[سكون الصمت]

اقتباس شكرا لك سكون الصمت سلمتي على هذه القصة الرائعة والجميلة والمجهود المبدع منك. وفي إنتظار ما تبقى من هذه القصة الجميلة.

العفو ولو ما سوينا غير الواجب ,,

الله يسلمك ومشكور وماتقصر على المرور ,,


اتمنى ان اراك من المتابعين دوماً ’’


لك شكري ,,






الجزء الرابع




حسيت بالحر .. منو طفى السنترال !!! يالله ..
غفت عيني دقايق وصحييت على صرااخ سلووم بغرفتي خلاني اقووم مخترعه
شيخه : بسم الله .. شصاير !!
لقيت حصه قاعده على كرسي المستواليت وسلوم يصرخ على مريوم ماخذه كاكاوه
قمت متنرفزة وكشتي حايسه : شنو هالازعاج من صباح الله خير .. يااختي مااعنج احساس ؟
حصه : قووووومي .. بسج نووم .. ماتشبعييين !!
طالعت صوب الدريشه لقيت للحين السما منورة .. يريت تلفوني شفت الساعه كانت 3 العصر
يووو طافتني صلاة الظهر ..
قمت متعيزة عدلت فراشي ولميت شعري ورحت صوب الحمام
حصه : شيوووخ .. متى شريتي هالكحل عجيييب .. اسود شحلاته
شيخه : ........
حصه : هههههه مسطله انتي شنو ؟
شيخه للحينها دايخه .. كثر ماانام مااشبع : هاا .. ابسألج يعني مافيه غرفه بهالبيت تطلعين فيها مواهب عيالج الا هني
حصه : شسوي . عيزنا ونقعد فيج .. ماكو غير هالطريقه احم احم .. غسلي وتعالي في لج مفاجأة
شيخه .. مالها خلق تسأل .. دخلت الحمام وتغسلت وتوضت
طلعت مالقت احد بغرفتها .. الحمدلله والشكر .. اشك انها وعيالها مسكونين هذيل
صليت الظهر والعصر مع بعض .. عقب غيرت بجامتي ولبست دراعه وانا طالعه من غرفتي انتبهت لشي محطوط بجس على المستواليت مالي
قربت لقيتها هديه ومكتوب عالكرت
(( الساحرة شيخه .. هدية متواضعه من عمج خالد .. ))
ضحكت .. مع انها ماتحب احد يناديها ساحره .. بس ظحكت عالاسلوب .. خلوود هذا مايكبر
خذت الجيس وفتحت الهديه لقيتها ساعه حلوة من swach ..
شيخه من يومها ماتلبس ساعه بيدينها مب متعودة .. بس يله مدام انها من خلوود خلنا نلبسها عشانه
لبست الساعه وطلعت من غرفتها متجهه لغرفه خلوود
دخلت ومالقت احد . نزلت تحت لقت الكل متيمع وانتبهت لحصه تقولها ان سلطان هني
صعدت شيخه ولبست شيلتها السودا وعقب انزلت وسلمت وقعدت يم منيرة
شيخه : خلوود وين ؟
منيرة : ممم طلع من ساعه .. شنو يايبلج وريني ؟
شيخه تبتسم : ساعه .. شوفيها
وطلعها شوي توريها لمنيرة
شيخه : وانتي ؟
منيرة : مجموعه عطوور من guss
شيخه : شهالكرم اللي نازل عليه ؟
منيرة : حرااام عليج .. ههه بس تلقينه استحى من عزوز
شيخه : الظاهر جذي
منيرة : اقولج . ترى مابقى عالدوامات شي .. شرايج نروح السوق اليوم ؟
شيخه : ايييييييه يله .. بس منو يودينا عاد ؟؟
منيرة : مم نقول حق امي
شيخه : اوو تعرفين امي ماتحب روحات السوق تمل .. وبعدين احنا بنروح مجمعات امي ماترتاح جذي
منيرة : مم شرايج نقول لحصه ؟
شيخه : فكرة .. خلص كلميها .. وانا بكلم مهااوي بشوفه اذا في احد ييبها بيتنا ونروح يميع
منيرة : حلو .. شلون نقول لحصه .. استحي فشله سلطان قاعد
شيخه تفكر عقب قالت : دزيلها مسج ؟
منيرة تطقها على جتفها بشويش : على هالنوم المفروض تكونين مسطله
شيخه : ههههه .. اعجبج مو هينه انا
قاموا واكتبوا مسج من تلفون منيرة حق حصه اللي كانت قاعده يم ريلها بالكنبات المقابله لهم وصلاح يم امه وابوه
حصه وصلها المسج ويوم افتحته ضحكت
شيخه تساسر منور : اووووف اختج فضيحه
حصه بصوت عالي : هههه يماا بناتج بيروحون السوق
سلطان استأذن : يلا انا رايح عمي وعمتي تبون شي !!
ابو خالد : قاعد يبا وين بتروح ؟
ام خالد : اقعد فديتك تو النالس
سلطان : عندي جم شغله اخلصها وعقب برد .. والتفت لحصه : تبين شي حبيبتي ؟
حصه : لا سلامتك الله وياك
شيخه وهي تأشر حق حصو من بعييد : هييين .. مو ويه اسرار انتي
ام خالد : وين بتروحون يما شيخه ؟
شيخه : احم يما نبي نروح السوق يعني مابقى شي عالدوامات وانا ماجهزت حق الجامعه
ام خالد : خلود وينه ؟
منيرة : خلوود رايح مع عزوز وربعه طلعه البحر .. يقول ماخذينا راحتنا معاكم
بوخالد يكلم صلاح : قوم يبا صلاح ود خواتك السوق
صلاح : يباااا دخيلك هذيل بناتك يلوعون الجبد بالسوق .. وانا مافيني صبر
منيرة : حصووووه ودينا انتي !!
حصه : ودي والله .. بس مريوم وسلوم منو بيشوفهم !!
شيخه بنظرة : شنو قصدج .. فاهمتج انا !! ماييوووووووووون معانا
حصه : هههههههههه .. زين عيل شوفو احد يوديكم
شيخه : بدق على مها الحين ووبنشوف يمكن في احد يوديها نروح معاها
صعدت شيخه فوق وخذت تلفونها ودقت على مها
مها : هلااااايمااااا عمرج سلحافة
شيخه : اسم الله على عمري .. عسى بالخير بس ... مع انه ويهج مايبشر بالخير
مها : جب هههه
شيخه : هههه نبي نروح السوق شرايج ؟
مها : حتى انا بروح بعد .. انتوا منو بيوديكم ؟
شيخه : حاليا .. ماكو احد راضي يودينا .. دقيت عليج اشوف مع منو بتروحين !
مها : ممم خل اشووووف ناااااااااااصر
وقالتها وهي ترص على حروف اسمه وتضحك
شيخه وقلبها بغى يوقف : هاا .. مم فشله
مها : لحظة .. شيوخ
وتكلم ناصر : بسم الله انتا من وين طلعتلي !!
ناصر : اذوني ونت .. حسيت في احد قاعد يحش فيني .. وماشكيت الا فيج
مها : هههههههه حرام عليك
ناصر : شنو قاعده تسولفين عني عند رفيجتج ؟
مها بنص عين : هذي ... شيووخ
ناصر : والله !! عطيني
ناصر : الو .. قوة شيخه
شيخه اللي كانت تسمع كلشي وقلبها يدق .. يااحلات حسك يانصووور !!
شيخه : الو هلا ناصر
ناصر :همم شعندكم تحشون فيني !!!
شيخه : هاا .. لا بس نبي نروح السوق وقاعدين ندور احد يودينا
ناصر : يه .. الشيوخ يبون يروحون السوق .. من عيوني
مها : اوووف يييب التلفون هيييي
ناصر يضحك : مهاا خلص انا بوديكم .. نص ساعه الكل يكون زاهب
وطلع ومشى عنهم
الطرفين ساكتين وفجأة طلعت ضحكه من مها
مها : ههههههههههههههههههههههههههههههههاااااي
شيخه وهي تنهد : الله ياخذج قولي امين
مها : بس بس الله يخليج .. ياويلي لو عندي منظرة واشوف ويهج شلون صااار
شيخه : سكتي مهاااوي ترى مالي خلق ملاقتج
مها : ههه زين قومي لبسي يله ..
شيخه : زيييين يله باي
مها : باي

