وهذا الجزء هديه مني لج ..
الجزء الثالث عشر
عيادة الامل الجديد
السالمية
الدكتور : ياحاج .. اسمع كلامي دنتا حالتك بتتحسن وان رجعت البيت حترجع للمشروب تاني ..
بوعزيز : لا يادكتور .. انا مستشفيات بعد مااقعد .. لاعت جبدي ..
عزيز : يبا عشان خاطري هالاسبوع بس .. انتا الحمدلله حالتك الحين احسن .. وردة البيت ماهي نافعتك .. وانا ادري انك لو رحت بترد لهالمشروب مرة ثانيه
بوعزيز اللي معند ومصر على رايه : عزوز .. انا هني مابتم كيفك .. بتطلعني ولا اخذ تكسي وارد البيت
عزيز بيأس .. بس اصرار عجيب انه يخلص ابوه من المرض اللي عايش فيه : مثل ماتبي ..
الدكتور : يعني مفيش امل ياحاج ..!!
عزيز : خلاص دكتور .. انا بحاول اييبه ان شالله كل يومين تطمن على الاوضاع .. مانقدر نجبره على شي ..
الدكتور : مجهود رائع جدا منك يااستاز عبدالعزيز .. انا حكتبله على شويه ادويه تهدي الاعصاب وبعض الارشادات لازم تبذلها معاه .. ومتخلهوش لوحدو . اوكيه
عزيز : ابشر ... يله يبا نمشي
طلعنا من العيادة وانا احس براحه عجييييبه لتحسن ابوي .. تدرون ان طول الطريج كنت افكر ان ابوي تعافى خلاص ويضحك ويقولي عزيز لاتسوي جذيه .. عزيز .. بيع الحين .. بجم السهم ؟ نزل ولا صعد ..
يا الله .. كنت بس احلم بهالشي يصير وابتسامتي مافارقت ويهي .. عشان جذيه لازم ابذل مجهود اكثر معاه .. يارب خلك معاي يارب
التفت صوب الوالد وانا اشوف عيونه فيها شي يديد .. ماادري شنو .. شي اول مرة اشوفه في ابوي .. كان يطالع الشارع وجنه ماطلع من عشر سنين .. عقب قال : عزوز ... ودني شوي دوانيه المحيسن بشوف الربع
ماتتصورون شكثر كنت مستانس .. يمكن لو قدرت جان طلعت من سيارتي وطرت من الوناسه : افاا عليك بو عزيز .. انتا بس تاااامر
ورجعت بابتسامه اكثر : يبا .. ماقلتلك .. ترى انا الحين اشتغل مع بوحسين رفيجك وبوقتاده بالاسهم
التفت بوعزيز بذهول : من متى ؟.
عزيز : صارلي تقدر تقول مده مو قصيرة .. بس الشهاده لله ماقصروا معاي ابد
سكت بوعزيز فتره عقب قال : انا بسنه 92 كانوا يسموني داهيه السوق .. كانت كل الصفقات ترسي علي .. وفي نكسه المناخ اللي صارت قبل الغزو .. انا وعدد قليل اللي ماخسرنا شي .. وحاشنا خير منها
انا كنت اطالع ابوي بذهول وجني اول مرة اسمعه .. كنت ادري ان كنا نملك خير قبل ماتتوفى امي .. واذكر اسم ابوي كان له هيبته بالسوق .. بس ماتوقعت لهالدرجه
التفت بوعزيز صوب دريشه السيارة وهو يأشر : شفت هالارض هذي .. ! كنت في يوم بايعها بنص مليون دينار .. مع اني شريتها من عمك برخص التراب .. ااااااخ .. ايااام راحت
عزيز : بشنو تنصحني يبا .. انا محتاج شورك ! ..
بوعزيز : التجارة مثل السياسة ياولدي .. الشاطر اللي يعرف شلون ياخذ اللي يبي من غير مايخسر شي .. اهم شي الحذر ..
تمنيا تقريبا ثلث ساعه انا وابوي نسولف عن البورصه والاسهم وايام اول والحين .. اقص عليكم ان قلتلكم اني كنت مصدق اللي قاعد يصير حواليني .. كنت بين كل فترة اقرص روحي ابي اعرف ان اللي قاعد يصير حلم ولا علم وحقيقه ...
عارف انكم بتضحكون لو قلتلكم حتى تلفوني حطيته مغلق .. ماابي احد يضيع علي كلمه من كلام ابوي .. حتى لو ماكان له معنى .. كان أي شي يقوله يهمني .. ماعمره ابوي كلمني مثل اليوم .... ماسواها بحياته
نفس اليوم
الساعه 4ونص
ام خالد قاعده بالصاله وتتكلم بالتلفون .. وخلود ومها قاعدين مع شيوخ ومنور وحصه وسلطان واليهال بالصاله
ام خالد : هلا والله الغاليه .. ايه بس ماعطيتينا غير يومين ...
