بريطانيا
شقة صلاح
كنت افتر يمين ويسار ... للمرة الالف ادق على خلود مايرد علي ... وشيوخخ جهازها مغلق ..
فيه شي صاير .. قلبي مو مطمن
محمد اللي توه ياي من بره : هاي صلاح
صلاح من غير نفس : هلا ..
محمد : عسى ماشر .. شفيك .. شكلك مو طبيعي
صلاح : ماادري صارلي يومين ادق على الاهل محد يرد علي .. قمت احاتي
محمد : لاياشيخ .. لاتحاتي تلقاهم مشغولين ولا شي ..
صلاح : ميصير حمود .. كل يوم كنت اكلم خلود اخوي .. الحين ادق عليه فوق العشر مرات مايرد
محمد : خوفتني يااخوك .. ممم زيين .. والحل !!
صلاح وهو واقف صوب الدريشه ويشوف الشارع بتوتر وقلق ... قلبه مو مطمن .. حاس انه فيه شي
صلاح : ماادري
محمد : زيين عطني رقم خلود .. خلني ادق عليه انا يمكن يرد علي
صلاح : مااعتقد .. بس تدري خل نجرب
قمت وعطيت رقم خلود اخوي حق محمد ودق مرة ومرتين .. وثلاث لكن ماحد كان يرد
قمت وانا اتأفف .... لاااااا اكيييد فيهم شي
محمد : ياريال وين رايح تعااال ..
صلاح : بروح احجزلي على اقرب طيارة .. والله حاس ان في شي صاير
محمد : زين انت جربت تدق على البيت ؟؟
صلاح اللي غابن عن باله يدق على بيتهم : لا
محمد : زين دق على البيت .. اولا مراح يدرون ان هذا رقمك وبعدين يمكن احد يشيله
صلاح : صح كلامك
اخذت التلفون ودقيت على بيتنا .. وبعد رنتين ردت علي منور
صلاح : الو
منيرة بصوة فيه حزن ويأس : الو
صلاح : الو منور ... شفيكم ؟؟
منيرة : هــ هــ لا صلاح .. هلا والله .. شلونك ؟
صلاح : اقولج شفيكم .. ليش محد يرد علي .. صارلي يويمن اكسر التلفون عليكم محد يرد .. شصاير ؟
منيرة : ....... وو لاشي صلاح ولا شي
لحظة .. هذي حصه تبي تكلمك
حصه : هلا صلاح حبيبي .. سوري ترى الظاهر في مشكله بالخطوط
سكت شوي .. حسيت ان كل وحده قاعده تجذب علي اكثر من الثانيه .. الا شيووخ .. شيوخ ماتعرف تجذب
صلاح : شيوخ يمج ؟
حصه : لا.. شيوخ بدارها
صلاح : زين ناديها ..
حصه ..... مم صلاح انا بسكر الحين .. وان شالله بدق عليك بعد شوي عندنا ناس
طــــــــــــــــوط طـــــــــــــــــــوط
مسكت التلفون وانا اشوفه باستغراب وشك ...
صلاح : مو طبيعي ... فيه شي صاير حموود .. انا مااقدر اصبر اكثر
محمد : لاحول ولا قوة الا بالله ... شيتسوي يعني ؟؟؟؟
صلاح : .......... بشوووف شهد .. اكيد تعرف شي
قمت وانا بين خطوة اخطيها يدام وخطوة اخيطها ورى .. بسم الله مابدينا للحين دوامات وانا اتطلب من البنت لا .. واروح شقتها ..
نسيت اقولكم .. ان شهد ساكنه بسكن الجامعه .. خالها في منطقه بعيده عن جامعتها لكن يمرها تقريبا كل يومين ..
وكون شقتي يم السكن .. فكان ابوها متطمن عليها ..
ماشفتها من ذاك اليوم اللي سلمتها اوراق قبولها وكان ويانا خالها .. مادار بينا اي حديث .. مجرد سلام بس ..
مستحي اروح .. بس مستحيل اخلي هالموضضوع يعدي من غير لااعرف شسالفه
وصلت السكن ورحت عند حارس الامن وسألته عن رقم غرفتها ...
