تابع الجزء الرابع عشر ,,
شيخه
بس طلع عزوز من هني دخلت حصوص وبيدها كرتون الخباز مال كيك
منيرة : شنو هذا
حصه بنظرة : كيييييييك احم
ام خالد : منو يايبه !!
حصه بنبرة حسيتها تقصدني فيها : هذي الكيكه هديه من عزوز حق بعض الناس
منيرة طالعتني وانا حاشني الفضول شسالفه !!
حصه : ذاك اليوم شيوخ كانت عندي .. وطلعت مطعم عاد عزوز يه كالعاده وكله وجبتها والاخت زعلت وبرطمت وطلعت معصبها والولد لانه ذوق قالي هالكيكه حق شيوخ لاني كليت وجبتها وقوليلها لاتزعل ترى كنت ابي اطفرها بس .. ولا هي عزيزة مثل اختي وزود
ام خالد : فديييته تربيتي هالولد .. ماخذ قلب امه بالطيبه .. شفتي المسكين اخوج ماكان يقصد .. يايما انتوا اخوان لاتزعلون وتخلون أي شي يفرق بينكم .. عزوز مثل خالد وصلاح اخوج .. ولاتظنين انه بيوم اقل منهم
كانت امي تحاجيني وانا عيني على الكيكه ابي اشوف ذوقه .. اجذب عليكم ان قلت لكم الموضوع ماهمني .. يعني لفته حلوة منه .. بس بعد هالشي مايشفع له اللي سواه بيظل كريه ومليق
افتحوا الكيكه البنات وانا كنت مستانسه .. واسوي روحي مستانسه على الكيكه بس ماايبت طاريه بشي .. قصيناها وكلينا .. وبعدين امي قالتلي اقص منها حق بيت خالتي ام شهد .. وانا كنت اقص .. حسيت ان السجين وقفت بالنص .. انتبهت لصندوق .. طلعته وفتحته لقيته مليان كاكاو بنجوم وفيه ورقه
قعوا البنات يضحكون ..لان يدرون فيني هالكاكاو عشقي الابدي .. قبل امي كانت تييب منه كراتين وياويله اللي ياكل منه غيرير.. لقيت فيه ورقة .. فتحتها لقيت اشتراك بمطعم برجر كنج لمده سنه ..
ضحكت ... اول مرة اضحك على شي من عزوز ههههههههه .. يعني شلون يت على باله هالفكرة ..
حسيت بحصه كانت تشوف امي بنظرات غريبه .. ومنور تضحك بين وقت والثاني .. خذيت كاكاوي والورقه وماعلي من احد : رجاءا لاحد يزعجني .. بكمل الفلم
صعدت فوق وانا ماادري ليش صعدت .. حسيت اني منحرجه .. ليش ماادري . . استغربت من روحي .. شيوووخ هذا عدوج ماعليج منه يسوي جذيه علشان يحسن صورته ولا لاانتي تحبينه ولا اهوا يحبج .. لحظة من وياب طاري الحب الحين ..
مرات اخورها بالكلام وايد
_____________
نفس اليوم بليل
غرفة منيرة
الساعه 12 ونص
كنت قاعده على سريري وخايفه .. احس اني تسرعت .. يلله معقوله جذيه الواحد يخاف .. كنت افكر بعد جم يوم راح تتغير حياتي .. راح اكون مرتبطه بشخص عمري مافكرت انه بيكون زوجي .. زوجي !! يلله شكثر هالكلمه صعبه شلون بتعود عليها ..
قمت وفتحت كبتي افكر شنو راح البس حق يوم الخميس ..احترت .. طلعتلي كذا شغله .. بس ابي شي مميز .. تذكرت ان شيخو شاريه تنورة يديده من المهلب كانت حلوة ومالبستها خل اطرها منها
طلعت من غرفتي ورحت غرفة شيوخ اللي كانت قاعده ترتب كبتها كله عقاب من امي هههه ضحكت على شكلها وهي ترتب شوي .. وتنسدح شوي وتغني شوي .. هالبنت يااهل ولا عمرها راح تكبر
طقيت الباب
منور : ممكن نخش !!
شيخه فرت راسها تشوف منو : هذي انتي .. خير طلعي بره مابي اكلمج
منور : شيووووخ حبيبتي انتي .. والله ماكان قصدي
شيخه تعيب عليها : ماكان قصدي .. بسبتج امي زفتني وزعلت علي .. منور .. ليش تسوسين هاا!!
منور : ماسووست بس ابيج تتعلمين .. اللي سويتيه عييب ولازم تنزفين عليه عشان ماتعيدينه مرة ثانيه
حسيت ان منور بتفتح موضوع مالي خلقه : زين خلاص الحين شتبين !
منور : بقعد معاج شوي .. بعد جم يوم بتزوج تراني. . امشي نروح نسهر
نغزني قلبي يوم قالت منور انها بتتزوج .. لاتفهموني غلط . .انا اتمنى منور تتزوج اليوم قبل باجر .. بس ماتتصورون هالبنت شكثر قريبه على قلبي .. هالبنت اكثر وحده عشت معاها .. هههه اللي يقول عمري الحين الف هههه ..
