[اليازيه]

يتبع الفصل التاسع
بتول بحزن : اكيد تبكي



وقفو كلهم وطلعو لفوق ..



دانه وهي طالعه من الصاله الثانيه : خبول انتم ؟؟؟ امشو بشويش امحق انثى انتي وياها ..


بتول : اكرمينا بسكوتك


الماس : اللي تسبق لها جائزه


نجود وهي تركض (بفضول) : وش هي ؟


الماس : بوسه على خد الفائزه


بتول : وووووووووووووووووووووووووووووع ، منك عاد !!


الماس وقفت عن الركض : وع بعينك قليلة حيا ،، اجل من تبغيها منه؟؟


بتول انحرجت : ما اقصد يا حماره بس وع من يبغى بوسه منك ؟؟؟ اجل ابغى اتمشى شوي شوي تبرعت
بالجائزه لنجيد



نجود وهي جالسه على السلم : هههههههههههههههههههه نجيد تسلم عليك وتقول لك البوسه اهداء
مني لك ما عاد ابي الفوز



الماس صدقتهم وحطت يدها فخصرها : جعلكم اللي ماني بقايله !! كل هذا لانها مني ؟؟


والله محد يحصلها اصلا .. ما قول الا مالت



نجود ركضت لعندها وهي ميته من الضحك وباستها : هههههههههههههه نمزح معك يا غبيه



بتول : هههههههههههههههه والله لو انك ياسر عرفات



:


:





نوف جالسه تحاكي بالجوال


دخلو عليها البنات بازعاجهم وسكتو لما ناظروها تحاكي . . كلهم في بالهم انه ناصر


بتول ركضت لعندها : مين مين ؟؟



نوف وتبعد الجوال : صديقتي


بتول : احلفي


نوف افهمت قصدها : وربي صديقتي وش فيك ؟


بتول بخيبة امل وتأشر لنوفه يعني سكري الجوال


نوف : يلا احاكيك بعدين باي


نوف : علامكم ؟؟


نجود : طافك هوشة نايف وبتول هههههههههه


الماس : وش فيك منصدمه ؟؟ ههههههه


نوف : بتول دايم تتهاوش بس انا منصدمه من نايف ؟ هههههه


بتول : هييييييي انتم شفيكم علي ؟؟ بفهم كيف تناظروني ؟؟


نوف : ههههههههه والله امزح معك وش سالفة الهواش


بتول : انتي اللي وش سالفتك جايه هنا ؟؟ هالمكان ما جيناه من زمان



نوف وكنها تتذكر جلستها مع نايف وناصر هنا : لا بس حبيت اناظر الحديقه من فوق



الماس ترفع حاجبها : وش فيها الحديقه حتى تناظريها ؟؟ اللي يسمعك يقول تطل على اشجار البرتقال في
الشام والا على اشجار البن في تركيا !!!



نجود : ههههههه يا حرام لمووو سمعت اللي حافظته في الكتاب كله


بتول : خخخخخخخ








//


كلهم راحو يرتاحون في بيوتهم .. اول رمضان الكل يتعب وفي نصفه يتعودون عليه و في آخره يحاولو يستغلوه


دانه : بابا سمعت ان ناصر ما عاد يرجع هنا


ابو دانه : لا تقولي كذا ان شاءالله يرجع !


دانه وهي صاعده لغرفتها : ..


ابو دانه : تعالي ابغى احاكيك يا بنيتي ..


دانه خافت اكيد انه عرف عن موضوع عبدالله ،، وسكت طول اليوم لحد ما نوصل لبيتنا


والله ان درا ابوي والا عمامي والا عيالهم والله ليذبحوني !! معقوله عرف ؟


دانه بخوف : هلااا


ابو دانه جلس في الصاله وشاور لها تجلس بجنبه


ابو دانه : يا دانه انتي ما عدتي صغيره يا حبيبتي وكل يوم عمك يحاكيني عنك


دانه بصدمه : عن ايش ؟؟


ابو دانه : عنك وعن نايف !!


