الفصل الثاني
نوف وهي نازله من السياره بعبايتها الفخمه و بجمالها الساحر الواضح حتى من تحت الغطا
نوف فقلبها : هذي سيارة نصور ،، يعني هو هني .. معقوله ليلحين راقد !!
الماس بصوت عالي : نووووووووووووف علامك متنحه ؟؟ منتي بصاحيه ؟؟
نوف وعيونها طايره من الصدمه : لموووووو وجعه ليه قاطه الغطا ؟؟؟
الماس : والله احسب عندك سالفه مشي بس امشي
فتح الخادم الباب لهم ودخلو وهم في الحديقه صادفو سالم
نوف وهي تقط الغطا وبصوت خفيف : لمووو ارتحتي هذا سالم
الحين ما نخلص بيسلم علينا سلام سنه كامله يا كرهي له وبس
الماس : هههههه وجعه لا يسمعك ،، انا ما اطيقه بس الشكوى لله محسوب علينا ولد عمه
سالم عار ف انها ما تطيقه بس وش يسوي القلب وما يهوى :
هلا وغلا والله حي الله نوفه ولمووووو
الماس : وع يا شين اسمي بفمه كرهت دلعي وع وع
نوف بصوت ناعم مره : هلا فيك يا سالم كيفك؟
سالم : بخير دامك بخير بشرينا عنك ؟
نوف : أبد كل شي تمام ،، يلا حنا بندخل جوا تآمر على شي ؟؟
سالم : وليه مستعجله ؟؟
الماس : اقول انا طالعه باااااااي
نوف : الماس لموووووووو
سالم : افا مو عاجبتك الوقفه معي ؟؟ ترا ما اعض
نوف بضحكه بارده ودها تخنقه ودها تذبحه وتعلقه : لا شدعوه بس البرد برا ذبحني
سالم ويفتح عيونه : افا بنت عمي بردانه بعز الصيف ؟؟؟ على العموم حياك حياك ارحبي
نوف : والبقى يا سالم لا هنت ياخوي
سالم فقلبه أخوك ؟؟؟ : حياك حياك
وبهالوقت هذا ناصر واقف على الشباك ومربع يدينه ويناظر فنوف وسالم اللي صارلهم ساعه يسولفون !!
نوف دخلت ولقت بتول واقفه سلمت عليها وبتول طبعا عارفه انه سالم محد يبلعه من البنات لانهم عارفين حبه للبنات وهم يكرهوون هالنوعيه وخاصه نوف ونجود
بتول : سالم ما كنت تبغى تطلع من شوي ؟؟؟
سالم : ها ؟ مدري حسيت ا ني تعبان شوي ،، ابشوف لي بندول والا شي والله مدري شكلي ماني بطالع
نوف : اقول بتول وين البنات ؟
سالم يحب يشوف نوف ويسمع صوتها ويحب المكان اللي تكون
فيه مع انه عارف ان اخوه يعشقها بس ما يدري ليه يعمل كذا
دايم يقول انا مالي دخل بـنوف لازم انساها بس من يشوفها
ينسى كل كلامه جمالها يجذبه والبحه اللي في صوتها تنسيه كل شي
بتول : فوق اطلعي لهم انا جايه
نوف : يلا لمووو
//
وهي طالعه من الاصنصير طلع فوجهها ناصر
ناظرته من فوق لتحت وكان لابس ثوب النوم وشعره مبهذل
وحاط يده بخصره ورافع حاجبه وباين عليه الاستغراب
ناظرته واتركته ومشت
وقفها صوته اللي باين انه قاعد من النوم : نوف ؟؟
نوف التفتت له برزتها : هلا !!
ناصر: ما انتي قادره تسلمين علي دقيقه وصارلك ساعه جالسه
مع سالم ؟؟؟ ها ؟؟
نوف : ما اظن فيها شي لما اكلم سالم ،، ولد عمي وحسبت اخوي العيب اني اكلم ..... والا خلني ساكته ازين
ناصر : ايه اكلم ؟؟ كملي يا نوف ؟؟
نوف : ولا شي
ناصر : ولا شي ؟؟؟؟؟؟؟؟ تراك زودتيها يا نوف سكت لك امس
لاني تعبان ،، والله ماتروحي الا وانا عارف السالفه وانا حلفت
بالله
نوف وهي مقهوره ماسكه بطرف عباتها : ناصر رجاءا لا
تخليني اقول كلام انا ما ابغى اقوله !!