شيخه : انتي بتملجين .. والزواج لاحقين عليه .. يعني بعدج بتقعدين على قلبي جم شهر زياده
منيرة : ... امي تقول اهوا يبينا نتزوج بعد شهر من الملجه
فتحت عيوني وهديت اللي بيدي : وليش مستعيل .. شنو يمديج تسوين في شهر !!!!!
منيرة : ماادري سكتي .. حدي مغلقه
تبون الصج .. ضاق خلقي ... عالاقل يتزوجون عقب شهرين ثلاث اربع مثل خلود ومهاوي .. عشان اتعود شوي شوي على فراقها .. مو بهالسرعه
شيخه : زيين شلون تبيني اسهر معاج ووراي كل هالشغل هاا !!!
منيرة : الحين اساعدج ونخلص بسرعه ونروح نسهر .. تعالي ماطلعت نتايج الصيفي ؟
شبيخه : بلى طلعت .. تقديراتي زيينه بس عندي ماده دي ... لاتقولين حق امي تكفين
منيرة : ههههههه زيييين .. احم .. ممم اقول شيووخ ممكن يعني اتسلف منج البدله اللي شريتيها من المهلب
شيخه : أي بدله ؟
منيرة : الموف اللي فيها قصات .. بلييييييييييز بلبسها حق يوم الخميس
شيخه قامت معصبه : اقوووول قلبي ويهج يله .. وانا اقول البنت شفيها فجأة تسنعت .. صج الدنيا مصالح .. دنيا وسخه
منيرة : هههههههههههههه شيوووخ عن الهبال
وشيخه وهي تسوي روحها تبجي : يااختي مالبستها ولا مرة .. ناطره تيي مناسبه حلوة والبسها واكشخ فيها واصك على البنات
منيرة : ماتغلى علي صح !!!
شيخه وهي تفر وييها وتغطيه بيدها : روحي اخذيها قبل مااهون يله .. ولا ترى ان شفتها باخذها
منور : هيااااااا اموووووووووااه على خدك ياجميل
شيخه : اااااخ يالقهر .. مافي مشاواة ولا عدل بهالبيت .. يله سو خير وقطه بحر
منور : ههههه شفيج تتحلطمين .. قوليلي بالعافيه .. تشقينها بالعافيه
شيخه طلعت عيونها : ليش ناويه تشقينها بعد ...!!! عشان اشق راسج .. اقول لبسه وحده وتردينها .. صج ناس ماتنعطى ويه
طلعت منور تقيس البدله وانا اشوفها .. والله زعلت .. شلون بقعد بعد شهر بروحي من غير لا اشوفها .. بتم في البيت بروحي .. صلاح وبيسافر بعد اسبوع .. وخلود وبيتزوج ومابقى على زواجه شي اهوا ومهاوي .. حتى شهوده .. قبلوها بالجامعه ..تميت بروحي هني .. مافي غيري .. وو عزيز
هديت اللي بيدي وقلت اشوف منور بالبدله شلون طلعت عليها .. وبالمرة نسهر شوي واشربلي حليب بارد يردلي نشاطي وحيويتي المسلوبه
طلعت من غرفتي وشفت ليت غرفة صلاح مفتوح ودرعمت كالعاده
شيخه : هااا كابتن شنو قاعد تسوي ؟
صلاح : شيوووخ ييتي بوقتج تعالي .. ساعديني محتار بهاالهدوم والجينزات والاغراض .. تعالي ساعديني
شيخه : ههههههه ماسويت كبتي علشان ايي اساعدك .. بس يله معليش .. ماني رادتك
اخذت القميص وانا اصفطه واسوي روحي مشغوله فيه واقول من غير لااشوفه
شيخه : تدري ان .. شهد معاك بنفس الجامعه !
صلاح : أي شهد ؟
شيخه : .. شهد .. بنت يارنا بوعماد
صلاح بعد اهتمام : ليش . . شنو بتدرس ؟
شيخه : تصميم داخلي
صلاح : موجود هالتخصص بالكويت ليش هالتفلسف
شيخه : وانا شكو .. !
صلاح : عيل ليش تقوليلي ؟
شيخه : بس جذيه
سكت انا وهو سكت .. حسيت فيه تنرفز بس يبت طاري البنت ماادري ليش .. امووت واعرف شنو بينه وبينها ..
صلاح : .... مع منو بتروح ؟
شيخه : خالها يدرس هناك وبتورح عنده
صلاح : زين توقعتها تروح بروحها
شيخه : مايصير بنت تروح بروحها
صلاح : اللي مثلها اتوقع عاادي
شيخه باستغراب : ليش يعني ؟ شفيها اهيا
صلاح : اوووف ماادري ..
شيخه : زين تبي هالجيينز احطه !!
