[http://www.0sss0.com/up/uploader_files2/VoU95445.gif
الجزء الثامن عشــر[ والأخيــــر]...
عايشه:وشلون؟؟؟....يعني ماعاد راح يطلقها؟؟؟...
فاطمه تفرك يدها بغيض:شكله لأ....
عايشه:سلمى بتصيح من أخوك ما يصير...
فاطمه:وشو اللي مايصير...يعني بيدي شي أسويه وماسويته...
عايشه:فيه...
فاطمه تقاطعها:لأ ما فيه...لأني ألحين أنا وهو ما نكلم بعض...
عايشه:إنتي وتركي؟؟...
فاطمه:إيه...وهي السبب الله ياخذها...
كانت فاطمه مقهوره من اخوها ومن زوجته...ومقهوره اكثر لمن تشوف تمسك تركي بشذى يزيـــد ويزيـــــد...
فاطمه بعد فترة صمت:عايشه الحل عندك مو عندي أنا...
عايشه وهي تنزل فنجان القهوه من يدها:أنا؟؟؟...
فاطمه:إيه....
عايشه:طيب يله تكلمي بسرعه...
وقعدت فاطمه تقول لعايشه...اللي كانت تستمع...بكل حواسها...
***
بشاير اللي كانت سهرانه مع سارا......
بشاير اللي كانت تتكلم بكل أريحيه مع سارا اللي تعتبرها من أقرب المقربين لها..
بشاير وهي لامه ركبها بين ذراعينها وحاطه ذقنها على ركبها:سارا الكل انحلت مشاكله شذى وتركي...أمي وشذى...سلمى وتركي...إلا أنا.. مشكلتي مع سعود ما انحلت...
سارا:بصراحه خالي أبوبندر ومتعب واخوانك ما ضغطوا عليه يطلقك...
بشاير:ما يبون يطلع كلام أكثر من اللي طلع علينا..يبون الأمر ينتهي ودي..
سارا:ماراح ينتهي ودي وهو ألحين يبي يرجعك له...
بشاير:مستحيل ارجع له...هو حطمني عشان مشاكل تركي مع أخته وفي النهايه هم تصالحوا ومحد اكلها إلا انا وهو...
سارا بغيض:الرجال كلهم كذا..مافيهم خير..بس يحبون يلعبون الحريم خصوصا اللي تحبهم كل شوي ودهم يغيرون بحريمهم مثل السيارات..
بشاير تبتسم:إنتي ليش هالقد متحامله على الرجال كلهم؟؟؟...
........:هي دايم كذا مدري وش مسوين لها؟؟؟؟...
لفوا على جهة متعب اللي كان توه داخل....
سارا تناظر تركي بعتب:وش فيك داخل كذا من دون احم ولا غيره خرعتنا..
متعب يناظرها:خرعتكم؟؟؟...اقول سارا لا تغيرين الموضوع جاوبي على سؤال بشاير...
بشاير بضحك:هلا متعب..شخبارك؟؟؟...
متعب:تمام...
سارا تكلم متعب:والله عاد الجواب عندك تعرف ليش...
متعب يكلم بشاير بمزح:وش اللي خلا سارا تتكلم عن الرجال كذا؟؟؟... وش الموضوع اللي خلاها تتكلم عننا كذا؟؟؟...
بشاير تصرف الموضوع بابتسامه:اسألها...
سارا بتلقائيه:عمايلكم السودا....الله يستر منك يا متعب...
متعب بإستغراب:أفا ليش؟؟؟...
سارا تقول اللي بخاطرها:اخاف تاخذ علي وحده مثل اخوك تركي لمن تزوج سلمى على شذى...
متعب قعد يضحك:من جدك سويره تتكلمين؟؟؟...
سارا:إيه والله من صدقي أتكلم...عاد أنتوا يا الرجال مامنكم أمان...
متعب قام وقعد جنبها:حتى أنا يا سارا؟؟؟...
سارا:والله كل الرجال نفس الشي...
متعب:أضمن لك نفسي إني مستحيل أناظر غيرك...
سارا:وشو الضمان؟؟؟...
متعب يقرب منها يبي يبوسها كضمان لها..
عرفت بشاير بنيته...فتكلمت بسرعه:متعب....نحن هنا...
لف عليها متعب وكأنه يتذكر وهو يضحك:نسيت إنتي موجوده...
***
تركي اللي كان قاعد مع شذى...
تركي اللي كان حبه لشذى...كأنه حب جديد كأنها امرأه غير اللي تزوجها اول مره...يمكن لمن فقدها حس بمكانتها...