ناصر : انا حلفت وانتي تعرفيني لما احلف ،، ما طلبت منك شي صعب ابي اعرف وش اللي مغيرك علي من يوم الحفله ؟؟
وش اللي تغير يا نويف ؟؟
في بيت مبارك ابو تركي
ساره تصلي العشاء وبجنبها الجوهره تدرس
ابو تركي : تركي يااااااا تركي
تركي : هلا يبه سم
ابو تركي (مبارك) : سم الله عدوك انا ابغاك تقهوى معنا عشان نطلع نصلي
تركي : ابشر بس وين عزيز والبنات ؟
ام تركي (منيره ) : عبدالعزيز ؟؟؟ الله يرحم حاله ماهو عاجبني هالولد
ابو تركي ينزل فنجاله : ليه عسى ما شر وش فيه ؟
ام تركي بقلة حيله : ولا شي بس اشوفه تعبان بس ما يعلم احد .. !
ابو تركي : لا لا ما عليه شر ان شاءلله ،، هذا اسد والاسد ما ينخاف عليه
ام تركي : الله يحفظه ان شاءالله
تركي : انا طالع للبنات اشوفهم من امس ما شفتهم
//
الجوهره : من ؟؟
\تركي : انا تركي
الجوهره قفزت من مكانها : هلا وغلا باخوي حبيبي
تركي بابتسامه ساحره : هلا فيك وينكم انتم ما تبانون ؟؟
الجووهره : والله ياخوك مشاغل هههههههههه
تركي : هزلت اللي الجوهره تنشغل هههههه
ساره : والسلام بس للجوهره ؟؟
تركي : لا والله بس اشوفك تصلين كيف الدوام معك ؟؟
ساره : الله لا يوريك ياخوي ،، مابقى فيني الا شعره وشكلها بتنقطع
تركي : افا ،، تساهيل باذن الله
ساره : الا انت وشلونك مع الشركه ؟ ليلحين ما رقوك ؟؟
تركي يتنهد : مايندرى عنهم بهالشركه ،، اللي يتعب ويكد يظل
مكانه واللي ياخذ لقمته بالحرام وهو راقد فبيتهم تجيه الترقيه وهو مرتاح ،، ماينعرف لهم !!
ساره : والله انك تستاهل تصير مديرهم كل الشغل فوق راسك ،، الله يعطيك على قد نيتك ياخوي
تركي يوقف : انا نازل اصلي بدكم شي ؟
الجوهره : هههههههه والله وقمنا نحكي سوري وش السالفه ؟؟
الجوهره بخبث : معكم سوريات في الشركه ؟؟
تركي : هههههههه هبله انتي ؟؟ الا قولي الربع كلهم سوريين وفلسطن
الجوهره : اها اجل ما بدنا شي خيي اتيسر ،، لا اله الا الله
تركي وهو يضحك على خبال اخته : هههههههه محمد رسول الله
//
نوف : يا ناصر خلني اطلع للبنات والله مو حلوه بحقي
ناصر : نوفه يا قلبي انتي ابغى اعرف السالفه
نوف وتعمل حالها زعلانه : لا تقول يا قلبي
ناصر : طيب ،، قولي وش السالفه يا بنت خالي !!
نوف تبغى تخرب السالفه وتفك نفسها من هالهم : افففففففف دامك تبي تعرف ،، ابيك ما تعصب
ناصر : اعصب على ايش ؟؟ احكي
نوف : انا سمعتك لما كنت تحاكي خويتك اقصد البنت والله مدري وش اسميها بس ... ( دمعت عيونها)
وهي تقول فقلبها : لا يا نوف لا تبكين يا هبله لا يصير قلبك خبل امسكي نفسك وسوي نفسك مو مهتمه )
ناصر باستغراب : انا اكلم بنت ؟؟؟ متى ؟؟؟ وين طيب ؟؟
نوف : ناصر خلاص انت بتعرف السالفه وعرفتها خلاص عاد
ياربي منك
ناصر وهو معصب مره شوي ويذبحها ( قرب لعندها ) وقال :
لا تخليني اضربك هني تكلمي نفس الناس يا نويف انا من متى
احاكي بنات انتي اكثر وحده عارفه اني ما اشوف بهالدنيا كلها الا بنت وحده ! ومحد مالي عين ناصر الا هي .. ! كيف تبغيني احاكي غيرها
؟؟؟
نوف انحرجت وبدلع قالت : انا سمعت باذني كيف كنت تحاكيها وتقول لها حاضر يا حبيبتي كل شي بيوصلك عند باب غرفتك انتي بس خليك مرتاحه
ناصر راحت عقدت حواجبه وضحك بقوه : هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه ههه
نوف فتحت عيونها ومسحت دموعها وجت تبغى تطلع للبنات
وناصر ماسك ضحكته ويعدل شعره : هههههههههههههههه تعالي يا هبله والله انك خبلتيني معك هههههههههه
نوف تتخصر : ناصر جاي تتمصخر علي انت ؟ وش اللي يضحكك
انا الغلطانه اللي واقفه معك
ناصر : والله ما اتمصخر افا عليك بس انا اتمصخر على نوفه ؟؟؟
ناصر وهو حاط يده على الباب : اللي كنت احاكيها امي ههههههه والله امي