صلاح : ........ وو خالها وين قاعد ؟
ابصم بالمليون اذا هالريال مو مهتم لها : والله قالتلي بس انا نسيت
صلاح : اهاا
شيخه : عاد حط بالك عليها .. مااوصك
صلاح : ليش قالولج ولي امرها .. مالي شغل فيها !!
شيخه : زيين زيين .. صج ريايل اخر زمن مافيهم فزعه
صلاح ويسوي روحه مو مهتم : .... وبتروح حق التسجيل ؟
شيخه : اعتقد بس المشكله ان مافي احد يروح معاها الحين .. يمكن تروح مع خالتها العودة
صلاح بقلبه ... عشان تلعب لعب هناك .. لا ولي ولا حسيب
صلاح : قوليلها اذا تبي ... تعطيني اوراقها والمواد اللي تبيها .. ووانا اسجلها
قلت هالكلمه وانا منزل راسي احط دلاغاتي السود بالبجنطه .. بس استغربت سكوت شيوخ رفعت راسي
وشفتها تطالعني ببلاهه
صلاح : شفيج صاحيه !!
شيخه : هاا .. لا خلاص بقولها
صلاح : يله حبيبيتي .. مشكورة على المساعده .. قلبي ويهج
شيخه : لحظة يابابا مافي شي بلاش .. احم .. ابي دينارين
صلاح : وانا من وين لي ؟؟
شيخه : يماا منك توهم خالاتي معطينك هديه التخرج .. بليييز عاد لاتنيحس
صلاح : فتحي البوك واخذي دينارين بس .. وسكري الباب وراج .. ولا اقولج .. يبي البوك انتي مالج امان
شيخه : حرام عليك انا اميينه ..
صلاح : لا والله .. عبالي شيخه تدرين ..
شيخه : كعكعكع سخيف
صلاح : وانتي اسخف ياام لسان
شيخه : معليه بطوفها لك .. كله عشان الدينارين
طلعت وسكرت الباب وتذكرت ان عندي وجبات ببلاش هديه عزوز .. يعني مراح احتاج الدينارين .. يله راح يي وقت واحتاجهم ..
غرفة منور
طلعت البدله قياسي مضبوط .. حتى شيوخ قالت انها احلى علي منها .. وتنازلت لي عليها بعد الحاح وبجي وتوسل هههه.. طلعت شيوخ تطلب لنا وتزهب لنا سهره حلوة وفلم حلو .. وانا قعد انزع ملابسي والبس بجامتي .. انتبهت على رساله بتلفوني ..
فتحتها وكانت من فيصل
(( لما قالتلي عمتي الرد .. ماصدقت .. صرت اسألها كل دقيقه .. انا بحلم !! انا بحلم منور !! ؟؟ قوليلي ))
ضحكت على خبال فيصل .. ورديت
(( انا نفسي ماادري شلون وافقت .. احس اني بحلم ))
فيصل
(( شوفي ان سمعت انج بتأجلين الملجه ياويلج .. ترى اخطفج واللي فيها فيها ))
منيرة
(( يصير خير الين يوم الخميس))
فيصل
(( شيصبرني الين الخميس .. طويل الوقت .. والصبر اطول ))
منيرة : حطيتله ابتسامه وكتبت
(( تصبح على خير ))
ماكنت ابي اطول معاه بالمسجات وايد .. وبعد مارد علي .. نزلت عند شيوخ اسهر معاها وانا نفسيتي فوق الريح
ماتوقعت اني راح اتعود على فيصل بهالسرعه ..
نفس الوقت
الدوانيه
خلود نام .. بس انا للحين افكر بالشعار .. الصراحه ودي بشي مميز وحلو .. سمعت صوت بره .. لاشعوريا قمت وطليت من الباب اللي يطل عالمطبخ .. لقيت شيوخ قاعده تحوس .. ابتسمت يوم شفتها .. وتذكرت خاتمها ..
ادري بتقولون مينون .. بس لبست نعالي وطلعت سيارتي ويبته من الدرج .. تدرون صار هالخاتم مايفارقني باي مكان ..
انسدحت على الكنب وانا متلحف بلحافي العزيز واتأمل بهالخاتم .. يت على بالي فكرة .. طلعت قلم من بين الاوراق اللي منثرة على الارض .. ولونته من فوق .. وطبعته على ورقة بيضا .. كانت الصورة وااااااو .. وردة وطالع منها مثل الخطين .. ماادري حسيت ان هذا اهوا شعار الشركه .. اخذت سويجي وركبت السيارة ورحت مركز سلطان ويبت حبر . وورق ابيض .. طبعت الخاتم على الورق وسويتله سكانر ورجعت دخلته على اللاب توب وصرت العب بالاوان واعدل بعض الاشيا .. حبيته وحسيت اني ارتحت اخير ا من سالفه الشعار .. دايما انتي الملهمه يامغرورتي
بست الخاتم وعلقته بمفتاح سيارتي .. ومانمت الا قريب صلاة الفير ..
اتمنى لكم قراءه ممتعه ,,
لكم شكري ,,
اختكم في الله
سكــــــــــــونه
,
,