شذى:أقول تركي فيه موعد بكره لفيصل..توديني ولا أروح مع السواق...
تركي:لا طبعا(بابتسامه)أنا اللي بوديك...بس سلامات وش فيه؟؟؟...
شذى:لا الحمدلله مافيه شي...بس فيه تطعيمات لازم ياخذها...
تركي:مشالله الحين كم عمره؟؟؟....
شذى:شهر ونص...مشالله عليك ولدك ولا تعرف كم عمره؟؟؟...
تركي:لا...أعرف عمره بس أبي اعرفه بالضبط...
شذى:احسب بعد ناسيه...
تركي:شذى أبي أقولك حاجه خطيره مره...
شذى انتبهت له:وش هي...
تركي بعبط:إني احبك...
شذى ضحكت وهي مستحيه...وكأنها باقي بشهر العسل...
شذى:أتمنى ذلك يا تركي...
تركي:ماذا تتمنين يا عزيزتي؟؟؟...
شذى بعباطه:أتمنى أن تكون محقا في حبك لي...
تركي:ألا تفهمين إنني احبك جدا..وعاشقا لك يا حبيتي..
شذى:أنا اعلم أنك تريد ارضائي فقط بكلامك هذا...
تركي:وعشاني بعد أحبك(يضحك)بصراااحه مااعرف اتكلم فصحى ومااقدر أجاريك بكلامك فصحى....
شذى تضحك:ياحليلك وانت تتكلم فصحى أبد مو لايق عليك...
وبعدها قامت...
تركي:وين رايحه؟؟؟....لا تقولين لمحرابك بعد؟؟؟...
شذى بابتسامه تبي تقهره:على قولتك لمحراابي...
كانت علاقة تركي بشذى في تحسن مستمر..بس باقي نظام الفندقه عايشين فيه...على حسب شرط شذى...او يقضي الله أمرا كان مفعولا؟؟؟...
***
محمد:ما أقدر أتدخل يا سعود...
سعود: داري بس وش الدبره ياخوي؟؟؟؟...
محمد وهو يحط يده على كتف سعود:اصبر وانا اخوك...إن الله كان مع الصابرين...
يوخر سعود يد محمد بعصبيه:اصبر؟؟؟...لا تقعد تلعب بأعصابي كذا...
محمد يضحك من أخوه:والله ما بيدي شي...
سعود بعصبيه:والله مايحس بالنار إلا واطيها...
محمد يستهبل:واللي يده بالنار مو مثل اللي يده بالمويه...
سعود:محمد انا اتكلم معك من جد وانت تتطنز...
محمد:لا والله ما أتطنز...بس اقولك ما بيدي شي تقولي وش اسوي أقولك يا سعود ما بيدي شي تقول وش اسوي اقلقتني يا خوي...
سعود وهو قام من العصبيه:الشرهه على اللي يستشيرك...
محمد:لا تكون بس زعلت مني يا سعود؟؟؟...
سعود:ما زعلت بس قاعد ترفع ضغطي...وانا اللي فيني مكفيني...
محمد:ليه وش فيك يا بعدي؟؟؟...لا يكون وراك بيت ومره وعيال؟؟؟...
سعود:يعني بس هذا هو الهم عندك انا اقصد بشاير بس انا الغلطان اللي كلمتك...
وطلع من عنده معصب....محمد صدق شوي متحسف على سالفة سعود وبشاير بس من صدق ماعنده حل لهالموضـــوع؟؟؟....
***
بعدها بيوميـــن...
سلمى وهي قاعده بالبلكونه على الساعه10 بالليل وتكلم عادل...
سلمى:عادل حبيبي...مدري وش أقولك...
عادل::والله العظيم احبك وودي أشوفك قريب يا سلمى...
سلمى:قريب؟؟؟...
عادل:ودي هاللحظه...ودي احطك بعيني واغمضها...
سلمى بحزن نابع من القلب:عادل شكل علاقتنا ما راح تكتب لها الحياه...
عادل بخوف:ليه تقولي كدا؟؟؟...
سلمى حزينه:أبوي واعمامي يبون يذبحون حبنا يا عادل...
عادل:ليـــه؟؟؟...
سلمى:في موضوع خطير وحساس ودي اقولك بس ما يصلح التليفون...
عادل بتوتر:حبيبتي شوفي....أنا بعد اسبوعين بنزل الرياض...راح اشوفك بس على الاقل قولي وش الموضوع بإختصار...