نوف : امك تقول لها حبيبتي ؟؟؟
ناصر ويطالع نوف : اي والله واقولها عمري وحياتي وروحي وفيه اغلى من امي ؟؟؟؟ لا لا امي لا تغارين منها لانك بتتعبي ههههههههههههههههههههه
نوف ودها الارض تنشق وتبلعها : ومن قالك اني اغار عليك ؟؟؟ انا اصلا بس حبيت انصحك
ناصر كسرت خاطره انحرجت مره
قال لها وهو يحك خده : ايه ايه صح صادقه اهم شي النصيحه الله يجزاك خير (ماقدر يمسك ضحكته)
نوف خلاص وصلت للآخر : خذت جنطتها وركضت لغرفة البنات وهي معصبه
راحت وهي تسمع صوت ضحكات ناصر باذنها ليلحين ماراحت
انحرجت بس ارتاحت هم وانزاح عن قلبها
يااااااي يا نوفه شكاكه مره ،، تدرين ناصر يحبك ليه تدخلي الشيطان بينكم ؟؟
نجود قاعده على الصوفا : ما بغيتي تجين !! جايه تشوفينا والا تشوفين نويصر ؟؟ مالت بس مالت
نوف : الاثنين كلكم غالين
نجود بصوت خفيف : تصالحتو ؟والا غسلتي شراعه ؟ ههههه
نوف عصبت : وجعه هذا ناصر ،، تصالحنا وطلعت فاهمه غلط
نجود انصمت : جد ؟؟؟ تعالي الصاله الثاني ابي اعرف السالفه تكفين
نوف : عيب مو بألحين انتظري ليما ارجع البيت واكلمك عالجوال فشله بتول موجوده وحنا رايحين نسولف
بتول وهي داخله : ياويلي على اخوي
نوف خافت : من هو ؟؟
بتول : هههههههه ياويلي على اخوي بيروح من يدنا
نوف : وجعه
نجود : ليه وش فيه ؟؟؟؟
بتول : نويصر طالع يغني ويضحك مدري وش فيه ،، لاااا ،،تدرون وين الصدمه ؟
نوف تسمع باهتمام
الهنوف وهي تاكل فستق : وين ؟؟؟ ?
بتول : قلت له ناصر : قالي هلا يا عمري
نوف : ههههههههه وانتي وش قلتي له؟
بتول : من الصدمه رحت وتركته مدري وش كنت ابغى منه !!!
العنود : يازينه ناصر والله محظوظين فيه ياليته اخوي آآآآآآآآه
نوف : وجعه يا عدوها وش آه انتي ؟؟
العنود : يووووه عاد جبتو طاري ناصر ؟؟؟
نوف : اقول تبوله حياتي جيبي الفيلم خلينا نشوفه احسن من القعده مع هالبزارين
العنود : هالبزارين اللي ماهم عاجبينك بيشوفون معك الفيلم
نوف : ياااااااكرهك
بتول : هههههههههههههههههه
//
^
^
أسئلك باللي خلق قلبك اكرهني
في بيت الجد سامي
سامي : والله يا راشد ما ودي دانه تاخذ من برا العايله كافي خالد اخذ وحده ماهي منا
خالد : يا جدي انت تروح وترجع لهالموضوع ،، خل كل واحد ياخذ اللي يبيها لا تغصبونهم الله يطولنا
فعمرك
سامي وهو يكح : لا .. انت خربت كل شي لا تعلمهم على العصيان نايف موافق وما عنده مشكله
ياخذ دانه
ابو خالد : خالد انت مالك دعوه اترك كل شي على جدك ،، وما اظن احد بيعصيه
خالد : طيب انتو وش دراكم ان نايف يبي دانه ،، ليه ما يكون يبي يتزوجها بس عشان يرضيكم ؟؟؟
ابو دانه : أفا يا خالد ليه وانا عمك دانه فيها شي يعيبها ؟؟؟ والا ما هي بالعين شي ؟؟
خالد وهو يقوم يبوس راس عمه : لا لا يا عم وش ذا الكلام والله ان دانه مثل اختي ،، والكلام هذا
اقوله حتى لو واحد من عيال عمتي بياخذ نوف والا الماس الله يسامحك بس
ابو دانه : خلاص اجل لا تدخل وتقوى شوكتهم علينا
خالد : طيب ابغى اسألك بالله عليك يا عمي دانه عارفه انها لنايف ؟؟
ابو دانه : اليوم مادرت بكره تدري
خالد تضايق : شفتو ؟؟ لا تلومونهم اذا تطلقو بعدين ،،
سامي : يا خالد للمره المليون اقولك لا تدخل ،، لا تحسب اني تاركك تكلم يعني معطيك الضوء
الاخضر ،، لا ،، ترا ان فتحت فمك عند نايف والا دانه صدقني ماراح يصير طيب
خالد : ماني متكلم لا عندكم ولا عندهم بس تذكرو حكيي بعدين
انا طالع فمان الله
وهو طالع خالد من بيت جده صادف نايف اخوه داخل
نايف : وين وين اذا حضرت الشياطين ذهبت الملائكه ؟؟ وين يا بو فيصل
سامي ياشر لخالد يخرج: خله خله يقول ما شاف عياله من مبطي تعال انت بحاكيك
