[نينوى]

الأخوة : قلب خضر ، حامل المسك ، الغريب ، سبيل الرشاد ، ديك الجن ، مروج
السلام عليكم
الحقيقة موضوع رائع وانا ملاحظة أن من يقرأ ملاحظاتكم اللي حطيتوها يصير عنده تصور كامل للموضوع . وصج كلام ديك الجن أنه حسب ظروف كل شخص هو يحكم بالضبط وصدقوني أحنا البنات نبي الستر وزوج محترم وطيب ومسألة الفلوس أعتقد تصير مش مهمة حيل إذا كان للبنت زوج محترم وطيب ، لكن إذا كان زوج سيء في اخلاقه وبخيل هذه حياة لا تطاق ابد .
واحنا البنات مستعدين نتفهم ظروف الزوج بس بشرط مو يوعد ويخلف أقول لكم كيف
بعض الأزواج يوعد زوجته أنها إذا صبرت على الحياة مع أهله كلها أربع أو خمس سنوات ويوفر لها سكن مستقل وتمر سنين وتحس أنه يجطل وما يهتم وكل سنة داخل في عذر جديد. مسألة سكن مستقل لازم منها وهي ضرورية أنا أقول لكم من تجارب ناس أعرفهم كثير ما ارتاحوا إلا لما نقلوا شقة خاصة بهم .
وحدة من صديقاتي كل يوم هوشة بسبب طريقة تربية اعيالها هي تربيهم شي وبيت زوجها يربونهم شي ثاني ومسألة الطباخ بعضهم يتشرط وما يعجبه طبخ فلانه وبعضهم أقل كلمة يكبرونها هوشة ....... واجد عيوب للسكن مع أهل الزوج .
أما كلام حامل المسك فهو حقيقي بصراحة بعض الأزواج يبخل على زوجته وخاصة أننا بنات في سن الشباب وغيرنا يلبس ويكشخ فلازم الوحدة تصير مثل مستوى غيرها . يعني لا بد يعيش زوجته في مستوى قريباتها . يمكن تقولون من وين يبوق ( بصراحة هذه مشكلة ومسؤلية الزوج ) لأن الزوجة تعيش قهر من داخلها وتعيرها صديقاتها ومش هذا بس حتى قضية ملابس اطفالهما فلا بد من توفير ملابس تناسب مستوى الأقارب .
يمكن البعض يقول أن كل شيء صار غالي والبنات يريدون أشياء كثيرة . أنا أقول نبي نعيش في مستوى اللي نتعايش معهم وبس .
وإذا كان السفر للخارج لمدة شهر مكلف للزوج طيب وفر سفرة يومين لمكان قريب ما يكلفك شي . بس هم الرجال يتضجرون من كل شي ويبون الزوجة ما تطالب بشي أحنا بشر من لحم ودم وأحاسيس .

الله يوفقكم أخواني
ولكم كل التحية والتقدير لأنكم كلكم رائعين
اختكم نينوى