ام احمد : والله الولد مستعيل يااوخيتي .. عسى بس سألتوا عنه .. ترى مو عشان انه ولد اخوي بمدحه لج .. بس فيصل حبوب وبيحطها بعيونه ..
ام خالد : والله العيال سألوا عنه وانتو بعد ماعليكم كلام .. والشهاده لله مراح نلقى احسن منكم .. بس الراي راي البنت ..
ام احمد : عدل كلامج .. الشور شورها .. عيل احنا حابين نزوركم الخميس الياي شرايج ؟
منور استحت وطلعت غرفتها وحصوص وشيوخ قاطين اذونهم بس مايسمعون شي لان الوالده تتحجى بالالغاز عبالها مامحد يدري .. ماتدري ان اهي اخر من يعلم
حصه : شيووخ سوي روحج تصيب جاي حق امي وقطي اذونج
شيخه اللي فضولها واصل السما : اوووووف ماتشوفينها لما اقرب منها تسكت .. امج عليها حركات بعد موهينه
مها : لاتعوبن اعماركم .. السالفه كلها اعرفها تعالوا اقولكم
خالد : اقول سلطان .. قوم بس هالحريم ماعندهم غير الحش والسوالف اللي مالها معنى .. خلنا نروح الدوانيه احسن
سلطان وهو يكلم حصه : حصوص .. يبي يوسف باخذه .. يمكن اروح بعد شوي عند حسين هاا .. واييج الليل اوكيه ؟
حصه اللي مب مهتمه : اوكي اوكي ... كملي مهاوي
خالد يضحك : هههههه .. مااقولك حريم
سلطان : هههههه وانتا صاج .. قامت تحقرني بعد .. بل
سكرت ام خالد التلفون
حصه : هاا يما .. نقول مبروك !
ام خالد : بسم الله بهالبيت ماينخش شي ابد !!!
شيخه : يمااااااااا .. التفاصيل بسرعه يله .. كلنا نعرف الموجز
ام خالد : والله اهما خوش ناس وماعليهم كلام وابوج مبدئيا موافق .. باجي منور بس .. اذا لها نيه اخليهم ييون الخميس
حصه : تبيني اكلمها لج ؟
ام خالد : لا ناديها انا بكلمها ..
حصه : شيوخ .. يله شوفي شغلج
شيخه : افااا عليج بهالسوالف عند ويهج تراني شقرديه
ام خالد : لعنبو .. عيب عليج انتي ماتستحين ماتخيلين !!
شيخه : ليش استحي .. لا حياء في الدين
مها: ههههههههههههه شكو شيووخ
شيخه : هههههه هاا ماادري ..
ام خالد : الله يعيني عليج يوم بزوجج بس .. روحي روحي فكيني
شيخه : وبترقصين بعرسي سااااااامري ياسلاااااااام
ام خالد : شيخووه استحي لا بالفنيان يله
شيخه : هههههههه .. زييين مافي حريه بهالبيت ...
صعدت وانا مستااااانسه حدي ... دشيت غرفة منور وهي واقفه صوب الدريشه وشكلها سرحاااااانه
شيخه : سرحاان بمين ياحلو !! ؟
منور : بسم الله .. خرعتيني
شيخه تقلدها : خرعتييييييني !!!!! هههههههههه نزلي ماماتي تبيج
منور : مابي اتزوج
شيخه باحباط : لييييييييييييش !
منور : شيوووخ .. تدرين منو هذا ؟
شيخه : منو ؟
منور : هذا اللي ... كان يلحقني بالجامعه ؟
شيخه بذهول : حلللللفي !!!!!!
منور : والله
شيخه : ياااااااااااااااي .. رومااانسي .. حظج
منور : اقول جب بس
شيخه بنظرة حالمه وهي تحط ايدهل على جتف منور : ياسلاااام .. جنكم فلم هندي .. حب من النظرة الاولى .. اعجب فيج .. حبج .. ماقدر يفارقج .. واخطبج .. شنو احلى من جذيه بعد
منور : شيوووخ يالسخييفه ذلفي ماني ناقصتج
شيخه : منور من صجج انتي .. اذا بترفضينه لانه كان يلاحقج .. اسمحيلي ماعندج سالفه
منور : مو جذيه
شيخه : عيل شنو ؟
منور : ماادري
شيخه : زين عيل روحي قولي حق امي هالكلام انا مالي شغل
وطلعت من الغرفه .. بطت جبدي هالمنور .. وارفعت ضغطي ... احد يحصل حب شريف عفيف هالايام ويرفض .. !!