خالد قرب عند نايف وقال : الله يعينك يا حرم دانه استلم
نايف عرف السالفه ودخل الصاله
وبهاللحظه جت جدتهم سلمى وسلمو عليها وجلست معهم
نايف : سم يا جدي وش بغيت ؟
سامي: نايف وش رايك فدانه بنت عمك؟
نايف ماعنده مشكله ياخذ دانه او غيرها لان من كثر ما كانو يضغطون عليه
ويقنعونه بدانه سلم للامر الواقع وصارت دانه واقع لا مفر منه
نايف التفت لعمه ابو دانه : والله يا جدي دانه يكفيها انها بنت عمي فواز ،، فيه احد ما يحب القرب منه
ابو دانه : الله لا يهينك يا نايف والله انك رجال ابن رجال
نايف بغصه : الله يسلمك انا والله جاي اسلم واطلع تامرون على شي ؟؟
الكل : سلامتك
نايف وهو طالع لبيته يمشي .. فكر بمستقبله وحياته مع دانه كيف بتكون ؟؟
كان يفكر ويقول ياليتها نجود على الاقل اعرفها من سوالف نوف عنها ومن
مدحها لها ودمها الخفيف وجمالها وحب الكل لها ويقول ياليتها حتى بتول
على الاقل اخت سالم وناصر والكل يمدح فيها
بس ليه دانه بالذات ؟؟ وانا ما اسمع عنها الا كل شين ،، شايفه حالها رغم
بساطة شكلها ،، ما ترضى بالقليل لو ايش كان
..................... سمع صوت سياره وخالد جوا
راح لعنده وهو متضايق : وين على الله ؟؟
خالد : رايح اجيب خواتك من بيت عمتي ،، وشكلي بجيب بنات عمي فواز معهم
نايف : الساعه 12 والله انهن مفهيات
خالد : لا عادي سامح لهم الوالد
نايف : يلا اجل سلام انا طالع ارتاح
خالد وهو يحرك : سلام
//
قصر ابو سالم
نوف و الماس ما يعرفون ان اللي راح يرجعهم للبيت خالد والا كان مافكرو يخرجو من بيتهم
اول ما سمعت نوف صوت جوالها اغنية عبدالمجيد عبدالله ( روحي تحبك )
قفزت من مكانها : ه ه هلا خ خالد والله ابوي سمح لنا والحين نرجع والله الحين
خالد : بسم الله عليك وشفيك ؟؟ عارف انا جاي اصلا اخذكم 5 دقايق وانزلو انتو وبنات عمي فواز ( وسكر الخط فوجهها)
نوف وهي تناظر فجوالها والبنات يناظرونها : خالد
الماس تخرعت : شيبغى ؟
نوف : يقول انلزو بسرعه اقصد انزلو بسرعه آه يا بطني
نجود : ههههههههههه تستاهلون يا ليتني اشوفكم معه والله احلى منظر ههههههههههه
نوف : تضحكين ها ؟؟ نسيت اقولك انتو بعد ويانا ههههههههههههه
نجود : تخسين روحي بلحالك ،، والله لو اموت ماروح معه هذا معقد يخوف يمه
نوف : اخلصي ترا وربي معصب مره وكأن وده يقتل احد
نجود : يمه لا والله مالي دعوه اصلا انا ابغى انام عند عمتي اليوم صح تبوووله ؟
بتول : يا عيون بتول صح مالومك والله
نوف : والله انا قلت لك وانتي كيفك ،، ان هاوشني يا ويلك يا نجيد
نجود : والله مشكلتك اخوك وانا وش دخلني اذا هو على اي شي تافه يعصب
الماس تصايح تحت : نوووووووووووووووف يا نوووووووووووووووف ياويلي بتجيبلي الجلطه هالبنت
ناصر وهو ماسك الكابتشينو : وشفيك تصايحين كذا احد ميت لك
الماس : اف كملت ،، خالد برا وهذي تسولف فوق ياويلنا
ناصر : تبغيني اطلع اقتله ؟؟
الماس : اسمالله على اخوي ،، عشان اذبحك انا
ناصر : ما تقدرين نوف ماهي مخليتك
الماس : ويلي يالثقه والله مصدق عمرك ،، اللي يسمعك يقول اختي ميته عليك
نوف نزلت تركض ولما شافت ناصر عصبت ما تبغاه يشوفها بهالشكل وهي خايفه
نوف ومعها الهنوف والعنود : يلا يا بنات
ناصر ما شال عينه عن نوف : نوف والله لاذبح اختك خليها تسكت ترا حكيها يجيب الضغط
نوف وهي تلبس شيلتها : وش قالت ؟
ناصر وهو يطلع معهم للحديقه اسأليها في البيت أنا اوريك يا لمو
نوف : ياويلي يا ناصر من خالد والله يذبحنا
ناصر : والله مدري ليه معطينه اكبر من حجمه تراه يخاف من الفار
نوف : ناصر ؟؟؟؟ هذا اخوي
العنود : احلفي انه اخوك ؟؟
الهنوف : ومحد رافع ضغطنا بالعيله الا هو الله......
