اليوم الثاني
لندن
الجامعه
شهد
كنت امشي بالحديقه وفكري مشتت .. بين شيوخ اللي ماردت علي من يوم ماتوفت امها .. وبين الكلام اللي قالته منور حقي قبل شوي .. عن حالتها النفسيه وشكثر اهيا تعبانه .. شي يعور القلب .. الله يعينهم ..
ودي لو كنت اسوي شي لهم .. لاتطالعوني جذيه .. انا مالي شغل بصلاح .. قصدي البنات .. !!
تبون الصج اشوفه مرات بالجامعه .. وشكله حيل تعبان وويه اصفر .. يحضر وهو ماله خلق ..
نسيت اقولكم .. ان نظام جامعتنا في بدايه اول سنه راح نكون هني وبعدين انا راح انتقل لكليه هارفورد ووصلاح بعد راح ينتقل لكلية الطيران .. يعني مراح اشوفه غير هالسنه .. ممم يله شنسوي بعد
سناء : شهد ... شهووده
شلت كتبي من على الكرسي علشان سناء تقعد : هلا والله .. حياج
سناء وهي تقعد بتعب : اوووف .. شهالجامعه .. تعبت على مالقيت مبنى التسجيل ..
شهد : ههههه .. اشوووفج منهد حييلج .. ها شسويتي ؟
سناء : مارضوا اضيف ماده من كليتي .. قالوا اخذي اختياري من كليه ثانيه
شهد : زيين المهم بيحسبونها لج ؟؟
سناء : ايه اكييد .. عاد لو اقولج شنو سجلت بتضحكين علي هههههههااي
شهد : قولي اشوف .. ؟؟ ويين ؟
سناء : ماده هندسه طيران
شهد : حلفي ؟ هههههههههه امبييي .. وشلون بتمشين فيها هذي ؟
سناء : ماادري .. الله يستر بس ..
شهد وهي تشوف هالعالم اللي رايحه واللي راده .. كلن لاهي بروحه ولا يدري عن احد
سناء : ماشفتي علووي اليوم ؟
شهد : لا والله .. علياء على مااظن مراح تحضر اليوم امها بتسافر باجر وبتم معاها اليوم
سناء : اهاا ... شهوود !!
شهد وهي تعدل شيلتها : هلا
سناء : يعني انا بقولج شي .. انتي جم عمرج ؟
شهد : 18 سنه .. ليش ؟
سناء : زين .. وانتي هني بروحج عدل ؟
شهد : عدل .. خالي موجود لكن مااشوفه الا بالويك اند
سناء : طيب .. احنا مو بالكويت .. يعني قصدي اقول .. مالها لزمه عباتج هذي .. تقدرين تلبسين اللي يرحيج محد هني يدري عنج ولا ينتقدج .. What S Up!!!
شهد : سناء .. انا مو لابسه العباة تقليد ولا استعباط .. ولا غصبن علي .. انا لابستها اقتناع .. وبعدين هني ولا الكويت .. الله موجود بكل مكان .. ورب الكويت .. تراه نفسه رب لندن وامريكا
سناء اللي غيرت الموضوع بسرعه : زين فكينا بس من محاضراتج الدينيه .. قومي خل نشرب شي Bettre Than Your Talk
ضحكت بقلبي .. سناء بنت تعرفت عليها اهيا اكبر مني بسنه .. بس خوش بنت رغم انها عاشت طفولتها وحياتها كلها هني .. وافكارها وااايد متحرره .. دايم تنقد علي وعلى عليا .. وتقول ان احنا رجعين .. كل مرة تشوفني لازم تقولي عن العباه .. والانسان لازم يكون حر بتصرفاته .. لكن مصيري بقدر اقنعها ..اهيا الحين غافله مثل ماكنت انا غافله .. وبحاول اني اطلعها من هالغفله اللي اهي عايشه فيها .. مرات اقول لنفسي .. ليش ابلش روحي معاها .. اغلب البنات يقولون ان سمعتها بين العرب هني مش ولابد .. يعني تكلم شباب وتطلع معاهم وعايشه حياتها بالطول والعرض .. اهلها مايدرون .. وان دروا .. مايقدرون يسوون لها شي .. لان هالشي تربت عليه من صغرها ..