سكرت شيخه من مها وللحينها ماسكه التلفون بيدينها .. مستانسه ان ناصر رضى يوديهم بس عشانها ياحبي لك يانصور .. شلون بروح معاه السوق والله قلبي بيوقف من الوناسه
شوي ولا تدش عليها منيرة
منيرة : شيووخ شصار ؟
نقزت شيخه مخترعه : بسم الله خرعتيني
منيرة : ههه سرحانه بمنوا اعترفي
شيخه وهي تتنهد : محد
منيرة وهي ترفع بيدينها قلاده عزوز وتحطها يدام ويه شيخه : اكيييييد بصديق الطفوله هههههههههههههههه
شيخه فجأة اعتفس ويهاا : وييييييييييييييع ... اقول خربتي مزاجي ولوعتي جبدي رجاءا هالانسان خلقه مااحبه
منيرة : مو لازم تحبينه .. بس خذي قلادتج حرام الريال متعبل ويايبها لج
شيخه : اوووف مو وقتج انتي يله لبسي بنروح مع مها
منيرة : منو بيوديها ؟
شيخه : ناصر
منيرة : نعم !!
شيخه : شفيج ؟
منيرة : امي رضت ؟
شيخه : ماقلتلها بس اكيد بترضى .. عادي يعني
منيرة : ماادري انا الصراحه استحي من الريال
شيخه تشوفها بنص عين : شقصدج انا اللي مااستحي يعني
منيرة : ههههههههههه ياربي من هالبنت بس تبي تهاوش .. مو قصدي جذي يعني بس من زمان ماطلعنا مع ناصر .. احس غير الحين عن اول
شيخه ماتبي منيرة تخرب عليها : منوور عادي ناصر مو اول مرة نطلع معاه الله يخليج
منيرة : وانتي شفيج متحمسه جذي ؟
شيخه ارتبكت : هاا .. عادي .. بس ابي اروووووح السوق
منيرة : انا مالي شغل قولي حق امي واذا رضت عقبها يصير خير
شيخه ... من عيوووووووووني
طلعت منيرة من عندها وحطت قلادة عزوز على الكوميدينا .. لاحقتها عيون شيخه اللي خذت القلادة وحطتها بصندوق اكسسواراتها بعد ماتأملتها شوي .. تذكرت يوم كانوا صغار .. بيوم العيد كانت اهيا باولى متوسط وخالد وعزوز كانوا باولى ثانوي وطبعا هالعيد عياديها كانت وايد امها زادتها دينارين وخالاتها عطوها على 3دنانير والفرحه موشايلتها .. وبمعزل عن الحريم كانت قاعده تعد فلوسها اللي طمعوا فيها خالد وعزوز قربوا منها
خالد : شيووخ .. الله شكثر حصلتي ؟؟
شيخه وتخش فلوسها : مالك شغل
عزوز : شيخه .. عندي فكرة شرايج نستثمرهم لج انا وخلود
شيخه ببلاهه : شنو يعني تستثمرهم ؟
عزوز : يعني نسويهم وااايد
شيخه : شلون ؟
عزوز وهو يحط ايده بمخباته : سر المهنه ياماما .. عطينا ياهم وماعليج
شيخه سكتت وعقب قالت : مابي انتوا تجذبون علي
خلود : افااا شيووخ انا اخوج اجذب عليج .!! وبعدين كل خواتي استثمرنا فلوسهم
عزوز : يله شيخه !! لاتحتارين بتصيرين غنيه
شيخه والطمع لعب فيها : انزين بس ابيهم اليوم تثتسرمونهم
عزوز : ههههههههههههههه قصدج نستثمرهم
خلود : اييييي اليوم افاا عليج .. يله عزوز خل نشوف شغلنا
خذوا الفلوس وطبعا راحوا فيها السينما وشروا وجبات وكلوا وخلصوا وعقب ردوا البيت وكانت شيخه تنطرهم عند الباب وبيدها جيس لانها بتفكيرها بتصير غنيه والفلوس مابتكفي جنطتها الصغيره
عزوز : اووو شيخه هذي !! تعال ننخش بتفضحنا
خلود : امش عادي انا عندي خطه
ويو صوبها ..
شيخه : يله عطوني فلوسي
خلود : شيخه احنا حطيناهم بالبنك الحين بيصيرون وايد لازم ننطر لين باجر
بس هني شيخو ماسكتت حست انها انطعنت من الظهر وقصوا عليها .. وبدأت بمسلسل بكائي محصلش ماخلت احد ماسمعته صوتها الحلو وهي تبجي
والاهم السلطات العليا .. بوخالد وام خالد اللي زفوا الشباب وخذوا عياديهم وعطوها لشيخه وتموا حاقدين عليها مايكلمونها يومين .. وبفلوسهم شرت قلاده حلوة للحين محتفظة فيها
تمت شيخه تشوف قلادة عزوز كل ما بغت تدخلها شي يخليها تفكر تلبسها
طردت هالفكرة من بالها ..
نزلت طيران عند امها وقالتلها وبالزووور رضت بعد ماوصتها بالثقل وتترك عنها الخبال واتفقوا يروحون عقب صلاة العصر