الماس : الله وشو ؟؟؟؟
الهنوف : الله يوفقه
ناصر : الحين اوريكم فيه
خالد ينزل من سيارته ويسلم على ناصر
ناصر : يا هلا بولد الخال ارحب ارحب قهوه شاي ماي عصير عيش
دجاج تفاح موز
خالد وهو يسلم عليه : تنكت انت ووجهك ؟
ناصر : لا والله بس وش فيك ماعاد تدخل بيتنا حتى امي زعلانه عليك
خالد وهو يأشر لنوف والبنات يركبو السياره : والله يا ناصر ناوي اجيكم
بس الشكوى لله الوقت ما عاد يمدينا
ناصر : ما عليه الله يعينكم ،، وراك مخوف البنات وش عامل لهم
نوف في السياره وحاطه يديها على راسها : الله ياخذ عدوك ياناصر
فضحتنا
الماس : هذا ما ينقال له شي فضيييييييحه
العنود : ياويلنا
خالد وهو يشعل زقاره : ليه مشتكيات لك ؟
ناصر وهو يناظر فنوف : لا .. بس نوف من شوي بغت تطيح على
وجهها.. احساس وانا اخوك
نوف : مالت عليك انا انزل اقتله ؟؟
الماس : القتل شوي عليه
خالد : آهآ لا لا ماعليه ــ ماتبغى تخليني انتظر
خالد بصوت عالي : نجود ودانه وينهم ؟
نوف بصوت ناعم : دانه ما جت ونجود تبغى تقعد عند بتول
خالد : ما اسمعك ؟؟
نوف : الله ياخذك يا ناصر لازم تجي ؟؟
الماس : انسي الذرابه شوي وعلي صوتك لا يجي ،، تر كل ما يقرب تتلف اعصابي
العنود : ابعدي ابعدي ،، (بصوت عالي يفجر الاذان ) دانه ماجت ونجود تبغى تقعد عند بتووووووووووووول
خالد ناقد عليها : طيب قصري حسك سمعنا سمعنا
العنود : ما تستاهل مالت على اختك
نوف : وجعه انا وش دخلني
العنود : مهوب انتي اقصد لموووو
الماس : جعل تريلا تدعسك يالخايسه وش فيك حاطه دوبك من دوبي يالسوسه
نوف : اسكتو اسكتو جا خالد
خالد وهو يناظر في الهنوف : اطلعي يالعنود ناديها .. بسررررررعه
الهنوف وهي ترتجف : بس انا مو بالعنود
خالد بصوت عالي ويحذف الزقاره : وانا وش دخلني ووش همني ؟ انزلي
ناديها لا اصعد لها .. تعرفي كيف ؟؟ ناصر اصعد نادها لو ما عليك امر ...
ناصر : ابشر ،، فمان الله
خالد : فمان الكريم
//
ناصر : نجوووووووووووووود ( هههههه)
نجود من فوق تطل على ناصر : هلا
ناصر : جاك الموت ياتارك الصلاه ،، خالد يبغاك هههههههههه ماعنده
بنات ينامو برا بيتهم
نجود : وهو وش دخله ؟؟؟ ابوي هو والا اخوي
ناصر : وانتي الصادقه ولد عمك اخلصي تراه معصب
نجود : اففففففف والله بيجلطني هالخالد
//
وبالسياره ماصارت مواقف لان السياره كان يعمها الهدوووووء حتى الهمس معدوووووووم
ما يسمعون الا صوت محمد عبده وبس
..