وينه بس هالحب .. ويينه وانا مستعده امسك فيه بريولي وايديني ههههههههه >>> تبون الصج بس كلام لو صار الموضوع جد بصير جبانه اكثر من منور .. نزلت تحت واسألتني امي
ام خالد : كل هذا تنادين منور !!!
شيخه : شكلها ماتبي تنزل .. خليها تفكر هاليومين وعقب سألوها
ام خالد : ميصير ابي اعطي كلمه للحرمه
شيخه : اذا بتكلمينها الحين ترى بترفض .. خليها تفكر زين
حصه : صح كلام شيوخ يما .. خليها
اليوم الثاني
كان اخر امتحان حق صلاح وشهد .. صلوح ماشفناه من اول مايه من المدرسه .. حط راسه ونااام وقال لحد يقعدني بنام قرن .. وشهوده دقيت عليها عطيتني مغلق .. مسكينه تعبانه الله يعينهم ومايضيع تعبهم ان شالله
حصوص قالتلي اغير ملابسي واساعدها بتروح تودي اغراض في بيتهم وترتب شوي .. من ضيقه الخلق رحت معاها .. اما منور ماشفناها من امس .. طول الوقت في غرفتها
الجانب الثاني
غرفة منيرة
كنت منسدحه على فراشي ابي انام .. مليت من التفكير وراسي مو قاعد يتحمل .. انا دام اني برفضه ليش مكتأبه ... منور خلج عقلانيه شوي .. الريال يبيج وشاريج ...!!!
لا لا .. فيصل لعوووب .. مابيه .. اخاف يي وقت ويمل مني .. ويرجع لعادته القديمه
اووووف زهقت ومليت .. انزل تحت شوي ابرك لي من هالتفكير
وتوني كنت بنزل .. ولا يرن تلفوني على صوت مسج ..... تدرون منو وو!!!! .. اكيد عرفتووه
فيصل ... ايه اهوا
اخذت التلوفن بلهفه وانا اقرى شنو كاتب بالحرف
(( منيرة .. انا ابيج .. يارب يكون جوابج موافقه ))
لاشعوريا حسيت باصابعي تكتب الحروف من غير مااحس
(( مستحيل اوافق على واحد مابقى بنت بالكليه ماكلمها ))
رجع كتبلي
(( ممكن اكلمج .. ثواني .. مراح اطول فيهم ))
كتبت له
(( اسفه .. ماتعودت اكلم ريال غريب علي بالتلفون))
فيصل
(( دقايق .. بقولج شي .. وانا راضي بعدين باي رد يطلع منج ))
سكت .. ياني فضول اني اعرف شبيقول .. وبنفس الوقت ماعندي الجرأة اني اكلمها
ثواني ولا تلفوني يرن على اغنيه عبدالمجيد انسان اكثر
كنت اشوف الرقم اللي حفظته بقلبي قبل عيني .. وانا ماسكه التلفون مو عارفه شسوي ..
واخيرا ردييت بس بصمت
منيرة : .............
فيصل : الو
منيرة : هلا فيصل في شي !!
فيصل بقلبه : شلونج ؟
منيرة بجفا : بخير
فيصل : مراح اطول عليج .. ولا راح اتفلسف وايد بالحجي .. انتي تعرفيني يمكن .. وتعرفين ان كانت لي علاقات وايد مع البنات واعرف البنت اكثر من نفسها ..
لكن في شي انتي ماتعرفينه
شي مالاحظتيه .. ولو كان بيدي كنت شلت قلبي من مكانه ووريتج منو فيه ... تدرين منو ؟
منيرة ساكته : .............
فيصل : منيرة .. انتي .. انتي وبس .. ادري بتقولين جذاب وقال هالكلام لغيري .. عندج حق ماتصدقيني .. وعنج حق لو ترفضيني .. لكن ابيج تتأكدين مليون بالميه .. اني حبيتج انتي الوحيده . .اللي حبيتها بحياتي وابيها .. ابيها تكون لي واعيش معاها باجي حياتي ..