الساعه 4 العصر
مها : شيوووخ يله نزلي عااد بسرعه
شيخه : انتوا وين عند الباب ؟
مها : ايه
شيخه : اوكيه نازلين
نزلت شيخه ومنيرة واركبوا بسيارة ناصر .. سلموا واقعدوا منيرة ورى مها وشيخه ورى ناصر
مها : ها بنات وين تبون ؟
شيخه كانت بتموت من الاحراج مع انها مو بالعاده تستحي جذي .. بس يمكن مشاعر ناصر اتجاها خلتها تستحي وتمت ساكته
منيرة : كيفكم وين ماتبون
ناصر : عاد انا ماادل السوق هني .. محتاج خبرتكم .. ها الشيخه شيخه ماسمعنا صوتج ؟
شيخه : أأ احم .. ماادري على راحتك .. اقصد راحتكم
وهي بقلبها تقول ... شيوخ قولي شي تحجي .. اخاف صدقتي روحج مستحيه .. قلنا ثقلي مو جذي عاد
منيرة تطالعها مستغربه وتضحك
مها : منوور انتي قولي يله قبل مانحرك
منيرة : ممم اغلب المولات مسوين سيل الحين .. شرايكم نروح مارينا
ناصر : وين صاير منيرة ؟
منيرة قعدت تدليه وتمت السوالف اغلبها بين ناصر ومها ومنيرة .. اما شيخه فتمت ساكته .. ودها تسولف بس شي كان يمنعها .. من قرارة نفسها كانت تدري انها مو حيا من ناصر .. بس شي خلاها ماتندمج معاهم .. كانت تطالع الطريج بره شوي وتشوف عيون ناصر من المنظرة شوي .. الين ماوصلوا المول