سلمى والدموع تتجمع بمحاجرها:اهلي زوجوني من ولد عمي المتزوج... تخيل يا عادل...وهو شكله ما يحبني...ماخذله وحده شينه وأنا...
يقاطعها عادل بغضب:سلمى إيش تقولي من هذا الحيوان اللي خذاك مني...
سلمى بدت تصيح.......
عادل بنفس وتيرة الغضب:وكيف يصير مثل هذا ولا تقولي لي يا سلمى..
سلمى لا تزال تصيح...
عادل:آآآآخ يا سلمى لا تبكي...وقولي لي وش صار بالتفصيل...
سلمى من بين دموعها:ما اقدر أتكلم يا عادل..إنت تعال وانا بأقولك...
عادل بعصبيه:وش راح يصبرني اسبوعين؟؟؟...وكيف حبيبتي تبكي وتبيني اصكر السماعه...
سلمى:عادل إذا كان لي خاطر عندك بأصكر ألحين..وإذا جيت بأقولك...
عادل بقلة حيله:خلاص أوكيه...بس سلمى إذا شفتي نفسك احسن طمنيني عليك لو بمسج طيب؟؟؟...
سلمى بحب:إنشالله..
وصكرت سلمى..ولمن كانت تبي تدخل البيت شافت عايشه واقفه بعصبيه..
سلمى بلوعة كبد من اختها:خير وش تبين؟؟؟...
عايشه:وش قلة هالحيا اللي انتي قاعده تسوينها؟؟؟....
سلمى بقهر:الله ياخذك انتي وولد عمك ومرة ولد عمك كلكم زين وبنت عمك هالعجيز الكبيرة راس الحيه...انا مدري وش خلاني ادخل عرض بحياة تركي ومرته...لا هو اللي ظبط معي..ولا أنا اللي عشت حياتي...
ودخلت سلمى بعد ما وخرت اختها بعصبيه...
أما عايشه فكانت مستغربه و معصبه...بعدين لحقتها وقعدت تهزأ فيها وإن سلمى من جد ناقصتها تربيه...
***
بالعصر يوم الخميس....
أم بندر:أقول يا أبو بندر..ورى مانطلع كلنا للمزرعه مع العيال...
أبو بندر:ودي والله...بس ألحين فيها عمال قاعدين يبنون الملاحق الجديده فيها...
ام بندر:طيب متى بيخلصون؟؟؟..
أبو بندر:الله اعلم...بس بندر هو المسؤول عنها...
أم بندر:خذت حيلي بشاير....مررره صايره انطوائيه وماتكلم احد...
.......:أحلى يا اللي تقول انطوائيه..والله الوالده مثقفه...
إلا يناظرون بندر عند الباب...
أم بندر بثقه:مثقفه غصبن عليك وعلى عمتك هالعجيز بعد...
حصه وهي داخله:ما العجيز إلا انتي يا السعف والليف..ألحين ماتقولين وش دخلني أنا؟؟؟...
أم بندر تضحك بمكر:عشان اتغدى فيك قبل لا تتعشين فيني...من شفتك داخله قمت احارشك قبل لا تتحرشين فيني...
أبو بندر يبتسم:هلا والله بالعزيزة الغاليه...حياك....
بندر:مو أنا السواق اللي جايبها هاه؟؟؟؟...
أم بندر:تعال اجلس بجنبي...ماعليك منهم....
***
تركي اللي راح بيت عمه أبوعبدالكريم....عشان يزور عمه...وأكيد عشان سلمى بعد...
تركي:وش فيك يا سلمى مادّه البوز؟؟؟...
سلمى تناظره بإحتقار وزعل:.....................
تركي يرفع حاجب وينزل الثاني:طيب ممكن اعرف سر هالنظره؟؟؟...
سلمى شالت عينها من عليه وقعدت تطالع السقف بتملل...
تركي ارتفع ضغظه منها:سلمى حركاتك هذي ماتمشي عندي.. اعقلي وتأدبي وعن هالنظرات...
سلمى تناظره:إنت اللي حركاتك ماتمشي عندي...أصلا أنا اعرف وش سر حركاتك هذي كلها...إنت تبي تنفرني منك...تركي إذا ماتبيني ترى حتى انا ما ابيك...
تركي اللي سكت يمكن كان كلامها حقيقه بس هو قاعد يتهرب من هالحقيقه..
سلمى:كلامي صح ولااا؟؟؟...
تركي بإستخفاف:اشك بعقلك...من جدك تتكلمين ولا تبين تسوين جو...
سلمى:طيب قول كلامي صح أو لأ؟؟؟...
