض ما ناقصها الا يجينا الثلج
وتكون كامله ..

نايف : سكري سكري الباب عشان اعلمك الثلج كيف صاير

نوف تسكره : هههههههههه نويف اول مره اناظرك عصبي كذا هدي يابن
الحلال

الماس بزعل : ايوه وزفني بقوه ،، آخر مره هاوشني فيها من ألف وتسع

ميه وحطبه .. وجاي الحين يحرجني


نايف يلتفت بالسياره يناظر بالسيارات اللي خلفه .. وساكت .. ينتظر

يطلع على الخط عشان يعطي كل وحده نصيبها ..



/

الهنوف : افففففففف ما خلصت اغراضي ..


نايف : ومن متى عمركم خلصتو يالحريم .. والله لو كل شي جاهز عندكم
لازم تطلعو حاجه جديده ..

العنود : الا انا ،، ما احتاج شي لو البس خيشه أجنن

نايف بضحك : كثري منها ههههه

نجود ونوف : هههههههههههه


العنود زعلت ..


نجود : يووووه يا نايف نصف اللي بالسياره زعلتهم اليوم !! الله يعينك


نايف يناظر نجود بالمنظره : مين غير الماس والعنود والهنوف ؟؟؟

نجود : تبوله ..


بتول متخبيه ورا نجود نست ان نايف هو اللي راح يوصلهم لبيوتهم ..
تحسب انها راح تفلت منه


نايف : اووووووو عاد تبوله ؟؟؟ ماشاءالله عليها ما تقول كلا م يغث ..
الحين انا تارك خويي وجاي معكم خايف عليكم تقولي ماحنا بزارين ؟؟ اذا انتي مو بزر مين البزر



بتول عصبت ووجها صار احمر من القهر ودها تقتله .. بس مالها الا السكوت


نايف : ومع هذا سامحتها .. تبوله حسبت لمووو ..

نوف : ماقصرت والله انك جيت معنا ..

نجود : اي والله

نايف : الحمد لله .. صراحه انا اهم شي عندي ..نجود .. (وسكت متعمد)



نجود عيونها طلعت ..



نايف يكمل باستهزاء: ونوف طبعا ..



نوف اكتفت بهالضحكه : ههههههههههههه



نايف حب يطول السالفه : ليه تضكين يا ام غمازه ناقصه


نوف : وش غمازه ناقصه .. وش احلى من غمازتي ها


نايف : والله انك مغروره يا بنت .. (رجع ناظر نجود وكأنه يدور اي حاجه
يحاكيها فيها) نجود مو فيه بنات ازين منها بس ماهن مغرورات زيها ؟؟



نجود ما تدري وش تقول : حرام عليك نويف والله مهي بمغروره .. بس
هي طبعها كذا


نايف : وحده تصلح والثانيه تشوت

نوف : ههههههه فديتك محد يرفعلي الا انتي ..



بتول فاتحه فمها بصوت خفيف : نجيد .. من متى ان شاءالله ؟

نجود بفرح باين على وجهها : وشو ؟

بتول : وشو ها .. انا اوريك ..




فجأه دق تلفون نايف ..


نايف : صوت يا بنات .. هلااااااا والله

ناصر : هلا فيك .. اخبارك

نايف : تمام الحمد لله.. بشرنا عنك

ناصر : ابد كل شي تمام .. عيدك مبارك مقدما ..

نايف : من العايدين وكل عام وانت بخيـر

نوف سمعت صوت ناصر وعرفته بسرعه بس قالت اكيد تشابه اصوات
والا ما كان سكتنا نايف ..

ناصر : كيف الاهل ان شاءالله بخير ؟؟

نايف : كلهم يسلمون عليك وينك يا ولد ما عاد تتصل زي اول ؟؟؟ لا
يكون ما انت ناوي تعايد علينا بكره ؟؟

والله ليزعلون منك



ناصر جالس على النت طفشان : والله النيه لا .. تعذر لي منهم ..

نايف : ماني متعذر لك من احد .. باذن الله راح تجي وتعايد على امك
وجدك وجدتك واهلك كلهم ينتظرونك ..