دانه وكأنها نست سالفة الخطبه : نايف ؟؟ ما خلصنا منه ؟؟


ابو دانه : ماراح تلاقين احسن منه ؟؟ ولد عمك هذا من احسن الشباب بكل حاجه


والله ان نايف ذا رجال ينشد فيه الظهر لو تلفي الرياض ما عاد تلاقي زيه


دانه توقف : انا ما ابغاه بابا ما ابغاه اكرهه والله ما ابغاه بعدين توني صغيره خله ياخذ نجود


دخلت نجود والهنوف الصاله


نجود باستغراب: من اللي ياخذ نجود ؟؟



دانه تناظر فأبوها : بابا خله ياخذ نجود لابقين لبعض انا ما ابغاه


ابو دانه : بس نايف يحبك وشاريك ما يبغى الا انتي


نجود وموقفها محرج بس وش يعمل ابو دانه ؟؟ لازم يكذب عشان تتم هالزيجه


نجود بصوت كله حزن : ومن قالك اني ابغاه ،، ما تبينه لا ترمينه علي .. ولا تدخليني فمواضيعك يا دانه انسيني شوي



دانه : جتكم عاد نجيد .. لازم تتفلسف بكم كلمه ..


ابو دانه : اطلعي يا نجود ،، خليني احاكي اختك ..


نجود وجها احمر ودها تبكي : ابشر بابا


،،





الهنوف في الاصنصير : نجيد وش فيك ؟؟؟



نجود : ولا شي ..


الهنوف : ما عليك منها هي مقهوره لانه بيغصبها ابوي .. وعارفه ان مافيه حل ثاني لو تموت


نجود : ما همتني قلتلك .. اطلعي


الهنوف وهي تطلع : نجود ابغى اقولك حاجه قالتها لي الريم


نجود :وشو ؟


الهنوف : الريم قالت لي ان نايف دايم يسأل عنك ويسولف عنك .. وبكل حاجه لازم يدخل اسمك فيها


نجود نزلت دمعتها ودخلت لغرفتها وكأنها تقول مو بوقتك يالهنوف ياليتك محتفظه بهالكلام لنفسك


لحقته االهنوف وقالت : انا حلفتها بالله وانتي تعرفي الريم ما تجيب كلام من مخها تقول والله انها يحبها باين


من عيونه عشان كذا انا والعنود دايم نتريق عليك وعليه بس والله ما كنت احسبك تحبينه


نجود وهي تبتسم باستهزاء: وش خلاك تتأكدي اني احبه


الهنوف : اليوم عيونك ووجهك وكلامك ونبرة صوتك كل هذا يبن كلامي والله انك تحبينه ..
والله انك تحبين نايف


دانه : تحبين مين يا عمري ؟؟؟؟؟؟؟


نجود وعيونها حمرا وتناظر بدانه : .............


الهنوف هربت لغرفتها ..


دانه بصوت عالي : انتي وحده ما تستحين على وجهك .. تعرفين انه خاطبني ويحبني وتتلزقي فيه ها ؟؟


نجود خافت حد يسمع كلامها كيف تخبي طول هذي السنين كلها وتجي الهنوف وتخرب كل شي بغباء منها ؟؟؟


نجود بارتباك : انا ما قلت حاجه الهنوف والريم هو يحللو ويخططو على كيفهم الرجال ما قال حاجه


اصلا دايم يسولف عنك بالعكس انا ما احبه اصلا دايم اتهاش معاه ما اطيقه (وجلست تبكي)


دانه تقرب من عندها : اسمعيني انا اصلا ما ابغاه ،، بس انتي طلعتي فخلقتي وكن الله جايبك من السما ،،
هذا وجهي اذا ما فضحتك عن امك وابوك وفكيت نفسي من هالزفت نايف


نجود بصدمه كبيره يمكن تكون اكبر صدمه فحياتها ،، وش الغلط اللي عملته وخلت اختها تمسكها من ايدها اللي تعورها ..


هذا جزاها لانها كانت تغطي على كل فضايحها و الشباب اللي تعرفهم ؟؟


هذا جزاها لأنها كانت توفر مبالغ لأختها بس لأنها كانت تطلبها ؟؟


هذا جزاها لأنها سترت حبها لنايف حتى ما تخسر اختها حياتها الزوجيه ؟؟


هذا جزاها لأنها ضحت بحبيبها لوحده خانت اخوتها ؟؟


هذا جزاها اللي ما كانت ترضى بأي كلمة تجرح اختها في حضورها وغيابها ؟؟


هذا جزاها لأنها حبتها من كل قلبها ولا يوم فكرت تمسك عليها اي ممسك او تهددها بحاجه مهما كانت
صغيره ؟؟