يوم الجمعه الساعه 2ونص متجمعين عايله ابو تركي (مبارك) على الغدا
غدا زي كل يوم رز ودجاج ،، غدا بسيط بس كان الكل يجتمع حوله ومحد يتأخر
ابو تركي ،، وام تركي ،، وتركي ،،وساره ،، وعبدالعزيز ،، و الجوهره
سوالف وضحك ما تخلص .. اما منيره ام تركي تعمل حالها مو مهتمه انها تيتمت رغم وجود امها وابوها
عايشين ابوها التاجر الكبير وامها الطيبه الحبيبه كل ما تذكرهم يبكي قلبها من الحرقه ما تدري ليه ابوها
عمل زي كذا ،،
معقوله ابوي يكرهني ؟؟ الله يسامحه والله اني مسامحتهم كلهم من كبيرهم لصغيرهم ،، قامت فجآه عن
الغدا وطلعت غرفتها حتى بدون لا تغسل يدها وجلست تبكي ( دموع بدون صوت )
حسو فيها بناتها وراحو لها
الجوهره : افا يمه والله دموعك غاليه علينا لا تعذبي نفسك كذا
ساره ماهي قادره تخفف عن امها ان حكت بكت معها وهي ما تبغى تزيد المها
الجوهره بابتسامه وهي تضم امها : انتي لا تفكري فيهم انسيهم مثل ما نسوك
منيره (ام تركي) تزيد في بكيها : ومن قالك انهم نسوني انتي وش دراك .. اللي يحب ما ينسى وانا بنتهم
كيف تبغينهم ينسوني
الجوهره : قوليلي طيب وينهم ؟؟ عمرهم سألو عنك ؟؟ حتى في الاعياد ما ينشافون ؟؟ اصلا انا ما اعرف
اشكالهم الا بناتهم من كلام الناس عنهم ؟. كيف يكونوا اهل ؟؟؟؟
ساره : خلاص يا الجوهره نبيك عون صرتي فرعون يا تقولي خير يا تسكتي
الجوهره : يا ساره انا اقول هالكلام والله عشانها ،، لي متى بتشيل فقلبها وتكتم اللوعه ،، تراها تعبت وهذا
مو بزين لصحتها تراها بشر وتحس
منيره ام تركي : الجوهره كل هالكلام اللي قلتيه والله عارفته يابنيتي بس وش تسوين بقلب مره ماشافت
امها من 30 سنه ؟؟ ماشافت اختها واخوانها من 30 سنه ؟؟ وهم بمنطقه وحده ماهو ظلم ؟؟؟
الجوهره : اذا بنجي للظلم فهو ظلم ،، وكبير بعد لكن مهو بأنتي اللي قلتي شوفيهم بالجامعه واتركيهم ورا
ظهرك ؟؟ لا تحاكينهم ؟؟ وبتسمعين كلام يالجوهره وطنشي ؟؟ يمه تبغيني اطنش وانتي بكبرك ترشين ملح
على الجرح ؟؟؟
ساره : تراك زودتيها امي تقول كلمه وانتي تردي بعشر ؟؟؟
الجوهره : انا كرهتهم مع اني ما عرفتهم بس اللي يحرق قلب امي انا اكرهه وابغضه حتى لو هو فيه خير
والا فيه احد ينسى بنته 30 سنه ؟؟ وين عايشين سوالف افلام ؟؟؟
منيره : اتركيها يا ساره والله انها صادقه
اعذريني يا بنتي
الجوهره وعينها مليانه دموع بس ما نزلو : خلاص يالغاليه اذا منتي بقادره تنسينهم ،، تناسيهم غصب ،،
وعيشي حياتك ،، فيه ناس يتمنو يشوفو ابتسامه منك وعايشين من شانك الله يسامحك بس
منيره ابتسمت : الله يحفظكم لي روحو كملو غداكم
الجوهره تمغط : انا شبعت الحمد لله بروح اناااااااااااااام واقوم اكمل مسلسلي
ساره : اي مسلسل مهو امس اخر حلقه ؟؟؟
الجوهره : ياويلي عنك تحسبه 30 حلقه ،، الناس توها في البدايه ،، هذا مسلسل تركي
ساره : والله احسبه عبدالعزيز
الجوهره : وع لا تنكتين مره ثانيه ،، احسك خبله هههههههه
ساره تناظر باختها : ههههههههههه والله انك نذله اضحكي لو مجامله
//
نايف : الو
بتول : هلا
نايف : هلا بتول ،،
بتول : من نايف ؟؟؟
نايف : ايوه ،، كيفك
بتول : تمام ،، كيفك انت والبنات
نايف : والله كل شي تمام
بتول : آمر وش بغيت
نايف : ناصر ادق عليه ما يرد ولا 10 مكالمات
بتول : ايه هو في الملحق مع العمال ،، يمكن ناسي جواله ،، انا ابلغه
نايف : الله لا يهينك ،‘ ُ سلآم
بتول : باي
//
بتول تنادي اخوها الصغير : سعوووووووووودي
سعد : نعم يا مشكلتي في الحياه
بتول تفتح عيونها على كبرها : هاه وش قلت ؟؟ من وين سامع هالحكي .. جد ما في حيا
سعد وهو ياخذ له كم نظره على التلفزيون خطافي وكنه مافيه صبر : يوووه دايم اسمع ناصر يقولها لك
بتول : طيب اسكت اسكت ،، هاك هذا جوال ناصر روح وده له بالملحق
سعد : يوووو يا بتول ما تشوفي الخدم عندك ؟؟ ابغى اكمل كونان
بتول : كونان ماهو بطاير بعدين ناصر مايحب احد يجي جواله
سعد : طيب بس لا تعيديها مره ثانيه تراي مشغول بالببايات
بتول : فديت اللي يتابع كونان انا يلا روح بسررعه وقوله ترا نايف داق عليك
/
/
بالملحق
:
سالم : وين يابابا انا قايلك ما ابغى هالترخيم كيف تسمع انت ؟؟
العامل : واللهي حضرتك انت قلت كده امبارح !