مب ضوروري توافقين علي .. لكن كان ضروري تعرفين فيصل هالانسان اللي علاقاته ملت الدنيا .. ماحب غير منيرة .. ولو بيده يعيش طول عمره يحبها ولا يبي منها شي
منيرة كانت ساكته وتسمع .. ومرة تتعاطف معاه ومرة تحس انها مخدوعه .. ايقنت انها تعزه .. وله معزة بقلبها واهتمام .. بس للحين خايفه منه
فيصل : مابي اطول عليج .. كل اللي اتمناه انج تكونين شريكة حياتي .. وتعطيني فرصه .. وان ماصار هالشي .. تأكدي اني اتمنالج كل خير
منيرة : مشكور
فيصل : محظوظ اللي بتكونين من نصيبه .. اسف اذا ازعجتج .. مع السلامه
سكر فيصل الخط وانا للحين حاطه السماعه على اذني .. كنت ابيه يقول اكثر .. يزيل كل هالشك اللي بقلبي صوبه .. غمضت عيوني بااستسلام .. وسكرت التلفون وانا خلاص عرفت ان ماكو فايده .. ولازم اقول لامي عن قراري ..
__________________
اليوم الثاني
في بيت ام ناصر
مها تكلم شيخه بالتلفون : وينج ؟
شيخه : انا ببيت حصوص قاعده اساعدها ليش ؟
مها : ابي اروح السوق .. شيوخ عندي اغراض الدنيا ابيهم والحين اغلب المولات مسوين سيل .. بستغل الفرصه
شيخه : زين روحي يما مرخوصه هههههه
مها : شيووخ عن الملاقه ابيج تين وياي
شيخه : ليش حبيبتي احد قالكم اني مرسال .. كل شوي وحده زاختني وكارفتني شغل
مها : فدييييييييتج ياعلني اشوفج عروس قولي امييييين
شيخه : امييييييييين ههههههههههه
مها : يله يالماصخه لاتقولين لا
شيخه : زين يله .. اقول حق حصوص تيبني عندج .. متى بتروحين ؟
مها : بنصلي المغرب ونمشي .. شرايج
شيخه : اوكيه .. يله باي
مها : باي
سكرت من مهاوي وانا صج احس روحي ابي ارتاح .. مابقى شي على الصيفي ويخلص .. رحت عند حصوص بالغرفه اكمل باجي الشغل معاها واحط اغراض البيبي بالكبت
ولقيتها تتحجى بالتلفون
حصه وهي تبعد عنها التلفون : شيووخ .. حطي على القناه الاولى يقولون مطلعين اسامي الناجحين بالثنويه
شيخه : صج !! .. منو قالج ؟
حصه : توه سلطان قالي .. صلاح وينه ؟؟
شيخه : ماادري خل ادق عليه يمكن يدري
اخذت تلفوني ودقيت بسرعه ومن اول رنه شاله
شيخه : الو .. صلوح .. ها بشر ؟
صلاح بضيق : ماطلع شي !
شيخه : يقولون حاطين الاسامي بالتلفزيون .!
صلاح : هذا انا فاتح التلفزيون والنت والجرايد كلها عندي .. ماكو شي
شيخه : وييييه عيل متى بتطلع نتايجكم ؟
صلاح : اتوقع اليوم الفير .. بتنزل بالجرايد
شيخه : زين .. اذا طلع شي قولنا
صلاح : اوكي
شيخه : باي
حصه : هااااا ماكو شي ؟
شيخه : يقول للحين ماطلع شي .. يتوقع عالفير ان شالله
حصه : يااخوفي يفشلنا بعد كل هالدراسه
شيخه : المشكله انا عندي نفس الاحساس ههههه
حصه : ان شالله مايضيع تعبه بلاش
شيخه : صح نسيت اقولج .. بس نخلص وديني بيت خالتي ناديه .. بروح معاها السوق تبي اغراض ..
حصه : اوكي .. هاج حطي هالسله هناك
اخذت السله من حصوص وحطيتها وييت انسدحت على فراش سلوم بتعب .. : اخخخ يااختي عضلات ريولي قامت تعورني .. تعبت تراني
حصه : مشكورة فديييتج اختي عزيزتي .. نخدمج بعرسج
شيخه : وين اصرفها مشكورة هذي بعد .. وعرسي تو الناس عليه .. ابي مكافئه الحين
حصه : شنو تبين ياام لسان
شيخه : اولا هالكلمه انا كلللللش ماااحبها .. ليش تتعمدون تغثوني فيها يعني .. وبعدين انا قنوعه .. ابي من برجر كنج وجبه دبل دبل واااابر ..
حصه : هههههههههه يحليلج صج قنوعه .. يله طلبي وعلينا الدفع
شيخه : لحظة وابي هيرشز كيك .. وووو ممم
حصه : بس عنبو .. بتاكليني
شيخه : ههه خليني اتهنى بمكافئتي واحللها عدل ..