سناء اللي يعرفها عن قرب يكتشف ان قلبها طيب وتحب كل الناس .. وعمرها ماتحجت عن احد بالشيينه .. وهالشي وايد يحببني فيها ..
سناء بيضه وطويله ومو متحجبه .. ولبسها مثل الاجانب تقريبا .. تصرفاتها وكلامها مثلهم بالضبط .. الله يهديها ياارب
الجانب الثاني
كنت قاعد مع الربع بره بالحديقه .. شفت شهد قاعده شوي بعييد عنا ... اهيا ماانتبهت لي .. لكن انا ميزتها عن باجي البنات كلهم .. كانت الوحيده اللي لابسه عباة .. رغم ان فكرتي عنها ماتغيرت .. الا ان هالشي كبرها بعيني واايد
الين مايت وحده وقعدت يمها .. شفت الشباب شلون يتحجون عنها .. وعن اسمها وعمرها وكلشي تقريبا .. استغربت شهد شلون ترافج بنت مثلها ..
صلاح .. شفيك .. مو هذي من طقتها .. يعني منو بترافج .. !! استغفر الله .. شللي قردني وخلاني معاج بالجامعه
تدرون .. رغم اني قاعد اسولف مع الربع .. الا ان عيوني كل شوي تروح وترد عليها .. ماادري ليش .. احس جني بحرسها .. بحميها .. اراقبها .. كرهت روحي من هالتصرف .. بس مو بيدي .. والله مو بيدي .. لاشعوريا احس بعيوني تورح صوبها ..
الين ماشفتها مشت .. سندت جسمي على الكرسي بتنهد وجنه مهمتي خلصت ..
__________________
شيخة : لا .... مابي
حصه : لييييش ...!! عاجبتج القعده مع سويره يعني ؟؟
شيخه : لا مو عاجبتني .. بس مستحيل اهد بيت ابوي حقها تتهنى فيه .. حبيبتي .. انا الحين متفرغه لها بالكامل .. بشوف منو اللي بيهد البيت انا ولا اهيا ؟؟؟
حصه : ياشيوخ ياحبيبتي .. عاجبتج حياتج جذيه . لاتطلعين ولا تروحين .. حتى الجامعه ماقمتي تروحين ... انتي قاعده تهدمين مستقبلج بايدج
تدرون .. حسيت اني ببجي .. ليش لكل يلومني علشان قاعده استرد حق امي بيدي ... ليش محد يحس .. ليش الكل نسى وصار يمارس حياته عادي .... شلون تبوني اشوف بيتنا اللي طول عمرها المرحومه منورته يظلم ويصير كئيب وماااسوي شي ... انا كل يوم قاعده اموت الف مرة .. بس اشوف ويهها بهالبيت ...
شيخه : انتوا مو قاعدين تحسون فيني
سلطان : شيخه ... انتي الخسرانه ... ابوج وتزوج وماتقدرين تغيرين الواقع .. وامج وراحت مكان احسن من هني الف مرة .. اللي قاعده تسوينه كله مامنه فايده ..
شيخه : حصوص انتي اللي تقولين هالكلام .. انتي !!
حصة : في البدايه انا كنت مثلج .. متاضيقة من اللي صار .. لكن بعد ماواجهت ابوي .. حسيت ان كل اللي بنسويه مامنه فايده .. انتي ماتعرفين هالسارة مثل ماااعرفها .. يمكن انتي ومنور كنتوا صغار .. بس هذي كانت تخطط لهالشي سنين ياشيخه .. وللاسف ابوي طاح بفخها .. ولانه ابوي .. انا مابيدي شي
شيخه : لاتحاولون .. والله والله .. هالشيطان مراح يتم في بتنا شهر بحاله .. وبتقولوون شيخه قالت
قمت متنرفزة وصعدت غرفتي ... قعدت بسريري ابجي .. شفت الكوميدينا .. وتذكرت امي .. تدرون كل ليلة كانت تحطلي علبة حليب يم فراشي ... من يوم انا صغيرة .. وصرت مااقدر نام من غير لااشرب حليلب ...