ناصر : انا بصفط السيارة والحقكم وين بتروحون ؟
مها : ممم خلص انتا بس تدش المول دق علينا
ناصر : اوكي .. حطوا بالكم
مها : اوكيه ... يله بنات
مها كانت تتسوق وعادي بس منيرة وشيخه مو متعودين يطلعون من غير ريال او مرة كبيرة معاهم .. وخاصه هالحزة السوق يكون زحمة وكله شباب
منيرة تكلم شيخه بشويش : شفتي كله شباب .. شلون بنتسوق احنا
شيخه : ماعلينا منهم . انتي بس خوافه
منيرة : لا ياشجاعه مااقدر عليج انا
مها : يله يالعيايز شفيكم
شيخه : العيوز منيرة تخاف هههه
مها : منور لاتخافين دحنا معانا بت قدعه
وهي تأشر لى شيوخ وشيوخ تبتسم بثقه : ايوا كدا
دخلوا وتشروا من جم محل عقب دق عليهم ناصر وواعدوه بمحل وكان يدامه محل اكسسوارات نسائيه
مها تكلم شيخه : شيخووه .. ناصر شعنده داش هالمحل ؟
شيخه تلتفت لوين ماأشرت مها مستغربه : ماادري .. يمكن يبي يشتري شي حق خالتي
مها : امي ماتلبس اكسسوارات ..
شيخه : ممم شككتيني ؟
مها : هههههههههههههه .. لا عاد نصور مو مال هالسوالف الا اذا طلع اللي في بالي صج هذا شي ثاني
شيخه : وشنو في بالج ؟
يرن تلفون مها ...
مها : هلا ناصر ..
ناصر : مهاوي .. شيخه يمج ؟
مها باستغراب : ايه
ناصر : زين انا بالمحل اللي قبالكم .. قوليلها تيي
مها : نعم !!
ناصر : يله عاد لاتطولينها
مها : زين
وتلتفت لشيخه اللي كانت مع منيرة يقايسون توبات
مها : شيوخ .. ناصر يقولج تعالي المحل اللي قبالنا
شيخه : انا ؟
مها : ههه احم ايه
شيخه وهي مستغربه .. فرحانه وخايفه .. يعني كذا شعور مختلط فيها مو عارفه تفسره
صحيح اهيا تتمنى ان ناصر يكون يبادلها نفس المشاعر بس ماتدري ليش كانت خايفه مااعرفت تفسر شعورها
طلعت من المحل واتجهت لوين ماكان ناصر واقف يشوف سوارات ذهبيه على طريقه سلاسل حلوة
شيخه بصوت واطي ومترقب : هلا ناصر
ناصر التفت لها واتسعت ابتسامته : هلا شيوخ .. تعالي ابي ذوقج
شيخه بخجل : بشنو ؟
ناصر : ممم شرايج بهالاسوار .. حلو ؟
شيخه باستغراب : ايه ..
راعي المحل : يعني لازم تاخد راي المدام .. والله مراح تلائيي متلون بالسوووق
شيخه هني ويهاا قلب الوان واشكال .. ياويلي .. شهالاحراج الله ياخذ بليسك جانك ماتعرف تتحجى بس من داخلها استانست من كلام اللبناني
ناصر بنبرة عاديه : لا هي مو مدامتي .. شيوخ يعني اخذها
شيخه بقلبها .. شكله ماانتبه على كلام اللبناني ..
ناصر : شيييييخه !!
شيخه هني وصل فيها الفضول وماقدرت تسكت : ممكن اعرف لمنو ؟
ناصر بنظرة : صدقيني انتي اول وحده بتعرفين وانا وعدتج
شيخه : شمعنا انا اول وحده ؟
ناصر بنفس النظرة : بعدين شيوخ يله نمشي
شيخه وهي تطق ريولها بالارض : مابي
ناصر شافها وعقب مااات من الضحك : هههههههههههههه .. هذي شيخه ..
شيخه هني شوي وتمووت .. شنو يعني !! .. ياخذ هديه نسائيه وياخذ رايي فيها وعقب يقول بعدين تعرفين
رجعت شيخه للبنات وهي مفوله .. وقالت لمها كلشي
مها : يالهبله .. عبالج حق بنت !!
شيخه اللي تكابر ولا تحب تبين انها تحبه : وانا شكو فيه بس قهرني اخوج .. ليش مايناديج انتي ..
مها : احم .. يعني تستغبين شيوووخ !!
شيخه ببلاهه مو فاهمه : لا والله
مها : منو متخرج من الثانوي ويبي يدش علوم اداريه !!!!
شيخه انصدمت : من صجج ؟
مها تضحك : والله اخوي حركااااااات
شيخه كانت من داخلها تناقز ... دايما اظن فيك ظن السو ياناصر .. شسوي من زوود حبي ... ياناس احبه .. ذوق هالريال كله ذوق