ليه طيب ؟؟ وكيف قلبها بيطاوعها تحكي للناس وتفضحها ؟؟ طيب انا اختها ؟؟؟


نجود وهي تبكي : دانه ! احلفك بأغلى ما عندك الرجال ما عملك حاجه تصغريه بعين اهله .. احلفك بالله لا
تقولي عنه كلام ماهو صحيح



دانه : ههههههههههههه خايفه عليه ؟؟ طيب عادي لكن بقول لبابا وماما انك تحبين زوج اختك وميته فيه وهو


ماهو معطيك وجه عشان كذا راح اكبر فعينهم لأني لا يمكن اتزوج واحد تحبه اختي هههههههههههه كذا كويس ؟



نجود بحقد : سوي اللي بتسوينه لكن لا تقربي الرجال خليه فحاله وانا معي الله .. ما اقول الا الله يسامحك


دانه : الله يسامح الجميع ،، والا لعبتك النذله من يلعبها ؟؟


نجود : ما قصرتي والله .. خليتيني نذله كمان ؟؟؟


دانه وهي طالعه : بقولهم بس ماهو الحين بعدين .. والله لاوريك اتي ونايف الحمار (سكرت الباب بقوه)



نجود جلست لوحدها تفكر معقوله اللي راح يصير ؟؟ والله ولا مره بعمري تخيلتها وش بيقول عني ابوي ،،
امي وش بتفكر فيني ؟؟ مع اني والله ما عمري عملت حاجه احتراما لهم ولدانه والله اعتبرته زي اخوي بس
ليه هذا يصير ؟؟




وبدون لا تحس اخذت جواله واتصلت فنوف


نجود : كنت احبه


نوف : بسم الله منهو ؟


نجود تبكي : وربي كنت احبه كنت


نوف : وش في صوتك نجيد ؟؟؟ اذا مقلب والله لاكون قاتلتك


نجود تصيح : نوف ابغى احاكيك تكفين والله ماني بقادره بنفجر


نوف : تعالي طيب البيت مافيه احد


نجود : ما اقدر وقت سحور الاس قاعده من النوم


نوف : تعالي والا بجيك تراك خوفتيني سكري وتعالي كلها خطوتين باي


نوف نزلت تحت وهي تجري .. تبغى تنتظرها وتعرف منها السالفه وسبب صياحها وبكيها اللي يخوف



حمودي جالس في الصاله باين انه توه جالس من النوم


نوف : حمودي اطلع فوق ماما فوق


حمود :لا ماما هنا في المطبخ


نوف : اففففف وش اقول لماما الحين ؟؟ الله يستر


نجود ما استأذنت من احد طلعت من بيتهم ودخلت لبيت نوف : مرحبا



نوف مسكت يد نجود وركضت لفوق


نجود حست انها جسد بدون روح ما تدري وش العمل !!


نوف سكرت الباب وجلست نجود : علميني وش السالفه ؟؟


نجود وهي تناظر بالارض : كنت احبه يا نوف والله كنت


نوف : انتي ما سكه علي هالجمله ايش فيه ؟؟؟


نجود حكت السالفه كلها لنوف .. ونوف مصدومه مره ما تدري وش العمل بس وعدت نجود ما تطلع من بيتها
الا وهي حاله المشكله .. واتصلت فعمها ابو دانه وعلمته ان نجود عندهم اليوم وراح تنام عندهم






/



عبدالعزيز : آهآ يعني هذيك اللي كانت تبكي وتبعد سامي عنك هي نوف ؟؟



ناصر : طيب لا تقول اسمها ترا والله اغار ..


عزيز : ههههههههههه هذا وانا ما قلت انها مزيونه ؟؟؟؟


ناصر عصب : انا الغلطان اللي حكيت لك ..


وراح ناصر وحكى كل شي لعزيز عن حبه لنوفه .. وكأنه ما صدق انه يلاقي حد يحكي له ويسمع له باهتمام .
.. وعزيز انتهز الفرصه بخدعه من خدعه حقيره زيه .. انقهر كيف ناصر لقى اللي يحبها واللي تبادله مثل
الشعور !! كيف يعيش متهني معها ؟؟؟؟



راح تشوفو وش راح يعمل ..





ديلار زين السفره وجهز كل حاجه .. مابقى شي على الاذان






/





على السفره ومع الافطار جلسو يسلفون ام تركي و تركي والجوهره وساره .


