اليوم: الثلاثاء..
المكان: العين ..غرفة مهرة..
الوقت: العاشرة صباحا..
----------------------------------------
(مهرة)....
فجأة حسيت بانه حد متسلط على بابي يبا يكسره…خنفست…وفركت عيوني مستغربه واانا اتسمع انواع الصريخ..
آمنه: مهرووووووووووووه….!! مسودة الويه هالكثر رقاد..!! مهروووووووووووه ويهد قومي…
اووفف…اصبحنا واصبح الملك لله….خير شو صار..؟ بعدت اللحاف عني بايدي اليمين وانا احاول قد ما اقدر اني ما اهوس على ايدي المكسوره اللي تعورني…
رفعت ايدي ورتبت شعري شوي …
آمنة: مهروووووووه ان مانشيتي احين بكسر بابج تراني قومي احسن لج…
عقدت حواجبي..شفيها هذي..!!..مشيت بسرعه صوب الباب وانا احاول اني امشي بثبات..الرقاد بعده مافج من عيوني..ويالله يالله اشوف جدامي…
فتحت الباب وتساندت عليه شوي..
مهرة: هاااا عموووه…شوفيج.؟!
آمنه: شو شوفيني..انتي ماتستحين على ويهج…استويتي حرمه وترقدين لين الظهر.؟!! ومخلتني اروحي اعابل بالبيت..؟!!
بطلت عيوني مستغربه…واطالعت الساعه…الظهر.؟؟؟ تونا الساعه عشر..!!!!!..
مهرة: عمووه توها الساعه عشر..وانا في اجازه…وبعدين انتي ماتشتغلين في البيت البشكاره عندج تسد الشغل عنج انتي بس تشرفين شو بسوي يعني انا زياده.؟!!
آمنه: وصار لج لسان تردين علي بعد.. يابوي خبرج عتيج البشكاره شردت الله لا ردها…
بطلت عيوني زياده…وفجأة انتابتني رغبة في اني انسدح عالارض واظحك….
بس كتمت الظحكه لا ايييني طراق سنع…
مهرة: شردت.؟!!!!!!...وين شردت…كيف…ليش الله ياخذها..؟؟؟
سألت هالاسئله عشان احسس عمووه اني متفاعله وياها..
بس الصراحه البشكاره ماتنلام…اكيد شردت من طبايع عموه الشريره…متسلطه عليها لين ماطفرت…ماتنلام…
آمنه: عاااااد هذا اللي صار شردت وبلغنا الشرطه…وان زخوها تخسي اني اردها…والحين تغسلي وخلصيني نزلي تحت ساعديني الحين…بسرعه…
مهرة: احم…ان شاء الله عموه الحين بنزل…
سارت عمتي…ورديت انا قفلت الباب…دخلت الحمام وتسبحت..عنبو ذاك السبووح…كله بسرعه بسرعه…وبايد مجبسه بعد..توقعوا عاد انتوا الباقي…
لفيت شعري اللي يسمونه "سايح" والمقصوص مدرج لين خصري ..كان خرسان طبعا ومانشف لكن مافيه وقت…
بتقولون هذي البنت المهملة من قبل الاهل متى حصلت وقت ترتب شعرها وتقصقصه…
لا تغترون.!!
استغليت فرصه عرس اخوي حمد عشان اقصه في الصالون …والا محد بيعطيني ويه من الاساس…
المهم…تلبست ملابسي ونزلت تحت اشوف عمتي شو تسوي….
حصلتها في المطبخ تعابل الدياي وتجهز للغدا…
مهرة: هاا عمووه…شو تبيني اسوي.؟؟ بشو اساعدج؟
آمنه: سيري نظفي البيت والصاله وحجر خوانج…ولمي ثيابهم الخايسه ووديها غرفه الغسيل… انا بعابل الطباخ..
مهرة: ان شاء الله…
قلت فخاطري الحمد لله مافيني عالطباخ…ان طلع شي خربان بتقول هذي مهره خربت…وانا مافيني بصراحه..
سرت وطلعت من المطبخ ورجعت للبيت…اول مادخلت دخلت على غرفة ابوي عشان اصبح عليه لكني ماحصلته..الظاهر انه طلع العزبه او مكان ثاني يقضي شغله معينه…استغليت الفرصه ورتبت فراشه وجمعت ملابسه …
ونفس الشي بحجرة سهيل…
سيفوووه بعده راقد ومعفن….وحسدته في هذيج اللحظة… عشان مايتهنى برقاده…شمعنى انا اللي اعاني من شردة البشكاره بسبب طبايع العمه.؟!!..
اما حمد.؟؟ فما رحت لقسمه لانه متزوج والمفروض حرمته تهتم بكل شغله الحين…..