سالم : يا كذبك يا مصطفى أبك متى قلته انا ؟؟ اصلا البارحه كله ما شفتك ،، ياخي كذب كويس والا لا تكذب
العامل : حضرتك انا حعملك اللي انته عايزه ولا يهمك
سالم : لا يكثر شوف شغلك
ناصر وهو ماسك انواع الخام للستاير : سالم انا طالع اوريهم امي وبتول عشان يختارون الالوان
سالم : لا تأخر ترا دايخ وابغى انام
ناصر : ابشر
//
ناصر : انت يالنتفه وين امي ؟؟ وش ذا اللي معك ؟؟ هذا جوالي !!!!!!!!!1
سعد : ايه تقولك بتول نايف يتصل فيك ماليوم
ناصر : وبتول وش دخلها ها ؟؟ وش له تفتح جوالي ؟؟؟
سعد : وانا شدراني روح اسألها انا بروح لكونان
ناصر : كونان !! الله يخلف على اهلك
بتول في غرفتها تعمل ميك أب صديقاتها بيجون البيت
ناصر بعد ما طق الباب : بتول من سمح لك تفتحي جوالي
بتول : وانت من سمح لك تدخل قبل لا اسمح لك ،، يمكن كنت البس ؟؟
ناصر : لا تغيري الموضوع
بتول : وانت كل شي لازم تكبره !! يا انك شكاك يا ناصر الله يعين امرتك عليك
ناصر : وش دخل مرتي في الموضوع ردي على سؤالي
بتول وهي ترجع تكمل مكياجها : ناصر اتصل في البيت وقال ابغى احاكي ناصر ضروري ورحت
خليت سعد يوصله لك فيها شي ؟؟
ناصر : آهآ .. قولي كذا من الاول ..
بتول : طيب سكر الباب معك لو سمحت
ناصر وهو يجلس على السرير : هلا نايف السموحه ياخوي توها قالت لي بتول
... ايه ايه خلاص تم ,, اشوفك بالمزرعه ان شاءالله سلم سلم
بتول بصوت مو مسموع : افففف يقعد بدون استاذان ويدخل بدون استاذان مدري كيف عايش ؟؟
ناصر : وش قلتي يا تبوله ؟؟
بتول : هاه ولا شي اقول ابي خصوصيتي شوي
ناصر: يا كبر الكلمه بفمك ،، لك جناح خاص فيك وامي وابوي مدلعينك اخر دلع وش اكبر من هالخصوصيه بعد !!
بتول: وانت وش قاهرك ؟؟
ناصر : على طاري نوف ،، ما حاكيتيها اليوم ؟ وينها اشتقنا لها
بتول وسعت عينها : اولا من جاب طاري نوف ،، ثانيا متى امداك تشتاق لها توك شايفها البارحه
ناصر : ما قلتي من شوي الله يعين مرتك عليك ؟؟ اكيد تقصدي نوفه ؟؟
بتول : ياااي على ثقتك ياخوي من قالك ان نوفه لك ؟؟ تحسب ابوي وعمامي بيتركونها لك ؟؟ نوف عندهم
صفقه وساعتها ماهم سامعين كلام البزارين
ناصر عصب : بزارين بعينك ،، عطيتك وجه الظاهر ،، بعدين وش سالفة الصفقات بنوف ؟؟ ها تكلمي بسرعه
بتول : اسمع ناصر انا ما احب اكون نقالة كلام بس انت اخوي وما ابيك تنكسر عشان وحده حتى لو كانت وحده انا احبها واعزها
ناصر : بتول حياتي تراك زودتيها والله لو مقلب لأكون ذابحك
بتول : انت تعرفني بهالامور مافيه مقالب
ناصر : اجل قوليلي السالفه
بتول : السالفه مني انا ماراح تسمعهااااااااااااااااااااااا نوفه حلفتني خلاص يا ناصر
ناصر : اها السالفه فيها نويف لا ومحلفتك ؟؟ اسمعي يا تبوله نوفه والله محد ماخذها الا انا وراح تشوفي بعدين
بتول : كفو يا اخوي بس هذيلا عمامي وانت عارفهم ،، اللي يبغون يزوجوه يزوجوه واللي يبغون يطلقوه يطلقوه بمزاجهم
ناصر : يصير خيـر ،، انا طالع واذا سألك عني سالم قولي له مو فيه
بتول بقلبها (ياويلي من نوف والله لتذبحني)
