منتديات الطرف - أنا أرفض - شعر/ عبدالوهاب الحسن

أنا أرفض

أعترف إني شطبت اسمك وعنوانك

من الأوراق والروحات والجيّه ..

وحتى من الوله اللي يغرد كل عصريه ..

على وجداني (حزة) ما تعارفنا وتمازجنا

بيوم الموعد الأول .. مثل نسمات فجرية ..

وأكثر أعترف إني ..

نثرت الشوق بعيونك، ومنها ..

سال شوق أكبر

وأكبر شعشع بروحي ..

شعرت إني تقولي: حنانك ..

كلي عطشانه ..

لقيت الكون ما يقدر يضمك

واتركك .. آنا ..

فتحت كلي على بعضي منازل .. قلت دخليني ..

وسكنيني، واروي من مطر ..

غيمة (حساوية) !

حساويه .. عطش لكنها أنهار ..

حساويه .. على ضحكة موانيها زهت أسفار ..

وعلى همسة سواقيها .. أغاني الليل والسمار

يردد من وراها الصوت والأشعار

نخل .. شامخ .. نخل من أنبل الأشجار ..

يترجم للزمن صبره .. ويتغنى (زهيريه) !

حساويه ..

حساويه .. تحب بكل ما فيها من الإحساس والطيبه

بحاضرها .. وماضيها !

ولا تبخل

على اللي يحبها .. أو كان جافيها

وأنا نبضي حليب أمي جرى منها

وعشقي بالصدر موّار ..

ولكني غصب عني تركتك واللي شيدناه ..

في لحظةْ وهم .. ينهار !!

تركتك .. ليتك تعرفين وش لوني ؟!

رجعت اكتب ..

واسطر بالحبر لسود

لأن الجزن .. ماليني ..

هربت من كل شي ظني يذكرني ..

وحتى زرقة الشطآن ..

خوفي ما تنجيني ..

وتخدعني

مثل ما كانت اعيونك ..

وموجتها السماويه ..

وعذريني

شطبت اسمك وعنوانك

من الأوراق

والروحات والجيّه ..

وحتى من الوله اللي يطاردني

ويغريني بجنيهْ

أنا أرفض ..

يكون الحب في دنيا ..

تجاريهْ ..

عبدالوهاب الحسن
24/6/1422هـ

جلسة شعبان 1434هـ