حصه : زين يله علشان مااتأخرين على مهاوي بعد ساعه بياذن المغرب مايمديج تاكلين
شيخه : اوكيييي
طلعت من عند حصوص وسيييييييييده على تلفون الصاله .. طلبت لي وجبتي .. ممم شكثر احب برجر كنج وخصوصا هيرشز كيك ... امووت عليها يااااي ميته يووع
عقب اخذت شيلتي ولفيتها أي شي وطلعت الحديقه .. ماكو ريايل هناك بس سبحان الله يمكن احد يدش ولا الزراع ييي .. صج كان الجو حار .. بس احب الحديقه واايد .. وكنت قاعده على الديرفه .. ورافعه ريولي عن الارض والعب بتلفوني ...
وماحسيت الا بالجلب ينبح .. معناه في احد عند الباب .. او بيدش
اختي من داخل البيت وفاتحه الدريشه
حصه : شفيه شارون ينبح !!!!
شيخه : ماادري يمكن ريلج ولا الزراع يه !
حصه : ماقالي سلطان انه بيي البيت الحين ! ..
شوي ولا سلطان ومعاه ريال ثاني داشين البيت
انا ماانتبهت الا على سلطان ريل حصوص .. فعدلت شيلتي .. ونزلت بلوزتي البيجيه شوي على البنطلون الابيض بفشيله .. ودخلت شعري الطالع من اللفه .. وقعدت عدل
سلطان : اهلااا شيخه .. شلونج ؟
شيخه : الحمدلله بخير .. الله يسلمك ..
سلطان : نورتي البيت والله .. حصوص وينها ؟
شيخه : حصه داخل .. ترتب باجي الاغراض
وقمت بفشيله ودخلت داخل وانا للحين مو منتبه على الريال اللي مع سلطان ريل حصه .. كنت بس مفتشله من شكلي وهيئتي ..
حصه : منو بره .. سلطان ؟
شيخه : ايه .. انا بدش المطبخ
حصه : هههه تعالي ليش تروحين المطبخ .. روحي غرفه مريوم
شيخه : زيين
سلطان من ورى الباب : درب ..
خذت حصوص شيلتها ولفتها عالسريع وقالت : تفضل
دخل سلطان وكان اللي معاه .. عزوز
حصه : هلا عزيز شلونك !!
عزوز بدشداشه وغترة وشكله كااااااااااان حد السكبه .. لدرجه ان شيوخ اللي تعرف عزوز عدل ماعرفته
عزوز وهو يفصخ النظارة : هلا والله انا بخير انتي شلونج ؟.
حصه : بخير عساك بخير .. زين والله نورت بيتنا من زمان ماييت
عزوز : والله انا قلت لسلطان ماله داعي نيي .. نكلم شغلنا بره .. بس هو اصر .. ماحبينا نثقل عليكم
حصه : صج راح ازعل منك ان قلت جذيه .. حياكم .. تفضلوا
دش سلطان وراه عزوز وقعدوا بالصاله ... لان الدوانيه قاعدين يبنونها بره وماخلصت وغير ان عزوز مو غريب .. فكانت قعدته بالصاله شبه عاديه
دخلت حصوص غرفه مريوم وشافت شيوخ مبطله عيونها على الاخر
شيخه : الريال اللي مع ريلج هذا ...... عزوووووووز !!!!!!
حصه : اييه عزووووز .. قومي خل نسوي شي فشله الريال مو ياي بيتنا من زمان
شيخه للحين مو مستوعبه .. والله ماعرفته .. متغير علي .. صاير ... جنه ملوت الدعايات عشتووو !! حق منو كل هالكشخه .. اخاف بيخطب بس هههههه
حصه : هيييييي شيخوو اكلمج انا قومي
شيخه : سوري قولي حق الخدامه
حصه : الخدامه عندنها شغل الدنيا بره .. وانتي ليش ماتقومين
شيخه : اول شي الحين انا طالبه وباكل مو فاضيه اسوي جاي حق عمي عزوز .. وبعدين كافي اخدمه ببيتنا تبيني اخدمه هني بعد !! .. سوري
حصه وهي تير شيوخ من ايدها :قومي خلصيني عن المصاخه
شيخه وجنها بتبجي : اوووف كلشي بالغصب بهالدنيا .. كله شقا وتعب .. وبعدين شوفي شنو لابسه .. استحي اطلع جذيه
حصه : مافي احد غريب .. كلهم خوانج
شيخه بتأفف وهي تنزل بلوزتها اكثر وتعدل شيلتها : زيين
طلعت مع حصوص وانا مستحيه من شكلي ومن روحي .. اكثر من اني مابي اسوي شي حق عزوز .. ماادري ليش احيانا احس اني مابي اسويله شي .. انه قاهرني .. ليش جذي كاشخ الحمدلله والشكر .. وين بيروح !! وحق منو ؟
ماانكر ان فيني فضول كبير ومرات احس ان عقلي صغير وافكر باشيا تافهه .. بس غصبن علي .. هالريال مطفرني بحياتي .. شكو ياي سؤال .. !! خلود مو هني علشان ينزرع بكل مكان يدامي
شلون باكل وجبتي ... أااااخ يالقهر بس
الجانب الثاني
عزوز
اول مادخلت بيت حصه كنت مستحي .. حسيتها فشله ادش بيت العالم واهما مايدرون اني ياي .. يعني يمكن اثقل عليهم ولا اسبب لهم ازعاج .. رغم يقيني ان حصوص بترحب فيني .. مثل كل مرة ايي فيها هني ..