هنا قفزت بتول من مكانها ولا شعوريا : نااااااااااااااصر ..



ناصر استغرب وش جاب بتول عن نايف وصوت سياره : هذي تبوله ؟؟

نايف : ايه خاطفها


نجود تضايقت (افففف كم مره يقول بتول في اليوم ؟؟؟)

ناصر : لا بالله .. ؟

نايف : والله تونا جايين من السوق .. البنات كلهم معي .. !

ناصر : كلهم كلهم .. !

نايف : ايه كلهم .. ؟

ناصر : اها .. طيب عطني تبوله لو ما عليك امر ..




نوف جالسه ساكته .. أكيد انه زعلان .. من اول ما قالو بكره العيد يحاول

يتصل فيها بس ما ترد عليه ..










بتول : ناصر ناصر اتصل بجوالي انا نازله للبيت الحين طيب ؟

ناصر : طيب .. يلا سلام ..



/

بتول قبل لا تسكر باب السياره : مشكور نايف ..

نايف : حياك الله ..


/



/





ساره جالسه مع ابنها آخر العنقود شبيه ناصر سعودي ..

بتول : هاي

ساره : هلا .. ليه تأخرتو

بتول : لان نايف اللي مودينا .. خليني اوريك وش جبت ..

ساره تناظر بحاجات بنتها وملابسها .. : ذوق طالعه على امك

بتول : شفـ (دق جوالها) ناصر ماما .. احاكيه بعدين اعطيك طيب ؟

ساره بفرح : طيب بس لا تطولي ..


بتول دخلت الغرفه : هاي ناصر ..

ناصر يتمغط : هايات .. ها فضيتي السوق ؟؟ ما بقيتي شي للحريم ؟؟

بتول بدلع : ناصر !! ياويلك من الله .. اصلا نايف ما يترك احد بحاله

ناصر : والله ما تستحين .. هذا و هو متعني عشانكم ..

بتول : اي متعني الله يخليك ،، ! شافنا في السوق و جا معنا

ناصر بنبره غير : اقول تبوله ؟

بتول : هلا

ناصر : نوف وش فيها

بتول : وكنها تتذكر الموقف : مافيها شي ليه ؟؟؟

ناصر : لا تكذبي علي .. اعرفك انا .. احكي مدام فتوش


بتول لازم تحكي والا بيتهاوشون مع بعض : ناصر .. نوفه انحرجت
مره .. كل يوم احسها تنكسر اكثر واكثر

وربي يا ناصر ماكنها نوف اللي تعرفها احسها مره ذبلت .. كل يوم جاي احد و عامل لها حركه زي وجهه


ناصر بعصبيه : من تقصدين ..


بتول : يا ناصر .. نوف انحرجت .. قبل شوي وقدام الكل تعرف وش نادت فارس بوجود الكل ؟؟


ناصر : وش نادته ؟؟

بتول : ناصر ..

ناصر سكت .. يعرف نوف وخجلها وانها كيف تفهم الامور .. واللي يهمها فلان كيف فكر وفلانه وش راح تقول


بتول : جدي يشوفها نغزه و سالم مسكها ممسك عليها .. و دانه لما
وصلها الخبر الكل ينتظرها متى تتشمت بنوف


ناصر يرجع شعره بيده ويتنهد بقوه سحب كمية هوا كبيره وطلعها بوقت واحد : ...

بتول : ماودي اضايقك بس حتى نوف عندي مهمه .. ما ابغاك تزعل منها
او تاخذ موقف ترا في اشياء كثيره يا ناصر نوف ما تحكيها لك .. لان
هذي طبيعتها لو انا مكانها اتكلم واقول وارد .. اما هي لا اهم شي عندها
انت لا تلومها .. يكفي انها تصطنع البسمه قدامنا بس من ورانا انا احلف
بالله انها تبكي دم



ناصر ضاق صدره مررررررره وكره انه طلع من حياتهم لثانيه وحده



ناصر بصوت مخنوق : بتول احاكيك بعدين سلام ..

ماهو غريب تعيش في يـوم [ مهجـور ]
وتعيش في همّك .. على الضيم أكثر .. !