ما عدا ابو تركي مبارك .. ساكت وما دخل جوفه الا كوب مويا !!


ام تركي تقطع ضحكتها : اقول مبارك علامك شايل هموم الدنيا على راسك ؟؟


تركي : اي والله يبه ما انت طبيعي اليوم !! اوديك المستشفى


ابو تركي : لا مافيني شي بس بغيتك يا ام تركي انتي وولدك بموضوع



الجوهره تناظر بساره اللي قرت الكلام بعين الجوهره (وش هالموضوع السري ؟؟؟)



/


بغرفة الجوهره وساره


الجوهره : تتوقعي موضوع خطبه ؟؟؟


ساره : مالت عليك لو موضوع خطبه كان شفتي ابوك فرحان مو زعلان


الجوهره : يمكن زعلان لان واحد غني معه في الدوام يبغى يتزوجني غصب


ساره : ههههههههههه ايه وتطلعي انتي مغصوبه بس تحبون بعض في النهايه ؟؟ نصيحه مني لا اتابعي قناة
روتانا سينما مأثره عليك مره



الجوهره : ههههههههه هذا اللي جا فبالي ههههه




/




بتول : أهلين بدور ،‘


بدور : تبوله ما صارت رديلي خبر راح تجي الحفله والا لا ؟؟


بتول : ممممم مادري والله .. متى هي ؟


بدور : بكره


بتول : خلاص جايه ،‘ بس بجيب معاي وحده من بنات خالي مقدر اجي لوحدي استحي


بدور : حياكم الله بس لا تتأخري


بتول : اوكي ،‘ سي يو ..




/





نوف جالسه فغرفتها بعد الفطور وبعد الصلاه .. جلست تناظر بنفسها بالمنظره


تذكرت ناصر لما كان يعلق على شامتها اللي على خدها وجلست تضحك لوحدها


سمعت رنت جوالها وراحت تركض له



رفعت السماعه لقته ( ناصر يتصل )



استغربت كل ما تتذكره يتصل فيها ؟؟



نوف فتحت الجوال وما حكت



ناصر : الو !!!


نوف : هلا


ناصر : هلا بك ،‘ كيفك نويف اخبارك


نوف : بخير الحمد لله انت كيفك ؟؟


ناصر : ابد انا بخير ولله الحمد .. ورا غرفتك هاديه وين لموو وحمودي ؟؟


نوف : لمو راحت تكمل نومتها بعد ما صلت وحمودي يناظر بالباباي بغرفته


ناصر : آآآه أجل اكيد سعودي يناظر معه


نوف بألم : كنك عارف ،، امك عندنا اليوم وجايبه سعودي معها


ناصر :فديته وربي له وحشه ،‘ عطيني تبوله احاكيها


نوف : لا تبوله ما جت ،‘ تقول تونا شايفين بعض .. شكلها طفشت منا


ناصر : هههه لا تلقينها لهالحين نايمه ..


نوف بتردد : تبغى تحاكي عمتي ساره !!


ناصر : والله يا نويف مـ


نوف : لحظه اناديها لغرفتي .. على شاني لا تسكر ..


ناصر : ابشري ..




/




في الصاله الجده سلمى زايره ام خالد .. وجايه معها بنتها منيره



نوف : عمه تعالي ابغاك تشوفي فستاني لو ما عليك امر ..


ام خالد باستغراب : اي فستان


نوف : ماما فستاني اللي كنت ناويه اخلي عمتي تشوفه ،‘ تعالي عمه ..


ساره وهي توقف باستغراب : ابشري جايه



بغرفة نوف : عمه ناصر يبغى يحاكيك داق مخصوص لك


ساره ودموعها كأنها جاهزه للانطلاق : وينه؟؟؟؟؟


نوف حطتها الجوال وطلعت من الغرفه ..


ساره : ناصر


ناصر : هلا والله بالغاليه .. كيفك يمه ؟؟


ساره تبكي : انت اللي كيفك وينك يمه تاكل تشرب وين تنام ؟؟


ناصر : هههههههه يمه ما تغيرتي يا كثر اسئلتك ههههههه لا تحاتين كل شي تمام والله كل شي تمام


ساره : تكفى يا ناصر ارجع والله اني تعبت وانا افكر فيك حالتي ما تسر لا العدو ولا الصديق ..