لكن قبل كنت انا وخلود نيي ونسهر مع سلطان على مباريات ولا افلام .. بس هالمرة خلود مو معاي .. خليته بالشركه .. فاحس الوضع غريب علي
اول مادخلت فضلت اني اتم بالنظارة الشمسيه السودا .. واول ماشفت احد قاعد عالديرفه ولابس لفه .. نزلت عيوني بالقاع .. وحسيت ان وضعي محرج
لكن تلاشى كل شي يدامي .. كل احراج وملل وضيق واي شعور مو حلو .. كله تلاشى بس سمعت سلطان يقول .. شلونج شيخه !!!
تدرون شنو حسيت صج !! .. حسيت اني راح افضح روحي وابتسم بويهها واقولها ولهت عليييج
رفعت عيوني وانا للحين لابس النطارة وقعدت اتأملها وهي منحرجه وتنزل عيونها وبلوزتها .. صوتها كان مثل صوتها يوم اهي صغيرة .. بالضبط نفس النعومه والبحه والشقاوة المخفيه فيه .. عيونها العسليه المترقبه والمستحيه والخايفه بوقت واحد .. كل شي نفسه .. اول مرة اتامل شيوخ عن قرب جذيه .. ماادري يمكن لانها ماالتفت لي للحين او يمكن لاني شفتها بعفويه اكثر .. ماادري .. اللي اعرفه انها ...... لحظة ليش لابسه بنطلون يداد الريال .. ماتستحي هذي .. !! هيين
دخلت هي وااحنا دخلنا وراها وماشفتها الا عقب عشر دقايق طالعه من غرفه وداشه المطبخ ... وبعد نص ساعه تقريبا من شغلنا انا وسلطان .. كنت اوريه بعض الاوراق خاصه ان سلطان عنده خلفيه بالتجارة وابيه يساعدني بعض الامور ..
رن جرس الباب ..
وقام سلطان يفتح الباب .. انا تميت قاعد بالصاله ولفت نظري صوب المرايه المحطوطه قريب الباب صورة .. يوم قربت شفتها صورة تظمني انا وخلود وصلوح وشيخه وحصه ومنيرة .. يوم كنا صغار
هالصورة كانت بالامارات .. كنا في حتا .. ومصورين فوق الجبل .. كانت صج صورة نكته .. انصدمت لاني اول مرة اشوفها ببيت حصه .. دققت النظر اكثر .. ضحكت على شكل خلود هههه شكله كان من غير لحيه وشوارب وكان ضعييف وقزم .. ولا شكلي انا بطه ومدحدح وابيض جني من العيال اللي امهاتهم يدعسون كلشي بحلجهم .. وصلوح كان صغير شكله توه يمشي ...
طاحت عيوني على شيخه .. تدرون وين كانت قاعده .. بيني وبين خلود ..تدرون شلون كان شكلها ... كانت تبجي وفاتجه حلجها على الاخر .. هههههههههه مسكينه .. ماكو غيري اكيد انا
دققت اكثر بشعرها الفاتح .. وبعيونها .. وبكل شي فيها .. حسيت بالحنين لهالايام .. بالحينين لكلشي قبل ماتتوفى امي ..
سلطان وهو يحط ايده على جتفي : شفتوا اشكالكم !! ؟؟هههههههه
عزوز : يرحم والديك .. حصه من وين يايبتها هالصورة من أي كهف .. قولها لاتطلعينا فضايح
سلطان : صالها مده والله .. لقتها بالالبومات القديمه وخاصه انها تظمكم انتوا اخوانها كلهم .. فحطتها
تدرون شللي خلاني اسكت فجأة .. يوم قال سلطان خوانها ... انتوا اخوانها .. انا واحد منهم .. يالله هالشعور خلاني مو بس اطير من الوناسه الا اتشقق ..