" الأغرب " .. تعيش العمر دوم [مقهور]
وترجع بك الذكــ’ــرى على كل منظر .. ,





/




بهالليله محد ارتاح ..


سامي كل تفكيره فبنته منيره اللي رافض زوجها العرض والاسف وبناصر اللي ما يعرف طريقه دور بكل مكان الا المزرعه ..



وسلمى اللي كل يوم تحس انها راح تفقد حاسة النظر بسبب بكيها الدايم .. واللي ما يخلص



والا ابو خالد اللي يطمن الناس على حالته وهو نفسه ماهو متطمن .. يحس باحساس غريب اول مره يجيه ..


وام خالد اللي ما ترقد الليل سهرانه عليه .. تناظره كل ما ارمش والا كح والا تحرك



وخالد اللي كل تفكيره كيف يقنع ابوه ويربح هالصفقه (صالح) وكيف يكسر خشم اخته نوف ..


ونايف اللي ما يعرف الايام وش مخبيتله .. كيف ياخذ وحده تافهه سطحيه كريهه .. وهو فوق هذا يعشق اختها ؟؟


والا نوف اللي ما ارتاحت من وقت ما ناظرها ناصر آخر نظره .. النظره اللي كانت بعيونه غريبه للحين ماهي فاهمتها .. ما ارتاحت بحياتها اللي كانت تشوف انها اسعد بنت في العالم .. كل شي متوفر لها .. وفجأه فقدت اشياء كثيره .. اشياء مره غاليه .. تلتفت يمين تحس بغصه تلتفت شمال تحس بضيقه تحط راسها عالمخده وتبدا سلسلة التفكير اللي ما تنتهي ..

||~ مخنوق ! لكن ماادري ليه انا مخنوق
ضايق ! ولا ادري ليه بالحيل ضاآايق !!

ثوب الصبر من حزن الأيام مشقوق
واليا سألوني ، قلت : بالحيييييييل رايق!

احيان ، ودك ترتفع للسما فوق ..
تطيييير / تبعد ، ماتشوف الخلايق ! ~||



/

اما ابو دانه وام دانه .. ما يعرفو كيف يخلو دانه توافق على نايف . وين لهم وجه يرفضوه .؟؟؟


ودانه هايمه بعبدالله لحد الجنون .. عاشقته وعاشقه حتى السلبيات اللي تشوفها قدامها .. وعلى تتحول لايجابيات اتوماتيكا ..



اما نجود الله اعلم بحالها .. اختها راح تهدم حياة نفسها وحياة نجود
معها .. اذا حكت راح تخرب حياة الكل .. باستهتارها الي ماهو غريب
عليها .. لكن نجود جالسه تنتظر اللحظه اللي تناظر فيها كل شي ينهدم
قدام عينها وهي جالسه تبكي وتندب حظها .. ما توقعت حبها لنايف يكبر
كل يوم .. وكل دقيقه تعجب باخلاقه وروحه اكثر من الدقيقه اللي قبلها ..
وتشتاق له حتى وهو موجود ..

|| ~ أحسب السالفه ‘‘ نظرهـ ’’ و احسب ان الغرام ’’ اعجاب ‘‘
الين ان صرت بـ غ ــيآبـهـ / اضيق بـ داخل ثيابي .,. ~||





اما ساره تجلس كل يوم على هالشباك .. احساسها يقول ان ناصر راح
يدخل زي كل يوم يبوس راسها ويحط راسه وينام من التعب ..



وبتول ما قدرت تنام من التعب .. كل ثانيه تقوم وتاكل من هالمهدئات
وترجع تنام ربع ساعه وترجع تقوم .. غريبه حالتها !




/

الكل كان يحسد محمد وسعد .. يفكرو بأن لو يرجعو صغار كل واحد منهم
اكبر هم عنده انه يشتري اللعبه الفلانيه او يستعير اللعبه الفلانيه او كيف
يلعب بهاللعبه .. !


بس الواقع .. كل ما كبر واحد منهم سنه كل ما زاد همه ضعفه مليون
مره ..




وهذي هي الحياه !





هذي هي الدنيا متاهات واحزان ** كلن يدور راحته ما لقاها
!