رجعوا البيت بعد ماتعبت ريولهم من الفرارة ..
منيرة دخلت غرفتها تقايس ملابسها وتشوف اغراضها اما شيخه خلت اغراضها تحت وصعدت غرفتها تبي تعبر عن فرحتها اليوم .. صحيح الطلعه ماكانت مثل ماتبي .. بس الهديه غيرت مزاجها اميه وثمانين درجه .. ماتوقعت ناصر يتذكر هالشي .. دايما في بالها ان اهتمامها فيه بس من طرفها
بعد اليوم .. تاكدت 90 % ان تعني شي لناصر

نفس اليوم الساعه 6 المغرب
خالد في حالة مايعلم فيها الا الله .. نفسيته زفت من اليوم يدق على اسما ولا ترد عليه .. خاف ليكون فيها شي
دق عليها للمرة الالف وبعد عدة رنات
اسما : .....
خالد : : الو .. اسما
اسما : .. هلا خالد
خالد بعصبيه : فيج شي ..!! تعبانه عسى ماشر من اليوم وانا ادق عليج
اسما : ... خالد لو سمحت ماتدق على هالرقم مرة ثانيه
خالد : .........
اسما : انا اسفه بس مااقدر اكلمك بعد اليوم
خالد بصدمه مو قادر يرد بكلمه .. كان وده يسألها شصاير .. ليش ماكانت ترد .. بس صدمته فيها خلته ساكت يسمع نبرة صوتها الجامده اللي ماتعود ان يسمعها من أسما .. اللي حبها من قلبها يسمعها تتعذر باعذار واهيه ماتوقع بيوم تكون من اسما
كانت كل لحظاته معاها تمر يدام عيونه كأنها شريط ينعرض بسرعه .. وعقب تقوله انه كان حلم .. وحلم كله وهم بوهم
سكتت اسما شوي عقب قدر يجمع خالد بعض الحروف وقال
خالد : ارخصتيني بهالسهوله !!
اسما : خالد انــ ــ
خالد هني صرخ وعصب وفقد اعصابه .. حس روحه انه ضعيف ..معقوله انا غبي لهالدرجه تقدر وحده مثل اسما تلعب بمشاعري وتخليني اعيش بدنيا الحب : انتي شنو .. انتي لاتنطقين بحرف اشرف لج .. تدرين لو قايلتلي أي سبب ثاني كنت عذرتج .. تدرين حسافه حتى الكلام معاج
وسكر بويهاا الخط .. وهوا مفول .. حس روحه بيختنق اذا تم دقايق بعد .. خذا سويجه وتلفونه وطلع من البيت

