منتديات الطرف - قصة احزاني

قصة احزاني

أبكتب لك مع أبياتي كلام مشفر تشفير
لعلك تفهم المعنى ورمز صاغه لساني
أنا اللي عاشقه خلٍ عشق غيري بلا تقدير
تمنيته وهو ناسي واحسب انه تمناني
سقاني كاس بيدينه طلع كاس الهوى تخدير
احسبي مالكه قلبه وهو مع واحد ثاني
أنا نفسي على الذلة تعاف الزين لو هو غير
وآباطا قلبي برجلي إذا إنه تحداني
أنا ابنسى عنا الماضي وابرحل دونما تبرير
عسى الله يسعد أيام العزيز اللي تمناني
تبي تدري وش القصة وش المعنى وش التفسير
وش اللي سهر عيوني وخلا النوم ماجاني
وش اللي كسر الخاطر كسور مالهن تجبير
وش اللي ارخص دموعي بجوف الليل بكاني
ابرسل لك مع أبياتي علامات بهن تبصير
وابوصف لك معالم جرح ينزف وسط وجداني
ابرسم لك شظايا خافق متكسر تكسير
وابنظم لك قوافي شعر فيها قصة احزاني
وابكتب قصتي معها عذر وارفع لك التقرير
انا المظلوم لكني بمفهومك انا الجاني
انا شفتك على دربي ومن اجلك عكست السير
وانا مدري وش اللي يم ذاك الدرب وداني
لمحت اسمك مثل نجم على نوره يطير الطير
وانا من يوم شفت اسمك فرحت وجيت لك عاني
تقابلنا انا وانته على صفحه بها تسطير
تهلي بي من أولها وبأخر سطر تجفاني
لقيت تنتظر غيري حقيقه مابها تزوير
وانا اللي كنت اظن انك على الصفحه تحراني
تعيش الحلم مع صوره على التصغير والتكبير
تعزي قلبك العاشق وفيك القلب عزاني
سبحت بداخل اعماقك وغصت بغبة التفكير
ولا تحسب هواجيسك مع اللي راح تخفاني
حملت المسك باليمنى وباليسرى نفخت الكير
تداوي جرح بقلبي وتفتق جرح اشقاني
بخفي جرحك الدامي وابدفن سرنا بالبير
وابنثر ذكرياتك شعر للهاجس تغشاني
وذا نادمت هاجوسي ابذكر عشرتك بالخير
وابدعي لك إذا هب الجنوب وهيض اشجاني
عسى دوم معك يمشي رفيق بدربك التيسر
وانا ماضيع من بعدك ولي رب تولاني
انا ياصاحبي برحل وسامحني عن التقصير
انا نفسي تعاف الزين إذا ماكان يبغاني
وتبي أفرز لك المعنى على الصافي بلا تكثير
واسبك صافي المعنى بقالب بيت وحداني
خلاص الوقت علمني حفظت الدرس بالتكرير
نصيحة لاتجي وان جيت ماظنيت تلقاني
ممااراق لي