خلصت تنظيف البيت وكل شي..حتى غرفتي رتبتها… ورجعت لعمتي في المطبخ…
بصراحه ريحة الطبخ كانت شاله الدنيا والظاهر الغدا بيطلع شي معتبر….عالاقل عموه تعرف تطبخ احسن عن البشكاره… يالله ..يطلع منها شي زين عالاقل..
مهرة: ياسلاااام ياسلااااااااااام..تسلم ايدج صراحه ريحه تفجج الراس…
حاولت اكسب عطفها شوي…لكنها واجهتني بحقيقة زفته..
آمنه: لو تقعدين وتتعلمين الطبخ بيكون وايد احسن لج…بيظه ماتعرفين تسوين..باجر الله يعين شو بتسوين فبيت ريلج..!!..
انقهرت بصراحه… احين لازم عالبنت تبرمج كل حياتها وكل تصرفاتها واطباعها واهتماماتها بما يتفق مع اسم "الزوجه"…. اوكي انا ماريد…ماحب الطبخ….لازم ياكل من طبخي يعني..؟؟؟؟..يعله ماياكل… بالله هو يحب الطبخ..؟!!..خله هو يطبخ وانا بذوق طباخه…اما مجتمع يقهر صدق…!!!
ياعمتي انا وريلي نتفاهم انتي مالج خصصصصصصص…!!!..
كان ودي اقولها لها بصراحه بس ماعندي شجاعه..بتعطيني فويهي بالملااااااااس…بعدين منو بياخذني.؟!!..
مهرة: عمووه انتي ماخليتي اقعد اتعلم ..طرشتيني انظف…
آمنه: يعني منو بينظف..؟؟؟؟
مهرة: خلاص في الليل بنتعلم الطباخ منج….
آمنه: والله مايندرا تفلحين والا لا….حطيتي الثياب في الغساله؟؟؟
رفعت حواجبي…وبطلت عيوني… ماذكر ان عمتي قالت كلمه غساله..!!!!..
مهرة: عموه انتي قلتيلي حطيهم في غرفة الغسيل…بس..
اطالعتني عمتي بقهر…
آمنه: شوووووو يسون في غرفة الغسيل؟؟ يغسلن عمارهن روااحن؟؟؟؟؟ اما انج طمّه ماتفهمين شي..روحي غسلي ثياب خوانج…الا ثياب ابوج وثيابي لا تصكينهن اخافج بعد ماتعرفين تغسلين…
مهره: عاد عموه انا مب طمه لهالدرجه….!!!
لبستها…وسرت عنها لغرفة سيف…
وادق ..وادق…وادق….
مثل مادقت علي عموه الباب الصبح…بس عشان اقهر شخص ثاني في البيت مثل ما انا منقهره….
سيف: هاااااااااااااااه هااااااااااااااااااااه..شوووووووووووووووو هذا ماتخلون الواحد يرقد..!!.
ابتسمت…
وقلت بهداوة تقهر شوي..
مهرة: …بطل الباب…
صرخ عليه…
سيف: شوووووووووو تبين…
مارديت عليه..
لكني رديت ادق …وادق…وادق….وانا ابتسم..واتخيل شكل سيف المعتفس الحين..
بطل الباب وعيونه اطلع شرار…
سيف: تبيني اصفعج انتي والا شو….شووووووووووو تبين..؟!!!!..
تظاهرت بالبرود..
مهرة: عطني ثيابك الخايسه….
عقد سيف حياته اكثر…
سيف: شخصج انتي بثيابي الخايسه..؟!!!!...
مهرة: بشكارتنا شردت…
سيف: شوووووووووووووووووه..؟؟؟
مهرة: اللي سمعته…عطني ثيابك الخايسه ما عندي اليوم بطوله اوقفه على باب جنابك….
دخل حجرته ثواني…وجمع ثيابه…وفوانيله والوزره بعد…والسفر..وكل شي خطر على باله انه خايس…بس عشان يقهرني..جمع اكبر قدر من الثياب اللي " يعتقد" انهن خايسات مناك هن نظاف…يا وفرهن فويهي…
سيف: اندوج…وثاني مره لا ادقين الباب جي….
طاحت بين ايدي كم كندوره وسفره وكم فانيله..اما الباقي طاح عالارض…اطالعته بكبرياء…
مهرة: اللي طاح…رد البسه…انا مب بشكارتك اغسل لك الكبت باللي فيه كامل…
ورحت عنه وفويهي ابتسامه …احب اقهره مثل مايقهرني…ومن طرف عيني شفته يلقط باقي ثيابه ودخلهن داخل ورقع بالباب….
--------------------------------------