في الصاله
صلاح : شيووووووخ قتلج ردي المباراة انا متابعها
شيخه : اسفه انا يايه قبلك .. روح الديوانيه
صلاح : مابي
شيخه : صلوووووح مو على كيفك ... لو تموت ماراح احطها لك
صلاح يصرخ : شيخووووه سمعي الكلام
شيخه بدخلة خالد تستنجد : خلوووووود شوف صلاح اقوله روح الديوانيه مو راضي تعال زفه
خالد اللي عيونه كانت محمرة طالعهم بنظرة عقب راح للباب يبي يطلع
عم الهدوء شيخه وصلاح .. انصدموا من شكل خالد
صلاح : بسم الله هذا شفيه ؟
شيخه : ماادري .. شفت ويهه .. جنه احد معطيه كف
صلاح : والله انا اللي بعطيج كف اذا ما حطيتي المباراة
شيخه : ههههههااااي .. ضحكتني والله
منيرة وهي يايه من بره مع امها وعلى ويهم علامه استغراب
ام خالد بخوف : شفيه خالد ..يما شصاير ؟
منيرة : شفيه خالد ؟
شيخه : ماادري طول اليوم كانت نفسيته زفت .. بس تم بالغرفه مده وعقب طلع وعيونه محمرة ولا رد علينا بولا كلمه
ام خالد : يما وليدي ... شفيه صلاح ماتدري !!
صلاح : والله ماادري .. انا وياكم قاعد شعرفني عن ولدج
ام خالد اللي خافت صج : قووم صلاح روح الحق اخوك .. دق عليه سو أي شي دخيلك
صلاح : شفيج يما .. هدي بالج مافيه الا العافيه تلقينه متاضيق من شي
ام خالد : دق عليه زين
وقربت التلفون من ولدها اللي دق على خالد بس مارد عليه
صلاح : مايرد يمااا. ..
ام خالد هني قعدت تبجي : ياويلي على ولدي شفيه .. الله يخليكم سوو شي .. دق على عزيز اكيد يعرف شي
صلاح : شيوخ يبي تلفوني من فوق بسرعه
وركضت شيخه تييب التلفون وقلبها بيوقف من الخوف .. صج اخوها ماكان على طبيعته .. شفيه
يابت التلفون لصلاح اللي دق على عزيز وقاله بالللي صار
عزيز : خلص لاتحاتي .. انا بدق عليه .. وان شالله مافيه الا العافيه طمن خالتي

طلع عزيز بسرعه من الديوانيه ودق على خالد مرة ومرتين وثلاث بس مارد عليه
فكر ودزله مسج (( خلود .. رد علي بس قولي اذا انتا بخير عشان اطمن امك ترى اهلك يحاتونك ))

ونطر دقايق ولا رد عليه خالد ... حس ان الموضوع كبيير اكييد
ورجع دق عليه لقى جهازه مغلق ...فكر شوي وعقب عرف وين بيلقى خالد .. خذا سويجه واستأذن من الشباب وطلع بسيارته

بعد ساعه
كانت سيارة عزوز صافطه يم سيارة خالد وهما الاثنين واقفين عند البحر وصارلهم عشر دقايق مادار بينهم حديث غير السلام
خالد من النوع اللي يكبت بداخله ولا يطلع لاحد انه متاضيق بس لما يكون معصب مايحب يكلم احد الا لما يهدا شوي علشان جذي ماكان عزوز ناوي يفاتحه باي شي .. بس يبيه يرجع معاه البيت ويطمن اهله عليه
عزوز قطع الصمت وقال : مابي اعرف شفيك .. بس ميخالف تيي معاي البيت نرتاح هناك وتنام مو زين اهلك وامك يحاتونك
خالد : ..............
عزوز : عشان امك خلوود .. يله حرام لو شايفها شلون خايفه عليك
خالد كلشي ولا امه .. صج كان ماله خلق يروح مكان ويدري انه ان راح مع عزوز بيخرله كلشي لان مايقدر مايقوله
عزوز وهويطالع البحر : خلود تعرف ...مراات نكون ضعاف بمواقف لازم نستمد القوة فيها .. الريال ياخالد مايهزه الا الشديد القوي مثل مايقولون .. لاتخلي شي يهزك الا اذا كان يسوى
خالد يعرف ان مستحيل يقدر يخبي شي عن عزوز وان قدر فعيونه تفضحه .. اهوا الوحيد اللي يعرف شفيه حتى من غير مايتحجى
خالد : احس روحي ضعيف عزوز .. مصدوم من الواقع ... مصدوم
ونزلت دمعه من عيونه .. دمعه قهر وندم .. بس ابد ماكانت حسافه .. لان اللي مثل اسما مايستاهل الواحد يبجي عشانها .. بس كان مقهور من نفسه .. مقهور لانه حس انه ضعيف .. وهالشعور مايحبه أي ريال بالدنيا
عزوز : خالد .. الواقع غير الاحلام .. الحلم حلو .. لكنه مو دايما يصير .. لازم نكون عايشين بحلم بس ضمن الواقع
خالد التفت لعزيز وبعيونه كلام وايد .. بس موقادر يطلع شي .. او يمكن فعلا محتاج انه يقعد بروحه
خالد : خلص عزوز .. خلني الحين وانا برد بروحي
عزوز : سوري .. ريولي على ريولك .. الصراحه ماااظمنك
خالد : الله يخليك عزوز .. خلص قلتك برد .. وعد والله .. بس ابي اتم بروحي شوي
عزوز : مثل ماتبي .. بس على شر ط دق على امك وقولها انك بخير وبتنام عندي .. طمنها حرام عليك
خالد : اوكيه
عزوز بصوت آمر : الحين ... يله اشوف
خالد ضحك غصبن عنه : اخاف انتا ابوي وانا ماادري
عزوز : احم احم .. يله روح يب تلفونك
راح خالد وياب تلفونه وحصل فيه فوق العشر مسكولات .. ومابقى احد مادق عليه ابتداءا بابوه وامه حتى شيخه داقه عليه
خالد : هههههه مابقى احد مادق عليه .. ناقص بس خدامتنا تدق
عزوز : والله انت ماعندك قلب .. يحاتونك
خالد : حتى شيوووخ .. والله ماتوقعتها تدق
عزوز بقلبه .. رجاءا هالاسم يلخبطني فوق تحت لا تطريه
كلمهم خالد وطمنهم عليه وعقب خلاه عزوز ساعه بروحه ودق عليه عشان ينام عنده فالبيت