تضحكون .!!! ... انا احس ان قلبي قاعد يتقطع ... منو غيرج يايمه يدري عني منوو !!!
قعدت امسح دموعي بس سمعت صوت الباب ينطق
ومن غير نقس
شيخه : منو ؟
مها ومنيرة وحصه : خواتج يما .. فتحي الباب
مكان لي خلق حد .. مالي خلق اشوف احد ولا اكلم احد .. قمت بعيز وفتحت الباب .. ولقيت تدرون منو !!
خااااااااالد اخوي
فريت ويهي بعد ماخزيته ورجعت فراشي
خالد : شلونج شيخه ؟
قلتله بنبرة عتب ولوم : بخير ... ناوي تمد ايديك علي الحين بعد !!
خالد قلبه عوره على الكلمة اللي قالتها شيوخ : ماتبين تسلمين علي .. انا بسافر باجر !!
سكت ... صح خلود مايهون علي .. بس انا للحين زعلانه منه .. يطقني .. انا ... لا ويدام منو !!! الحقير
قرب خالد وقد يمي بالفراش وخذا راسي وباسه
خالد : وهذي بوسه عشان الحلوين مايزعلون منا .. اسف شيخه ماكان قصدي امد ايدي عليج .. بس الكلام اللي قلتيه حقـ ــ ــ
شيخه : لاتييب طاريه عندي ... لاتنطق باسمه
خالد باستغراب : انتي ليش شايلة عليه اهوا ...
شيخه : تكفى خالد .. مالي اخلق اسمع أي شي عنه ...
خالد : زين .. على راحتج .. راضيه علينا ست شيخه ؟
رفعت عيني بعيونه وكان فيها الف سؤال وسؤؤال .. ضايعه الاجابه وضايعه حياتي .. كنت ماسكه روحي مابي ابجي او اكون ضعيفة .. قمت من فراشي وقلتله
شيخة : ماسويت شي عشان ازعل منك .. انا مو زعلانه على احد .. اللي زعلانه عشانه رااح وخلاني وحيده .. انا والزمن
قام خالد ومسح على شعري : وحنا وين رحنا شيوخ .. كلنا يمج .. واوعدج اللي صار مراح يتكرر مرة ثانيه
هزيت راسي بشتات ومسحت دمعة نزلت من عيوني قبل لايشوفها خالد
مها وحصه اللي دخلوا الغرفة : قووومي شيووووخ غيري ملابسج نبي نطلع كلنا مع خالد
والله والله ... مالي خلق اروح مكان .. وبعدين مابي اخلي سويره اللي طلعت مع ابوي يخلالها الجو .. انا طول الوقت مرتزه بينهم .. وقاده اسوي مراقبه حق البيت .. اخاف يفوتني شي
منيرة اللي شايلها بايدها جيس : شيوووووووخ شوفي شنو يبتلج
لفيت صوب منور ... باستغراب وانا اشوف الجيس اللي بيدها
منيرة وهي تفتحه : هذي العباة اللي كنتي تبينها يوم رحنا السوق وماشريتيها لان كان يبيلها وقت تفصيل .. الصراحه قبل يومين رحت وفصلتها لج .. شرايج شيوخ قومي لبسيها يله
تصدقون .. قلبي عورني .. المرفوض استانس افرح .. منور تحاول تسعدني تحاول تطلعني من جو الحزن .. مسكينه اجلت عرسها عشاني .. لكن والله والله .. مو قادره .. ابي ارد شيخه بس مو عارفه شلون
منور : قومي شيووخ يله
قمت بعيز وقسته من غير نفس .. تذكرت اول ماشفتها كنت منينه عليها .. تطريزها بالاحمر لى الكموم والشيلة .. وقصتها روووعه .. لكن الحين .. ماشوف فيها شي حلو .. ماشوف شي بالدنيا حلو .. مااشوف غير الحزن
خالد : يله ياالشيخه .. لبسوا خلونا نطلع
قلت بسرعه : مابي اروح ...