عزوز : وينها حصه خلني ازفها مافي احلى من هذي يعني .. شوف اشكالنا جنه بملجأ ههههههه
سلطان ينادي حصه : حصووووص .. تعالي اخوج بيزفج .. وبعدين صح منو طالب مطعم .. اكيد شيوخ ..
عزوز بقلبه .. اهلا .. اهلا حدي يوعاااان .. اخخ بس لو اقدر اكل وجببتها امووت واعرف شتسوي
حصه اللي دخلت وهي تبتسم : اذا فيها زف ماني يايه ههههه .. عطني هذي شيوخ طالبه
سلطان وهو يفتح الجيس وبصوت عالي : شييييخه .. باكل الهيرشز مالتج اوكي !!!
حصه بشويش : سلطان لاتطفرها حرام عليك
سلطان وهو يضحك يعرف شيوخ كلشي ولا اكلها : وينها منزرعه بالمطبخ !
حصه : خل اناديها
وراحت حصه صوب المطبخ : شيوخ تعالي .. طلبج وصل
شيخه : حصووووووه قولي حق ريلج لايقرب يم اكلي ترى امصع رقبة مريوووم
حصه : ههههههههههههه .. دخيلج انتي وياه مالي خلقكم ترى وطلعوا عيالي من السالفه .. تبين اكلج كاهو بالصاله روحي اخذيه انا بروح ارضع يوسف قاعد يبجي
صج صج بطت جبدي حصووه شهالحركااات بعد .. مالي خلق ادش الصاله واشوف شين الحلايا مبسط .. ابي وجبتي ماااااااابي اهي اهي اهي
وبعد صراااع مع نفسي قررت اخوض المعركه واتحمل ثقاله الدم وادش
اول مادشيت لقيت سلطان ماسك الهيرشز ويسوي روحه توه ماكله ومخلص : الحمدلله والشكر يااارب ديمها نعمه
شيخه وهي تشهق : كليت كيكتي !!!!!!
سطان : ههه مو انا .. هذا عزوز
شيخه اللي نست روحها وهي ميانه مع ريل حصه عاادي : منو اذن لكم ان شالله !!!
عزوز اللي حب السالفه : رجاءا لاتبلشني شفكني عاد من لسانها !!
شيخه طلعت عيونها : ليش شجايفني ان شالله !! ..
عزوز : والله كل واحد عارف نفسه .. هذي وراثه من الطفوله ياعزيزتي
شيخه وهي تربع ايدينها وتوقف على جنب : لاتييب طاري الطفوله لانك اكثر مجرم بالدنيا
عزوز : وانتي ام لسان
شيخه بنرفزة : لاتقول ام لسان
عزوز : هههه مشكله انج ماتبين تعترفين .. يابابا هذي الحقيقه المرة .. عيل في وحده تاكلني جذي بلسانها .. بل ترى ماكلينا كيكتج كاهي
كل هذا وسلطان ماسك روحه من الضحك .. ورافع ايدينه : انا مالي شغل .. انتوا اخوان وتنيازون
شيخه : احنا مو اخوان ... ومرة ثانيه لاتقول ام لسان ياعزوز سمعت !!!!!
طلعت وانا ابجي .. كنت ميته غييييض بط جبدي .. قهرني .. ماادري ليش يسوي جذيه .. وليش كل ماشافني استلمني .. اكررررررهههههه ... اكررررههههك
دخلت عن حصوص وحالتي حاله
حصه : شفيييج بسم الله !!!
شيخه : هذا عززوووز الزفت !!
حصه بتملل .. تعرف شيوخ واسطوانتها المعتاده : يقولي ام لساااان تخيلي .. قليل ادب
حصه سكتت شوي وعقب بطتها ضحك : هههههههههههههههههههههههههههههههههههههههههههههه
شيخه :كانت مو متحمله : ليش تضحكين ؟؟؟
حصه : شيووخ انتوا ماتكبرون سؤال !!! .. وبعدين وياكم .. يعني ريال بيصك الخمس وعشرين وبنيه صكت العشرين وجنكم يهال بوعشر سنين ...