في بيت عماد ابو شهد
ام شهد وهي تحظن بنتها ودموعها على خدها : والله احلى خبر سمعته اليوم
شهد ماتدري بشنو تحس غير انها مقتنعه باللي سوته .. صج كان شي بداخلها مستنكر الشي كونه يديد عليها وقرار سريع لكنها كانت تحس براحه كبيره
ام شهد : الله يهديج يابنيتي ويكبر عقلج ..
شهد : يمااا .. ميخالف اروح عند منيرة تعلمني شلون البسه
ام شهد بابتسامه : روحي يما حبيبتي .. الله يوفقج ويحفظج ان شالله
طلعت شهد من عند امها اللي قعدت تبجي مستانسه على قرار شهد اللي كانت تتمناه من زمان يكون منها وبقناعتها

بغرفه شهد
بعد مالبست وخلصت .. امسكت الشيله ولفتها على راسها .. اول مرة تغطي شعرها بحياتها .. شعور يديد ومنظر يديد بتطلع فيه .. تحس بالنشوه بالسعاده بشكل مايوصف .. ماتدري شنو مصدرها ماتدري ان قطعه القماش اللي على راسها مالها أي معنى ان ماكانت مقتنعه بالمبدأ
وبخطوات خايفه ومترقبه راحت لبيت يرانهم بوخالد

في الصاله
منيرة قاعده وشيخه نايمه على ريولها يطالعون مسلسل يوم اخر ومندمجين
شيخه : ايييي منور لاتلعبين بشعري ترى يعور
منيرة : هههه موقاعده العب .. قاعده ادور القمل اللي بشعرج .. اووو فيه جيوش ههههههاي
شيخه انقزت : حلفي !!!!
منيرة تضحك عليها : هههه يالمينونه اضحك عليج .. ردي مكانج
شيخه : يالخايسه خرعتيني والله عبالي صج .. كلش ولا شعري ههه
وردت شيخه لمكانها شوي ولا صوت جرس الباب ونطت شيخه تفتحه وهذي عادتها .. يعني اللقافه شي اساسي بهالبنت
شيخه : منو ؟
شهد : شهد
شيخه فرت بوزها وعقب افتحت الباب وانصعقت باللي شافته : .......
شهد بابتسامه : السلام عليكم
شيخه : شهد ..!!! تحجبتي !!!!!!
شهد وهي تعدل شيلتها بايدها اللي باين انها ماتعرف تلفها زين : احم .. ايه
شيخه وللحين تخزها ومبهوره وعيونها مفتوحه على الاخر
شهد : هههه شفيج .. شكلي مو حلو !!
شيخه بسرعه : لا بالعكس .. تهبلين .. اصلا الحجاب محليج .. بس قرار مفاجئ
شهد : ممم بنسولف عند الباب يعني .. ماتبين تدخليني
شيخه تضحك : ههههه لا حيااج البيت بيتج ..
دخلت شهد اللي فاجئت منيرة بعد بهالقرار .. وقعدوا شوي يسولفون ومنيرة تعلمها شلون تلفها وتموا على سوالف وضحك .. نوعا ما حست شيخه بقبول لشهد .. خاصه بعد قرارها .. تحس ان البنت مسكينه لان ماعندها احد يعلمها والدليل انها فكرت تيينا على طول لان ماعندها احد ينصحها ..
دخلت عليهم ام خالد اللي كانت ترتب غرفة خالد .. لان ماتحب احد يرتبها غيرها
ام خالد : هلا يما شهد ..
شهد قامت تسلم : هلا خالتي .. شلونج
ام خالد : بخير عساج بخير .. شلون امج واخوانج والاهل ؟
شهد : كلهم بخير ويسلمون عليج ..
ام خالد : وامج وينها ؟ .. ليش مايات معاج
شهد : ماادري والله خالتي ..
ام خالد : لا مايصير دقي عليها دامنا مجتمعيين خلها تييي من زمان عن سوالفها الغاليه
شهد بابتسامه : ان شالله ..
منيرة : يمااا .. شهوده تحجبت
ام خالد : مبروك يابنيتي .. الله يثبتج على دينه .. والله زان ويهج بالهحجاب وزاد نور
شهد استحت : مشكورة خالتي ..
دقت شهد على امها تكلمها عشان تيي
شيخه : يمااا .. يعني خلود مراح يي ؟
ام خالد : كلمني عزيز يقول بينام عندهم وهو كان متاضيق من الشغل .. والحين مافيه الا العافيه .. وعقب كلمته الحمدلله صوته زين .. خوفني عليه والله
شيخه : مممم مااتوقع موضوع بالشغل يعفسه جذيه
منيرة تطق شيخه بيدينها وبشويش : امي مو ناقصه تخرعينها
شيخه تبي ترقع : احم .. اييييه اكيد موضوع بالشغل
منيرة تضحك : لا والله ههه
ام خالد : شهد عطيني اكلم امج
وتكلمها ام شهد ويسلمون على بعض وتصر عليها تيي وتعشى عندهم