حصه : لاتخافين مرت ابوج راح تتأخر اليوم .. ومراح ترد الا بليل .. مالها داعي حراستج هذي
طالعت حصوص وانا متردده .. اروح .. مهاوي خلاص بتزوج باجر .. وخلود بيسافر بعد ... منور يمكن ماااروح معاها يمعه مثل هذي .. شيخه .. خلي نفسج ترتاح جم ساعه ماتعبتي
قلت : زين .. خليني البس واييكم
الساعه 9 ونص
كنا قاعدين نمشي على البحر ... حصوص وعيالها صراخ وضحك .. منور كانت تدز يوسف بالعربانه .. مها وخالد يتمشون ومهاوي ماسكه ايدني ..وكل شوي تشوفني وتبتسم .. كنت احاول ادخل معاهم بالجو .. كنت احاول اضحك واناقز واسوي جو .. مثل ماكنت .. بس بالاخر اكتشفت اني قاعده اخدع روحي ... وعقلي وروحي كله بالبيت .. يمكن هالطلعه غيرت نفسيتي شوي .. لكن ابدا مامحت الجرح اللي بقلبي ..
نفس الوقت
تلفون خالد يرن .. وخر شوي عن البنات
خالد : الو هلا حبيبي
عزوز : هلا خلود ... اقولك انت وينك ؟؟؟
خالد : والله طالع مع البنات شوي .. نتمشى البحر
عزوز : هاااا ... اشوفك مخون فيني ليش ماقلتلي هاا !!!
خالد : ههههههههه افااا عليك .. حياك .. ياليت تفكني من جور النساء .. متوحدين فيني الله وكيلك
عزوز بتردد : منو من البنات !!
خالد اللي فهم على عزوز : كلهم .. وحتى شيخه
عزوز غمض عيونه وعقب قال : عيل بس ترد البيت ... مرني بالقهوة ..
خالد : صار حبيبي ..
عزوز : يله باي ..
خالد : باي
شيخة
كنت اشوف خالد يتحجى بالتلفون .. مسكتني مهاوي وقعدت تتحرش فيني .. انا معطيتها طااف .. عقب قامت تطشر علي ماي اهيا واليهال .. حسيت روحي ردتلي شوي .. قعدنا نتلاحق ونضحك وحصوص تصورنا بالفيديو .. منور كانت رافعه جينزها شوي اللي تحت العباه ومغطسه ريولها بالماي ..
خلود راح شرالنا شاورما وبيبسي وسفن اب .. وقعدنا ناكل ونضحك ونسولف
حسيت بالراحه .. ولو اني عارفة انها راحه مؤقته .. وبس ارد البيت بترد لي الكأبة والحزن ..
كنت حاضنه ريولي بيديني وقاعده يم مهاوي .. لما سمعتها تقولي نروح نتمشى شوي
قمت معاها وانا احاول اكون طبيعيه عالاقل هالساعات .. باجر مراح اشوفها ولااقعد معاها .. وحتى بعد مايردون من السفر .. بيصير حال خلود مثل حال حصوص .. مااشوفهم الا يوم اليمعه .. من عقب ماكانوا كل يوم هني .. لا وحتى يوم اليمعه نتغدى بروحنا والعصر نطلع .. لان البيت ماينقعد فيه
مها : شيووخ ... للحين ماتفكرين بنصور اخوي
رفعت عيوني صوب البحر وانا اقولها : ناصر كان مجرد نزوة يامها .. وانتهى من حياتي .. تعالي شخباره ... انا من زمان ماشفته ؟
مها : ماكو .. يلهي عمره بالشغل .. وفاة خالتي صدمته وايد .. تعرفين شكثر متعلق فيها ..
سكت ... مو بس اهوا .. الدنيا كلها كانت تحبها ومتعلقه فيها .. الله يرحمج يايمه
مها : شيووخ .. ممكن اسألج سؤال بس ماتعصبين !!