ناصر : يمه انتي اعلم بالحال ،‘ خلي الاوضاع تتحسن ،‘ بعدين اذا رجعت بتتأكد مقولة جدي (اني رجعت زي


الكلب) وانتي عارفتني يمه والله لو اموت ما ارجع الا وهو يترجاني



ساره تبكي بقوه : ناصر تكفى والله جدك يبغاك بس ما يدري وينك تكفى ارجع انت حتى على الجوال ما


تطلبني ياويلك من الله والله اتعبتني


ناصر وعورت قلبه امه : فديتك يالغالية لا تعملي بحالك كذا والله لو علي جيتك وجلست عند رجولك .. رمضان


وشو من دونك ؟؟؟ بس امهليني كم شهر



ساره : كم شهر ؟؟؟ والا كم سنه ؟؟؟ يمه انا ما اتحمل بعدك او بعد احد اخوانك تعوذ من ابليس واستسمح من جدك وارجع



ناصر : يمه لازم اسكر عطي الجوال نوف الحين واوعدك اني احاكيك عن قريب


ساره بدون حيله : ان شاءالله ،، ربي يحفظك يا رب



ساره تمسح دموعها قبل لا تطلع ..


نوف واقفه برا الجناح تسولف مع سعودي ،، اللي كل ما تشوفه تذكر ناصر .. اكثر واحد يشبهه سعد


نوف وقفت : باذن الله انه بيرجع ..



ساره : امين .. اقنعيه يمه نوف يرجع (مدت لها الجوال )



نوف استغربت ليه ما سكر الخط ؟؟: الو


ناصر : تدرين وش طرى علي ؟؟


نوف : وشو ؟


ناصر : جلستنا انا وانتي ونايف فوق بالدور الثالث فبيت جدي ..


نوف بصدمه : وش ذكرك فيه هالحين ؟؟


ناصر : وش فيك خايفه ؟؟


نوف : مو مسألة خايفة انت كل يوم تصدمني .. انا امس طلعت فوق لوحدي لأني تذكرت جلساتنا اللي مر


عليها سنين .. وانت الحين جيت تذكرني فيها فجأه !!!


ناصر :هههههه لأني مخاوي



نوف خافت : بسم الله علينا لا تجيب طاريهم اخاف وربي


ناصر : لانك هبله


نوف : ........


ناصر : وراك ما قلتي (يقلد صوتها ) ماني بهبله ؟؟


نوف خنقتها العبره : لان مافي وقت ازعل منك ..


ناصر عورت قلبه الكلمه : افا عليك.. الوقت قدامنا .. ازمه وتعدي يا نويف .. راح ارجع ان شاءالله واجلس انا وانتي في الحديقه


وتجي نجيد وتزعجنا .. واخطبك و املك عليك و اتزوجك ونجيب عيال وبزعل انا وانتي على اساميهم .. انا اقول


ابغاه سلمان وانتي تقولي ابغاه راشد وآخر شي تطلع بنت ونجلس نضحك على نفسنا



نوف ما قدرت تتحمل خانت وعدها وجلست تبكي : ........


ناصر بحزن : يا قلبي يا نويف انتي ما قلتي ما عاد تبكين .. وعودك ماهي مضبوطه


نوف : ...



ناصر : بالله عليك اول ما تسكري مني تروحي وتقري قرآن .. وسلمي لي على تبوله وروحي ارتاحي على شاني



نوف :...........


ناصر : وين ابشر ؟؟


نوف : ابشر


ناصر : تبشرين بالجنه ان شاءالله ،‘ ربي يحفظك مع السلامه


نوف : باي



:



/






في جناح خالد بالقصر ..


خالد : آه بس لو اقدر انفذ خطتي والله لأكون مبسوط ..


نوره وهي تغير ملابس ريتاج : يا كرهي لخططك يا خالد


خالد : انا ما قاهرني الا ابوي والا نوف اقدر عليها .. والله يا نوره ان هالصالح ما يتطوف .. لكن اختي حماره ..


نوره :اترك اختك وصالح وانزل لعمتك ساره تسئل عنك .. وجدتك تحت



خالد وهو يمسك يد فيصل : اشوى انك ذكرتيني والا كان سمعت خطبه تطفش




/


.
.





في القصر الكبيــر المليان بالاثاث الفاخر .. من اغنى العوايل في المملكه


الكل يحسب لهم الف حساب ،،


في الصاله الواسعه جالس صالح مع امه ..


ام صالح بكذب : والله مادري وش عاجبك فيها انا شايفتها بعرس شينه !