...... : تخيلي عندنا سياره فخمه ويفتح لك الباب سواق وعندك قصر ما تعرفين شكله من داخل من كبر حجمه
وتخيلي انا كل ثانيه اسوي تسريحاتي للجامعه عند المشغل وملابسي ما توصلني الا من باريس وايطاليا آآآآآآآآه وتخيلي . أجـ
ساره : بسسسسسسس ترا راح تتعبي ،، نفسيتك خربت يا حرام
الجوهره : اسكتي تكفين والله مالي الا الاحلام اسلي نفسي فيها
ساره : المشكله اذا صدقتيها
الجوهره : ياختي انا احس مكاني ماهو بهنا احسه بقصر بين الخدم والحشم والاستقبالات والحفلات أحس
بنات خوالي وخالتي مايستاهلو الخير اللي هم فيه ،، ودي اجيبهم يوم عندنا عشان يحمدو ربهم على
اللي هم فيه
ساره تنهدت : احمدي ربك ابوك و تركي مو مخلين عليك قاصر هذا تركي دايم ياخذنا وينزلنا المول ونشتري
كل اللي خاطرنا فيه
الجوهره : وانا ما قلت انه مقصر ،، لوما تركي اصلا ما كان شفتيني عايشه ،، كان مت من زمان آخ بس
ساره : تكفين يالجوهره لا تتكلمي كذا والله تخوفيني ، ،
الجوهره : لا تخافي يا اختي انتي عارفتني لا يمكن اغلط ،، هذي بس فضفضه ،، من لي غيرك اشكي له
ساره : اذا هي فضفضت هموم انا مستعده اشيلها كلها بس اذا لك خطط تكفين انسيها اذا لي غلاه عندك
الجوهره : يعني وش بسوي ، ، باسرق ؟؟ عاد لابق علي ههههههههههه عيوني زي عيون السروق
هههههههههه
ساره : ههههههههه مفارقك والله ،، والله ان البراءه كلها بعيونك
الجوهره : ههه فديتك ،، خلاص تطمني
//
في زاوية من الرياض المزارع والاسطبلات اللي يروحون لها الشباب وتعتبر من المتنفسات القليله هناك
ناصر و نايف : السلام علييييييييييكم
الشباب وقفو : وعلييييييييكم السلام ارحبوووووووووو ارحبووووووو
ناصر : والبقى والبقى
نايف : ماشاءالله الشله كلها هنا وش صاير ؟؟؟
عبدالعزيز ولد ام تركي : درينا انكم فيه وحبينا نشوفكم
ناصر وهو يسلم على عزيز : نكسب شوفتكم يا عبدالعزيز وينك غاط ؟؟
عبدالعزيز يناظر فولد خالته والنعمه باينه فعيونه : عايش بس الاشغال ماخذتنا
ناصر جلس بجنب عبدالعزيز وهو ماهو عارف من ولده : اذا محتاج تمشية اوراق او فيزه او محتاج وظيفه ترانا حاضرين
عبدالعزيز انقهر مع ان ناصر قالها عن طيب نيه : لا مشكور كل اموري تمام انا طالب وما افكر بالوظيفه
ناصر : عسى عسى .. دوم ان شاءالله وامورك تمام
عبدالعزيز : الا قولي يا ناصر عندك شي بكره ؟؟
ناصر : حاليا لا ،، بس ليه تسال ؟
عبدالعزيز : سلامتك بس عازمك على العشا بكره
ناصر : أبشر بس فأي مطعم ؟؟
عبدالعزيز فقلبه ( عزالله بطران ما تعشى الا فالمطاعم الفخمه ) : كيف ؟؟ لا انت حسبة واحد من الاهل ،، عازمك فبيتنا
ناصر استغرب : وعازم الشباب كلهم ؟؟
عبدالعزيز : لا بس .. لا انا اصلا ما اعرفهم كلهم ،، عازمك بس انت حياك بكره ..
ناصر كان حاب يرفض لانه بيروح لبيت خاله راشد يتفاهم مع نوف ويحاول يشوفها ولو دقيقه يعرف السالفه
بس ماهي من عادته يرفض : تم ابشر
عبدالعزيز بابتسامه وراها طيبه ممزوجه بشي غريب هو نفسه ماهو عارف ليه سوا كذا .. اصلا ما خطط
لهالشي ،، ناصر ينحب واعماله الكل يشهد له فيها ماراح آذيه لو وش صار
تعشو الشباب ومارجعو بيوتهم الا الساعه 3الفجر