شيخه : قولي
مها : اذا ....... اخطبج عزوز ... بتوافقين ؟؟؟؟
شيخه : مراح ارد عليج لان هالشي عمره مابيصير
مها وهي تمسكني من ايدني وتوقفني وعينها بعيني : واذا قلتلج .. انه صار
بطلت عيوني على الاخر : نعم !!!
مها : الصراحه .. عزيز خطبج قبل لاتتوفى الوالده .. وتعرفين اللي صار يعني .. وخلود امس قالي اسألج عشان يعطي الريال خبر ... شرايج ؟
شيخه : هههههه ....
مها : شفيج تضحكين ؟
شيخه بنبرة غضب : وله عين بعد .. قولي حق خلود .. نصيحه من اختك .. اللي مافي خير باهله مافي خير باحد .. عزوز كانت المرحومه تعده واحد منا .. لكن شوفي شسوى !!! ذبحها .. ذبحها يامها ..
وهذا اللي يقول يقتل القتيل ويمشي بجنازتو ... ولاجنه سوا شي !! .. وفوق هذا يتجرأ ويخطبني ... انا !!
مها : شيووخ .. انتي مو فاهمـــ
شيخه : انا اللي فاهمه كلشي يامها .. انا اللي فاهمه ..
مها : شقول حق خالد الحين ؟
شيخه : اللي سمعتيه ..
هديت مها وانا مو طبيعيه ...كنت مستغربه اللي صاير .. عزوز .. يخطبني انا .. صج مايستحي .. هذا شنو مافي بويهه حيا ولا مستحى .. حسبي الله عليك بس
تمينا شوي وعقب ردينا البيت .. منور دخلت غرفتها على طول سبحت ونامت .. حصوص ركبت سيارتها ومشت .. ومهاوي راح خالد يوصلها بيتهم ..
رحت المطبخ اخذلي كوب حليب ويوم طلعت منه لقيت العله قاعده ...
سارة : الناس تسلم يالمتربيه
كنت بمشي وماابرد عليها بس استوقفتني هالكلمة .... المتربيه
فريت ويهي صوبها وقلت : هههههه تدرين احلى شي صار بالدنيا .. انج هني .. الحمدلله لقيت لي احد اتسلى فيه واعذبه ...
ممم اقول سويره ... مو لايق عليج هالقناع ... ولالايق عليج هالبيت ..
سارة وقفت وهي متخصره : شوفي يالشيخه ... لاتحطين راسج براسي .. ترى مثل مااخذت مكان امج ... اقدر عليج انتي
حسيت النار شبت بقلبي ... هذي تاخذ مكان امي .... لا انتي ولا عشرة من امثالج
شيخه : ماعاش من ياخذ مكانها يالحقييرة
سارة : عييييب ياماما .. انا بحسبه امج .. ولا اقولج .. امج كانت عيوز .. انا بحسبه اختج
وبغضب وحرة بقلبي ماطفت عطيتها كف على ويهها بردت فيه النار اللي شابه فيني
ابو خالد اللي توه ياي من بره : شيوووووووووووووووووووووخ !!!!!!
سارة بتصنع : شفت .. شفت يابوخالد ... اخر عمري وانا بهالعمر .. انطق .. ومن منو .. من البنت اللي حسبتها مثل بنتي !!
بوخالد اللي ماسمع غير كلام شيوخ وقلة ادبها .. ومادرى انه سويرة ورى كل هذا قرب من شيوخ
بوخالد : صعدي غرفتج ولا ابي اشوف ويهج سمعتي
شيخه .. حسيت دموع الدنيا كلها تجمعت بعيوني .. ماهمني جذب هالحقيرة .. ولا همني شي ...كل اللي همني اهوا ابوي اللي تغير .. صرت احس اني يدام واحد ثاني .. واحد مااعرفه ولا عمري عرفته .. صرت اتذكر بس شلون قبل كنت انط على ظهره وهو يضحك .. انظف له نظارته وادلك ريوله .. اتذكر لما كان الكل يزعلني اهوا الوحيد اللي يراضيني .. كان دايما يقول الا الشيخه . لاحد يكلمها ويزعلها وانا حي ... هذا ابوي .. مستحيل .. هذا واحد ثاني ..