صعدت بالمصعد وانا مرتبك .. اخاف تظن في بالها اني اسوي جذيه على شان اتقرب لها ..
اخاف عباها اني صيده يديده .. ويت لها بريولها ... بس موقته الحين
اول ماوصلت الشقه .. طقيت الجرس بعد توتر .. وقلت ان محد رد علي برجع
وماكانت غير دقيقه الا وانفتح الباب ...
وطل منه ويه .. طفولي .. ملائكي .. لا حرام .. احلى
كانت شهد لابسه ثوب الصلاة .. وشكلها كانت بتصلي ..
اول مرة بحياتي .. اشوف ويه بهالجمال .. ماادري .. شهد مو اول مرة اشوفها .. بس شكلها هالمرة غير .. غيير .. يمكن ثوب الصلاة محليه ..
لحظة .. هييييي .. صلاح .. لاتخدعك بمظاهرها .. هذي تمثل .. لاتنسى اهيا شنو .. لاتكون ضعييف
صلاح : السلام عليكم .. اسف ازعجتج
شهد باستغراب : وعليكم السلام والرحمه .. هلا والله لا عادي
صلاح : الصراحه انا ابي منج خدمه ...
شهد : تفضل ..
صلاح : بنتم واقفين عند الباب !!
قلت هالكلمة بثقه ان امثالها عادي يدخلون رياييل ببيوتهم .. فكنت قايلها وانا واثق
شهد : اسفه .. مافي احد بالشقه غيري .. البنات مو هني اقدر اخدمك بشي ؟؟
تعرفون شنو انقص ويهي .. وانحرجت .. حسيت انها كسرت فيني عدل .. بس مو انا اللي تكسرني امثالها وقلت بسرعه
صلاح : شدعوة .. يت علي انا يعني .!!
شفتها سكتت شوي ونزلت عيونها بالارض وعقب قالت
شهد : مشكور ... اقدر اخدمك بشي ؟
صلاح : زيين .. انا بس كنت ابيج تدقين على شيخه .. صارلي يومين ادق عليها ولا ترد علي ..
قلبي مو مطمن ابي اعرف شصاير ؟؟
شهد : زين .. انطرني بس عشر دقايق .. انزل اللوبي وادق عليها
لفيت ويهي وانا ماشي : اوكي
نزلت تحت ونطرتها ..
كنت اشوف بنات السكن .. منهم اجانب ومنهم انجليز ومنهم عرب ..
شفت وحده عربيه .. داشه بلبس شبهه عاري مع واحد عربي وكانوا يتضحكون ووصلها الين السكن ومشى ..
استغربت .. وواستنكرت الوضع .. رفعت عيني على المصعد الي بتطلع منه شهد وانا اتمتم
صلاح : .. وانا اقول تبي تدرس بره ليييش !!!! لااا ومصره عالسكن بعد !!
الجانب الثاني
شهد
كنت توني بكبر للصلاة ولا اسمع جرس الباب .. رحت افتحه بتثاقل وانا كنت متوقعه الزائر بيكون خالي ..
نسيت اقولكم ان في بداية قرار دراستي بلندن .. كانت الخطه اني اسكن مع خالي .. عالاقل ماكون بروحي .. لكن كلشي تغير يوم عرفت انه متزوج وبعا محد يدري .. غيري
متزوج لبنانيه تدرس معاه ..
قلت ميخالف .. سكت ولا نطقت بحرف ... لكن تصوروا .. اني من اول ليله نمت فيها معاهم .. سمعت صرااخها اهي وخالي .. تقوله احنا مو ناقصين مصاريف على الناس .. وانا مااحب احد يسكن بيتي .. ومن هالحجي ..
عاد من ثاني يوم دقيت على ابوي واقنعته اني بروح السكن .. وبالموووووت وافق بعد ماهددت خالي ان مارضى .. راح اقولهم عن زواجه ..