تركي:طبعا خطأ...ولو كنت ما أبيك كان ما أخذتك من الأساس... على بالك إن الزواج بالعافيه...
سلمى اللي كانت تعرف الحقيقه كاملة وكيف إنها اخذته جد بالعافيه..
سلمى:ليش لأ؟؟؟..بعض الأحيان يكون بالعافيه...
تركي:وش عندك اليوم..شكلك تبين هوشه...
سلمى:إنت اللي تبي ولا تحاول تلصقها بغيرك...تركي أنا عارفه إن مرتك الخايسه الشينه هي السبب بكل اللي يصير...تذكر كنت وش حليلك معي لمن كانت عند اهلها...بس الحين من رجعت وولدت وهي ماخذه وقتك كله..
تركي يقاطعها بضيق:شذى مالها دخل..ومالك دخل عن كان وقتي لها كله او لأ...اتوقع هالشي مالك دخل فيه يا سلمى...
لحظتها ناظرت سلمى تركي بخنق وعصبيه...خلاص كرهته وماعادها طايقه تناظره...تنتظر قدوم الحبيب ونصفها الحقيقي عادل؟؟؟...
***
شذى:هلااا بشاير وينك؟؟؟...
بشايرتتطنز:بالرياض...
شذى تضحك بسخافه:احلفي؟؟؟...على بالي بسكاكا..
بشايرتضحك:فال الله ولا فالك...
شذى:يالله من جد اكلمك...من زمان ماعاد شفتك...
بشاير:الجامعه الله ياخذها إنشالله...
شذى:طيب متى مافضيتي مرّي علي....
بشاير:اوكيشن...
شذى:يالله باااااااي...
بشاير:بااااي...
صكت شذى على دخلة تركي البيت...
تركي:وش فيك صكيتي؟؟؟..
شذى:لا بس كنت اكلم بشاير...ولمن صكيت كنت داخل...
تركي: تدرين إني داخل أبي أنام وتعباااااان....
شذى:طيب روح نام...بدل ماشكلك كذا يكسر الخاطر...
تركي:شكلي يكسر الخاطر انتي وخشتك...
شذى:من جد والله يا تركي روح نام...
تركي وهو قايم:يالله تصبحين على خير...
شذى:وإنت من أهله...
قعدت شذى تناظره إلين ماطلع فوق...وهي تحس بأن حبها له مايموت او مستحيل يموت...على كل اللي صار منه...على كل اللي سواه...
لايزال حبها...
لايزال نبضها...
لا يزال حياتها...
***
بالشرقيه...وبالتحديد في بيت خالد ولد ابومحمد...
مها:اقول خالد...
خالد:هلا...
مها:مادريت إن اختي منال انخطبت...
خالد اللي فرح من جد لمنال:من جدك تتكلمين؟؟؟...
مها بفرح:إيه والله...
خالد:متى وكيف؟؟؟....ومين اللي خطبها؟؟؟...
مها تضحك:هههههه شوي شوي علي من هالأسئلة...
خالد يضحك وضربها بخفه على كتفها:طيب يله تكلمي...
مها تبتسم:توها انخطبت الأسبوع اللي طاف...ويمكن على الأسبوع الجاي تكون شوفتها...واللي خطبها واحد من طرف خوالي يصير لنا من بعيد بس مو مره نعرفهم...
خالد:طيب أكيد أختك موافقه...ولاااا كعادتها بعد الشوفه ترفض هي قد سوتها من قبل مرتين...
مها تبتسم:لاااا إنشالله أكيد...لأنها حتى هي مقتنعه فيه مره...
خالد:الله يوفقها...والله فرحت لها مثل ما فرحت لأختي شذى...
مها:صدق يا خالد؟؟؟...
خالد يبتسم بحنيه:إيه والله يا مهاوي...يكفي إنها اختك وبنت عمي...
مها حست بالدموع بعيونها... وش كثر تحب بخالد...وش كثر تحب فيه حنيته وصبره عليها...وش كثر تحب فيه حلمه وعقله... للحين هو عايش معها ولا مكدر صفو حياتها معه أي شي غير تأخر إنجابها لسنين طوااال وهو صابر راضي...
تذكرت لمن كلمت أختها اليوم الصباح...وقالت لها عن الخطبه... وإنها موافقه علي التقدم لها...لأنها غسلت يدها من سعود...أو بمعني أصح انزاح حبه من قلبها...لأنه لا تقدم لها أو لمح بشي بكذا...فحست على كرامتها إنه بتنهان...فقررت إنها تستأنف حياتها اللي كانت بتضيع في حب سعود الواهم ..
***