صارت اليمعه احلى ..
شهد وشيخه ومنيرة .. سوالف وضحك ووناسه ..
وام شهد وام خالد .. اندمجوا مع بعض كالعاده ..
شيخه : شهد .. تعالي بما انج اول يوم متحجبه انا بعطيج شيلات يديدة شاريتها للجامعه ..
شهد باحراج : لا شيوخه عادي .. اشتري عقب
شيخه : هههه بيني وبينج .. ناويه اروح السوق بعد .. فراح اشتريلي وانا عندي وايد
يله قومي
منيرة : زيين انتوا رحوا وانا بشوف العشا شسوت الخدامه فيه

صعدت شيخه وشهد وقعدت توريها شيلاتها واعجبت شهد .. حست ان الدنيا موشايلتها من الوناسه .. مو عشان ان شيخه عطتها شيلاتها لا .. لان حست بطعم الخوات اللي فاقدته .. شهد عندها اخوان لكن كلهم صغار وماعندها خات تشكيلها او تسولف معاها مثل شيخه ومنيرة ... خذتها العبرة وحست ان دموعا بتنزل
شيخه : شهوده .. ليش تبجيين !!!
شهد : شيخه انا وايد احبكم .. انا صج كنت بالفترة الاخيرة ضايعه بس مافي احد يعلمني .. انا ودي اتحجب واصير زينه ... اقدر اصير زينه !!!
شيخه تحظن شهد وهي بعد بتبجي : شهد .. تدرين انتي وايد تغيرتي .. واعتبريني انا ومنيرة خواتج اذا تضايقتي من شي لا يردج غير لسانج ..
شهد وهي تمسح دموعها : اكييد
شيخه : زين .. يله شرايج ننزل نساعد منور بالعشا .. ماادري شمسويتلنا ..
شهد بابتسامه : يله

وهم قايمين .. انفتح باب الغرفه وكان صلاح
صلاح : شيخه ... منو عند امــ ــ
وسكت ..... تم يتأمل البنت اللي مع شيخه وحس ان دخان يطلع من راسه
شيخه : اووف اطلع انتا ماتعرف تطق الباب يعني
صلاح وماتحرك من مكانه مايدري ان شهد تحجبت فما همه ان يشوفها كاشفه شعرها وقال : اعتقد ان كلامي لمنيرة وصلج شيووخ
شيخه ارتبكت هالحمار بيفضحنا يدام البنت : خلص صلاح عقب كلمني اطلع الحين
صلاح : سمعي شيوخ .. احتراما لانها داشه بيتنا ماراح اتحجى .. بس انا مااحب خواتي يصادقون بنات ... وسكت
لما سمع صوت بنت تبجي ومغطيه ويها بيدينها
خذت حجابها ولبسته وطلعت تركض رايحه بيتهم
شيخه : صج ماتستحي على ويهك .....
واركضت تلحق شهد




..............................


اتمنى لكم متابعه ممتعه


لكم خالص تحياااتي


سكونـــــــــــه