صالح : اكيد شفتي وحده ثانيه ،، اصلا يقولون ماشفنا زي جمالها .. !


ام صالح : المهم وش قالو ؟؟؟


صالح وهو ياكل عنب : للحين يفكرون


ام صالح بعصبيه : خييييييييييييييييير ،، يفكروووووووووو ؟؟؟ ليه ان شاءالله ؟؟؟


يحمدون ربهم صبح ومسا


صالح : اذكري ربك يالغاليه من حقهم ،‘ وترا شوفت النفس ماهي بزينه كلنا بشر ؟؟


ام صالح : وليه ما تشوف نفسك وانت احسن منهم بمليون مره ؟؟؟ شباب ونسب واخلاق واصل ومال !!


صالح : حتى ولو لهم الحق يرفضو او يوافقو ..


محمد : هاااااي


صالح : استح على وجهك !! على هالكبرر وتقول هاي ؟؟؟


محمد : السلام عليكم ورحمة الله وبركاته.. ارتحت زين كذا


صالح : والله انك مفهي .. هلا وعليكم السلام ارتاح



محمد : يا اني ما بقيت ولا مول ما رحت له تعبت آآآآآآآه


صالح يعدل جلسته : انت متى بتكبر يعني ؟؟؟ والله انك رايحن فيها .. اللي كبرك يدير شركات وانت ما تعرف
حتى تدير نفسك!!


محمد بتأفف : عاد بدا التجريح بالكلام ..


صالح: هههههههه تجريح بالكلام ؟؟؟ المهم يا تجريح اطلع فوق ازعجت امك بصوتك


محمد : اللي يسمعك يقول محمد عبده على غفله حتى انت صوتك مزعج ومره بعد



ام صالح : بس مو زي صوتك


صالح : هههههههههه وشهد شاهد من اهله


محمد : ابغى اتزوج يمه ،، اذا انتظرت صالح ماني بخالص !!


صالح : ومن قالك تنتظرني ؟؟؟ اختر اي بنت وانا مستعد اخطبها لك ..


محمد لما شاف المسأله سهله وجديه غير رايه : هاه ؟ لا بعدين بعدين


صالح ذكي وفاهم محمد .. اصغر اخوانه
(صالح + أحمد + محمد + هاجر )


هاجر هي الوحيده اللي متزوجه فيهم ..


/




/



ابو تركي : يا تركي افهم علي وانا ابوك .. معاشك لو توصل السحاب ماهوجايب لنا بيت


ام تركي وكنها تاخذ نصف الهم عن ابو تركي : ومتى نسلم البيت يا مبارك ؟؟


مبارك : معنا رمضان كله ..


تركي : نعم ؟؟؟ رمضان ؟؟ ومن متى تعرف يبه ؟؟


ابو تركي : والله يا تركي تو ما نزلو قرار تقاعدي واللي يتقاعد لزوم يطلع من البيت بعد مهلة شهر


منيره : ما عليه الله يسترها ان شاءالله ..


ابو تركي ساكت يفكر وش بيصير لهم


وتركي جلس يقلب السالفه يمين وشمال حتى لو ياخذ قرض ماراح يقدر عليه ولا راح يسمحو له فيه !!لا
حول ولا قوة الا بالله ..


انا منهو حمل همّه على راسـه تقـول عقـال!
مجاديف الزمن دارت عليه ونَسّـف الغتـره!!


وانا منهو فقد صوته وبعض الصوت بـه مـازال
دعيـت الله يفرّجهـا علـيّ وبحَّـت النبـره


/


/


/


الغرفه مليانه ملابس متناثره .. والدولاب مفتوح للآخر ..


ساره : الله ياخذ عدوك ان شاءالله .. ليه كذا ؟؟ من بيزينهم ؟؟؟


الجوهره : اففففففففف ساره انا ازينهم بعدين بس تكفين ساعديني وش البس ؟؟؟


ساره : طيب اخذتي اذن من ابوك والا تركي ؟؟؟


الجوهره : حاكيت تركي و قلت له صديقتي عندها حفله للبنات وعزمتني وقال اوكي .. هو يعرف اخوها ..


ساره : البسي هذي والله حلوه


الجوهره : لا وع شافوها علي . .. وش رايك بهذي ؟؟


ساره : هذي بعد حلوه .