صعدت غرفتي .. والدمعه مافارقت عيني .. وبنفس الوقت . كرهي لسارة يزيد يوم عن يوم .. ويكبر
قعدت بفراشي .. استرجع كل اللي صار اليوم من خبر عزوز .. الين نظرة ابوي الغريبه على عيوني
طلعت دفتري وكتبت فيه
لولاأحس بداخل الصدر دقات
ماكنت اصدق ان قلبي محله
استغفرالله
شلون ذا القلب ما مات
وشلون ينبض بعد ماراح خله
اخر مصيبه زادة الطين بلات
فرقا الحبيب الي له القلب كله
قصة حياتي اصبحت شبه مأساة
قصه حزينه والنهايه ممله
سكرت الدفتر ولميت لحافي بقوة وانا امسح دمعاتي اللي صارت اقرب اقرباي من بعد الغاليه .....
نفس اليوم بليل
كنت قاعد مع خلود بالقهوة .. يعني على قولتهم .. وداعيه للعزوبيه .. كنا نسولف ونضحك ونتذكر .. لكن مابين كل سالفه وضحكه .. اكو غصه وحزن مافارقوني كلش .. كنت متوعد فيه بس يرد من شهر العسل .. الشغل بيتاضعف عليه وانا باخذ اجازة .. تعتب من الشغل .. ابي ارتاح شوي
رن تلفوني وشفت رقم عبير وحطيته صامت .. قعدت اشوف الرقم اللي طالع على الشاشه .. شنو صار لو كان هالرقم رقمج ياشيخه .. شنو صار لو كنتي لي انا .. شنو صار لو كنتي زوجتي .. ااااه .. حلم مستحيل راح يتحقق بيوم .. يااخ ياشيخه .. بعد كل اللي صار .. واللي ياني منج .. للحين احبج .. يمكن اكثر من اول .. مجروح .. لكن عمر الجروح ماتمحي الحب ..
خالد : الوووو .. وين رحت !!!!
عزوز : هاا .. كاني وين ببروح يعني ؟؟
خالد : منو اللي داق وماتبي ترد عليه ؟
عزوز : الله يسلمك هذي وحده اسمها عبير .. مشكله علي تلفونات .. تقول اعجبت بصوتي ههههه
خالد : بذمتك ههههه .. هذي لو تشوفك شبتسوي ..!!
عزوز : خلنا منها ياريال .. قولي .. بتطولون ؟؟
خالد : لا .. يعني تقدر تقول اسبوع تقريبا ..
عزوز : اهاا .. زين يله خل نتمشى قوم .. مليت من القعده
خالد : يله
قمت وماحسيت بروحي الا وخالد يناديني
خالد : عزوز ... تلفونك .. بوكك .. سويجك كلهم على الطاوله
عزوز بتوتر : اووف .. مخي مو معاي .. عطني
خلود حط ايده على البوك والسويج : مخك وينه عزوز .. وينه ؟؟
عزوز بنظرة يخفيها بابتسامته مغصوبه : موجود ياخالد .. بس مطين هههه
خالد بجديه شوي : للحينه حجي شيوخ مزعلك ..!!
عزوز : خالد ؟
خالد : هلا ..
عزوز : راح ترفضني صح !!
اليوم الثاني
لندن
صلاح
غطيت عيوني بايدي بعد مافتح محمد الستارة حسيت النور دخل بعيوني وانزعجت ... رفعت اللحاف وغطيت فيه ويهي وانا اقول
صلاح : حمووود ... يااخي سكر البرده شهالنحاسه .. ماتشوفني نايم
محمد : قوووم أي نوم .. يله باجي نص ساعه على المحاضرة .. يمدينا نروح
كنت حاس بكسل وخمول مالي خلق اروح مكان .. شفت حمود يلبس دلاغه ويدور جاكيته عندي ..