شيخه : اهوا اللي بدى .. شكو يتحرش .. قومي وديني عند مهاوي يله
حصه اللي نومت يوسف ولبست عباتها : زيين زين كليتيني .. قومي يله
رحت غرفة مريوم ولبست عباتي ولفيت شيلتي عدل وطلعت وانا مبرطمه
سلطان وهو يضحك : شيووخ .. شيخه .. تعالي اخذي اكلج ترى ماحد كلاه كنا بنطرفرج بس
شيخه : مابي شبعت
وطلعت بره الصاله وانا مفووووووله ... والخايس الثاني لاف شماغه على ويهه ويضحك جنه بيموت .. فيني شي يضحك علشان يكركر جذيه .. الحمدلله والشكر .. ناس مو صاحيه
طلعت حصه اللي حسيتها ماسكه روحها بتضحك .. شكله سلطان قالها كل شي ومرت برجر كنج وطلبتلي .. اول شي سويت روحي زعلانه .. بس بعدين طلبت لاني كنت ميته يوووع
وطول الطريج كنت اهز ريولي .. ولا اتذكر هالمليق شلون كلمني .. انا ام لسااان يالبطه .. هييين .. هييين ياعزوز
الجانب الثاني
عزوز
تعرفون اول ماطلعت شيوخ ندمت ... بس والله موبيدي .. مااقدر امسك روحي .. مااقدر اشوفها ومااطفرها .. احبها لما تعصب .. احبها لما تثور .. امووووت على لسانها .. بس يوم شفت عيونها وهي طالعه .. حسيت انها باجيه .. حسيت بتأنيب الظمير .. بس مااقدر امنع روحي من الضحك .. يااخي هالبنت فلم .. فلم
وقررت اني اراضيها بطريقتي .. وعلى هوااي J
وصلنا بين خالتي ناديه ودشيت لقيت عمي بو ناصر توه بيطلع المسيد حث صلاه المغرب وخالتي قاعده تشرب جاي
سلمت على عمي وعلى خالتي اللي استرخصتني تروح تصلي
وانا رحت غرفه مهاوي وصليت يوم شفتها على سيادتها .. قلت استغل الوقت واصلي علشان يمدينا نروح ونرد مبجر
وبعد ماصلينا ..قعدنا ناكل انا ومهاوي عالسريع .. ونزلت بعدين بالصاله انطرها تخلص .. وشفت جراح توه قاعد من النوم
شيخه : هااااااااااي جراااح .. توك قاعد حبيبي ؟؟
جراح : yes, anti ….
شيخه : زين هممم شرايك تي معانا السوق ؟؟ في المول اكو too much games
جراح : relly , please tell my baba ابي اروح
شيخه : وين ابوك ؟
جراح : there !
واشر على غرفه المكتب
دخلت ولقيت ناصر عند اللابتوب وشكله مشغول بشي .. الظاهر شغله ولا بحث من بحوثه
شيخه : مسا الخير ناصر
ناصر اول ماشافني جان يفز من مكانه وابتسم ابتسامه عرييضه خفت منها : هلاااااااااااا وغلااااا .. انا اقول هالنور من ويين !!
شيخه اللي متعوده على ناصر وكلامه من زمان .. بس ماتدري ان قصده قبل اختلف عن قصده الحين : خل جراح يي معانا السوق انا ومهاوي
ناصر وخر من الكرسي وقرب مني وبابتسامه ونظرة جهلتها : بس !!
شيخه ببلاهه : ايه
ناصر : ماتبين ابوه يي معاكم ؟
شيخه بعفويه : اكيييد .. حياك الله بو جراح تورنها هههههه
ناصر قرب اكثر : تبيني أي معاكم صج !
تبون الصج .. خفت منه واستغربت هذا شفيه وتذكرت يوم ملجه خلود شسوى بالمطبخ وعلى طول قمت : ها ناخذ جراح معانا ولا لا ؟
ناصر : خلينا من جراح .. شيوخ .. ما ولهت علي ؟
انا فتحت عيوني على الاخر .. هذا شفيه .. ليش جذيه قاعد يتحجى !!! ... حسيت اني انأرفت منه ماادري ليش .. طلعت من غرفه المكتب وصعدت غرفه مهاوي بسرعه
مها : شفيج ؟
شيخه : انتي متأكده ان اخوج رجع من امريكا وعقله كله معاه !
مها : ليش ههه شسوى ؟
شيخه : ماادري تصرفاته غريبه ..!!
مها : هذا ضريبة الدراسه بالخارج .. قومي بس خل نطلع
واول ماطلعنا شفنا جراحوو يبجي يبي يي معانا .. الصراحه كسر خاطري .. لبسته جيوتيه وقلت امش ماعلينا من هالمينون ابوك ..
......
أتمنى لكم متابعه ممتعه ,,
انتظروني قريبا ,, مع اجزاء جديده ,,
لكم مني جزيل الشكر ,,
اختكم في الله
سكونــــــــه