طبعا سكت ولا قال شي .. بس يبي يتاكد ان علمت احد ولا لا .. وهذا هو من ذاك اليوم وكل يوم طاب عندي يتحسس الوضع .. ويبيني ارجع اسكن عنده علشان يبعد عنه الشبهات
تبون الصج .. انا خايفه من وضع هالسكن .. شكله مايريح .. بس الحمدلله ان البنات اللي معاي زينين
معاي بنت اماراتيه حببووووبه حييل .. والثانيه كويتيه
اووو نسيت الباب
ركضت صوب المدخل وفتحت ... وطليت براسي .. انصدمت من الويه اللي شفته .. لكن سويت روحي طبيعيه على الاخر ..
كنت احاول اكلمه بجمود ومن غير تعابير .. ماادري ليش ..
يمكن كنت احاول اكون مستعده لاي ضربه بيوجهها لي .. وهذي هي قنابل كلامه اللي يسم تنهال وحده ورى الثانيه
كنت اتعوذ من بليس ..واقول حديث الغضب في سري .. علسان اهدى .. رفع ضغطي بس يله خل نشوف شنو يبي
صلاح : خلاص انا انطرج تحت
اول ماسكرت الباب .. قعدت افكر .. كلام صلاح خلاني اشك .. صح .. شيوخ ماكلمتني من مده .. شسالفه
اخذت تلفوني .. ولبست عباتي ولفيت شيلتي بسرعه ونزلت
لقيت الاخ صلاح .. ناطرني ويطالعني من فوق الين تحت .. بغيت اقوله اذلف لا .. صج مو كفو واحد يساعدك .. بس قلت خل يعدي هالموضوع على خير
قعدت على الكرسي المقابله من غير مااتكلم بحرف .. دقيت على رقم شيخه .. بس ماردت علي .. دقيت ودقيت لكن ماجاوبت
شهد : ماترد !!
صلاح اللي بدى عليه القلق : اكييييد فيه شي .. انا شاك بالموضوع .. والله صاير شي ومايبون يقولولي
شفت صلاح وقف ورد قعد .. حسيت فيه متوتر وخايف .. فكرت بسرعه وقلت
شهد : لحظة .. خلني ادق على امي .. اذا فيه شي لاسمح الله اكيد امي بتعرف
وعلى طول كنت ادور رقم امي من بين ارقام تلفوني .. وانا اسمع انفاس صلاح وطقطقه اصابعه .. حسيت ان المضوع يمكن يكون جاييد
شهد : الو
ام شهد : الو هلا يما شهوده
شهد : هلا يما .. شلونكم ؟
ام شهد : نحمد الله على كل حال .. والله الاحوال ماتسر ؟
شهد : ليش يما شصاير ؟
ام شهد : ام خالد يارتنا .. عطتج عمرها ..
شهقت شهقه خلت صلاح يوقف على حيله .. ماكنت عارف شسوي .. حطيت ايدي على حلجي وسكت
صلاح : شصاير ؟
سكت ... والله حسيت اني ضعيفه .. لا مو انا اللي بنقلك الخبر ... دخيلكم اي احد يقوله الا انا ..
صلاح بعصبيه : شــــــهد ... !!
قعدت ابجي .. ماعرف شقول ...
قعد عند ريولي ومسك ايدي حيييييل وهو يرص عليهم : احلفج باغلى الناس .. تقولين شصاير !! ....
وسكت شوي .. وعقب قال : امي !!
هزيت راسي وانا مغمضه والدموع تنزل على ويهي
وفجأة حسيت مثل الريح .. اختفى ... كنت خايفه عليه .. مااقص عليكم .. كان شكله مصدوم .. لكن ماعرفت اتصرف .. ياليت ماكنت انا اللي انقله الخبر .. يالليييييييييت
بيت بوخالد
منيرة
من اول ماشيوخ شافت مرت ابوي .. صعدت غرفتها وهي بصدمه اكبر من الصدمه اللي قبلها .. نسيت اقولكم .. ان ابوي من العزا للحين ماشفناه .. حتى بعد هالخبر .. حصوص اصرت تعرف شسالفه اليوم وتنطره الين مايي ...
كنت خايفه لا حصوص تسول لنا فضيحه كبيرة .. لكن اسكتت وماكنت اشوف الا دموعها
الصراحه الموضوع ماكان على البال ولا على الخاطر .. ابوي ... ابوي انا يتزوج ..!!!