فتحت عيوني شوي شوي .. وانا احس بصدااع مو طبيعي .. تذكرت امس وين كنت
ضاق خلقي .. وضاقت فيني الدنيا .. امس الشباب كلهم حبوا يسهرون في حدى هالملاهي الليلية .. وانا كنت مصر مااروح .. لكن لاخر لحظة .. قدروا انهم ياخذوني معاهم .. كرهت روحي يوم رحت هناك .. مكان غريب علي ووضع اغرب ... زعلت من نفسي حييل .. شلون طاوعتهم ورحت .. شلووون
رفعت اللحاف عني وفريت راسي صوب صورة امي اللي على الكوميدينا ..
اخذتها وقعدت اتأملها .. حسيت اني خنت العهد .. تذكرت كل كلمه قالتها لي الغاليه قبل مااسافر .. سامحيني يايمه .. سامحيني
قمت وغيرت ملابسي بسرعه .. وانا بداخلي قررت اني مااعيد اللي سويته هذا مرة ثانيه .. هذي الاماكن مو لي انا ..
الجانب الثاني
شهد
كنت واقفه انطر سناء توصل .. قالتلي لاتروحين القاعه ونطريني بره ابي اعطيج شي ..
تميت واقفه عند بوابه الجامعه .. ويوم تعتب رحت قعدت على الكراسي القريبه ... كنت لاهيه بهالناس اللي تدش وتطلع .. وكلشوي اشوف ساعتي خفت لاتبدى محاضرتي وسناء مايات
عليا اللي شافتني : شهوود .. تراه هالمحاضرة بتبدى لا .. شو تسوين هني ؟؟
شهد : انطر سناء .. قالت بعطيج شي قبل لاتدشين المحاضرة ..
عليا : اهاا .. زيين .. تبين ابلغ الدكتور انج بتأخرين ؟
شهد : لا لا .. اذا تاخرت انا بيي لاتخافين
عليا : زيين .. انا انطرج بالقاعه
شهد : اوكي ..
راحت عليا وانا قمت وقفت كنت خلاص راح امشي .. ولا اسمع احد يناديني
التفت صوب مصدر الصوت وكان شاب .. شكله كان سعودي
فهد : صباح الخير شهد
استغربت شعرفه باسمي : هلا .. تعرفني !
فهد : مو انتي .. صديقة سناء ؟؟
زاد فضولي : ايه .. فيه شي ؟
فهد : لا .. بس سناء تتكلم عنج كثير .. ووحبيت اعرفج بنفسي .. معاج فهد
قلتله ببرود : هلا فهد .. اعذرني عندي محاضره
مشيت منعنده وانا اغلي .. سناء تتحجى عني واييد .. وشعرفها بفهد ... وليش تذكرني عنده !!. اووف .. خلني اروح المحاضرة وعقب اشوف شسالفه
نفس اللحظه
صلاح
كنت راح اقوم وازنطها .. لا اذبحها احسن .. سؤال هذي تغال بالكويت وتغازل بره بعد .. ماتصدق تشوف ريال الا وتطيح الميانه .. اخخ بس اخخ .. مو رابطني الا شي واحد بس .. ان احنا بالجامعه .. لكن معليه ياشهد .. مو انا اللي اشوف بنت ديرتي طايحتله سوالف مع الشباب واسكت ..
حسيت اني ماقمت اشوف يدامي .. وبس مشت .. ركضت صوبها وييرتها من ايدها بقوة
صلاح : لحظة ...!!
شهد باستغراب وصدمه من اللي سواه صلاح
صلاح : مرة ثانيه .. خليني اشوفج واقفه من ريال وتطيحيله سوالف معاه .. مايحصلج طيب ياشهد
كنت احس اني بثور فيها لو تميت واقف اكثر .. ماكنت حاس باللي قاعد اسوي .. ولا كنت حاس بقبضة ايدي على ايدها بقوة..
حسيت فيها تحاول تبعد ايدي ودموعها تنزل ... ماادري تمثيل ولا من قوة القبضه .. فجيتها بسرعه ومشيت عنها وبعيوني غضب مايطفيه شي
رحت عند مبنى الدكاترة وتميت انطر حمود وانا احك سكسوكتي السودا .. بتوتر .. الين مايا حمود ورحنا القاعه
__________________