/



نجود نايمه فبيت نوفه


بتول : هاي نجود


نجود: هايات


بتول : كيفك ؟


نجود : بخير .. وش هالذرابه العاده ما تسلمين تدخلين على طول في الموضوع


بتول : انتم ما يعجبكم شي .. !! اقول من الاخر تجين معي لبيت صديقتي ؟


نجود بتعب : والله مو بقادره يا تبوله والا انتي عارفتني اجي معك عادي بس والله تعبانه


بتول : عارفه وربي ،، اجل بتصل بنويف ..


نجود : لحظه اخليك تحاكيها ؟؟


بتول : ليه هي عندك ؟؟؟


نجود : انا اللي نايمه عندها ،، لحظه ؟ نووووووووووفه


نوف توها ماخذه دوش : هلا


نجود : تبوله تبغاك


نوف : اهلين تبوله .


بتول : نوفه حياتي ابغى اطلبك طلب .. لا ترديني ..


نوف : انتي تامرين..


بتول : ابغاك تجي معي لبيت صديقتي عامله حفله صغيره ..


نوف : حفله برمضان ؟؟؟


بتول : لااااا مافيها رقص واغاني ،، جمعة بنات ..


نوف : اها .. من عيوني ..


بتول بفرح : تسلملي عيونك فديتك



/





نجود مستغربه : توك تعبانه وظهرك يعورك !!


نوف : وليلحين هو يعورني ليه ؟؟؟؟


نجود : اجل ليه وافقتي تروحي معها ؟؟ لانها اخت ناصر .؟؟


نوف : لا والله لانها بتول ..


نجود : طيب بكره اجلس لوحدي يعني . !


نوف : عندك لموووو .. والبنات ما حـ نطول .




/



..... : يبه تكفى اسمعني لو مره وحده لا تخليها تغير لك رايك ..


ابو خالد بصوت عالي : خالد !!!! هالموضوع انهيناه سكره .


خالد :الله يطول فعمرك هذا صالح .. اكبر ملياردير .. انتم علامكم يا ناس محد فاهمني ؟؟


ابو خالد : انا اكثر واحد فاهمك يا خالد .. ابعد عن اختك لا تشوف شي ما يسرك


ابو خالد فجأه جلس على الكرسي ..


خالد : وش فيك يبه ؟؟


ابو خالد : ولا شي بس دوخه خفيفه تجي وتروح ،، (يوقف ويروح لغرفته) مثل ما قلت لك لا تتدخل باختك





/


/





.


اليوم اللي بعده مر بسرعه .. افطرو الناس وجلسو مع بعض يتقهوو ويحلو


نوف طلعت للصاله لابسه وكاشخه وتبغى تمر بتول ويروحو لبيت صديقتها



خالد يناظر فنوف من فوق لتحت : وين ان شاءالله


ابو خالد : ارتكها ماخذه الاذن مني


خالد : وش هالبهرجه ذي كلها طالعه مع سايق ولوحدها ؟؟؟


نوف بحقد : فيك الخير ودني انا وبتول لبيت صديقتنا


خالد : نوف احترمي نفسك واعرفي من تحاكين


ابو خالد : وش فيك خالد اختك شقالت ؟؟؟؟


خالد يزين ثوبه النوم .. : ما تطلع كذا مع السايق وانا ماني موديها


ابو خالد : انت فيك شي ؟؟؟؟ شارب شي ؟؟؟؟ الحين انا موافق انت وش دخلك بعدين اختك تحط غطا على
وجهها وش لك فيها ؟؟؟ وراح تمر بنت عمتها على طريقها


نايف توه داخل : علامكم ؟؟؟


نايف افطر عند صديقه وتوه داخل ،، استغرب ان نجود جالسه عندهم !!!


نايف وهو يحط مفتاح سيارته ومحفظته على الطاوله ويجلس : وين نوفا ؟؟ الله الله وش هالحلا ؟؟



نوف : عيونك الحلوه ،، رايحه مع تبوله لبيت صديقتها ..


نايف : اوديك ؟؟


ابو خالد : الله لا يهينك يا نايف ،، ما تقصر بس ارتاح .. نوفه روحي مع السايق .. ولا تبطون علينا


نوف : تسلم نويف ،، ابشر يبه باااي




/


نايف : كيفك نجود ؟


نجود ماهي قادره تناظره : طيبه الحمد لله


نجود انحرجت واستأذنت تطلع فوق عند الماس