ليش ؟؟ ومن متى ؟؟؟ ... .وامي !!!
يالله .. مسكينه امي .. كل هالسنني كانت مخدوعه فيه .. كل هالايام كانت عايشتها جذبه
الله يرحمج يالغاليه ... الله يرحمج
الساعه الحين 9 ونص بليل ... فيصل دق علي مرتين بس ماشلته .. حبيبي ماله ذنب .. بس نفسيتي زفت .. مالي خلق اكلم احد .. بعد هالخبر
انا كنت اشبه بالضيعفه ماعادت هالمصايب تأثر فيني .. لكن حصوص معلنتها حرب في البيت .. دقت على خالد وقالتله .. وهذي هي تنطر خالاتي يمشون عشان تفضى حق هالسالف هاليديده
ومااشوفها غير تمسح دموعها وخالاتي يهدونها .. وكل وحده فيهم شايله على ابوي .. مهما صار هذي اختهم .. يكتشفون بعد مماتها بثلاث ايام ان ريلها متزوج عليها ... صدمه مابعدها صدمه
اكثر وحده كانت معصبه اهيا خالتي فاطمه .. كانوا يتحجون عن هالمرة .. شكلهم يعرفونها حتى حصوص .. بس انا عمري ماشفتها .. بس اللي فهمته من كلامهم انها كانت رفيجة امي قبل
اخخخخ .. تدرون منو اللي كاسر خاطري بكل هذا .. صلاح .. ماني عارفه ليش خلود مايي يعلمه بوفاة امي .. قال ان اهوا بيدق عليه باجر وبيقوله يي الكويت علشان اي سبب وبعدين يقوله .. لان درى ان هاليومين كان عنده تسجيل .. وان ماسجل راح عليه هالكورس
شيووووخ ... ياقلبي عليها .. امس خلود مسكها وقعد يصرخ عليها قعد يهز فيها .. يبيها تجبي .. مو زين اللي قاعد يصير فيها وتسويه بروحها .. بس ماكو وجنها صنم ... حييط لاتتحجى ولاتنطق
الجانب الثاني
غرفة شيخه
كنت متسنده على الباب وقافلته من برى .. واطالع الفراغ ... احاول اني اصدق كل اللي قاعد يصير حواليني ... احاول اني استوعب ان هذا بيت بوخالد .. ان امي راحت .. ان ابوي تزوج
ان زوجته اهياااااااا ...................
لا لا لا ....... مستحييل .... شلون ؟؟؟؟!!!
رفعت راسي على صوت صراخ ... وكان صراخ حصوص .. فتحت الباب وانا خايفه
كنت اسمع حس ابوي وخالد وحصوص ..
نزلت وقعدت على الدري .. وانا اشوف حصوص تقول لابوي
حصه : ليييش يايبا ليييييييييش !!!
ابوخالد بنبرة : حصــــــــــــه ... انا مو ياهل علشان تحاسبوني .. وبعدين هالشي كان بالسر .. يعني ماكنت ابي اضايق امج ..
حصه : حسافه يبا ... حساااافه كنت متوقعتك تحب امي ... كنت متوقعه السنين اللي عشتوها مع بعض بتصمد ..
ابوخالد : حصوووووص .. بس عااد .. هالشي قراري ومااظن اني تعديت على حدود اي احد منكم
حصه بصراااااخ : تزوجت .. وتقول ماتعديت على حدودكم .. انتا يبت لنا مرت ابو ... تفهم يعني شنو !!!
ابوخالد بصراخ : جـــــــــــــــــــــــــــــــــب ... انا امااسمحلج تطولين صوتج علي .. انا ماني خالد ولا منور .. سمعتي
خالد المصدوم من الخبر : .. صلو على النبي
حصه وهي تمش دموعها : عالاقل .. لابغيت تتزوج ... كنت رحت بعييد .. مو تاخذ .....
شفت حصه سكتت بعد صوت طراق من ابوي على خدها خل الوضع كله مكهرب ... شفتها بجت بصوت عالي .. وطلعت بره البيت